قصيدة بحق القائد الشهيد السيد الخامنائي
-
يا محلى الشهادة تريد راعيها
سيد وابن سيد لايگ اعليها
----
يابيرغ عراضه طيحتك كلفة
جرحك بالكلب هيهات مايشفه
وكل شيعي تشب نيرانه ماتطفه
وتريد الثار من اعداك متلهفة
مصيبة وفاجعة هاليوم نرثيها
-----
يانسل النبوة وبيك نتباهه
وشلون الشريعة واكع الواها
كلف وادلالنا بفگدك چفيناها
عمت عين العملها وبيك سواهه
ياشجرة محمد وانت تاليها
يامحله الشهادة تريد راعيها
-----
تنعاك وعليك الدنيا حزنانه
نلطم عالوجه ونريد عوانه
راح البي حميه مشه وخلانه
على الدنيا العفى بعدك يمولانه
ياحسرة وهضيمة راح واليها
يامحلى لشهادة تريد راعيها
--
قائد وولقيادة تلوگ اله وتندل
مثل جده الصميدة بالحرب زلزل
بوجه اعداه واكف ماقبل ينذل
ساتر بالحرب ظل وحدة اتكفل
ولجل الدين روحه اليوم يفديها
يامحلى الشهادة تريد راعيها
---
يعلم السوء مصباحه صعب واكشر
مانحمل غيابك والگلب وجر
شلون تطيح وانت الحيد المشكر
ياضرغام يالجدك قلع خيبر
سود اثيابناوالحزن غاطيها
يامحلى الشهادة تريد راعيها
--------------++++
خادمة اهل البيت
امل فلوحي الموسوي
وصلت زينب الوليان... جابت روس اهاليها
_
تمشي الروس وياها
منهو يعين بلواها
وياهو اليدفن وياها
تهل ادموع تجريها...جابت روس اهاليها
__
من ظهر الهزل طاحت
وصلت جيتكم صاحت
شمرت روحها وناحت
زينب حيل مابيها...جابت روس اهاليها
____
تراب كبوركم تذري
ريت ابدالكم عمري
اكعدو حايره بامري
يتاماكم حرت بيها...جابت روس اهاليها
_
يتاماكم تون وتنوح
تنحب والكلب مجروح
شكللها على المذبوح
تون تريد واليها..جابت روس اهاليها
____
دكعدو لاكو الحره
تبجي عيونها حمره
تعاين للولي وكبره
تذكر من يوصيها...جابت روس اهاليها
_
وصيتك خويه محميه
الضعنك صرت راعيه
بس اعذرني برقيه
ماحملت يراعيها..جابت روس اهاليها
منها انكطعت الانفاس
ماتت عالطشت عالراس
كون يشوفها عباس
وحاضر كون يدريها...جابت روس اهاليها
_
شحجي وحيل تعبانه
ماتنحجي بلوانه
منهو اليرد ويانه
شلون الدور اطب ليها...جابت روس اهاليها
_
امل فلوحي الموسوي
يوم عشرين بصفر رد الضعن
وردت الحره العقيله من الدفن
تنادي زينب ياعلي..راده ابلايه ولي
يوم عشرين بصفر رد الضعن
______
اربعين من اليالي شنهو وشلون شعشت
شفت ضيم الغاضريه وبيها انه تلوعت
وتالي روس اهل الكلافه شايلتهم وادفنت
من اليسر جيت وانادي خلافكم ريت ومتت
راحواخواني وهلي...تنادي زينب ياعلي
يوم عشرين بصفر رد الضعن
_______
من اليسر رديت بويه غافي بعيوني الدمع
باربعين اعزازي انحب كلبي من ضلعي انشلع
امشي وتلفت وعاين شو ولا واحد سمع
روسكم بيدي وانادي وكلبي بيكم منفجع
شلون ارد بيتي خلي..تنادي زينب ياعلي
يوم عشرين بصفر رد الضعن
_______
جينه وتراب المكابر بينه مليانه العبي
حيل تعبانين واكثر تتعب ايام السبي
ينهدم حيل الحراير لو نظر ليها اجنبي
صارن بسدي يلوذن وانه صرت احبي حبي
ايا كلبي المبتلي..تنادي زينب ياعلي
يوم عشرين بصفر رد الضعن
_______
علي النوك الهزل جينه بس يتامه وبس حرم
هناك عفناهه العشيره وطاحت هناك الزلم
لا اهل ضلت اليه بطرك دخان الخيم
عفت اخوي حسين مرمي وعفت راعيه العلم
العمر ضاع وشلي...تنادي زينب ياعلي
بيوم عشرين بصفر رد الضعن
_______
ردت ضعون السبايه ناحله مضيعه الامل
من يلاكيها بوطنها والاهل وين الاهل
والدرب كلش طويل ومايل اعليها الحمل
تنادي وين الي كفلنا والدمع منها يهل
شلون ارد المنزلي...تنادي زينب ياعلي
بيوم عشرين بصفر رد الضعن
______
امل فلوحي الموسوي
طور جنوبي
----------
يابس دم اخوي ..وحيل اذاني
نازل عالرمح.. وتشيله عدواني
يابس دم اخوي وحيل اذاني
---------
نازل عالرمح ودمومه مصبوبه
وي راسك خذوني وبيه مهيوبه
مشوني بسبي وما اعرف ادروبه
من بلد البلد ونوب گادوني
يابس دم اخوي وحيل اذاني
----------
گادوني ودمع من عيني ضل ينزل
حره مخدره وماعرف انه الذل
من تحدي العده ما احمل وتكتل
اصبري اتحملي حسين وصاني
يابس دم اخوي وحيل اذاني
---------
مشوني ابسبي والروس محموله
احس مني الجدام ابهظم مشلوله
وين الي تواسي بلطمه معدوله
على دهري الخذه منعدي اخواني
يابس دم اخوي وحيل اذاني
--------
عالنوگ اصعدت والعين مشبوحه
اعاين عالاهل برگاب مذبوحه
ضل گلبي بونينه وزايد،بنوحه
كل شهگه الشمر بسياطه ضرباني
يابس دم اخوي وحيل اذاني
-----------
زينب والدهر مابطل اعلومه
خلصت العمر بحزان مهضومه
وهذا اخر مطافي ادخل الحومه
مايرحم زماني وخوش كسراني
يابس دم اخوي وحيل اذاني
-------
حيره تحيرت والخيم محروگه
واگع ابن ابوي الجربه مشگوكه
طاح الماخذو عدوانه احگوكه
چفوفه مگطعه وللضيم خلاني
يابس دم اخوي وحيل اذاني
-----
-خلاني بهظم بعيال محتاره
اطفال مدلله ودموع تتجاره
تبچي والهظم ماتعرف اخباره
ياوسفه الخرابه تصير صيواني
يابس دم اخوي وحيل اذاني
---------
امل فلوحي الموسوي
13/محرم… .13/9/2019
نزله للدفن
---------
ياعلي السجاد تكليفك صعب
الليله دفن احبابك بين الغرب
------
ياعلي شد حيلك انت اعله الهظم
وگوي گلبك للمصيبه ولا تهم
الليله دفن اجساد متوذره وتلم
يساعدك الله الدمع منك يصب
----------
ياعلي حالك يلوب ولا هجع
حگك تنوح الفجيعه بالدمع
تشوفها الاقماروبهذا الوضع
مگطعه الاشلاه وبلايه ذنب
--------
ياعلي الاشلاه متگطعه وذر
ممتحن بيهن وحالك مايسر
شلون يازين العباد بهالامر
وانت بين اعداك مايمك محب
---------
ياعلي ماكو محب ينعه المصاب
وحدك تعاني الدفن كلش عذاب
الليله صعبه شلون لو هلت التراب
ومن ترد الزينب ونارك تشب
---------
ياعلي ورديت وشتحجي بعد
وبيدك اتراب المنيه والحد
دافن العباس وحسين العمد
وريحه الاحباب بجفوفك تهب
----------
ياعلي وترد نحيل ومنهدم
وينظر ابن ازياد شامت مبتسم
وزينب الحره تطب وسط الزلم
گلبك بهالحال دامي وينشعب
-------
امل فلوحي الموسوي
11/9/2019
11 محرم
برز فقاره بيمنى المرتضى
صال بيهم نور جده المصطفى
طب الاكبر عالملا.. السيف ناده ياهلا
برز فقاره بيمينه المرتضى
-------
نزل ميدانه الوجه منه يشع
جنه حيدر بالمغاره ابلا درع
امه تدعي رده اليه وبالدمع
رده سالم ربي ماريد انفجع
طب الاكبر عالملا.. السيف ناده ياهلا
برز فقاره بيمينى المرتضى
--------
نزل للحومه وبتر بيهم بتر
من ابوه حسين ماخذ هلامر
بالرگاب يكصها يشمرها شمر
تگاطفت روس المنيه والكفر
طب الاكبر علملا.. السيف ناده ياهلا
برز فقاره بيمينه المرتضى
-------
علي الاكبر مايهم يوم النزل
للمغاره طب علي وبچه الزلم
جوه ايده ارگاب ذبحها غنم
يشبه العباس صولاته شهم
طب الاكبر عالملا… سيفه ناده ياهلا
برز فقاره بيمينه المرتضى
---------
بهمه ادير المعركه وفن الحرب
انه ابن الشطر مرحب من ضرب
مايهاب الموت حيدر لو يطب
الف الفين ويوگع مو صعب
طب الاكبر عالملا… سيفه ناده ياهلا
برز فقاره بيمينه المرتضى
------
هيبه العباس بيمينه العلم
شال سيفه وكام يردمهم ردم
والتدناله يطيح وماسلم
لايخاف النبله لاخاف السهم
طب الاكبر عالملا.. سيفه ناده ياهلا
برز فقاره بيمينه المرتضى
----
امل فلوحي الموسوي
ها عباس ..حشمتك يبعد اختك
ها عباس.. وانه الجايه ابختك
------------
ها عباس چاوين الوعد وينه
ها عباس شو رد الشمر بينه
ها عباس.خلافك خويه يسبينه
ها عباس .اليوم بحاجتك ردتك
ها عباس وانه الجايه ابختك
-------***--
ها عباس ..تردني لو ارد وحدي
ها عباس.. لوعوف الشمر يحدي
ها عباس.. ردني بكربلا شعدي
ها عباس. گوم وياي حشمتك
ها عباس.. وانه الجايه ابختك
---------
ها عباس خويه شلون حاجيني
ها عباس اشلع خويه عينيني
ها عباس هاك واخذ چفيني
ها عباس.اگعد وبدمع صحتك
ها عباس.. وانه الجايه ابختك
----------
ها عباس جنك مني تتعذر
ها عباس. ونت الماگلت مگدر
ها عباس .وسفه شلون يمشكر
ها عباس نايم وانه گاصدتك
ها عباس.. واته الجايه ابختك
------------
ها عباس خويه اسمع يبو فاضل
ها عباس شل حيلي الهظم كاتل
ها عباس. لو نشدو على الكافل
ها عباس. وانت اعله الترب خدك
ها عباس .وانه الجايه ابختك
---------
امل فلوحي الموسوي
--------------------------------------------------
لاتسافر . ابدارك تخلي عليله
لاتسافر ..روحتك بويه ثگيله
لاتسافر… لاتسافر
***
خل اسولفلك يبويه شوف يالغالي ونيني
بويه لاتبتعد عني الخاطر ادموعي البعيني
لاتروح وهذا حالي تذبح افراحي وسنيني
ارجع بهذا قرارك جارح ويجرح حنيني
لاتسافر ..مرضي بويه مالي حيله
لاتسافر. تترك ابدارك عليله
لاتسافر… .لاتسافر
*
انهظم بويه وعاين ليش ماتنشد يغالي
ماتكلي بويه گومي ليش بس هذا سؤالي
وانه بالسكته احظر جهزت بويه احوالي
شو صحتهم بويه كلهم وماگلت بويه تعالي
لاتسافر. تگول سفرتته طويله
لاتسافر. بدارك تخلي عليله
لاتسافر…. لاتسافر
************
بويه يا كل امنياتي وكلها احلامي الزهيه
بويه ما احمل قرارك تعوفني هاي المسيه
سفرتك اعرف طويله ودري مامنعدها جيه
صعبه صعبه وحيل صعبه الابو يترك بنيه
لاتسافر . خلي عمتنه العقيله
لاتسافر . بدارك تخلي عليله
لاتسافر… لاتسافر
البيه مرض نعرف يبويه كون وياه اليعينه
مايتركونه يعاني سلوته بوحده بونينه
تروح بويه بس اگلك خذت عمري وكل سنينه
يعني بويه هايهيه تروح بويه وماتجينه
لاتسافر . منهو بعدك اشتكيله
لاتسافر . بدارك تخلي عليله
لاتسافر.. لاتسافر
**
سفرتك بويه تاذي اعرف شگد راح اعاني
بويه راح ابقه اعله بابك العمر كله اتاني
وما اضن بويه اعيشن راح اموتن بويه اني
شنهو ضلتي ياحبيبي والحزن ضيع الواني
لاتسافر . الحزن تارس شليله
لاتسافر .ابدارك تخلي عليله
لاتسافر ..لاتسافر
*
وياك خليني يبويه بالدرب لا ما اتعبك
بويه ارويك بدمعتي لو عطشت انه اشربك
ضلعي خليه اعله ضلعك لو اجت خيل وتسحگك
بويه احسبني عبايه من الشمس احميها جثتك
لاتسافر. بويه مهظومه ونحيله
لاتسافر . بدارك تخلي عليله
لاتسافر… لاتسافر
***
خادمه اهل البيت
امل فلوحي الموسوي
اسألكم الدعاء
والرحمه لوالدي
ياحسين .هل محرم وانه بالهم والونين
ياحسين. هلاله يجرح ذابح احلام السنين
مانسيت الي جره
دمك يصب منحره
ياحسين. هل محرم وانه بالهم والونين
-------------
لاتهل شهر المواجع لاتهل شهر الاسه
جايني وشتلگه بيه ريتني ميته وعسه
هم الك عين وتصدلي عاودت هذا المسه
شچم نهر شحيت وحنه ارياگنه متيبسه
جايني شرايد بعد
بياصلافه انت ترد
ياحسين. هذ شهر الفاجعه البيه فاگدين
ياحسين. هل محرم وانه بالهم والونين
------------
منك شأذكر وتاني ونت شهرالنايبات
بيك مجروره الفواطم وتدري هنه مدللات
مچتفات بحبل يمشن وبجدمهن حافيات
وعالهزل بيهن اباري مايعرفن حايرات
والدمع منهن يهل
وعالنهر ضل الكفل
ياحسين. يساره مگطوعه يخويه واليمين
ياحسين .هل محرم وانه بالهم والونين
----------
لا خيم ضلت اليه ولا فزع واحد الي
ياشهر وشتلگه بيه واني حرمه بلا ولي
خذت كل الي تريده بجيتك گلي شلي
جيتني تجرح بگلبي ماترد لمه هلي
دمومهم تنزف جرت
روحي حيره تحيرت
ياحسين. يا نبض گلبي ودمعته والحنين
يا حسين. هل محرم وانه بالهم والونين
-----------
بيك مسبيه وروحن من بلد ومشي البلد
لا اخو ضل وأنطره ولا يتچيلي ولد
وانه بالغربه وگولن بياهو ائمن واعتمد
وياي بس اعليل ناحل وع متوني مستند
بيه اصبر واصطبر
ينادي ياعمه العذر
ياحسين. يميل ويه الناگه مربوط الادين
ياحسين. هل محرم وانه بالهم والونين
------------
بيك ادموع السبايا گلي شنهو بيا ذنب
اليامصيبه تريد،انسه والگلب نار التهب
وانه اطرنهه العساكر بمجلس الطاغي اطب
شلون صارت گلي هايه دمعتي تزل تصب
لهسه دخان الحزن
ماشفه جرحي يون
ياحسين. ميته خويه بيوم فگدتكم العين
ياحسين. هل محرم وانه بالهم والونين
---------------
وما اسولف قصه ارقيه الحزينه الي جرت
رادت الطفله ابوهه بالفراگ تلوعت
بالطشت راسك يبويه تصيح ليه توسدت
نگطعت انفاس العزيزه چنها مو ميته غفت
ناده سجادلاجل
عمه مامنها امل
ياحسين. ماتت الطفله بخرابه ياضوه العين
ياحسين. هل محرم وانه بالهم والونين
----------------
امل فلوحي الموسوي
هل محرم هل علينه اهلاله
وغير دگ اصدورنا شيحلاله
-------
بحب ابو اليمه عرفنه الماعرف
نلطم وندمي الصدر هذا شرف
حسين غايه محبته وهو الهدف
خسر كلمن ما يون وبچاله
-------
خسر كلمن مابچه وينعه عليه
حسين سر الجنه والجنه بديه
منزله وجاه وامامه وكلها ليه
حتئ جبرائيل ضل ينعاله
---------
ينعى جبرائيل يبجي بالسمه
گابل الزهره ويون يافاطمه
هل محرم مطرت الدنيا دمه
والعرش اسود توشح حاله
---------
موشح اسود والحزن عم الحزن
هذ شهر الفاجعه وكلنه نون
واليريد،اسمه تسجله ام الحسن
حسين صاح ودمعته الهماله
-----------
ياحسين يصيح وبمعنى وفهم
مو رياء وصوت وبلايه علم
شنهو راد حسين يدرس هالقيم
بدمه ضحه حسين وانطه اعياله
---------
انطه دمه وضحه بالمال ونفس
راد،يحيى الدين وبريگه يبس
نادى كلا للظلم والكل رجس
بوجه كل طاغي رفض واعماله
----------
امل فلوحي الموسوي… 1 محرم 1/9/2019
يمته تظهر يبو صالح عالمله
وتاخذ بثارات صيحت كربله
الرايه بيدك والمسير اتواصله
وابد ما تهده وتخف صولاتك
--------
يمته تظهر والصبر مل وجزع
گلوبنا ذابت مثل حال الشمع
والعيون اتعودت تهمل دمع
تنطر اتاني وگضت جمعاتك
------------
نتاني كل جمعه تهل بطلتك
وندعي عجل يا امامي مروتك
وين ياباب التمرله بدخلتك
وتعلن الصيحه وتجي بثاراتك
---------
يالثارات الحسين انت تكول
وثار امي فاطمه الحره البتول
وين كل خاين غدر ال الرسول
وابد ماترحم بعد ضرباتك
-------------
تضرب الهامات للعاشت دغش
وسيفك تجرده وعليهم يرتعش
وكل مرائي مايضل سيفك يحش
وتصفى بيدك ونت گد جولاتك
------------
شوكت نفرح لوتجي يعم الامان
عيونه تقر ياملك هذا الزمان
ومايضل للظالم ويانه مكان
وانت معروف وعلي بسطراتك
----------
نتاني للطله العظيمه وننتظر
وكلب كل مكسور يشفه وينجبر
ابد ماننسه بقنوت ولا فجر
ندعي عجل سيدي بصيحاتك
---------
امل فلوحي الموسوي
نعي للاربعين
---------------------------------
نزليني يناگه هذا حدي
دكعدي هنا بلله شويه كعدي
وصلناهم اهلنا منين ابدي
والمن التفت والطم بخدي
*****
عمه ياعلي دليني گبر حسين
خليني اون وبچيها دم العين
اوسد راسي يمه خلي يسمع زين
واحچيله شعمل وشسوه بيه البين
-----------------
تعالن يالفواطم گعدن انوح
وصلنه اگبور اهلنه وليهم نروح
عطاشه اگبورهم نرويها بالروح
كل علويه بينه تنزف جروح
*******
عمه ياعلي وين حسين والينا
خلينه اعله گبره نهل بواچينا
يفز ويستمع هظمه نواعينا
ونكله ياعزيز الروح رد لينا
******
شهر ويه العشر تيام اعدلهن
وي دگات كلبي كمت ارددهن
انه شتاگيت والايام شيردهن
عيون الماتشوفنكم اسدنهن
*******
اجيت جروح فوگ جروح يااهلي
دكعدولي العمر من دونكم شلي
صدگ يمكم انادي ودمعتي تهلي
ويبح صوتي ولا واحد هلا يگلي
------
عجيبه وهذا لا ضنيت ميصير
زينبكم غريبه وبالغرب اتحير
بلاخوان والعدوان بيها تسير
عفتكم نومه والعسكر عليه تدير
---------------
امل فلوحي الموسوي
قصيده مشتركه بين الشاعر السيد رياض الرسل الجابري
والشاعره العلويه امل فلوحي الموسوي
-----------------------------
من بعد عزها وخدرها والمهابه
طفله ياللاسف ماتت بالخرابه
من راحت سبيه
ماردت رقيه
طفله ياللاسف ماتت بالخرابه
-------------
من بعد ذاك الدلال وحضن ابوها
شلون بحضان الترابه ينوموها
والكفر داير مداير يحرسوها
طفله ورده مفتحه ويذبلوها
براس ابوها تنفجع
يهل من عدها الدمع
طفله ياللاسف ماتت بالخرابه
الشاعره العلويه امل فلوحي الموسوي
---------------
من بعد ضيم وعذاب الغاضريه
طفله ترفه وللاسف راحت سبيه
الناس كلها اتصيح طفله وخارجيه
مادرو بنت النبي هذي رقيه
طفله ماتحمل سفر
بالسبي شبعت قهر
طفله ياللاسف ماتت بالخرابه
الشاعر السيد رياض الرسل الجابري
------------
زغار اديها مربطات الحاله صعبه
مغمضين العين والمدمع تصبه
وينها وين السبي وتشوف دربه
تنادي خصمك رحم ماعده بگلبه
بويه اذاني الشمر
ماخذ اسنين العمر
طفله ياللاسف ماتت بالخرابه
الشاعره العلويه امل فلوحي الموسوي
--------------------
طفله وتشوف السبي هيه وزغيره
هاي ماصارت ابد ياناس حيره
بالخرابه ايگعدوها ابلا حصيره
عالتراب شلون وتنام الاميره
يا رقيه و شعجب
يضربوها ابلا سبب
طفله ياللاسف ماتت بالخرابه
الشاعر السيد رياض الرسل الجابري
----------
ضلت تنادي ابوي انه ارد اشوفه
بالحلم ضلت تشاهد بس طيوفه
فزت من النوم مرعوبه وبخوفه
ياحلم لتروح ماريدن اعوفه
هذا ابويه ويمي جان
ليش خذته يازمان
طفله ياللاسف ماتت بالخرابه
الشاعره العلويه امل فلوحي الموسوي
-----------------------
اللهم تقبلها منا بأحسن القبول
نام الولد لو مات شو چنه
كلمات الشاعره، ،،،امل فلوحي الموسوي
ياحسين، ،،هل محرم وانه بالهم والونين
كلمات الشاعره، ،امل فلوحي الموسوي
امشي بالشارع ودور اقرايه
گلبي ويه حسين مو ويايه
----------
گلبي شابع بس هضم
وينجبر بس باللطم
والدمع يهمل تمسحه الرايه
--------
امشي،ب الشارع ودور والتفت
وين ريحه مجلسك وينه صحت
ياحسين مراد من عدك ردت
ياشفيع ذنوبي گومني طحت
دربي خلصته نحيب
التفتلي يالحبيب
ارد اندبك كون بس بهايه
--------
ارد اندبك ياشفيع المذنبين
گلبي موجوع وعرف بس الونين
نظره يامولاي عن ذيج السنين
بداعة الزهره وعليك ام البنين
سجل اسمي وي الخدم
وعطر اسمك خل اشم
الثبات نريد يا مولاية
-----------
الثبات نريد بالخدمة صدگ
ومن يذكرك گلبي كونه يحترك
ومن نگول حسين نشهكها شهگ
وعهدنوصل حضرتك مانفترگ
كل سنه ياسيدي
بسمك احنه نهتدي
وباربعينك نخدم ومشايه
----------
باربعينك نوصل وكلنا عزم
الشوگ ماخذنا عليك ونستهم
نوصل الشباجك نبوسه ونشم
ونمسح الدمعات تحضنا وتلم
سيدي كلبك جبير
حاشا يمك مانحير
جينه يالمحبوب الك عنايه
---------
تمت بعون الله
7 محرم
السبت 6/8/2022
الشاعرة امل فلوحي الموسوي
اكعد شوفهااحوالي ..يعباس
هاي الروس يالغالي..يعباس
_____
خويه اكعد تلكاني
دهري شلون عاباني
بيكم حيل اذاني
ردتي شلون يالوالي...هاي الروس يالغالي
___
من السبي ردينه
تعبنه وحيل تعبينه
وصلنه كبوركم جينه
ندفن روسكم تالي...هاي الروس يالغالي
__
جينه والكلب يلهب
صعدت نوكهم تتعب
نطيح ونوبه انجلب
ودمع عيونه اتلالي...هاي الروس يالغالي
__
اليوم الفاتحه هنانه
هاي الروس ويانه
كلمن راسه بمجانه
ميته كون واشوالي..هاي الروس يالغالي
__
بيدي واحفر الخفره
وخلي وجوه متعفره
روحي من الهظم جمره
بيدي ودفن ارجالي.. هاي الروس يالغالي
___
ارش كبوركم ونحب
موماي بدمع يسجب
خويه كبوركم ترهب
وياكم موتي يحلالي..هاي الروس يالغالي
____
جيتك والدمع يجري
خويه حايره بامري
وتايه ياكمر فكري
ومنكم ضعني رد خالي..هاي الروس يالغالي
___
امل فلوحي الموسوي
مارحت للشام مذلوله وسبيه
رحت ثوره بعين كل الناصبيه
انه زينب…… انه زينب
-----------
يلي كل ضنك سبيه امدنكه الراس
لا وحق حسين هيبه وچني عباس
انه مامكسوره لكن كسرت احساس
كسر كلبي حسين شفته بحافر انداس
رغم دمعاتي لچن حره وابيه
رحت ثوره بعين كل الناصبيه
انه زينب…… انه زينب
---------
امشي مچتوفه صدك والشمر يحدي
لچن من حيدر شجاعه وغيره عندي
مالطمت اكبال عدواني اعله خدي
لاوحگ ضلع البتول وذاك جدي
انه امي الزاچيه وتكفي الهويه
رحت ثوره بعين كل الناصبيه
انه زينب…. انه زينب
-------
شالو الروس وعلى كامو يصدون
بهيبه امشي وما اهمن من يضربون
خلي سوط اهل الكفر يلعب علمتون
المهم ماوگعت الرايه ويشوفون
هاي من امي حفظت انه الوصيه
رحت ثوره بعين كل الناصبيه
انه زينب…… .انه زينب
-------
يايزيد شگد تعيش وشنهو عمرك
تعيش،ملعون وتموت وهذا فكرك
انه صوت الحق رعد مابين قصرك
ونت محتار شتگول وحرت بمرك
وشنهو ردك للعقيله الهاشميه
رحت ثوره بعين كل الناصبيه
انه زينب….. انه زينب
----
كيد كيدك يا يزيد وانت خسران
ابد ماتمحي ذكرنه ونعلى بالشان
كلشي من الله جميل ولله قربان
شنهو باجر موقفك يم سيدالاكوان
لوگلت زينب اسيره وخارجيه
رحت ثوره بعين كل الناصبيه
انه زينب…… انه زينب
---------
مايهم ادخل دوواوين وخرابه
اخت عباس وتضل نفس المهابه
شتفرق اقصور الرذيله من الترابه
بالحشر كل طاغي معروف بحسابه
وزينب انه دمعه الذل مو اليه
رحت ثوره بعين كل الناصبيه
انه زينب…… انه زينب
---------
امل فلوحي الموسوي
26/9/2019
26محرم
توضه ودخلها المجالس.. تدري من تلگاه جالس
االمهدي گاعد ينتظر.. الواسى محزوز النحر
يكتب اسمه بسجل عابس
توضه ودخلها المجالس
-------------
توضه بالاهات ودخل بالدمع
واسي الزهره وكلبها المنفجع
عينها باللطم مكسورت ضلع
گاعده ابكل باب مأتم تستمع
بكل مجالسنه تحس
تدخل شلون الشمس
اتوضه وادخلها المجالس
----------
لودخلت ابمجلس حسين الشهيد
تصيح يازهراء سجليها وتريد
اجر من حسين تلگاه بالوعيد
خل تهل العين دمعات وتزيد
تسمع الزهره وتشوف.. اباب كل مجلس تطوف
توضه وادخلها المجالس
-----------
بهيبتك من الله للمجلس تطب
وبالوجه نور وعطرحزنك يهب
ونار گلبك ماهدت تلهب لهب
على حسين الماشرب مي العذب
تلطم وتدمي الصدر… والدمع منك يدر
توضه وادخلها المجالس
----------
ماتنفعك دنيا لا ينفع ولد
غير حب حسين بس هو السند
لو تريد الاخره ويوم الوعد
علم ابنك عالولايه وبالمهد
خادم يضل للابد…. حزام للموكب يشد
توضه وادخلها المجالس
---------
لو دخلت المجلس وتنعه الحسين
تلگه باب الكرم ام اربع بنين
توزع الماي وتنادي،بالونين
ياحسين تصيح ياگره العين
وكل معزي تحيي اله.. . تگله يايمه هلا
توضه ودخلها المجالس
---------
احييو كل مأتم نعه ال الرسول
بدمعه وبلطمه تواسون البتول
الصادق بهاي القضيه يحث يكول
احيو كل احزانه الجنه تنول
الطم وعازي الامام. بصدرك تنول الوسام
توضه وادخلها المجالس
---------------
امل فلوحي الموسوي… .
13/محرم
13/9/2019
حقه گلبك ياعلي من ينسحن
صعبه كلش حيل لحظات الدفن
وحدك ومكسور خاطر
بالدفن بس انت حاظر
صعبه كلش حيل لحظات الدفن
-----------
صعبه كلش وانت ضال ابلا اهل
شلون شلت حسين ومگطع وصل
تنوح والدمعات من عينك تهل
هذا موقف ياعلي لا مو سهل
تلملم اوصال اوذر
والكلب دامي انفطر
صعبه كلش حيل لحظات الدفن
----------------
شلون گلي اكدرت تدفنها القطع
من الارض ترفعها ومحني الضلع
موذره الوليان صعبه تنرفع
وانت گلبك ذايب ومثل الشمع
وهمك الماينجلي
شلون صابر ياعلي
صعبه كلش حيل لحظات الدفن
-----------
ويه عمتك زينب الفكر انشغل
وانت عايفها بخرابه وبالرمل
راحو اخوتها بعد وين الكفل
وبين اميه تنوح بت خير العمل
بهايه انت تحيرت
روحك الليله ادفنت
صعبه كلش حيل لحظات الدفن
--------
يساعدك الله ونحيل من المرض
والطفوف شخلت بحيلك ترض
تعاين الهلفاجعه تضيگ الارض
ياعلي وحالك عليل ومنفرض
هلت عيونك دمع
الليله گلبك منفجع
صعبه كلش حيل لحظات الدفن
------
گلبك شحاله وصرت تنظر اله
جسمه متوذر وطايح بالفله
حالك يبجي الصخر من شايله
توگع اوذاره ودمومه السايله
ينادي ماجبت السدر
دموم من نحره تدر
صعبه كلش حيل لحظات الدفن
-----
شلون نزلته وهلت ليه الترب
والگبر رشيته هم ماي العذب
ضل ابو اليمه بضماه وماشرب
والشمس نيرانها تلهب لهب
ضامي بالحومه وكع
گلبك الليله نشلع
صعب كلش حيل لحظات الدفن
------
امل فلوحي الموسوي
10 محرم… .1/9/2019
حلوه زفه الشبان ..جاسم وين صيوانه
-----*
عرسك وين يمدلل
السيف بركبتك هلهل
وردك من وكت يذبل
يمه نگطع بالوانه
-------
تانيت الورد يزهر
ربيعك بعد،ماخضر
تالي خاطري تكسر
تلاگي الموت باحضانه
-----------
يجاسم دگت ادفوفك
بعرسك دمك يطوفك
الحسن ياريته يشوفك
تزفه سيوف حزنانه
---------
شحلات الزفه لوليدي
وأعجن حنته بأيدي
حسبت العرس عيدي
عرسك يمه بچانه
-------
صال وجال بالميدان
يركض وارعب العدوان
يابس ريگه وعطشان
نغاضت منه عدوانه
------
طفينه الشمع يبني
بيك الدهر دولبني
سهم العرس صوبني
ريت الليله ميته انه
----
امل فلوحي الموسوي
مسبيه العلاوي تنوح. كوم وزلزل الحومه
وسفه ياكمرمطروح. خويه عوفها النومه
----------
عوف النوم يامغوار
والعسكر علينا اندار
ماتدري اضن شصار
اسكينه تنادي مهمومه
------
مهمومه وتناشدني
عمي وين عايفني
يعمه الكوم تنظرني
وروحي حيل مهظومه
-------
بنات حسين مسبيات
الليله بالبراري تبات
گوم انهض يبو الكلفات
بعازه للولي ويومه
چاوين العلم والجود
بلا چفين بس زنود
وطايح ضاربه العامود
عمي الهامه مدمومه
----------
طايح والدموم تسيل
وعدوانك عليه تعيل
وزينب حايره باليل
تصيح وتنعه مالومه
-------
شلون تطيح ياجيدوم
جاياهو اليرد الگوم
وراسك عالنهر مدموم
اخوي الهامه مهشومه
----------
وين الدك الي صدره
يجي ويشوفها الحره
تصعد ناگه متعثره
بسدها ايتام ملمومه
------
امل فلوحي الموسوي
يحسين اجيت وحايبتها سنيني
يحسين مشلوله احس رجليني
اتعثر وما ائدري
بيا كتر واكع عمري
يحسين اجيت وجايبتها سنيني
----------
اوصلك انه شلون طحت بحيره
وضعي صعب مو بالسهل تعبيره
اتلفت وشحت زلمها الغيره
وحيرانه وجهي بيا كتر لوديره
وضليته بس النسوان
ويانه تحدي العدوان
تسمع يريت بهضمتي وونيني
يحسين اجيت وجايبتها سنيني
--------------
لا عشت كوني وروحي المن ضلت
وجثتك على التربان خويه نشمرت
ارد اوصلك روحك اخافن طلعت
مرعوبه اوصل روحي نار وشبت
النفس ينبض كوه
ومن خوفتي اتلوه
لحظات اضن مابينك ومابيني
يحسين اجيت وحايبتها اسنيني
--------
هل الدمع وتعثر انه بممشاي
مادري عايش لو فكدت انه الراي
ازحف زحف جيت وجبت هذ الماي
تلگاني يا ضنوه علي يارجواي
كونك عدل اكعدلي
العمر دونك شلي
ارويك ياعطشان مي من عيني
يحسين جيت وجايبتها سنيني
-------
جبت العمر بچفوفي يا ضي العين
اشخيره عمري لو فگدتك يحسين
انحب اضل طول العمركله اونين
يحير زماني الليله حالي بامرين
اوصل گمر لو لحسين
ششويت بيه يالبين
ولله وگدرت باخوتي تلويني
يحسين اجيت وجايبتها اسنيني
--------------
شطوله الطريق ودربي صار شكبره
كل خطوه اتعثر واطيح اب عثره
بين االجثث اركض وصيح بعبره
مهظومه زينب يمه وينج زهره
يايمه شوفي الاحوال
ممدوده كلها الابطال
ونار الخيم اركض جمر يچويني
يحسين اجيت وجايبتها سنيني
-------------
امل فلوحي الموسوي
زبنب تنوح الهظم ياذيها
وين عباس التكفل بيها
-----
وين عباس وتنادي بالفله
ليش عايفني بهظمها كربله
تايها وتنعاك خويه المرجله
شوف زينب انهض وحاچيها
----------
انهض وشوف المصيبه والهظم
محجباتك تركض بنص الزلم
حرگو اعليهن يعباس الخيم
وتصرخ الاطفال ياواليها
-----------
تصرخ وتنحب تنادي يالكفل
مدللين ومايعرفون الزعل
حافيه الاقدام يجويهم رمل
وزينب الحره الشمر سابيها
---------
يسبي زينب نوبه يسب البتول
يضرب بسوطه بمتن ال الرسول
مايخاف الله الشمر بيهم يجول
تنوح والدمعات دم تجريها
----------
تجري دم دمعاتها يا ابا الفضل
وينك تشوف العقيله بلا اهل
الحمل واكع ومن عدها هدل
وين اخوها يشوفها ويحميها
-----------
وين اخوها تكفل بهذ الوكت
وينه عباس وخيمنه تفرهدت
تصيح زينب ريتني هسه متت
ولا فواطمنا الشمر يحديها
---------
يحدي ياعباس نبراته زجر
كوم ياخويه وابد لاتعتذر
خويه نار الارض متغطيه جمر
والفواطم حافيه رجليها
-------
امل فلوحي الموسوي
يمتئ تظهر يبو صالح عالمله
وتاخذ بثارات صيحت كربله
الرايه بيدك والمسير اتواصله
وابد ماتهده وتخف صولاتك
كلمات الشاعره العلويه
امل فلوحي الموسوي
نعي
نزليني يناكه هذا حدي
امل فلوحي الموسوي
هلا بريحه احبابي ..
ردولي جوابي
وين اهلي والاحباب
عليله والگلب ذاب
هلا بريحه احبابي
-------*
غفتوني وحيده ومرضي يبره
بقيت معلعله بس دمعي يجره
تانيت شكثر والباب انطره
اجوني مااجو وبگلبي اصبره
محد يدگ بابي… ردولي جوابي
هلا بريحه احبابي
--------------
يعمه بس دمع وبلايه والي
شو رديتي من الضعن خالي
وين حسين جاوين الغوالي
نهد حيلي يزينب هذا حالي
وين اهلي والضعون
بعد ماضن يردون
ياقهري وعذابي.. ردولي جوابي
هلا بريحه احبابي
--------------------
شو خابت ضنوني شفت الاهوال
متغيره اشوفج يصعب الحال
يعمه والضعن خالي من الرجال
حرم وطفال ماچانت عل البال
يعمه وين السباع
عمري بدونهم ضاع
ياهمي ومصابي… ردولي جوابي
هلا بريحه احبابي
---------------
يعمه گابليني الحيل مهدود
گلبي من الهظم ياعمه ممرود
كفيلج وين عمه احجيلي والجود
دگ صدره يعمه وين الوعود
عالناگه تردين
جاوين الميامين
يعمه الكلب مابي.. ردولي جوابي
هلا بريحه احبابي
---------------
دگعدي وسولفيلي عمه مابيج
اشوفج بالكلب حسرات تاذيج
يعمه شبيج فدوه تراب غاطيج
شو جنه يعمه الدهر سابيج
ترابج خل اشمه
ريحه اهلي عمه
عيوني الهم ترابي.. ردولي جوابي
هلا بريحه احبابي
-----------------------
رقيه وين عبدلله فگدته
والاكبر اخويه وينه ردته
يعمه جاوبي تكتل السكته
ياضيم العلي ماصار شفته
غربه ومرض ودموع
وگلبي ينوح مفجوع
الحزن والهم ثيابي. ردولي جوابي
هلا بريحه احبابي
-------------------
امل فلوحي الموسوي
نعي للعليله
--------------------
يهد فراگ وجهك ما مفارگته
جرح گلبي يبويه اليوم جربته
شنسه وغير اگولن يمكن انساك
ورد ردود دمعاتي تهل سكته
الهجر رايد صلافه وحيل
ونه بعدك يبويه الحيل ضيعته
ادورك وين ونت بكلي موجود
بغيابك ما اشوفن يومي تيهته
تعال واسمع الحسرات بالروح
وهم سامع گلب من تنسمع ونته
عليله وانتظر جيتك تقر العين
ودموعي تهل وليلي مانمته
يخنگني الهوه لو انته ماموجود
هواك بروحي بس بروحي نسمته
تعال وما اضن تلحگ على الحال
حالي بفرگتك چن خيل ساحگته
تجيني انتظر لو هايهيه وياي
ومثل شمع العمر بجفاك ذوبته
كل يوم انتظر وتهم العيون
ها هسه اجو لا بعد شوصنته
عليله بدار وحشه وبس التراب
تغطيني وگولن كلشي بوكته
وتانيكم وصبر روحي بالاحلام
ها باچر اضن كل يوم حاسبته
تعال وخلي احجيلك على الصار
وسولفلك شلون النزل ساكنته
تعال وشوف وضعي مايسر فد نوب
اريدن شوفتك والمرض عايفته
*
امل فلوحي الموسوي
نام الولد لو مات شو چنه
خليني اشمه نوبه احضننه
اگعد يعبد الله
ياييمه اسم الله
نام الولد لو مات شو چنه
---------------
اگعد ييمه واشوفها احوالي
ابلا وعي مهدك اهز خالي
تضحك تناغي چنك اكبالي
گماطك تغير لو وهم بالي
احمر يخوفني
مدموم هايبني
من خوفتي الگماط اميلنه
نام الولد لو مات شو چنه
-----------------
نايم ارسومك كلها تتبسم
صديت الك كل ضني اتحلم
ليش الحضينه املطخه بالدم
ناديت يمه والحجي اتلعثم
باوعلي يايمه
تدريني متعلمه
امناغاي حد الفجر اللعبنه
نام الولد لومات شو چنه
--------------
اتگربت لني اسمع اونينك
لحظات عفتك مادمه بعينك
بيني القدر شبساع لابينك
جيت وشفتها نذبحت سنينك
تاه الفكر مني
والدمع هل مني
رايح وليدي نگطعت الضنه
نام الولد لو مات شو چنه
--------------
در الحليب وزادلي وني
ترضع ييمه جان كل ضني
من اوصلتلك والدمع خذني
شابح عيونك ليش هايبني
ماحسبت مذبوح
يمه يبعد الروح
سابح بدمه شلون اشيلنه
نام الولد لو مات شو چنه
-------------
شلته وصيح الچلمه تتعثر
ياربي الك شكواي يالاكبر
ليش الطفل ينذبح بالمنحر
ينزف ودمه غرگ المندر
بالمعركه شله
مايفهم النبله
سهم المنيه شلون اجرنه
نام الولد لو مات شو چنه
-------------*
بحشاك نابت يمه يمدلل
ماراح اجره يمه لاتزعل
خافن اشيله والدمه تنهل
ياورده روحك ماردت تذبل
مات الورد يمه
محرومه من شمه
والورد يمه شلون ادفننه
-----------------
امل فلوحي الموسوي
11/9/2018
1 محرم
ياحسين .هل محرم وانه بالهم والونين
ياحسين. هلاله يجرح ذابح احلام السنين
مانسيت الي جره
دمك يصب منحره
ياحسين. هل محرم وانه بالهم والونين
-------------
لاتهل شهر المواجع لاتهل شهر الاسه
جايني وشتلگه بيه ريتني ميته وعسه
هم الك عين وتصدلي عاودت هذا المسه
شچم نهر شحيت وحنه ارياگنه متيبسه
جايني شرايد بعد
بياصلافه انت ترد
ياحسين. هذ شهر الفاجعه البيه فاگدين
ياحسين. هل محرم وانه بالهم والونين
------------
منك شأذكر وتاني ونت شهرالنايبات
بيك مجروره الفواطم وتدري هنه مدللات
مچتفات بحبل يمشن وبجدمهن حافيات
وعالهزل بيهن اباري مايعرفن حايرات
والدمع منهن يهل
وعالنهر ضل الكفل
ياحسين. يساره مگطوعه يخويه واليمين
ياحسين .هل محرم وانه بالهم والونين
----------
لا خيم ضلت اليه ولا فزع واحد الي
ياشهر وشتلگه بيه واني حرمه بلا ولي
خذت كل الي تريده بجيتك گلي شلي
جيتني تجرح بگلبي ماترد لمه هلي
دمومهم تنزف جرت
روحي حيره تحيرت
ياحسين. يا نبض گلبي ودمعته والحنين
يا حسين. هل محرم وانه بالهم والونين
-----------
بيك مسبيه وروحن من بلد ومشي البلد
لا اخو ضل وأنطره ولا يتچيلي ولد
وانه بالغربه وگولن بياهو ائمن واعتمد
وياي بس اعليل ناحل وع متوني مستند
بيه اصبر واصطبر
ينادي ياعمه العذر
ياحسين. يميل ويه الناگه مربوط الادين
ياحسين. هل محرم وانه بالهم والونين
------------
بيك ادموع السبايا گلي شنهو بيا ذنب
اليامصيبه تريد،انسه والگلب نار التهب
وانه اطرنهه العساكر بمجلس الطاغي اطب
شلون صارت گلي هايه دمعتي تزل تصب
لهسه دخان الحزن
ماشفه جرحي يون
ياحسين. ميته خويه بيوم فگدتكم العين
ياحسين. هل محرم وانه بالهم والونين
---------------
وما اسولف قصه ارقيه الحزينه الي جرت
رادت الطفله ابوهه بالفراگ تلوعت
بالطشت راسك يبويه تصيح ليه توسدت
نگطعت انفاس العزيزه چنها مو ميته غفت
ناده سجادلاجل
عمه مامنها امل
ياحسين. ماتت الطفله بخرابه ياضوه العين
ياحسين. هل محرم وانه بالهم والونين
----------------
امل فلوحي الموسوي
10/9/2018
الاثنين
