ليالي الفاطميه 1445
لحن محمد الجنامي/ تنشد من الناس
لسان حال الزهراء عليها السلام
محسن حلم راح. ما شافته العين
اتمنيته يا ناس. بس يشبه حسين
كل ساعه احسب كل شهر
تالي عله الباب انعصر
ما شافته العين
/////////.
محسن حلم عمري رحل. وشهور سبعه انتضر
من أدخل باول شهر. احسب يجي اخر شهر
من طرقه الباب انتهت. امال واحلام العمر
من قبل لا ضلعي انكسر. حسيت محسن منعصر
من دفعت الباب. ضاع العمر ضاع
اصعب عله الروح. لحضات الوداع
وبتدت ساعات القهر
تالي على الباب انعصر
ما شافته العين
///////////
من هجموا علينه العده. الزمره هاي الضالمه
دخان والباب احترك. الدخان واصل للسمه
من طاح محسن عالارض. اسمع ينادي فاطمه
ارماد والدم انخبط. ابني اشوفه بس دمه
عالارض من طاح. طاحت تره الروح
شيفيد الاعتاب. واوليدي مذبوح
قلبي من الفركه جمر.
تالي على الباب انعصر
ما شافته العين
/////////
حضرت كاروك الطفل. وحضرت اكماطه اله
لطفل الرضيع يضل ورث. لصوغه لحسين بكربله
اسم الله يبني من الذبح. ادري الرباب تدلله
بالعاشر ينوم الطفل. لو سمع يحجي حرمله
من الضمه يفز. عبدالله عطشان
ويقدمه الحسين. للدين قربان
ويشوفه مكطوع النحر
تالي على الباب انعصر
ما شافته العين
////////
مريم وقصتي اتشابهت. لو نحجي عن طاري الجذع
الباب جانت من جذع. من طاح كسرلي الضلع
ما همني ضلع والكسر. ولا همي خدي المنصفع
كل فكري ليش عالارض وبيا ذنب محسن وقع
محسن حلم جان. ومنتضره ايام
وبيا ذنب ليش مذبوحه الاحلام
ميرجع المات الصبر.
تالي على الباب انعصر
ما شافته العين
/////////
الصديقه اني فاطمه. عندي عتب لهل العرب
لليدعي اصحاب النبي. هم عدنه وياكم حرب؟
تعرفون منهو فاطمه. اصحاب انتم لو غرب؟
لو صدك اصحاب النبي. چا ليش خدي ينضرب
متبريه الاعرب. منكم يضلام
باجر ترجعون. تحركون الاخيام
تذبحون عالشاطي قمر
تالي على الباب انعصر
ما شافته العين
////////
تمت الحمد لله
خادم الحسين عليه السلام
علي فيصل الكريطي الكربلائي
29/10/2023
ليالي محرم وزن هجري.
*****
يامحرم/وينك انته من سنه اني انتضر
يامحرم/ سنه أتاني وريت عمرك مو شهر
يا محرم يا محرم
...................................................
يا محرم لحضه لحضه بنتضارك هذا عمري
اختلفن اعضاي بزعلهن جفي زعلان اعله صدري
عيني ماتحجي ويه جفني بهل المصيبه انته تدري
لو إجه طاريه زينب يلتقن والدمعه تجري
يامحرم/ بلا بواجي اني اموت من القهر
يا محرم/سنه أتاني وريت عمرك مو شهر
يا محرم يا محرم
...............................................
من تخلص يا محرم الله هم ينعم عليه
وبصفر خلاني اذكر جرح يوم الغاضريه
من بعد صفر أتاني ا ليالي فاطميه
من بعد هاي اليالي اليالي الزينبيه
يا محرم/ رايد اللطم للحسين وافتخر
يا محرم/سنه أتاني وريت عمرك مو شهر
يا محرم يا محرم
....................
والله لو ما هاليالي اني ما اريد العمر
الله خالقني حسيني ويختلف هذا الشهر
بهاليالي رايد الطم حته صدري ينكسر
اني اخجل صدري سالم حسين مكسور الصدر
يا محرم/ رايد اذكر قلبي لمصابه جمر
يا محرم /سنه أتاني وريت عمرك مو شهر
يا محرم يا محرم
.......................
وينك انته يا محرم منتضر هاي اليالي
أدري ترضه الزهره عني لو تشوف بدمعي هالي
رايد اسمع بالمصيبه وقصه المقتل ابالي
عايشه ابالي الفجيعه مهره من يرجعله خالي
يا محرم /انعم الله بالمأتم وبصفر
يامحرم/سنه أتاني وريت عمرك مو شهر
يا محرم يا محرم
..................
علمتني يا محرم قلب المفارك حنين
الله اليعين العليله هم يعين ام البنين
سنه ونص بنتضاره تالي ما رد الحسين
تحله لمفاركه حبيبه بس دموعه والونين
يا محرم /اليفارك بعد ما يريد العمر
يا محرم/سنه أتاني وريت عمرك مو شهر
يا محرم يا محرم
............................
ابالي ضلت بس مصيبه خل اسولفلك انه
خافي ما اشوفك محرم عمري اقل من السنه
المن انطي وجهي اني وضهري بذنوبي انحنه
ادري ما ينسه الخدمته وعمري لحسين انفنه
يا محرم/رايد اسئل هم تجيني بالقبر
يا محرم /سنه أتاني وريت عمرك مو شهر
يا محرم يا محرم
تمت الحمدالله
خادم الحسين/ علي فيصل الكريطي الكربلائي
ليالي محرم 1444
لسان حال الإمام الحسن عليه السلام
يخلص الشهر المحرم ونتضر
بالسنه مقسومه اليه بس شهر
يوم واحد أنذكر سبعه بصفر
من الليالي
_
اعتب اني اعله الجفوني
بنص مجالسهم نسوني
واني ابو الحنيه
بكل مجالس اني حاضر
ابجي ومكسور خاطر
وسط الحسينيه
محرم من يمر عشره ليالي
مكاني اني اشوفه بيها خالي
ردت شاعر كتب حالي وسؤالي
ابد ما شاهدت واحد قرالي
اسمع أطوار ولحن بيهن حزن
بالقصيده ما شفت اسم الحسن
اني ابن الخيمه والتل والضعن
والغوالي
___
جانت اول امنياتي
بكربله تخلص حياتي
والعمل بالنيه
راح ابشركم بشاره
الراد يوصلي زياره
يقره الي لطميه
محرم من يمر والعاشر انتضره
وليالي الفاطميه وكسره الزهره
وليالي الزينبيه ودمعه الحره
ابد ما شاهدت واحد الي يقره
اعتب اعله الخدم ليحبوني
ليش طول السنه ميذكروني
بالقصد لو مقصد يجفوني
ودمعي هالي
_
بليله الثامن اشاهد
من الألف يذكرني واحد
واني ما انساكم
اي وحق دمعه الزهره
النساني اني اذكره
والله روحي وياكم
من كل السنه اني أنذكر مرتين
السابع من صفر والثامن من حسين
اقصد ليله الثامن والقصد وين
عله صينيه القاسم آهيل العين
بليله القاسم تزيد الونه
بيدي ياس وبيدي كومه حنه
اكتب الخدام واليتمنه
هذا حالي
__
الغربه صعبه وشوكي اصعب
لان احبكم اني اعتب
والعتب لحبابي
المجالس هيه بيتي
بالكرم معروف صيتي
باب الله بابي
سنه تبدي سنه تخلص ونه اتنطر
ناسيني الحبايب اكثر واكثر
انه كل المجالس اعتني واحضر
سجل الخدمه يمي وبيدي الدفتر
عالخدم اني اوزع نضره
بيدي اسجلكم وحق الزهره
ردت واحد يذكر اسمي انتضره
يرد سؤالي
__
قبل موتى اني اعلم
كربلاء تصير من دم
تموت كل اخواني
امنيه وحده اعله بالي
راسي يم حسين عالي
وسفه خالي امجاني
امنيتي اصيرن ضل عله حسيني
الشمس فوق الرمح خليها تجويني
ولكن وسفه قبله خلصت اسنيني
ونه كل مجلس الطمله عله عيني
ابد لا يوم كيوم مصابك
بساعه سبعين تموت احبابك
اول انسان سليبه اثيابك
وراسه عالي
__
تمت الحمدلله لله
5/7/2022
لا تنسونه من خالص دعائكم
الخادم /علي فيصل الكريطي الكربلائي
ل
ليله خروج الإمام الحسين عليه السلام
مقارنه بين خروج ساره والنبي ابراهيم وخروج السيده زينب عليها السلام مع كفيلها
ميمر
بين النبي والمعصوم قصه سفر بالهيمه
زينب وساره تشابهوا بالسفره
ابراهيم كافل ساره طول المسره
وزينب وياها الكافل الدك صدره
ساره هودجها الصندوق وزينب هودجها الخيمه
____
زينب ضعنها بي ملائك تفتر
ومن الجهات الاربعه متستر
يحرس ضعنها جاسم ويه الاكبر
وحارس خيمتها العباس عنها يغطي الغيمه
__
زينب ضعنها يختلف عن ساره
ساره وياها هم نبي ومحتاره
وزينب بهودجها الوحي خطاره
ويحضرها كل ليله حسين وتدعي اله يديمه
___
تالي اعله زينب الزمن هم يدور
تبدي المصايب من يجيها عاشور
تشاهد حسين اعله الترب ضل منحور
لمن يجيج الميمون يردد كلمه ضليمه
__
لمن يرد ضعنا الاميره الحره
بلا كافل وتختلف هاي المسره
زينب سبيه وتمشي ويه الاسره
عالرمح راس العباس والسهم يشرح ضيمه
____
زينب الثوره ومتداد الرحمه
الوادم الشينه تسحك اعله النعمه
بكلمتها زينب ذلت اجم زلمه
من خطبت اكبال ايزيد ذلته وهيه ايتيمه
____
لا تنسونه من خالص دعائكم
تمت الحمد لله 2/3/2022
الشاعر /علي فيصل الكريطي الكربلائي
لسان حال ام البنين عليها السلام
____
اليريد يذوب بالخدمه الحسينيه
اسم صاحب زمانه يذكره يوميه
اوصيكم اوصيكم
__
انه ام عباس اني من ذوي القربه
عكب صاحب زماني عايشه بغربه
ونه صاحب زماني حسين مو عجبه
ورتل يا حبيبي حسين بالندبه
جنت كل ليله اقره بقلبي لطميه
_
اليحب لازم امامه يضحي وينصره
وانه صاحب زماني مات وانتضره
بقيت بسمه الهج والحمد اقره
ورتل يا حسين بسبحه الزهره
منيتي ويه بناته امشي مسبيه
___
اليحب صاحب زمانه يسئل ويعلم
وانه اسئلت وجوابي بشر ابن حذلم
واذا صاحب زمانك غاب وانته بهم
انصب مجلسه ونتضره بالمئتم
اقره الندبه وقره الفاتحه عليه
__
انه ام البنين مئسسه الخدمه
الخدمه نعمه واجب نشكر النعمه
الخدم صاحب زمانه يرتفع اسمه
ارتفع اسمي لان حبيت ابو اليمه
حته الساده كلها تكلي علويه
____
اليحب صاحب زمانه اهوايه يشكيله
بصلاه الليله كون اهوايه يدعيله
ويقره الندبه كون بصبحه وبليله
وكل هموم قلبه بدمعه يحجيله
ويسولف وي امامه همومه ليليه
__
اذا صاحب زمانك بالوعد نازل
تضحي بروحك وهلك اذا تقاتل
ونه لصاحب زماني انطيته الكافل
فده جفه ونضر عينه ابو فاظل
فديت اربع ولد واحدهم بميه
__
إلى صاحب زمانك انخه واتقرب
الوسيله وحده بالدنيا فقط زينب
عيش الحب يا خادم وفهم من تحب
يغيرك لو جانت انته بضلام الجب
يدعيلك امامك بخالص النيه
___
تمت الحمد الله
21/1/2022
لا تنسونه من خالص دعائكم
الشاعر /علي فيصل الكريطي الكربلائي
لقاء رسول الله (ص)مع بنته فاطمه عليها السلام
__
التقينه بالسمه شفت بنتي فاطمه
هيه مو هيه كلت من شكلها استغربت
التقينه بالسمه
_____
هيه مو هيه شفتها // فاطمه متغيره
جنها من اليسر جتني //مو من المقبره
محنيه اجت مو قائمه
وبالوجه اثار الدمه
ما جنها بنتي فاطمه الحبيبه
انضر لخدها منسطر
والضلع شكله منعصر
وذبلانه جنها باليسر عجيبه
مو عجيبه وعجب ميته من الضرب
بالمصيبه اتألمت من شكلها استغربت
التقينه بالسمه
__
يختلف حته عطرها // ويه نسمات التمر
وريحه الدخان بيها // أشد من ذاكه العطر
كل نفس فاطم مختنك
مبينه اثار الحرك
والباب عالزهره انطبك جريمه
مضروبه جنها ام الحسن
ذابل جفن فوق الجفن
ذبلانه من كد الحزن هضيمه
ذبل خدها الترف بعد ما ينعرف
فاطمه بنتي صحت من شكلها استغربت
التقينه بالسمه
___
اعيونها انضرها حمره///تخفي عني بالجفوف
بالدرب تعثر اشاهد//من السطره ما تشوف
اني شفتها تكبعت
والسطره تخفيها شفت
توكع وتنهض من اجت الزجيه
اسم ونين من الوجع
شمسوي ببنيتي الجذع
كاسر ضهرها والضلع علويه
والالم كل كتر وبعد خسف الصدر
فاطمه اتعذبت من شكلها استغربت
التقينه بالسمه
__
من اجت انضرها ترجف// بس ونين اني استمع
تنادي بويه راح ابني/انعصر وي كسر الضلع
هذا اول احلامي الي
كمره وتشع بمنزلي
نحلم نضمه اني وعلي حلمنه
جاوبت طايح عللارض
والدمه بالطول وعرض
بالقسمه لا ما اعترض المنه
تكلي ضاق الهوه ونعصرنه سوه
بصدري مسمارهم نبت من شكلها استغربت
التقينه بالسمه
__
عن حسين اني اسئلتها // وسئلتها اعله الحسن
بالمغيسل من اجوني // ميته وفتحت الجفن
اسمع نداء من السمه
نحي الولد عن فاطمه
والدنيا صارت مضلمه تجاوب
والليل هم صار الدفن
شيعني خفيه ابو الحسن
من زغري فاركت الوطن مصايب
ضيعت كل هلي والمصيبه لعلي
تالي للباري رحت من شكلها استغربت
التقينه بالسمه
___
لا تنسونه من خالص دعائكم
خادم الحسين /علي فيصل الكريطي الكربلائي
دعواتي/يا رب البريه
ترزقني/خدمه فاطمه
___________
انه العبد الفقير وهذا مكتوبي
استحيت ارفع اديه بكثره اذنوبي
ارزقني الخدامه بوسع ادروبي
حبيبي حسين قربني عله محبوبي
بحسراتي/ربي ارفع اديه
ترزقني/خدمه فاطميه
_____
بدون حسين ربي دنيتي هندس
برحمتك عايش اني ورحمه المجلس
ضميري بلا مجالس منعمي وخرس
تدري اني حسين بصوتي اتنفس
وناتي/وحزني الغاضريه
ترزقني/خدمه فاطميه
______
من حسين صارت حلقه إيماني
الفضل للحسين اني انسان سواني
بقه اخر حلم لمن اموت اني
أوراق القصائد تصبح اجفاني
امنياتي/خادم للمنيه
ترزقني/ خدمه فاطميه
________
قبل توفيقي لازم أعقد النيه
قبل المجلس انوي بقلبي لطميه
اجي مهموم علطف والحزن بيه
اكيد المهدي حاضر ينضر عليه
ودعواتي/الندبه المهدويه
ترزقني/خدمه فاطميه
______
المجالس هم مدارس بيها اتعلم
وضمن بيها اجري اني من اللطم
بدرس حسين اصفن والمهم افهم
انكسار السيف بلطف وانتصار الدم
وجمراتي /خيل الاعوجيه
ترزقني/خدمه فاطميه
______
ارزقني الهي بس خدمته هاي
حلمي بمجلسه اني اوزع ماي
وجهه الزهره ابيضه من اجي مشاي
عندي هاليقين الزهره تمشي وياي
ودمعاتي/للزهره الزجيه
ترزقني/ خدمه فاطميه
_______
خادم الحسين عليه السلام/علي فيصل الكريطي
الليالي الفاطمية 1442
شفتج تلطخين وجهج بالرماد
حسين بعده ما وكع من الجواد
اهناكه برماد الخيام لطخي وجهج بالضلام
يمه زينب. يمه زينب
///////////////
ضمي دمعج يمه زينب. لعالم الهم والعطش
من تشوفي حسين دمه لطخي راسج والرمش
انسي يمه الجزع هسه. والجزع ليل اهدعش
من تشوفي حسين بالطف. صدره للخيل تنفرش
شفتج اتجزعين ويهيل الدمع
شجاب ثكل الخيل وي ثكل الجذع
وبعد طعنات وسهام. لطخي وجهج بالضلام
يمه زينب. يمه زينب
/////////////
شفتج تمسحين دمي. تداوي اثار الحرك
ضمي دمعج والمصيبه من خيامج تحترك
من تشوفي حسين يمه. صدره بالطف ينسحك
اشلون من تشوفي صدره ويه ضهره. ينطبك
جسم الحسين الخيول تكطعه
ينفرش من الخيم للمشرعه
يموت بالطف الحسام. لطخي وجهج بالضلام
يمه زينب. يمه زينب
////////////
شفتج تركضين زينب عله ضلعي النهشم
تركضين اهواي باجر من تضلي بلا زلم
الركضه تبدي من خيامج وتوصلي حسين بالم
وتنتهي من الشريعه ركضه وحده للخيم
اهناكه عالتل وكفتج وكفه نبي
لخاطرج سمو تل الزينبي
وكفتج وكفه أمام. لطخي وجهج بالضلام
يمه زينب. يمه زينب
////////
اهوايه حزنانه يزينب شفتي محسن ينعصر
اشلون باجر عالشريعه من تودعين الكمر
ما اسولف عن جماله وجه احله من النهر
لو مشه ينكسر ضهرج بكربله تشبعي قهر
يفدي لعيونج يساره واليمين
هذه كلها تربيه ام البنين
عله اسمها السلام. لطخي وجهج بالضلام
يمه زينب. يمه زينب
////////
احجي عن السبي زينب وحجي عن جرح الضمه
من بعد حركه الخيمه تنسبي جم فاطمه
اشلون من ترفعي راسج يمه زينب للسمه
تشوف راس حسين عينج عالرمح ينكط دمه
تشوفي كل ساعه الرمح يعثر تره
من يشوفج باليتامه محيره
بعد ما ينفع كلام. لطخي وجهج بالضلام
يمه زينب. يمه زينب
////////
والضلع والمتن يمه تره اهوايه اتشابهن
والسياط الجنه خنجر حيل يوجع بالمتن
تضربي راسج بالمحامل من يطلعون الضعن
من المصيبه يصير اسمج يصير اسم ام الحزن
تصيري انته الكافله بهذا الامر
يعني لا ما مات عباس الكمر
زود عباس الهمام. لطخي وجهج بالضلام
يمه زينب. يمه زينب
///////
تمت الحمد الله ٢/١٢/٢٠٢١
خادم الحسين /علي فيصل الگريطي الكربلائي
1443
( لسلام حال رقيه عليها السلام تتاني موعد الوالد الحسين عليه السلام )
اتاني موعد الضامي وأشوفه متني ولامي
اعد ايام اصل للشام
______________
رقيه اني وعد ايام منتضره
موعد والدي من جان عالغبره
السبي خلصته قوه عثره يم عثره
غير الشوك البرجلي الف جمره
اطيح وما يرحموني وعله متوني يضربوني
شفت الالام اصل للشام
____________
قريب ونيتي اشبكه والدمع هالي
انزل بالرمح بس الرمح عالي
بضلام الليل اشوفه قررت تالي
منعوني الحرس عن شوفه الغالي
اشمه بالسبي صعبه ودور بالرمح قلبه
عشت بوهام اصل للشام
_________
ضعت مره بسبينه وداعت الاكبر
وشفت راس الرمح من القهر يعثر
انتبهت اعله الوجه تالي وشفت منضر
جماله من الشمس والحر صبح اسمر
اقول بقلبي اشصاير وعله وجه انطبع حافر
بفعل ضلام اصل للشام
________
يصعدوني بهزل ساعه ينزلوني
شبعت اسياط لمن طاحت امتوني
سياط وجن خناجر من يضربوني
جبير السوط واني ازغيره تدروني
يضحكون ويعذبوني يصعدوني ويطيحوني
شبه لزلام اصل للشام
_____
احسب يمته موعدنه اريد ارتاح
عشت صبح ومسه بين البجي ونياح
شسولف وشكي حالي من يجي المصباح
افك اعيوني وعيوني عله الذباح
يصابحني ويمسيني هذاك الذابح حسيني
وحرك الخيام اصل للشام
________
وصلنه الشام والتمت علينه الناس
وانه كل بالي وحساسي يجيني الراس
بقيت ادعي يربي بداعت العباس
راسه من اشمه تكطع الانفاس
وتالي خلصت اسنيني بلحضه شبكه حسيني
عكب احلام اصل للشام
_________
اتمنه بعد موتي يجي ليه
يجيني بلا جرح الف وتسعميه
اشوفه متني وعيوني شحصل بيه
وشوفه اذني والشوك اعله رجليه
اريده من يجي سالم وجماله يشبه القاسم
ونضل اعوام اصل للشام
_______
تمت الحمد لله 29/8/1443
خادم الحسين/علي فيصل الكريطي الكربلائي
لا تنسونه من الدعاء
لحن باسم الكربلائي رحمه من تشتم هواك
لو تنقري لحن ثاني من وزن الهجري
______
موسم الدمعه بده والورد عاف النده
حسين ما مات ونشوف بموته اصبح مولده
__________________________
لو نقارن بالمصاب حسين باقي ما يروح
1400عام تشبه إعداد الجروح
لو نقارن بالجراح نقارن اشهور الطموح
12 طبرات الامام بكل شهر لحسين روح
كل أرضا كربلاء كل يوما عاشوراء
تبقه احزان الطفوف بموته اصبح مولده
__________________
خلي نفهم كربلاء نفهم الطف مختصر
شنهو معنه من نكول الدم على السيف انتصر
يعني ثوره يعني دين حسين لله انطه نحر
يعني لو ماكو حسين يعني دين الله انطبر
مئتمه باب الرجاء رحمه الله كربلاء
انته بس شيل الجفوف بموته اصبح مولده
_________________
(كل من عليها فان ) ربنه بكتابه يكول
ثنت السوره تره هيه كل اهل الرسول
حسين وجه الله تره سمعوا يا اهل العقول
إذا غصبا عالطغات حسين باقي وما يزول
الف وربعميت عام ولسه باقي حسين امام
حسين مو كهف كهوف بموته اصبح مولده
______________
نلطم ونبجي ونون ونحضر احنه بكربلاء
خلي نفهم هالمصاب وشنو معنى هالعزاء
حسين باب الله تره ومئتمه باب الرجاء
يعني من نعرف حسين يعني اعرفنه الاله
والاذن فتحوها زين سيد الجنه الحسين
سيد تكطعه السيوف بموته اصبح مولده
________________
يالتشك بهل العزاء وجبت دينك بالرياء
والدليل من الرسول دعني اروي ما لقاء
حسين مصباح الهدى هم سفينه النجاه
كل شعائرنه حسين اذن حي اعله العزاء
المئاتم تنصب والمدامع هم تصب
حسين عاشقته الالوف بموته اصبح مولده
________
حسين طاح اعله التراب وجسمه عالكاع انجوه
الله من شافه خضيب انطه للحسين الضوه
تربته صارت شفاء هيه للعالم دوه
صحره جانت كربلائه وهسه جنه نينوه
الله خصاها بفضل تربته تشافي العلل
تشافي حته المايشوف بموته اصبح مولده
__________________
غالي دمه الحسين وينتضر بالدنيا ثار
المهدي بحزانه انتضر من المصيبه دمه حار
عالخيام والفرات من الخيام بصدره نار
يضهر بثار الحسين وبيمينه ذوالفقار
يالثارات الجرح يالثارات الرمح
يردد برابع حروف بموته اصبح مولده
___________
تمت الحمدالله
15/8/2020
الشاعر /علي فيصل الكريطي الكربلائي
.
ليالي محرم
1443
لسان حال الامام الحسين عليه السلام يكلم الزهراء عليها السلام
عشر اخيول اجت تركض ردت من نومي انه انهض
اباوع كل خيامي نار وتغطيت برمال الحار
يا زهراء يا زهراء
_________
اول خيل اجتني داست بصدري
رفسني ورجله طلعت يمه من ضهري
سحك فوق السهم يمه وذبح عمري
ميت مدري عايش اني ما ادري
وصل الصوت لخيامي واحس بكسره اعضامي
عليه الزمن تالي اندار وتغطيت برمال الحار
يا زهراء يا زهراء
_________
ثاني خيل اجتني طحنت اعضامي
وباوع عالصدر مكسره اسهامي
كل طولي صبح مخضب ودامي
محتار اعله زينب لو عله الامي
احس بروحي ما تطلع ما اكدر واريد افزع
وجسمي صار كوم احجار وتغطيت برمال الحار
يا زهراء يا زهراء
________
احس يمه الهوه ما يوصل الريه
وكره الارضيه دارت يمه عليه
ضلع واحد هضمني انكسر بيه
وصل ضلعي لخيامي وشافته رقيه
وضلعي بنتي عرفته يم الخيمه شبكته
اني وياها عدنه اسرار وتغطيت برمال الحار
يا زهراء يا زهراء
_______
اجتني الخيل ردت انهض ولا اكدر
تغطيت برمل حار ودماي احمر
نسيت اجروحي وعيوني عله الخدر
اجتني وصار جسمي يشبه الاكبر
صرت اني ولا اني انكطع يا يمه شرياني
عزائي للخالق الجبار وتغطيت برمال الحار
يا زهراء يا زهراء
______
كل خيل السحكني هم ترك حفره
الحفر صاير عددهن سبحه الزهره
صفه جسمي تره ملعب عله الغبره
اختفه صوتي وصيح وماكو اي نبره
عله الغبره اختفه صوتي الرمل صايرلي تابوتي
النهايه انكطعت الاخبار وتغطيت برمال الحار
يا زهراء يا زهراء
__________
اشوف الخيل تسحك والكتلني جروح
حيره بيا كتر تطلع تريد الروح
ما يدواي الجرح يمه البجي والنوح
وزينب اه يزينب عكبي وين تروح
مصيبتها تره الصعبه وحيده بديره الغربه
يا وسفه الزمن غدار وتغطيت برمال الحار
يا زهراء يا زهراء
______
تمت الحمد لله 19/6/2021
خادم الحسين/علي فيصل الكريطي الكربلائي
ليالي محرم
ليله الانصار
لسان حال الامام الحسن عليه السلام
........
من الموت ما خايف ابد ما تهمني السبعين الف
سبعيني كسرولي القلب الزم ولف يوكع ولف
بكسر الخاطر الا من ناصر
_______________
منين ابدي يا ناس الحزن بفقد الاخو بفقد الابن
لو عله انصاري الي مشت لو ابجي اني اعله الضعن
اودعلي ولف يوكع ولف ثاني
اودع( شوذب) يقتلونه (همداني )
اودع مسلم يقتلونه نصراني
وبعيني اشاهد موت صحباني
امخلي ايدي اعله القلب صارت مواقف مو حرب
لو طاح من عندي ولف بوجهي الملامح تنقلب
وقلبي يصابر الا من ناصر
_________
سبعين خيمه بالفله كل وحده غيره شايله
والخيمه لو فقدت عمد تهتز وياها كربله
اسولف كل وداعي وي( ابن ضاهر )
لو سولف وداعي (بسالم) (وزاهر)
لو ابجي( لحميده) بفقد( ابو طاهر)
شيبت راسي والله ليله العاشر
لو طاح من ربعي غرس اركضله اني بلا فرس
هو اني عندي جم قلب ويمي يجر اخر نفس
يا ليل العاشر الا من ناصر
_______________
امشي ودلالي انمرد كل لحضه ويقل العدد
يمكن اجه دور الاخو مدري اجه دور الولد
(زهير) هم( برير )هم بعدهم (جون)
مات الجان بيه اهوايه ضل مجنون
المن اشكي حالي وبالخيم يبجون
اشكي لزينب وزينب تره بلا( عون)
لو اسولف يطول الشرح ( نافع) اشوفه منذبح
(الحر الرياحي) من وكع بيدي اخيطله الجرح
وضواي مسافر الا من ناصر
______________
اهنا بده بضهري الالم من كربله شحت زلم
وحدي اني بالحومه التفت ويمي شفت رف العلم
اباوع يمنه يسره بعيني وتحسر
لا (عثمان) يمي ولا شفت (جعفر )
لا( قاسم) بقالي ولا بقه( الاكبر )
بقه( عباس) يمي قايد العسكر
اهنا بده دور القدر من راح عباس الكمر
من صاح ياخويه اعرفت ابهايه كسرولي الضهر
راح القاهر الا من ناصر
______
صرت اني خيمه بلا عمد ساعه امشي وساعه ارد
من طحت انه علارض والخيل كامت تستعد
امشامر بالسهام وهم نبل وحجار
وشفت اني المخيم من اجاه النار
خفت والخيل اجتني والدمع مدرار
تغطيت برمل لكت رمل هم حار
اهنا حياتي اني انتهت والقصه يم زينب بدت
وللخالق انطيت النحر بس تالي سطان اصبحت
خالد باجر الا من ناصر
.....
تمت الحمدالله ليله 6 محرم 1442
خادم الحسين علي فيصل الكريطي الكربلائي
_____________
ليله الانصار / لسان حال الامام الحسين عليه السلام
يخاطب الانصار
.............
مو سبعين/ انتوا هواي عندي
والاسماء/دزهن الي جدي
شيعه اليه بالمئاتم يفتخر الاسمه خادم
مو سبعين
___________________
ابدي انصار بسلامي
عله السبعين الامامي
جدي كاتب هالاسامي بالكتاب
بالعرش مكتوب اسمكم
طاهر اعله الارض دمكم
باجر الوادم خدمكم بالكتاب مو فقط إخوان عندي
ولا فقط سبعين جندي
مسجلين (انصار مهدي) بالكتاب
لجل الثار/المهدي هو يعزم
من الانصار/عيسى ابن مريم
يأخذ بثار الغياضم يفتخر الاسمه خادم
مو سبعين
_______________
يا (حبيب) اول اذكرك
شيبتك اتعلي قدرك
اول الانصار اسمك بالممات
(زاهر )الشاعر اذكره
(جون) لسه بالي عطره
(وشبيب البصري) اصبره بالممات
(مسلم الكوفي) عله ناقه
من الجمل مبتور ساقه
وبعلي رايد لحاقه بالممات
يا مجروح/وصلي سلامي
للمختار/وللحيدر امامي
بعدك اني اليوم عازم يفتخر الاسمه خادم
مو سبعين
________________
(شوذب) (وعابس) سويه
من الكوفه اجوا ليه
همه روحين بديه بالقتال
(قاسط )وثنين اخوته
لجلي عالتربان موته
لفض اسمي وكطع صوته بالقتال
(ونس )لمن برز الهم
ال اميه من نزلهم
شيعه الشيطان قلهم بالقتال
يا ابطال /اهل نخوه وحميه
بالاجيال/فخر للرافضيه
من حبيب ولحد جاسم يفتخر الاسمه خادم
مو سبعين
______________
(يا زهير) وهذا دمك
جبت( سلمان) ابن عمك
(يا زهير) ارخصني اضمك بالطفوف
الملتقه يوم القيامه
قبلي ادخل بسلامه
بعدك اني( ابو ثمامه ) بالطفوف
(حنضله الشيباني) اكوله
مات هو بحمله الاولى
يا سلام الله اعله طوله بالطفوف
بهذا الموت/وتحقيق الشهاده
ويه المختار/تحصل قياده
قائد وبلعلم عالم يفتخر الاسمه خادم
مو سبعين
______
(وهب )كتله التحقق بيه
يا مسيح الغاضريه
تحقتت روئياك بيه بالمصاب
(يا برير )وقره روحك
تقره قران بجروحك
تسبح بنفاس نوحك بالمصاب
زايد بهمي جراحي
انضر (للحر الرياحي )
لجي هو اجه ضاحي بالمصاب
يا مقتول/ توفيقك مماتك
والايام /تخلد حياتك
من اميه انته قادم يفتخر الاسمه خادم
مو سبعين
__________
(سالم الكلبي )انه اعلم
ما عفت بالغربه (مسلم )
من اجيت وقسمت الدم كربلاء
ضهر( مسلم) بي (هاني )
الكوفه جنه وباب ثاني
جنه بيها (الهمداني) كربلاء
(الجعفعي) اذكر (وقارب)
(نافع )(ودهم الشايب )
ما نسيت اني الحبايب كربلاء
الانصار/كلها اعله بالي
اليموت /غالي يودعه غالي
اهل نخوه والمكارم يفتخر الاسمه خادم
مو سبعين
______________
(عمرو الهمداني) يومه
طاح بس شالوا قومه
بكربله حتما حتومه يا شهيد
ما متت بيوم عاشر
اسمك انته ويايه ناصر
تموت هسه وتحيه باجر يا شهيد
بكربله النزف دمه
اعتذر وبالي همه
خاف واحد ناسي اسمه يا شهيد
بعدي يموت/عالتربان ضامي
هذا الصوت/(لسعيد) ابعث سلامي
لقلبي ادري شوقه هايم يفتخر الاسمه خادم
مو سبعين
خادم الحسين علي فيصل الكريطي الكربلائي
ليالي محرم
.....
هذه القصيده لسيدتي خوله بنت الحسين عليها السلام
لسان حال خوله وهي تعتب
************
انتظر والغربه بيه شوقي للحسين ورقيه
بغربه احبابي انتصركم انه خوله
************
انتضر احباب اليه للوطن يلفوني
مومهم همه يجوني خلهم يذكروني
من البجي من دوم اخوتي مجرحات اعيوني
تذكروا سكنه ورقيه وبحزن تنسوني
للنساني اني اعتب اله اكول لعمتي زينب
بغربه احبابي انتصركم انه خوله
***********
اني خوله الليله اعتب وشرح بدمعاتي
بالبدايه اني اسلم لخوتي وعماتي
بغربه محد جاب اسمي ولا سمع وناتي
حته اصحاب المجالس نسوا شنهو ذاتي
بكربله شفت المصيبه وبالمئاتم هم غريبه
بغربه احبابي انتصركم انه خوله
**********
راح اسولف اني حزني سمعوا حزني وصوتي
متت اني اعله الهزيله والهزل تابوتي
شنهو ذنبي واني طفله باليسر حل موتي
لا حضر ليه ابويه ولا اجوني خوتي
بس علي هو الحضرني وحيده بالغربه دفني
بغربه احبابي انتصركم انه خوله
*************
اعرف بدمع اليفارك وعرف بحنيته
الله اليعين العليله شلون سكنت بيته
عايشه والدار خالي وتنتضر بس جيته
ما اضن عدله بغيابه اضن عكبه ميته
سنين ضلت بنتضاره تالي ما رد اعله داره
بغربه احبابي انتصركم انه خوله
**********
ليش يصحاب المجالس وشعجب ناسيني
خاف ما تعرفون اسمي اني ابويه حسيني
انتضر جيه محرم وبالقصائد عيني
بالقصيده الماكو اسمي الطم بجفيني
اني من حسين دمي ليش محد ذكر اسمي
بغربه احبابي انتضركم انه خوله
***************
احضر اني بالمجالس جالسه ويه الزهره
من الخيام جروح بيه أثر سحك الجمره
الف هنياله الي يحضر وعله ابويه يقره
بجفي اكتب الينادي فاطمه بس نضره
بالمئاتم ريجي يابس لمن احضر بالمجالس
بغربه احبابي انتصركم انه خوله
****************
خادم الحسين/علي فيصل الكريطي الكربلائي
ليالي محرم 1444
لماذا لم يتحدث الشعراء عن عباده زينب عليها السلام
يروي الامام زين العابدين في ليله الحادي عشر كانت محتركه الخيام وعلى ذاك الحال ونضر عمتي زينب عليها السلام تصلي صلاه النافله وكانت تصلي صلاتها من جلوس
زينب اميره كربله صلت صلاه النافلة
سجدت على ارماد الخيم وجانت اديها مكبله
زينب زينب
__
صلت صلاه جالسه والقبله صوب المشرعه
والنار تاكل بالخيم من الجهات الاربعه
بس هيه زينب مؤمنه والمؤمن اسلاحه الدعه
والحيره وبصف الخيم جثه حسين مكطعه
بالسفر ما صلت قصر وسجدت بعد سجدت شكر
لا عجبا من هل الامر بل إنها ام الصبر
زينب زينب
__
زينب توضت بالدمع وفراشها اقماش العلم
صلت صلاه النافله بين الرماحي والسهم
تدعي الالهي شاكره شكرا على كل النعم
ويمها رقيه نائمه متوسده برماد الخيم
تنضر حسين بلا دفن ما صلت الوحشه اضن
شافت ضلع يم الخيم والخيل طاحنته طحن
زينب زينب
_
سبعين واحد فاقده والمتن يتجاره دمه
مشتعله كل الخيم والليل تقضي قائمه
صلت جلوس زينبا ومحتركه بجروح الضمه
ومتوجهه لصوب النهر وبجفها سبحه فاطمه
وساجده فوق الترب وحسين يمها منسلب
كل الحوافر داسته ومحتاره زينب بالغرب
زينب زينب
__
صل على محمدأ اتردد بطول الدرب
زينب تره اول مره تصلي النوافل بالحرب
عالهزل تقره الفاتحه وبالغربه كاتلها الغرب
وتنادي ابو فاضل مدد لمن متنها ينضرب
لمن متنها ينجرح تخاطب بسكته الرمح
لكن سوالفهم دمع وعباس يفهم بالجرح
زينب زينب
____
من السبي ما عاتبتت والحره مكسوره ضهر
زينب تره ليل اهدعش صلت على ذاكه النحر
لمن لبو فاظل تحن تتوجه لصوب النهر
ايات تقره عالهزل وتهديهن لروح القمر
تتوجه اعله المشرعه تقراله هيه الواقعه
وتذكر صولته اعله النهر وتقراله هم الزلزله
زينب زينب
_
لمن متنها ينضرب باليسر تقره البسمله
لو أريد اسولف كربله بل هيه زينب كربله
عن زينب انسولف بعد غير صلاه النافله
ام اخوها لقبت وبعد الكفيل كافله
اول اميره اعله عالهزل وبجفها مشدود الحبل
كانت كا داود النبي والشمر كان كالنمل
زينب زينب
_
تمت الحمد لله
٢٣/٧/٢٠٢٢
لا تنسونه من خالص دعائكم
خادم الحسين/علي فيصل الكريطي الكربلائي
ليالي محرم
وكأن بالسيده زينب عليها السلام تأدي مناسك الحج في كربلاء
......................
مراسم حجي هذا العام ماكو خيمه ماكو خيام
من حسين للشاطي سبعه احسبهن اشواطي
مراسم حجي هذا العام
**
للحج مناسك اني اعد بحج الإسلام
سعي وطوافي والوداع ولبس الاحرام
احرامي اسود من طفت بحجي هالعام
حسابي مطافي الخيمه بس محتركه الاخيام
مطافي بس ركض يا ناس من حسين للعباس
بمتني توجع اسياطي سبعه احسبهن اشواطي
مراسم حجي هذا العام
****
قران من شرط اليحج ويرتل بنوح
لكنه حجي بكربله ايشيب الروح
اقره الزياره اعله الجسد وحسب بالجروح
الف وسبعميه جرح وقرأني مذبوح
الحوافر داست القرآن ونزفت سوره الانسان
بجرحي ضايع اخياطي سبعه احسبهن اشواطي
مراسم حجي هذا العام
***
رمي الحجر شرط اليحج معروفه هيه
لا ما رميت اني الحجر رمو عليه
لكن مناسك حجي انه بالغاضريه
بعد الحجيج مكيده وامشي سبيه
بمراسم حجي محتاره عليه رمي الحجاره
الكافل يسمع اعياطي سبعه احسبهن اشواطي
مراسم حجي هذا العام
*
شرط اليحج هم ينفرد وبروحه ظنه
كل النسه انفردن شفت بقبور اهلنه
للقاسم رمله من مشت بديها حنه
ولعلي ليله من مشت ما لكت منه
كل ثكله تهيل العين ونه كل بالي اخوي حسين
اخويه اللوله بكماطي سبعه احسبهن اشواطي
مراسم حجي هذا العام
***
هاي المناسك تختلف ودموعي من دم
عطشانه احجن بالفله وبالماي احلم
اطلب انه ماي العذب ما ردت زمزمز
غير السياط ال علمتن والدمعه والهم
بحجي بليله العاشر ورايه تركض الحافر
وخوتي تعرف ازماطي سبعه احسبهن اشواطي
مراسم حجي هذا العام
****
اخر مناسيك الوداع وحجه تكمل
للعباس اني رايحه لو مني يزعل
ابعيده المسافه للنهر والركضه للتل
بختم الوداع الخل تره يفارك الخل
ابو فاضل ينور العين أودع عينه والجفين
وخلص دمعي عالشاطي سبعه احسبهن اشواطي
مراسم حجي هذا العام
***
خادم الحسين/علي فيصل الكريطي الكربلائي
ليالي محرم 1444
لسان حال السيده زينب عليها السلام
عندما رئت الإمام الحسين عليه السلام في الخرابه
كاعده بنص الترابه صتفه شفتك بالخرابه
بقلبي ديره من الحجي الما ينحجي
راح اكعد يمك واشبع بجي
صتفه شفتك بالخرابه
___
راح اطلع ضيم قلبي //والسوالف باليسر
خويه وبعازت بواجي//راح اموت من القهر
راح اسولف والحجي كلش صعب
خويه اخفي اعيوني لمن انضرب
فشله تنطك مره ما بين العرب
خويه والضربوني هم وآدم غرب
اختصر كل الرزايه احتركت ويايه العبايه
بلا ابو فاظل عليمن اتجي
راح اكعد يمك واشبع بجي
صتفه شفتك بالخرابه
___
جيتك وشكي عذابي// ودمعي يمك ينجفي
لان ادري انته يخويه//هم غيور وهم وفي
السالفه المره اسولفها بالم
اعله راسي طاح عامود الخيم
خويه من المستحه بين الزلم
خويه غطيت الوجه حته بعلم
والله خويه مو بديه اركض وغصبن عليه
اتعب وبسكينه كل ساعه اتجي
راح اكعد يمك واشبع بجي
صتفه شفتك بالخرابه
_____
باليسر ردت اشتكيلك// ضيم قلبي والجرح
حاولت احجي ويه راسك // عالي لكنه الرمح
ردت اعاتب وستحيت من الجفن
من شفت اثار حافر عالوجن
ردت اكلك والحجي كله حزن
لمن امشي حيل يوجعني المتن
من رحت اني أسيره صرت حجيه جبيره
ابجي انعه يمك بصوتي الشجي
راح اكعد يمك واشبع بجي
صتفه شفتك بالخرابه
__
راح اسولفلك ركضتي// من عفت كل الحرم
ركضه وحده خويه اركض // من الشريعه للخيم
اشتكيلك والحجي يا خويه مر
فشله تركض مره مكسوره ضهر
من ابو فاظل اريد اني العذر
الركضه ركضه خوف من عند الشمر
الشمر يتراكض ورايه بسوطه موتها السبايه
من ابو فاظل اطيح ورتجي
راح اكعد يمك واشبع بجي
صتفه شفتك بالخرابه
_
راح اسولف عن بناتك // جتفوهن بالحبل
ماتت من الضمه خوله//وشيعوها اعله الهزل
اسمع تنادي سكينه العالمه
عمي جيب الماي كاتلنه الضمه
وعاتقه جفينها تتجاره دمه
وماتت الطفله رقيه فاطمه
امنتني اعله الوصيه ماتت الطفله رقيه
والعليله تريد يم راسك تجي
راح اكعد يمك واشبع بجي
صتفه شفتك بالخرابه
___
راح اغفه اني اعله راسك // وخل سوالفنه سكوت
ريت اصير اني رقيه // من اشم عطرك اموت
ريت اموت ولا اعيش بمستحه
متني لو مره الهوه هم يجرحه
انطحن قلبي مثل طحن الرحه
وجفني من الحزن ما نام وصحه
خل اخبرك بالعجيبه صرت مو زينب غريبه
أشد من السوط يوجعني الحجي
راح اكعد يمك واشبع بجي
صتفه شفتك بالخرابه
___
المعذره من صاحب الزمان عج
لا تنسونه من خالص دعائكم
تمت الحمدالله 27/6/2022
الخادم /علي فيصل الكريطي الكربلائي
ليالي الزينبيه 1443
الحزن طف ويسر احسب وشم بي
جسم حسين بالحومه اشم بي
الخيل من السحك تركت وشم بي
وضلوعه وصلت لخيمه رقيه
.............................................................
عشت طف ثاني بحياتي
الخيمه حركت امنياتي
وسبب موتي ذكرياتي
_
ذكره ذكره عشت وي عالم خيالي
شما ردت انسه يجي حسين اعله بالي
من اباوع للسمه وذكر دلالي
اذكر حسين برمح بس راسه عالي
عالرمح عينه عليه
شفافه تلفض بس رقيه
يوصي ويكلي بناتي يوصي ويكلي بناتي
___
من اشوف الماي اذكر كم مصيبه
اذكر العباس بس منهو اليجيبه
عفته عالشاطي ورحت منه غريبه
عشت دور الفاقد الميت حبيبه
عفته نايم عالشريعه
لكن اجفوفه كطيعه
ودعت يمه غلاتي ودعت يمه غلاتي
_
بذكريات اليسر والطف كثرن اجروحي
كربلاء يا ناس هيه الطلعت روحي
الشمر ضل صوته اعله بالي يهيج بنوحي
يالله يا زينب تعالي بكيفي هم روحي
بكيفه يتمرجل عليه
وكيد احبال بديه
اسمع يشتم خواتي اسمع يشتم خواتي
__
من يجيني الليل اذكر ليله العاشر
ويه صوت النفس اسمع ركضه الحافر
اشلون انام وشفت اخويه يكسر الخاطر
قطعه قطعه صار جسمه كله متناثر
رحت بليل ارد احضره
بست صدره وطلع ضهره
من العطش يبست لهاتي من العطش يبست لهاتي
__
من اشوف الشمس حزني ينمد ويكبر
عالرمح اذكر حسين من الشمس اسمر
شما ردت اغفه جراحي يلجم اكثر
يجي ابالي خنصر ايده وصدره المكسر
اغفه وتفززني دمعه
صوت عبدالله اسمعه
فكري بالطف حد مماتي فكري بالطف حد مماتي
_
من بعد طف المصيبه ولوعه الهم
ونه يوميه تره طف ثاني احلم
ابالي ركضه ورجلي لسه بيها اثر دم
ركضه وحده من الشريعه للمخيم
برجلي اسحك جمره جمره
امتوني من الضرب حمره
والحرك لسه بعباتي والحرك لسه بعباتي
___
تمت الحمد لله 7/2/2022
لا تنسونه من خالص دعائكم
الشاعر /علي فيصل الكريطي الكربلائي
عشت كل هاي الاسنين افسر موت الحسين
ميته بيوم الطفوف ميته بيوم الطفوف
________________
بلا انفاس انه أم عباس
قبل سنين ميته وناصبه المئتم
متت مرتين ينور العين
ميته من زمن بشرني ابن حذلم
متت ب اه ألف ويلاه
احترك قلبي يغالي بحرك المخيم
بجروح اهواي عشت دنياي
بقيت احلم شملنه يرجع ويلتم
عشت عالدمعه والنوح عشت ومفاركه الروح
وحزني صار معروف وحزني صار معروف
____
عشت اهموم ميته بيوم
من جاني ابن حذلم ناشر اعلامه
يصيح بصوت فات الفوت
لمن جيته اني ذب العمامه
كتله شلون كلي ضعون
حسين بلا اخو ومكطع احزامه
كتله حسين كلي وين
كال الخيل بالطف طحنت اعضامه
لمن شفت زينب راسي وياها شيب
عميه وجت ماتشوف عميه وجت ماتشوف
__________
عشت ايام بالاوهام
بس جلد وعضم والروح ماهيه
من سنتين عشت اونين
كل ليله اعله ابني اقره لطميه
يتسئلون مت اشلون
احجي بالدلاله واني محنيه
بهجم الخيل مات الحيل
جنت كل ليله اقره الفاتحه عليه
ميته وهذا حالي من عفت الغوالي
متت بالفركه والخوف كنت بالفركه والخوف
________
صبري ايوب حزني يذوب
المن اني اعيش ومات قرئاني
من ضليت خالي البيت
بس اني وفضل والباب وحزاني
بلايا روح عشت بجروح
واوراق العليله صارت اجفاني
عقب عباس شاب الراس
ضل الفضل وحده وعاش بحضاني
من الفضل الانفاس اشمن عطر عباس
عكب مكطوع الأجفوف عكب مكطوع الأجفوف
__________
اخت حسين روت مرتين
وقلبي من الخبر هم خابت اضنونه
حسيني مال غطاه ارمال
حته الخيل نايم ما يشوفونه
تالي انشاف اتغطه وخاف
سحكوا قلبي ريت ولا يسحونه
تالي مات بالحسرات
عله صوب الخيام مفتحه اعيونه
خبر واحد ذبحني شصاير بيك يبني
تكطع من السيوف تكطع من السيوف
_______
يجيني اليل بالياويل
اشلون اني انام وغمض بعيني
اشلون ارتاح ودري الراح
ثلث تيام بالحر نايم احسيني
يا ريت البين قبل حسين
قبل حسين ريته ماخذ سنيني
يريت الصار والاخبار
يريت الموت جاني وعايف ابنيني
ماتت ريت الاحزان من لفوني بجفان
ومصابي كمر مخسوف ومصابي كمر مخسوف
_______
اتمنه حسين نور العين
وبساعه منيتي يغمض اعيوني
اموت بهاي حلم دنياي
منيتي اعله النهر اهلي يدفنون
يمي اخيام هاي احلام
اذا من جربه العباس غسلوني
رفع راس اذا عباس
اذا بالرايه ويه اخوانه جفنوني
احله من الشهد هاي اذا اموتن عله الماي
وجرحي حسين الي يروف وجرحي حسين الي يروف
_______
تمت الحمد لله ٢٥/١/٢٠٢١
خادم الحسين/علي فيصل الكريطي الكربلائي
بالمغتسل دمعي نزل وصار الدمع تغسيل
من المست كسر الضلع يالزهره مات الحيل
وجهزت بجفوفي النعش لورده وعمره اثمعطعش
بالمغتسل
_________
ضليت انه بلا نفس وضلعج اشوفه مكسر
اشلون اغسلج فاطمه هو انتي ماي الكوثر
الاجدام ما تعين الجسم اوكف يزهره واعثر
وشلون اصبر فاطمه ونضر لخدج احمر
اني طحت لمن شفت مكسور ضلعج اه
تالي بجفن يم الحسن يزهره واويلاه
اايدي اعله جسمج ترتعش ورده وعمرها اثمنطعش
بالمغتسل
_______
يالزهره اغسلج بالدمع وعليج كل احزاني
من المست كسر الضلع صرت اني لا مو اني
من بعدج اني فاطمه صرت اني واحد ثاني
ضليت اني بلا ورد ومني احترك بستاني
مات الورد ومني ابتعد وضليت هم محتار
عالباب اون وكلي حزن ومكابل المسمار
وجسمي عله الباب انفرش لورده وعمره اثمعطعش
بالمغتسل
_______
للمغتسل امشي وارد يزهره عالي اونيني
مدري اون عله الضلع مدري اون للجنيني
جرحتني زينب والحسن وشيبني حيل حسيني
من البجي يا فاطمه خلص دمعها عيني
ما اضل امل بالمغتسل غسلت بيدي الروح
يا فاطمه حامي الحمه من فركتج مجروح
واسمج عله كلبي نقش لورده وعمره اثمعطعش
بالمغتسل
___
غسلتج اني فاطمه وضليت اني بعازه
ويموت بحساسه القلب لمن يودع اعزازه
خيبر عليه اشكد سهل وصعبه عليه جنازه
شيعتج اني فاطمه وللموت جسمي توازه
بليل الحزن اومشي واون وشايل سمه بجتافي
البيرغ هدل ودمعي نزل وامشي بجنازه حافي
ودفنت بجفوفي العرش لورده وعمره اثمعطعش
بالمغتسل
_
بعد الدفن يا فاطمه اشلون ادخل بيتي
بجفوفي تالي بالترب اني ادفنت عافيتي
لو شفتي حالي فاطمه جان اشكثر ونيتي
والباب مطبوك بحزن والهوه يخنك ريتي
بعدج نحت وتألمت ومنتضر بس الاحلام
من حسرتي وبحجرتي ضليت عشر ايام
وليلي عكب وجهك وحش لورده وعمره اثمعطعش
بالمغتسل
____
تمت الحمد لله ١٩/١/٢٠٢١
خادم الحسين/ علي فيصل الكريطي الكربلائي
1443
(لسان حال الامام السجاد عليه السلام )
ريت ميت/واني ايامي كصيره
ريت ميت/ولا شفت ذيجه الحصيره
حسين لميته بديه حسين لميته بديه
ريت ميت ريت ميت
______
انه قبل المخيم محترك دمي
انه الدافن اخوي والدي وعمي
تمنيت ويه الاكبر قطعوا جسمي
تمنيت الحوفر كسرن عضمي
ها يموتي/احسب ايام للمماتي
ها يموتي/خذت بالطف امنياتي
موتتني الغاضريه وموتني الغاضريه
ريت ميت ريت ميت
__________
انه اتمنه متت بالطف الف مره
ولا اشاهد ابويه ينكطع نحره
ولا شلت الحصيره البيها الف وذره
اشيلن صدره يوكع بالدرب ضهره
وضلع ابويه/وصل يم باب المخيم
وضلع ابويه /يبس وعليه جامد الدم
من سحكها الاعوجيه من سحكها الاعوجيه
ريت ميت ريت ميت
_________
قبل الطف متت كون وخلص عمري
ولا ادفن اخويه وينكسر ضهري
علي الاكبر كسر قلبي وهدم صبري
تمنيته يجي الليله يحفر قبري
علي الاكبر/وسدت بالترب خده
علي الاكبر /ماي من ايدي وتبده
راح اخويه من اديه راح اخويه من اديه
ريت ميت ريت ميت
___
يا ريت اني متت مره متت مرتين
ولا شفت الطفل مات اعله صدر حسين
ولا ادفن ابو فاضل بلا جفين
ولا اسمع عتب زينب يشيب العين
من دفنته/غارك الدم بلحيته
من دفتنه/عمي ميت بس نخيته
بالسبي يحضر اليه بالسبي يحضر اليه
ريت ميت ريت ميت
________
تمنيت الخيم لو طاحت اعليه
اموت ولا اشاهد عمتي مسبيه
ولا اشاهد رقيه مضيعه ترجيه
ولا اصعد هزيله وتبقه علويه
كون ميت/ولا شفت زينب سبيها
كون ميت/ولا تركبني بديها
وتبقه وحدها السبيه وتبقه وحدها السبيه
ريت ميت ريت ميت
_______
يريت الموت اجاني وخلصت اسنيني
ولا اشاهد سكينه تمسح بعيني
ولا خوله تموت بديره تسبيني
الف موته متت بفركه حسيني
الموت اسهل/ولا تتانيني العليله
الموت اسهل/اتاني ابويه تشتكيله
وشنهو اجاوب عن رقيه وشنهو اجاوب عن رقيه
ريت ميت ريت ميت
______
خلص تالي العمر بالحسره ولامي
محرم وبمحرم خلصن ايامي
عله افراش المنيه ونعه عالضامي
من الخيل ابدي للحركه اخيامي
الموت اجاني/يا هله وميه هله
الموت اجاني/شيبتني كربله
وحانت الليله المنيه وحانت الليله المنيه
ريت ميت ريت ميت
_____
تمت الحمد لله 30/8/2021
خادم الحسين عليه السلام/علي فيصل الكريطي الكربلائي
حكايه وفه طوعه وفه ام البنين عليهم السلام للحسين عليه السلام لسان حال الشاعر
___________
والوفه لو نقيسه عمر ولو نفهم الطف مختصر
من طوعه تبدي كربله وتنتهي بزود ام الكمر
اول اثنين وفوا حسين
___________
سوالف طوعه بحجايه المواقف لكن اهوايه
طوعه هم قبل عباس صارت هيه روايه
قبل هاي المواكب طوعه من سنين
فتحت موكب اسمه موكب الحسين
وزعت ماي مزجته بدموع العين
انطلقت منها ثوره والعزم للدين
بالموكب الضيف استقر وبجفوفها روت نهر
روايه صارت بس تره ما نطت لا جف ونضر
تره الجفين وفوا حسين
_____________
قصصها اهوايه بذهاني اسولف موقف الثاني
مواقفها ولا ننسه بدفنه مسلم وهاني
الموقف لونحسبه يبين بكلمه
موقف طوعه بيض وجه ابو اليمه
طوعه لو نعدها مو فقط حرمه
طوعه موقف وتسوه الف زلمه
من شحت الكوفه زلم صارت عله مسلم علم
بالوفه صارت كربله صارت شريعه هم خيم
طوعه للدين وفوا حسين
________________
النامت عدها علويه وربت الحسن هيه
ما معقوله عالعاقل اسمها يصير بدويه
الحسن ندري كريم وهوه ابو القاسم
هيه لضيفه تطبخ زاده للوادم
وفيه اشكد وفيه ام كمر هاشم
احترام لفاطمه غيرت اسم فاطم
باقي فضلها بكل زمن ام صارت لم الحزن
وام الحسين ونخوته نسميها هم ام الحسن
ام البنين وفوا حسين
______________
نطت لحسين ضنواها لكن الله انطاها
لتسهيل الامر هيه الحمد للحاجه نقراها
نطته كل ولدها وهيه خجلانه
الفضل كالت لو انطيته بعد انه
عله حسين وذبحته لسه حزنانه
بعد الموت تحضر مجلسه ويانه
الخنسه خل تنسه الحزن وتنسه حزنها اعله الابن
مدرسه اسمها ام البنين وتتعلم ادروس الضعن
وتهمل العين فوا حسين
___________
بم عباس لو ابدي اهوايه افضالها انه عندي
بفضها هيه باقي الدين بفضلها ثوره المهدي
ثوره كربله من عدها هم مقياس
لو ما هيه ربنه ما خلق عباس
للذالك الله خصها حاجه بين الناس
نقره الفاتحه الها بدمع وحساس
ام الوفه والمعرفه مو فقط انطت اربعه
انطت جبال بكربله وخجلانه لسه المشرعه
وضحت اسنين وفوا حسين
تمت الحمدالله 24/8/2020
خادم الحسين/ علي فيصل الكريطي الكربلائي
_______________
لسان السيده زينب عليها السلام عندما رأت مقتل الحسين عليه السلام
لحن مسلم الوائلي
يحسين وين اليوجعك دليني
_____
بسبحه الزهره من اعد اجروحك
من يا كتر يحسين طلعت روحك
ما ميزت صدرك يخويه وضهرك
يحسين راح اني اقبل نحرك
من يا كتر يحسين طلعت روحك
........
مفروش خويه عالارض وكل الجسد متوزع
ومنين الزمك تلجم والجسد كله مكطع
وبيش اروفك حايره ماعندي غير المدمع
خوفي اجر بيدي السهم وياها روحك تطلع
يخويه يحسين/بيا زمن تالي يلجمك جفي
يخويه يحسين/خوفي يلجمك هذا دمعي اليجفي
مثل العشب انحني ومايكسروني
نام انته خويه وخلهم يضربوني
للخيمه ادري هسه واصل نوحك
من ياكتر يحسين طلعت روحك
_________
مرتين يا خويه طحت اسم الله اعله زينب تعثر
من طحت اني عالوجه وبعيني صار الخنصر
امشي ومقاتل عالارض تالي اوصلت للمنحر
رديت خويه وهم طحت وعثرت فوق الاكبر
ابعيده المسافه/بين الخيم ومذبحك والشاطي
ابعيده المسافه/يمكن سعيت اني سبع اشواطي
كم مره طحت علارض يالغالي
بس اطمئن محد يشوف اخيالي
لو طحت ادري تلجم اجروحك
من يا كتر يحسين طلعت روحك
.............
متوضي يحسين بدمه وتصلي فوق الامك
بالسجده ادري تنجرح اهوايه ادري اسهامك
والقبله صارت كربله ومتوجه اعله اخيامك
اشلون اخويه كبرت ومكسرات اعضامك
صليت يحسين/باجر ورايه نايبه من الغبشه
صليت يحسين/خويه اعله روحك انته صلي الوحشه
باجر سبيه بصبح يوم العاشر
باجر ورايه تدري تركض حافر
بس بالنهايه خل اشم بفوحك
من يا كتر يحسين طلعت روحك
.....
نايم عله وجهك عجب يحسين الله يصبرك
خوفي اقبل بالصدر وتاليها يطلع ضهرك
نايم صدك يبو علي وتسحك الخيل بصدرك
لو ما يتامه وعائله اتمنه اموت بكترك
من بعد عباس/اني الكفيله وانته رفعه راسي
من بعد عباس/لا مو اسيره وزودي من عباسي
التل شهدلي والرساله بيدي
يبقه الحجاب وخل يموت اوليدي
ام عون اني وزودي من املوحك
من يا كتر يحسين طلعت روحك
....__________
مستغرب بوجهي اشكثر جنك تكول اشبيه
من الخيمه وجهي اسود صبح ورماد هذا البيه
دخان يحسيني تشم لو تشتم الحنيه
ما سولفتلك عالحرك وعله ايدي المجويه
من شبوا النار/ شردن بناتك ركض وسط الهيمه
من شبو النار/احترك جفي واني اطفي الخيمه
ما اريد اخفي جروحي تاكل بيه
سلبوا سكنه وباكوا الترجيه
مجويه ايدي والجم لو الوحك
تمت الحمدالله6/12/2020
_______
المقصر مع الحسين /علي فيصل الكريطي الكربلائي
ليالي محرم /وتنقري في ليله الانصار
.......................
كتاب النبي بيدك بعد سبعين وزداد العدد
قصه ابتدت من كربله بجيل المآتم تنولد
......،.................................
كتابك بده بعمر الدهر يمغذي بشفافك نهر
بيك الرسالات ابتدت بهلالك وجيت الكمر
يحسين اريدن افتهم شمسوي انته للدهر
قبلك ولا سوه نبي واقف وللموت انتضر
من قلبك انصاب بضمه _ عطشت تره حته السمه
وناحت عليك الزلزله _ بجيل المأتم تنولد
.............................،.........................................
تدري وسولفلك بعد ابليس لادم ما سجد
لو يدري شنهو مصيبتك جا صله يحسين وكعد
ولا نزل آدم للارض وشيطان للنار ما صعد
بس حكمه الله بهل الامر حته مئاتم تنوجد
اول مئاتم بالسمه _ بالعرش تحضر فاطمه
ربك نطاك المنزله _ بجيل المئاتم تنولد
................................
لو نحسب اجروح ودمه يلئسمك موكف السمه
الف وسبعميه جرح تزداد سبحه فاطمه
يمصلي عالتربه بسهم ومتوضي يحسين بدمه
بس الف وسفه اعله النهر الخله قلبك بي ضمه
أدري بصلاتك تنهضم _ بالسجده اذاك السهم
تفسير هاي المسئله _ بجيل المئاتم تنولد
...............................................
دينك لمن رادك ملح اوقفت انته عالرمح
قصبأ على انف العده اذنت اذان الجرح
دمك عالسيف انتصر يا باب الله المنفتح
مو خوف تبجي بكربله تبجي لان قلبك سمح
دينك لمن رادك ضوه _ انطيته يحسين الهوه
ونطيت لجله قافله _ بجيل المأتم تنولد
........................ .......
العده بيك اتوهمت كالو عليك انته متت
ما يدري سيافك وقع يحسين ونته الي عشت
بجيل المأتم تنولد شما يمر بيك الوقت
تروح المله بمر الزمن بس انته سلطان اصبحت
اسمك يضل للاخره _ بس مات سيافك تره
والشيعه بيك مدلله _ بجيل المئاتم تنولد
.........................................
بغار النبي يسيل الدمع ويه الحمامات اجتمع
يقرالهن ايات وقصص وهنه لحديثه تستمع
من طلع الحسين بأمر كالو طلع لجل الطمع
والامه كلها غدرته طلعو عليه بكم فرع
من الكوفه القصه ابتدت _ وبكربله القصه انتهت
بس تبقه دوم اعله العله _ بجيل المئاتم تنولد
تمت الحمدالله
الشاعر/علي فيصل الكريطي الكربلائي
@@@@@@@@@@@@@@
ليله ام البنين
الامام الحسين وذا به يوصي ام البنين
ان تدعيله من جروح كربله
_________
.
ادعيلي./يم كربله صار الخبر
ادعيلي/من الخيمه وجروح النهر
يا ام البنين . يا ام البنين
...........................
ادعيلي يا ام الكمر. دمي اريده ينتصر
وبيدي اشيد الدين
بيدي رسالات النبي ادعيلي يمه تحملي
صار الحمل للحسين
لو رحت اني تاخرت. معنى القصد يعني متت
واسي العليله زين
يايمه لو عاد الضعن. وسمعتي صدري منسحن
لا لا تسيلي العين
اشتاقلج/. ياريحه امي بفطرتج
اشتاقلج/. يا مغطيه دنيا بدمعتج
يا ام البنين يا ام البنين
.................
يا يمه يا جلمه هله. ادعيلي اوصل كربله
ادري الدمع سجاب
انويلي ركعات الحزن. وتذكري رن الضعن
وصليهن اعله الباب
وسبحي وسيلي الدمع. وتذكري كسر الضلع
وخلي الجروح اجواب
اضلاعي كلها تنكسر. اواسي الزجيه بهل الامر
بس حيره الاحباب
احبابي/ انضره كلها اعله الثره
احبابي/. ادري الجروح مطشره
يا ام البنين يا ام البنين
...........
ادعيلي بلماي العذب. تدرين بجروح القلب
وجروحي ماتلتام
يا يمه انويلي فرض. صعبه صلاتي اعله الارض
موصدري كله اسهام
وبالي بس حيره بقت. يمي رقيه لو اجت
اشلون اعله صدري تنام
راح اني اموت ودعوتج. انويها يم ابنيتج
ويلي اعله هضم الشام
ادعيلها/. هاي الغريبه ام الخدر
ادعيلها/. يسهل عليها اليسر
يا ام البنين يا ام البنين
.................
يا يمه اقدملج شكر. قدمتي اثلاثه وكمر
يا يمه رفعه راس
كل واحد يعادل جبل. خليني اسولف عالفحل
هذا البطل عباس
يا يمه مو بجه النهر. خله بعساكرهم مفر
صار الحرب مقياس
رفعتي راسي بربعه. وعليهم اقري الفاتحه
خليها عطر انفاس
مشكوره/. يمئصله يم الشيم
مشكوره/ موجود عطرج بالخيم
يا ام البنين يا ام البنين
................
مشتاق يمه لشوفتج. ترعب الدنيا هيبتج
واني دموعي تسيل
كاعد وفكر بالخيم. بس شوفتج صارت وهم
وجرح الافراق اطويل
لجروحي يايمه دوه. وبدونج ابقه بلا هوه
يمبجيه حته الليل
اخر دعاء ادعي بعد. يحفضلي يايمه الجسد
ويسلمه من الخيل
لجروحي/. صلي فرض اعله النهر
لجروحي/. وصلي لجروحي التنتضر
يا ام البنين يا ام البنين
..................
يايمه يلقلبج سمح. لو تسمعي راسي اعله الرمح
يعني القصد ما جيت
لا تحزني لا تجفلي. شمي العطر ببني علي
عليل وعليه وصيت
لو عاد ضعني بدمعته. وام البنين الواسته
تبقين شمعه بيت
ادري القاروره امتلت. وحساسج ادري بي صرت
بس الج فخر الصيت
بوداعي/. هاي النهايه الخاتمه
بوداعي/. يا ثاني امي فاطمه
يا ام البنين يا ام البنين
..........
خادم زينب علي فيصل الكريطي الكربلائي
