963
قصائد مع الحانها لخادمكم موسئ الخادم
تهدمت والله اركان الهدى
......
صوت جبريل اعتله ابسابع سمه
صوبو هامت علي حامي الحمه
خضبو محرابه ويلي بالدمه
ويتمو ولد الزجيه فاطمه
وزينب الصارت غريبه
ياعظم هاي المصيبه
تهدمت والله اركان الهدى
......
علي ماتمم صلاته بالفجر
بالسجود الاول وراسه انطبر
ويلي ما كمل صيامه ابهل الشهر
والمناجاته بجه الليل ابقهر
واعتله بفكده نحيبه
ياعظم هاي المصيبه
تهدمت والله اركان الهدى
.......
ضجه صارت بالارض لجل الولي
وصيحت الاذان ارجع ياعلي
اليتامه اخلاف عينك تبتلي
الفكد مثلك همه ابد ما ينجلي
بعدك الوحشه رهيبه
ياعظم هاي المصيبه
تهدمت والله اركان الهدى
.......
بعد عينه الدنيه فاركهه الفرح
كلشي بيهه اتغير وكلشي انذبح
وشهر رمضان اعله توديعه انجرح
جرح ما يشفه الامر واقع صبح
صوبو هامت حبيبه
ياعظم هاي المصيبه
تهدمت والله اركان الهدى
.......
ألعرش واللوح بمصابه انفجع
ويلي عالكرار صيحاته رفع
وحشه ظل محرابه خالي امن الجمع
واله يشتاك السجود اويه الركع
الصلاه لجله كئيبه
ياعظم هاي المصيبه
تهدمت والله اركان الهدى
.......
باجر المهدي ابطلعته ينتفض
ياخذ ابثار الصميدة والفرض
ويمحي كل جور وظلم فوك الارض
وبيده ينشر خيرهه بطول وعرض
بس تضل روحه سليبه
ياعظم هاي المصيبه
تهدمت والله اركان الهدى
.......
كلمات
✍ موسى الخادم
من غمض اعيونه.. طاحت زينب .. طاحت زينب
رادو يشيعونه ....ركضت زينب ... ركضت زينب
خلف النعش تصيح .... ياهو بعدك يبقى الي
خلف النعش تصيح .... وين رايح يا علي
......
الساعه الاخيره وي علي
جانت اشد كل ساعه
زينب تعايله بهضم
وحيدر يضم بوجاعه
لا بيهه تدّنه اله
لا بيهه حمل اوداعه
تتمنه جانت كعدته
ويضمهه بين اذراعه
اتمنت يرد ليهه .... سالم هامه ... سالم هامه
ويكعد يحاجيهه .... عن ايتامه.... عن ايتامه
ما حسّبت يموت ... اكبالهه اعظم ولي
خلف النعش تصيح .... وين رايح يا علي
........
زينب على اوداع الابو
ما بطلت دمعتهه
ومن عاينت كصته اعركت
زينب علت ونتهه
طاحت عليه وشبكته
شبكه بكبر محنتهه
وبعمامته ظلت تشم
بجه الحجر حالتهه
يم راسه مفجوعه.... كعدت هيه . كعدت هيه
صيحتهه مسموعه ... ظل اشويه . ظل اشويه
يمي ابقى لا تروح ... يا أعز من كل هلي
خلف النعش تصيح .... وين رايح يا علي
........
من غمض اعيونه اركضت
ركضت امفارك خله
من طولهه فوكه هوت
لتموت بوية ادكله
المثلك يفارك يا علي
للموت يمشي احسله
اكعد يسباح الكَلب
بعدك اعيش ابعله
ما احمل افراكك ... ارحم حالي . ارحم حالي
كل لحضه اشتاكك .... شاغل بالي . شاغل بالي
عن بالي ما تغيب .... حزني بعدك ضل جلي
خلف النعش تصيح .... وين رايح يا علي
......
ياهو الالج زينب بعد
هالصيحه جانت الهه
ياخيمتي ويا فرحتي
وسنين عمري كلهه
وياك اخذني يا علي
لو موتتك أجلهه
بعدك اعيش ابلا عمر
والروح هاي اسألهه
روحي اشيصبرهه .... يا عز ناسي .. يا عز ناسي
امصلاتك انظرهه ..شيبت راسي ... شيبت راسي
من هسه اَنه اكول .... ويه حزني أختلي
خلف النعش تصيح .... وين رايح يا علي
.......
الدنيه صارت مظلمه
ادكله يابو اسنيني
نيران هجرك والدي
مثل الخيم تجويني
محتاجتك تفزع الي
غيرك منو ايحاميني
مو كتلي انه بكربله
راح الشمر يسبيني
من يحرك اخيامي ... ياهو اشكيله . ياهو اشكيله
وحسين كدامي .... خيل اتشيله ... خيل اتشيله
لو جلجل الظلام .... باليتامه انه ابتلي
خلف النعش تصيح .... وين رايح يا علي
....
✍ كلمات الشاعر :: موسى الخادم
لمن تغسلونه .... لا لا تلجمونه
هامته مطبوره .... وخافن تأذونه
......
يمه يا حسن .... يمه يالكمر
ابهيده بالغسل ... وي علي علي
نازف الجرح ... جنه منذبح
ابهيده بالغسل ... وي علي علي
انه امكم الزهراء جيت بدموعي
اغسل نظر عيناي والد شموعي
متوجعه حيل اهواي مو من ضلوعي
من كبري اجيت امشي ... للشيباه نعشي
غالي علي غالي ... عندي اغله من كلشي
.....
وياي العلي ... جبت انه جفن
بجروحه اهم ... كضيت الدرب
الحلوه عشرته .... عينه غمضت
بجروحه اهم ... كضيت الدرب
يولادي أهمن بي وبيكم تراني
جرح الفكد كل يوم يلجمني اني
هذا الدهر لليوم ما انصفاني
من عنده كل حزني ..... شاهد علي وني
ما راحه شوفني .... جم غالي اخذ مني
.......
وسعوله اللحد .... يحباب الكلب
قرآن الفجر .... ينضم بكبر
طبرو هامته .... أعداء الفرض
قرآن الفجر .... ينضم بكبر
دين الله صار ينوح طبرو كتابه
والعرش ويه اللوح يبجي المصابه
وايتامه كد الكون تبجي اعله بابه
الله يصبركم .... عظمه مصيبتكم
خيمتكم الحلوه ... فاركهه دنيتكم
......
زينب كَّرُبي ... مشتاكه انه الج
يبنيتي الحزن .... حيل امغيرج
اصغيره انتي العمر ... بس امشيبه
يبنيتي الحزن .... حيل امغيرج
بعيونج انظر نار حركت خيامج
وبكربله اتركضين انتي ويتامج
والكافلج بدموع يوصل سلامج
يمج اجي ابلوعه ... وبونه مسموعه
احضر أعيننج ... ابلمتهن اضلوعه
......
بالعاشر تصح .... اخر جيه الي
يمه ابذبحتك .... يحسين انذبح
كدامي الشمر .... يكطع ركبتك
يمه بذبحتك .... يحسين انذبح
وبعيني اشوف الخيل صدرك تسحكه
وانه اركض ابلا شوف جسمك اشبكه
والحافر ايدج حيل جبدك يشكه
هدمك يسلبونك .... ساعة يسحكونك
وبالدم يمحبوبي .... سابح يخلونك
......
✍ كلمات الشاعر :: موسى الخادم
يا جرح أكثر ... زيَّد اونينك
طبرت الهامه ... دمعت ابنينك
....
رسول الله .. انه وجيتك .. اضمد جرحك ابأيدي
يمحبوبي ... شنو أيألمك ... عليك احسينك اوليدي
ياعلي ابداعت الزهره سولف اوياي
ياجرح اكثر يلجمك نظر عيناي
جرح راسك لو جرح ولدك يبو حسين
جاي اشوف اثنين مو واحد جرح جاي
ياعلي ... شنهو الي ألمك
ياعلي ... سولفلي همك
ياعلي ... شو جاري دمك
يا أبو الحمله .... واصل اجبينك
......
على امصابك ... عفت محسن .. ينوح وفاطمه الزهره
الك رادت ... تجي لكن ... الضلع ما منجبر كسره
كلشي برجاء الجنان امكدر اعليك
وصوت جبريل ابعضمته صار ناعيك
ضجه صارت بالسماء الطبرتك هاي
والأرض من مستحاهه ابحور تبجيك
يا علي ... امصابك فجعنه
يا علي ... خلَّص دمعنه
يا علي .. صيحه سمعنه
الخاطر ايتامك .... لا تسد عينك
.....
على بابك ... شفت موقف ... يبجي اعيون الي يشوفه
طفل واكف .. على اعتابك ... ملامح وجه مخطوفه
بيده طاست لبن شايل لازم الباب
يحجي وي روحه ويسولف جرحه لو طاب
ناذر اعيوني الثنين وروحي انطي
واليتامه اوياه تدعي بهذا المصاب
ياعلي ... عالخد دمعهم
ياعلي ... طفو شمعهم
ياعلي ... يهضم وضعهم
بمدمع الجاري ... نادتك وينك
.......
جرح هامك ... كسر كلبي ... مثل ما كاسر ايتامك
اه شكد ... كبر عمره ... الحسن شاب ابطبر هامك
وذاك ماجنه الحسين اليمك ينوح
جاي اشوفه بس جسد باقي بلا روح
كربله ما واصللهه وفاكد الحيل
على مصابك ياعلي بالدمعه مذبوح
يا علي ... حاله فجعني
يا علي ... ماجنه ابني
ياعلي ... زيدلي وني
ذابله اعيونه ... انظر أحسينك
.....
اشد منهم ... وضع زينب... عليك امحيره وتنعه
اليتم بين ... كبل موتك ... عليها وتشهد الدمعه
ياعلي اعليك العقيله شابحه العين
ذكرتني ابموقف اوياهه اويه الحسين
من على التل توكف اتعاين شمرهم
يحز نحره من كفه ويسبل الايدين
ياعلي ... سامع بجيهه
ياعلي ... يشرح سبيهه
ياعلي ... عاين عليهه
حالت الحره .... زادت اونينك
.......
كلمات
موسى الخادم
أنت الحق ياحيدر .... أنت السر الأكبر
والأمر والناهي ... انت بيوم المحشر
ياعلي يامولاي .... ياعلي يامولاي
.....
انت دستور العبادة ومنبع اليمه
كل شخص عاداك كافر ينكتب اسمه
الدنية مخلوقة اعله مودك انت والهادي
يعني الك يرجع الماي وهوا النشتمه
ياعلي .... انت الايمان الحقيقي والصدك
ياعلي .... الما يواليك بجهنم يحترك
يامالك وجداني .... ياقبلة ايماني
خل يسمع كل كافر ... واليتك سلطاني
ياعلي يا مولاي .... ياعلي يا مولاي
....
سيدي حبك ملكني من زغر سني
من عمر يومين وانت عايش بذهني
امي جانت من تلولي ياعلي ادكلي
احروف اسمك يا امامي ابفرحي وبحزني
ياعلي .... امي غذتني اعله حبك مو لبن
ياعلي .... ما ابدلك بالذهب يا با الحسن
ساكن كلبي وفكري .... وحبك بالدم يسري
يا اعظم شخصيه ... عنهه أسمعت بعمري
ياعلي يا مولاي .... ياعلي يا مولاي
.......
ياعلي كلمة اعشكتهه وسكنت ابكَلبي
اعترفلك انت بس انت الصرت حبي
ابكل لغات العالم احجيهه الك عاشك
اكثر امن الناس كلهه العايشه بقربي
ياعلي .... انه واهلي وناسي فدوه انروح الك
ياعلي .... خل يموت ابغيضه اصيحن عاذلك
اول عشك وتالي .... تبقى وغالي وغالي
غصبن عالماحبك .... بس انت التحلالي
ياعلي يا مولاي .... ياعلي يا مولاي
........
ما اعوفنه طريقك ما اعوفنه
شلون أعوفك وانت سيد النار والجنه
كلشي بالعالم وهم بس الحقيقي انته
العافك الأي سبب تالي ابناره يتهنه
ياعلي ... الما سلك دربك خسر يوم الحشر
ياعلي ... عالسراط اهناك يعجز ما يمر
الماحبك من كلبه ... درب اجهنم دربه
باجر اسمه امسجل .... ما عابد قط ربه
ياعلي يا مولاي .... ياعلي يا مولاي
.......
سيدي ومولاي انت ومنهجي الراقي
الما وصله اي نهج بالدول واعراقي
خلهه تسمعني النواصب واليلوموني
ما أساوم على حبك سيدي باقي
ياعلي .... لو يكطعوني وصل ما بيعك
ياعلي .... كل ثمن ما يوفي حق توديعك
ما بيعك يعيوني .... لو جنه ايملكوني
من زغري الهج بسمك .... واعداك ايسمعوني
........
يا علي ذكرك عباده و شرف يكفيني
من أضل أبأسمك الهج لاخر اسنيني
تسري ويه اعروك دمي يا ملك روحي
بيقضتي وبحلامي اسولف بيك تدريني
ياعلي ... اربعه وعشرين ساعه صورتك
ياعلي ... ما تفارك عيني مثل ازيارتك
بذكرك ليلي انهاري .... متفارك أفكاري
مجنونك سموني .... وصلتلك اخباري
......
.✍ كلمات
موسى الخادم
علي فارس مرعب ابصولاته
.......
علي قالع باب خيبر مثله فارس ما حصل
من يطب هو وفقاره الحومه يلفيهه الاجل
سطرته سطرت زلازل تنزل ابروس الكفر
والنعم من ابو زينب صيته ما واحد وصل
حيَّر الكون ابعظم سطراته
.......
علي دستور الشجاعه الشرَّف انساب العرب
اكباله كل واحد تجرأ يعني معناهه انشطب
ابن ود اكبال حيدر جسمه نصين انجسم
لا زياده البيه طلعت لا نقص لا مو عجب
علي ميثنيهه ابد ضرباته
.........
علي جان بوحده جيش ايعادل بهاي الارض
امسيطر اعله الحومه كلهه بطولهه وحتى العرض
الزلمه بيهم جان يوكف يم علي ابعد السمه
ومن كثر مابيه خوفه ايموت من كثر الركض
كبل سيفه ايموت من خزراته
......
اتلاثه وثمانين غزوه العلي حماي الحمه
كلهه مسجَّله انتصار العلي هيبة فاطمه
لا فتى الا علي تبقى الشعار الينذكر
راية الحق الإلهي بيده رفت بالسمه
كلهه تحجي بحيدر وحملاته
.....
علي ذكر اسمه عباده يعني هو اصل الذكر
عالصراط انشوف باجر بس اليحبه يمر
هالراساله بصوت عالي توصل المبغض علي
نفتخر والينه حيدر بالقيامه نفتخر
باجر اشمحله وعلي وكفاته
.....
كلمات
موسى الخادم
المات ابوه الوادم اتجيله
ومن كلبهه بالصبر تدعيله.
اشحال اذا جان الابو حيدر علي
.....
خيمه يا ناس الابو ... للابن حضنه دفو
ما يسد واحد مجانه شما جره وصار
كل وكت عون وسند ... مثله وين يصح بعد
ضاوي جان الدار هسه اظلم الدار
وسفه الاكبور ... تاخذ الزين ... الجان جفه ... مكرم الضيف .
احب شي جان اعله كلبه الضيفه
ايعزب وصايم يخلص صيفه
والضرب بالسيف هم كالاهه الي
.....
المات ابوه عمره انتهه ... ابصفنت احزانه التهه
كل طعم بالدنيه ما يبقاله ياناس
وين ما ذكره يمر ... يضيك من عنده الصدر
وعينه تغرك بالمدامع لاخر انفاس
بالبواجي ... والمناحه ... عمره يكضي .. الفارك اعزاز
ماتضله ابدنيته كل راحه
ليله وانهاره تلجمه اجراحه
هذا حالي الصبَّحت بي مبتلي
......
مصابي يا سامع اشد ... من مصايبكم بعد
اني راحالي ابو مطبور عالهام
كبل عيد الله انطبر ... صايم ودمه انثر
فوك محراب الصلاة وعافنه ايتام
يا هضيمه ... حجه الله ...دمه نازف .. عالترايب
ابن ملجم بالغدر طر هامه
وعاف حال الضيم حال ايتامه
كلمة البويه حرمني عاذلي
......
ابموت ابوي الي يحب .. ايواسي كلبي خل يحب
راس ابوه ابكل صبح وبكل مسه يروح
صيرو لاباكم خدم .... سمعاً وطاعه ونعم
خل كلامك هذا اله حط طلعت الروح
هالوصية ... مني اسمعو ... حسين انه
ابن حيدر
هالوصية ابالكم خلوهه
ليل وانهار وصبح ذكروهه
البر ابوه بالهم ابد ما يبتلي
........
تشهد اعلي كربله ... العاق أبوه ما اقبله
خدمته يمي وهم خل يعلم أبهاي
ما أسجله اويه الخدم ... أحسابه كالحارك خيم
كلمن امأذي ابوه ومخالفة الراي
ما أقبله ... لو خدمني ... كل سنينه ... ذنبه أكبر
المن صدك خادم الي يدعليه
والده وأمه تشدله الشيله
الراضي عنه والده راضي هلي
......
كلمات
موسى الخادم
افتتاحيه **
علي وينه .... علي وينه
يازينب .... علي وينه
.....
اليتامه أنجمعت ابابه
اول ليله لغيابه
واحد شابك الثاني
ويصيحون بحزن بابه
الك جينه ... الك جينه
يا بونه ... الك جينه
....
طلعت زينب بهمهه
مكسورة مثل امهه
صاحت مات ابو الحمله
بصوت المحترك دمهه
غُمض عينه ... غُمض عينه
من اصوابه ... غُمض عينه
.....
صاحو ياهو اليلمنه
بعده ويسمع الهمنه
حنَّيته علينه اكثر
جانت من حنان امنه
يسلينه ... يسلينه
جان اشكد .... يسلينه
.....
يمهم كربت زينب
تبجي وتشهك وتنحب
منظر مو سهل وصفه
بعد من الصعب اصعب
يوالينه ... يوالينه
تصيح بهم ... يوالينه
......
راح الجان حاسبنه
مثل اولاده ويحبنه
بديه دمعتنه يمسحهه
ويوكلنه ويشربنه
يغطينه .... يغطينه
اذا نمنه ... يغطينه
......
صاحت زينب بحركه
حانت ساعت الفركه
حيدر غمض اعيونه
وعليكم روحه محتركه
طفه اسنينه ... طفه اسنينه
ابن ملجم ... طفه سنينه
ا
......
كلمات
موسى الخادم
ياعلي ... ياعلي يا حامي الحمه ....
ياعلي ... ودع الارض رد للسمه ....
فاطمه الزهرة تنتظر
جيتك على حر الجمر
حان اللقاء اشتنتظر .... يا علي
.......
حانت منيتك ياعلي .... منك كرب حيل الاجل
ياابن عم المصطفى .... ودع يتاماك ابعجل
مشتاقه الك اهل السمه ...كد دمعك العل خد نزل
صيحات المفارك محب ... صارت بعد ما تُحتمل
ياعلي ... امتنايك طه المصطفى
ياعلي ... روحه اعله شوفك لاهفه
عجل بعد مابي صبر
حان اللقاء اشتنظر .
ياعلي
......
منتظره جيتك يا علي .... انفاس روحك وفاطمه
كل يوم اليمرهه بسنه ... جانت تكل لهل السمه
اشتاكت التسبيحك علي ... والشوفك اليروي الضمه
اشتاكت تصلي اجم فرض .. خلفك يحماي الحمه
ياعلي ... خلصت حياتك بالارض
ياعلي ... وي فاطمه صلي الفرض
منتظرك اذان الفجر
حان اللقاء اشتنتظر
ياعلي
.....
صيحات جبريل اعتلت ... قم ياعلي ادي الفرض
ساعات ظلتلك بعد .... واتشيل عن هاي الارض
يالعابد اكظيت العمر .... والحق الاهك تنتفض
سمعا وطاعه نعرفك .... عالموت ابد ما تعترض
ياعلي ... مشكور ابد ما قصرت
ياعلي ... للدين روحك قربت
لسلامك انطيت اشكتر
حان اللقاء اشتنتظر
.......
يالطلكتها دنيتك ....كلتلها غيرك خل تغر
بالرحه تطحن ياعلي .... خبزت شعيك تنذكر
اول امير ابلا حرس .... اول امير ابلا قصر
تاريخك الحافل يظل ... ما ينتهي اوياك بكبر
ياعلي ... يالخلصت عمرك تون
ياعلي ... ميموت طاريك ابدفن
تشهد الك غزوت بدر
حان اللقاء اشتنظر
ياعلي
.....
اهل الجنان الجيتك .... متزينه بثوب العشك
والجنه من كثر الفرح .... ياعلي رادت تختنك
كلشي اعله حبك منفطم.. يا رحمة الله المن صدك
كلمن ظلم حقك غدا ... بالحاطمه ايظل محترك
ياعلي .... يا كلمت الحق الصدك
ياعلي .... بالنار خصمك يحترك
مظلوم باجر تنذكر
حان اللقاء اشتنتظر
ياعلي
......
الحمدالله رب العالمين
اللهم صل على محمد وال محمد
موسى الخادم
أبد ما خاب الكصد ليك بطلب سريته .
يونس بعمق البحر بسمك ندب نجيته
بالشدد معروف
ما ترد ملهوف
…… ..
يونس بوسط البحــــر ناداه يحيــدر
احضر احضر ياعلي خلصني احضر
يـــدري مــترد الطلب لا ما تأخــــر
بالشدد تحضر يمن ذكــــرك تـكـرر
حاضربكل الشدد حاصل حضورك حاصل
تشهد أموات النجف تحضرهة ما متكاسل
صاحب المعروف
......
كاصدك يابا الحسن ماعنــدي غيرك
كلبي من عـــمر المهد أصبح اسيرك
المن اكصد واشتكي هاي انة أشيرك
ياهو يحـــمل غيرتك يحمل ضميرك
عودتني امن الزغر أشكيلك انه همومي
وبيه هالعادة أصبحت متبدلت من يومي
عاشت وما عوف
.....
يا من أبكـــل الشـــدد حاضر لكيــتك
ياهـو غــيرك ياعلي أكصد نخيـتـك
طايح بشـدة وعـلى العــادة أعتنيتـك
غير بابك مــا أدك هــاي انه أجيـتك
جيتك وشايل بدي حاجاتي يابو الغيرة
بدمعي كاصد حضرتك طايح تراني بحيرة
معتني بلا شوف
…… .
ســـائل أبابـــك وكــف يطلب رجائي
لا تردني بشــيمــتك ياســر بقـــائي
من أصــــيحأ يا علي أنـــه بــدعائي
ربي ميــــرد الدعا يكـــشف بـــلائي
امن اذكر اسمك يا علي كل المحن
تتلاشه
شيمتك مترد طلب تنسى اليندبك حاشى
بالكرم موصوف
ماتــــرد ملهوف
… ..
أبــد ما خــاب الكصد ليـــك وتنعنى
تجلي هــمة والكـرب تــنزاح عــنه
البيك يتمسك علي مـيخـيــب ظــنه
جنة حبك يا شمس مفتــاح جــــنه
هذا صوتي المرتفع ميسكتة ابد كل حاقد ... عاشكك من المهد يالوالي والرب شاهد
مايهم كل خوف
ماترد ملهوف
.......
الحمدلله رب العالمين
اللهم صل على محمد وال محمد
موسى الخادم
لافتى الا علي هالصرخة ما يمحوهة
بكل زمان ابكل عصر لأبدهم يسمعوهة
يبقى داحي الباب
قائــد الالـــباب
؟؟؟؟؟؟
هــذه صرخة وينسمع بالبر صداهـة
لافــتى الا علــي العالـــم قراهـة
يالنواصب صعبة تمحون أحتواهة
الصرخة هذه , الكون معتز بضواهة
هذا دستور انكتب بيد الجليل العالي عالبشر حيدر علي نصبتة الهم والي
مايصح لأصحاب
قــــائد الالـباب
؟؟؟؟؟؟؟
قـام ألاسلام بعلي وهــاي الحقيـقة
صعبة واحد يمحي ذكرى أبأي طريقة
ذوالفقار الشاهـد أشقــــدم رفيـــقة
بالمعارك لــــو نزل يمحي اليعيــقة
هذا قائدنة الابد ما ينوجد بمثالة البلحرب ما ينهزم كثر العدد يحلالة
عكس أبن حطاب
قائــــد الالــباب
؟؟؟؟؟؟
أشلون يتقارن عـلي ويهل الــرذالة
هــو روح الهادي جاويــن العدالة
لومة حيدر جا محو ذكر الرســالة
جان نـروة الهسة مـن كاس الجهالة
جان لسانة الصنم نسجد نقبل اعتابة جان لا دين انتشر لومة الوصي و احبابة
فضلة ما ينجاب
قائـــد الالــباب
؟؟؟؟؟؟؟
ياخليفة اليطعـــم بجــــفة اليتامة
ياخليفــة الليـــل ســاهــر ما ينامة
بس علينة وغيرة كاذب فـــي كلامة
اليدعي هــــــو المؤهــل للـــزعامة
غيرة ماعندة الغصب حق الخلافة الحيدر
لا خليفة الا علي بأمر الاه مصدر
أول الاطياب
قائد الالباب
؟؟؟؟؟؟؟؟؟؟؟؟؟
اليبغضك يا با الحسن ماعندة غيرة
الصافح جفوف الغدر بايـع ضميرة
خسر دنية وأخرة الخالف أمـــــيرة
الله يلعـن صاحب الفتـــنة الشهـيرة
الحرك دارك ياعلي نفسة الجمع أنصارة
بايعو شيخ الكفر تحت السقيفة أثارة
بغضأ أبحباب
قائد الالباب
الحمد الله رب العالمين
اللهم صل على محمد وال محمد
موسى الخادم
علي بصوت ... علي بصوت ... ناداكم
يخدام ... يخدام ... حياكم
....1....
علي من ارض النجف ... هلا بحبابي هتف ....
للحسين انطيتو جف .... وراية
راح اذيع اعله المله ... الكم بطف كربله...
كل عزية مسجله .... واقراية
خدم يا نعمه الخدم ... بيكم امباهي الامم ...
حسين صورتكم رسم ... مشاية
بالعيون ... بالعيون .... شفناكم
علي بصوت ... علي بصوت ... ناداكم
....2....
منزلتكم مفخره ... يم حسين امقدرة ...
بدنيته والاخرة ... احبابه
امه بيكم تفتخر ... تدعي الكم كل فجر ...
يالطمتو اعله الصدر .... بمصابه
كلشي يم ام الحسن ... ما يضيع ابهل الزمن ....
وحك جفين الرسن ... بعتابه
يضل دوم ... يضل دوم ... ذكراكم
علي بصوت ... علي بصوت ... ناداكم
.....3.....
يالخدمتو ابن الولي ...بشارة الكم من علي ...
بيدي همكم ينجلي ....انخوني
دعوه الكم ما ترد ... صك ضمان الكم بعد ...
حاضر الكم بالشدد ... تلكوني
ما اضيعلكم تعب .... ما اردلكم طلب ...
هذا عنوان انكتب ... بعيوني
بدي هاي ... بدي هاي ... حاجاتكم
علي بصوت ... علي بصوت ... ناداكم
....4 .....
كل شخص موكب بنه ... منه اتشكر انه ...
وبيده اخلي جم ضنه ... يخدمونه
صيته يوصل للنجم ... خادم حسين الشهم ...
منكتب اول اسم ... ... تلكونه
كل ثواب اعله السبط ... انحط تحت صاحبه خط .... كطرة المي عدنه شط ... لعيونه
بالكلوب .... بالكلوب .... شلناكم
علي بصوت ... علي بصوت ... ناداكم
.....5.....
باجر بيوم الحشر ... كل فعلكم ينذكر ...
ثوب خدمتكم عطر ... لنفاسي
مني اسمع يالمحب ... كل تعبكم منحسب ...
كل صرفكم منكتب ... ما ناسي
رغم انف الناصبي ... شافع الكم كل نبي ...
وفاطمه وام العبي ... وعباسي
يل الاحباب ... يل الاحباب .... وياكم
علي بصوت ... علي بصوت ... ناداكم
.....
تمت
الحمدالله رب العالمين
اللهم صل على محمد وآل محمد
موسى الخادم
الماوالاه ابو الحسنين شنهو ايفيده
مفتاح باب الجنة حيدر بيدة
حيدر علي نعمه الولي
........
الماواله حيدر عالسراط انشوفه
مجتفه ابحل المهانه اجفوفه
اجهنم ملاذه انهايته معروفه
نار السعير اتصير اله مكشوفه
مينفعه الوالهم كلبه
كدامه يلكه الشمر يلكه ايزيده
.....
كلمن بغض حيدر علي والينه
ما يدخل الجنه ويشوف ابعينه
دين الله حيدر والصحيح ابدينه
خسران كلمن خالفه امسجلينه
رابح كلمن سالك دربه
هنياله كلمن رابح بتأييدة
......
الخالف نهج حيدر خلاف المله
دستور واضح عاقل اليندله
مو كل شخص يتوفق ويوصله
بس الدعتله ام الحسن يتعله
وتكضيله الحاجات الصعبه
اكرام العلي اتقدمله كلشي ايريدة
....
الله ابجلالت قدره يهوا الحيدر
والهل السبب خلاها زوج الكوثر
يوم الحشر محد يجوز المعبر
الا بشفاعة علي قالع خيبر
توقيع الصك باخر شعبه
صك الجواز الوصي ايوقع بيدة
......
العالم ابكفه وعلي اسمه ابكفه
كل المناقب والفضائل صفه
يعجز لساني القاصر أن ايوصفه
بس الله وحده ايوصفه هو ايعرفه
ما يعرف حيدر بس ربه
مو عادي حيدر كلشي زاد ايزيدة
.....
٥ رمضان
الحمدالله رب العالمين
اللهم صل على محمد وال محمد
موسى الخادم
خوية وغلاتج .. لا ما نسيناج
من يوم موتج .. ولهسه ننعاج
عذريني أني واخوتج
ما حاضرين ابدفنتج
هاليوم اجيناج .. هاليوم اجيناج
............................----------...........
؛١
خويه من جانه الخبر ما صدكَـينه
بيج مو بالشام ندري بالمدينه
اشرجعاج الديرت الي ذابحينه
جان اجيتي الكربله ومتي اعله ادينه
خويه زينب .... حسبيته ابموتج
خويه زينب ... على ريحتة خوتج
خويه زينب .... وحشه ظل تابوتج
وصلتني الاخبار .. وحشه الجنازه
ولجفوف الاخوان ... جانت بعازه
بالشام صارت موتتج
ما حاضرين ابدفنتج
..........................__.............
؛؛٢
عن سبب تأخير جيتي لو سألتي
حيل ما ظل عندي اجيلج بيه يختي
حاضره ابعاشر محرم انتي جنتي
وشفت شوفت عينج الخيل اعله جثتي
بالحوافر ... طشروهه اعضامي
بالحوافر ... لحمي ظل كَـدامي
بالحوافر ... سحكَـو اعله احلامي
من يوم موتي ... والهل مسيه
يوجعني كلشي ... يل كلشي بيه
دمي يصب من روحتج
ما حاضرين ابدفنتج
...........................__.............
؛؛؛٣
خوية حقج لو عتبتي انتي عليه
وعلى عباس الرخص عمره الأخيه
الأخوه عازتهم صدكَـ وكت المنيه
وانتي تانيتي نجي وما بينه جيه
مو بدينه .... خويه الج ما جينه
مو بدينه .... امن الجروح البينه
مو بدينه .... يل الأخت عذرينه
المكسور ظهره ... شتعينه يا كَـاع
مو هينه يختي ... نوصلج ابساع
وهل السبب كل اخوتج
ما حاضرين ابدفنتج
...........................____........
؛؛؛؛٤
.لربعينج جينه جابتنه المحنه
عفنه ظلمه اكَـبورنه وجيناج كلنه
الله لا ينطي الزمان الي بعدنه
الشام لاديرتنه لا ديرت اهلنه
طبت السوكَـ ... لسه خويه ابالي
طبت السوكَـ ... بيهه رمح العالي
طبت السوكَـ ... تحجي حال اعيالي
اتأخرت يحسين ... جنج تكَـولين
كَـبرج وصلناه ... دم سالت العين
تانيتي انتي وغربتج
ما حاضرين ابدفنتج
__..........___
✍️🏻 كلمات موسى الخادم
ب ١٥ شعبان .. 🌷 .. قد كبّر الأذان
أشهدُ أن المهدي هل اهلاله
🌷🌷🌷🌷🌷🌷🌷🌷🌷🌷🌷🌷🌷
------------------/_///_/__//////////
؛١////🌷
كبّر اذان الفريضه ابهل مسيه
أنْولد صَاحب الدوله المهدويه
اليملي باجر هالأرض قِسطاً وعدلاَ
وبسمه تتباهه تضل كل البريه
نوره سطع … غطه الشمس …غطه الشمس
هذا المسه …. احله امنمس…احله امنمس
هذا الخبر من كل كَـلبنه انذيعه
رغماً على الشيطان
قد كبر الأذان
اشهد ان المهدي هل اهلاله
__-------------------------
؛٢🌷🌷
ياسلام الله على المهدي ورسومه
أجمل أعياد السنه صارلنه يومه
الما يحب هاليوم مو منه نحسبه
أعلينه محسوب اليحب ساعة قدومه
وسط الگلب …اسمه انقش …اسمه انقش
ودربه ورد … كله انفرش ..كله انفرش
جا هو غير المهدي روح الشيعه
اعظم ولي وسلطان
قد كبر الأذان
اشهد ان المهدي هل اهلاله
__------------------------
؛٣🌷🌷🌷
اليوم بيبان الفرح مفتوحه كلهه
اترحب ابكل محب للمهدي وصلهه
ألف هنياله الحضر هاي المسيه
هالمسيه املاك ربنه تحسبلهه
كلمن حضر … هذا الحفل …هذا الحفل
نال الأجر … نال الفضل …نال الفضل
هاليوم من ربنه امر تشريعه
يا أيُها الإنسان
قد كبر الأذان
اشهد ان المهدي هل اهلاله
_--------------
؛٤🌷🌷🌷🌷
وينه اليشاركنه هالفرحه الجبيره
خل يجي ويجيب وياه العشيره
مولد المهدي فخر للشيعه كلهه
أي وحق كافل الحره الكله غيره
هذا الشهر …. اعظم شهر …اعظم شهر
صيته كبر … بالمنتظر …بالمنتظر
أجمل شهر محد يحب توديعه
اتحبه الإنس والجان
قد كبر الأذان
اشهد ان المهدي هل اهلاله
--------------🌷🌷🌷🌷🌷------------------
✍️🏻 كلمات موسى الخادم
سلام الله اعله سطراته ... علي علي علي
سلام الله اعله صولاته .... علي علي علي
.....
علي تشهدله ساحات البطوله
علي بس هو تحلاله الرجوله
علي متفصلَّه الهيبه اعله طوله
علي ذكره عباده اعلن رسوله
علي هو الإيمان .... علي ذكره قرآن ....
علي احلى سلطان .... بالعالم
علي تشهدله اياته .... علي علي علي
........
علي من العلي اموقع الهوية
شجاعه ومرجله وغيره وحميه
بنزالاته اخذ مية اعله ميه
ويعادل فضله كل هاي البرية
علي مثله ماصار ... علي معنى الإيثار
علي حامه عالجار ... من مثله
متتوصف عباداته ..... علي علي علي
......
علي ما مثله واحد من يقاتل
يزلزلهه الارض ساعت ينازل
ابد ميثني بالسطره ويجامل
وصل صيته السمه وبكاعه واصل
علي سيف الإسلام.... علي والد الايتام
علي بسمه الايام .... تتباهه
برض ربنه وسماواته .... علي علي علي
........
علي كول وفعل يشهد فقاره
اسد بالحومه ماخذهه بجداره
يضل تاريخه حافل بالصداره
نهج بي تقتدي كل الغياره
علي نهج الابطال ... علي زين الارجال ....
علي اسمه ينشال .... عالهامه
وتعلموا منه وكفاته .... علي علي علي
.........
الوكف كدامه بالحومه وتحده
خطف من عنده روحه ولهله رده
علي كلش جبير وماكو كَده
يعادل كل جيوش الدنية وحده
علي راهب اعداه ... علي الحومه تهواه ...
علي نصره وياه .... يبراله
اسد ما يخطي صيداته ....علي علي علي
.........
ابن ود بيده ما طول دقيقه
ابد مو عاطفه نحجي الحقيقه
علي بالحومه موت احمر رفيقه
ابد ميخالفه ويترك طريقه
علي صكر الاحروب .... علي الحاربه ايتوب
علي خصمه مغلوب .... كَدامه
علي اشيحملهه حملاته ... علي علي علي
.........
قلع خيبر علي بقبضة يمينه
منو السواهه كبله امن المدينه
رسول الله بعلي كحلهه عينه
وبي باهه الإسلام وباهه دينه
علي قالع الباب ... علي سيد الاعراب
علي صيته ماغاب ... من يومه
علي اشمحلاه اشمحلاته .... علي علي علي
........
✍ كلمات الشاعر :: موسى الخادم
وين كاضي شهر الاصيام
يم علي لو يم الايتام
يابو صالح اسألك
بالدموع اتوسلك .... يا إمامي
......
اعتذرلك عن سؤالي خاف سببلك جرح
وأنته كل يوم اليمرك جرح كلبك منفتح
شلونه حالك شنهو وضعك سيدي بشهر الجرح
شي أكيد أمخلصه ليلك بالبواجي للصبح
ليلك تخلصه اعليه بدموع
الطبرت الهامه هواي موجوع
علي عندك كل هلك
يابو صالح اسألك
......
وين كاظي اصيام شهرك يا إمامي المنتظر
وتفطر ابيا حاله كلي وانت صايم بالقهر
اوين ناويهه الإقامه سيدي ابهذا الشهر
بالغري لو بالمدينه كلي لو يم النحر
لو يم عقيلة هاشم اتروح
أتقيم شهر اصيامك بنوح
ومحد اليستقبلك
يابو صالح اسألك
......
شنهو حالك يوم طبرت جدك المولى علي
وانت تسمع يابو صالح بالأذان اسم الولي
من مصيبه الحد مصيبه تمشي بالهم مبتلي
اشكبر حزنك يا إمامي ويه حزنك مختلي
الميتله حيدر يصبر اشلون
معذور لو تبجيله الاعيون
الحزن ثوبه امبادلك
يابو صالح اسألك
......
ياهو مثلك يابو صالح هيجي كلبه منشلع
ومن يعينك عالبواجي يالجبت عمرك دمع
ساهر الليل اعله طوله وصوت ونك منسمع
ايعينك الله اشكبره حملك على الهامه وعالضلع
ما واحد ايعينك يمولاي
عالخد دموعك تنزل اهواي
انت وين ارد اوصلك
يا بو صالح اسألك
.....
اخر الرايد اسأله واعتذر من حضرتك
وانت تفطر ماي تشرب لو فطورك دمعتك
تذكر الذبحوه ضامي احسين راعي امصيبتك
والدمه امخضب لحيَّته وشيب تارس لحيَّتك
كل عمرك امكضيه عطشان
ولحسين جدك دوم حزنان
ينعرض ذبحه الك
يابو صالح اسألك
........
✍ كلمات الشاعر :: موسى الخادم
من حيدر طلب يبقون ... بس ولد ام حسن يمه
والعباس راد يكوم ... وعلى صدره علي ضمه
ناداه ياخو زينب وين
وانت اعيون أم حسين
......
من قرَّبت ساعاته .... واتكاثرت دمعاته
رخصه طلب من ناسه ...المجتمعه وسط الحجره
خل يبقى بس ابنيني ... ولد ام حسن وحسيني
رايد اوصي اوصيتي .... لحبابي ولد الزهره
كام عباس وعلي كله انت غير
عيون ام حسين يا بدري الجبير
وين رايح يابو فاضل يا غيور
اكعد اكبالي ارد اودعنك يخير
اغله امن النفس عباس .. عندي انت يبو الغيره
وعند ام الحسن وحسين ...منزلتك تره اجبيره
يابو الراية والجفين
وانت اعيون ام حسين
........
حيدر بده ايمهدلهم .... عن موتته يكللهم
وعيونه صوب الكافل ....امن اول لخير احجاية
سولف سوالف تقهر ... عالخيمه واعله المنحر
كلهم بعد ما امشي .... زينب تعاني اهواية
يابو فاضل انت من هسه الكفيل
لختك الحره يبن حامي الدخيل
خله أيده ابأيد زينب وبدموع
كله ما وصيك حمل اختك ثكيل
باجر تبقى لا خيمه .... لا حامي اليحاميهه
من هسه اكلك هاي .... زينب عينك اعليهه
ايدك بيدهه امن الحين
وانت اعيون ام حسين
.....
كلهم يولدي الساده ..... حان السفر ميعاده
لمكم الزهره وجدكم .... راحل انه ابهل ساعه
ما ريد اشاهد دمعه .... ولا ريد واحد ينعه
كل واحد ايحل موته ... ويحين امر اوداعه
يهل بيتي سمعو هاي اوصيتي هاي
باليتامه اوصيكم الضلو وراي
اتفكدوهم ساعة الليل الطويل
جنت بيدي انه أشربهم الماي
ما يحتاج اوصيكم ... صيرو الهم حضن دافي
بعدي الدنية توليهم ... أبد بيتامي متوافي
صار اطلبهه انه اجم دين
وانت عيون ام حسين
.......
صورة وداع بعينه .... ينظر حسن وحسينه
ليله اشد كل ليله .... مرت على أهل الملكه
عاينهم وجر حسره .... وبكلبه ناره موجره
مو من طبرته الوالي .... موجوع من الفركه
مثل طير بجنحه ضماهه اليتام
ودمه سايل علي من طبرت الهام
منظر يبجي الصخر ذاك النهار
خلصت العشره اويه حيدر يا حرام
ما تمم علي اصيامه ... فطر من طبرة الهامه
واعله امصيبته بلوعه ... تبجي وتنحب ايتامه
مثلك ياعلي يصح وين
وانت عيون ام حسين
........
ظهره سند عالكافل .... ودموعه عالخد هامل
لا شي امام العاشر .... كلهم مصاب الهامه
بالطف جروح اهواية .... جف يوكع اويه الرايه
ومحبوبي يبقى الوحده .... بس العده كدامه
امصيبتي هينه المصايب كربلاء
اهناك يبني حسين تبقى ابلا رداء
وانت ياكافل يكطعوهن اديك
على شاطي العلكمي التروي دماء
وانتي أبنيتي راح عليج .... تنهد الزلم والخيل
وعندج ما تضل خوان ....عندج ما يضل كل حيل
اوي راس الكمر تحجين
وانت اعيون ام حسين
.......
✍ كلمات الشاعر :: موسى الخادم
بعدك بلا روح .... محرابك ينوح
ارجع يبو حسين .... لا تمشي وتروح
.......
ياعلي المحراب بعدك ... حالته اتبجي الصخر
موحش واظلم نهاره .... وليله خالي امن السحر
جان مهيوب ابوجوك .... هسه مكسور الظهر
ومثل الايتام الرجوعك ... ظل يتاني ابهل شهر
يبجي اعله فركاك ... ويتمنى ملكاك
محرابك اهواي .... ياعلي يهواك
.....
يا علي رحت وتركته .... ابلا وداعك يا علي
بعدك المحراب عايش .... على ذكرك يلولي
حتى بالأذان صوته .... بالبواجي معتلي
ياعلي صيحاته تسمع .... ارجع الناسك ولي
كل يوم الاذان ... يُرفع بالاحزان
محرابك اعليك .... بدموعه غركان
.........
جان محرابك يتاني .... جيتك جن ملكه أم
جان يتباهه بصلاتك ... هسه يبجي اعليك دم
ما أجه المثلك يحيدر ... خاشع بهاي الأمم
واعله هجرك صوره تذبح ... دمعه محرابك رسم
بيهه علي مات .... ومطبورة الآيات
محرابك اعليك ..... بجه السماوات
.....
اوياك ماتت امنياته .... وعوده محرابك ذبل
ياعلي حقه اليفارك ... مثلك ايموت ابعجل
كلشي بغيابك تغير .... كلشي ياخير العمل
مثل متغير حسين .... البيده تابوتك حمل
امصابك علي عاف .... اجروح المتّراف
محرابك اليوم ... مكسور ينشاف
.......
الطبر هامك يا علينه .... طبر هامت قبلتك
وعاف محرابك يويلي ... امخضب بدم جبهتك
والشرع اعلن حداده .... اعليك يوم امصيبتك
الله لا ينطي ابن ملجم .... فجع ناس الحبتك
ما راعه الايتام ... لا شهر الاصيام
محرابك ينوح .... كضاهه الايام
......
✍ كلمات الشاعر :: موسى الخادم
علي راح .... متخضب ابدم هامته
علي راح .... وبعينه دمعه العيلته
علي راح .... ياهو اليسدها وحشته
باخر ثلث من شهر الاصيام
ودع حياته علي الضرغام
عاف الحسن وحسين ايتام
وام الخدر مسبيت الشام
مات امخضب ابجرحه علي حامي الحمية
مات وراحه ما شاهد لحد يوم المنية
غمض عينه وبكلبه قصص كلهن اذية
نار الخيمه جاويته كبل سكنه ورقية
بالجروح ... خط قصه احزانه علي
بالجروح .... خلص حياته مبتلي
علي راح ... والطبرة وصلت كصته
......
حيدر علي بسيف الحقد مات
ما تمم اصيامه حرامات
راح وترك وحشه المناجات
واعليه بجت عين السماوات
مات وماتت الفرحه وسط عين اليتامه
مات ومن بعد موته النهار اعلن ظلامه
مات وخلِّف الزينب حزن تكتل سهامه
مات وجلمت الشامت علي طبروله هامه
حسافات ... نكرو فضل حامي الحمه
حسافات ... مو ناسه تبجيله السمه
علي راح ... دم هامه واصل لحيته
......
راح وترك جم غصه بالروح
جازو جهادة بطبره وجروح
ليث الشدايد راسه مفتوح
وزينب تصيح ابصوت مبحوح
يااغله واعز مني واعز كلشي هويته
انه امضيعه حضن امي الوسط حضنك لكيته
لا ترحل تذكرني بحزن كلبي النسيته
اغيابك يكسر اجناحي وسط روحي قريته
والحسين ... سولفله كلشي بالدمع
والحسين ... مكسور كلبه منفجع
علي راح ... وحسين حزو ركبته
....
الطبرو علي بالهامه ياناس
نفس اللي طبرو راس عباس
وانطو امرهم ينكطع راس
حسين ابو اليمه وصدرة ينداس
نفس الحركو اديارة احركو باب المخيم
والكسّر ظلع فاطم ظلع حسينه هشم
اه يالوعت العاشر العاشر من محرم
ما ننساها من نقره وحك الخلق ادم
ا
بالاخبار ... الماضي والحاضر جرح
بالاخبار .... لا بد حسينأ ينذبح
علي راح ... لحسين تسعر جمرته
.....
خلص حياته ابخبزة اشعير
جوعان يغفى ويشبع الغير
حيدر وجودة اعله الارض خير
سفرت عطائه وكلت الطير
ما واحد وصل حمكه علي واضح طريقه
ساوه اويه الفقير اويه الغني اباول وثيقه
عادل حيدر بكلشي كبل خلق الخليقه
عاش اويه الفقر عمرة صبح فقرة رفيقة
ملك عاش ... ماعندة قصر ولا حشم
ملك عاش ... يتفقد ايتامه ابألم
علي راح ... بس لسه ظلت صورتة
....
كلمات
موسى الخادم
نزله
سلطاني . عنواني . ايماني ... حيدر علي
.....
يا واحد ما مثله ... ثاني يصح
يا مرهم يابلسم ... اكبر جرح
يا اجمل يا اكمل... طلعت صبح
يا اول يا اخر ... صاحب ربح
ياحيدر ...
ياموطن . . عشكي الاولي
والعافك . . خصمي وعاذلي
والحبك . . انطي كلشي الي
مولاي مولاي ... مولاي مولاي... مولاي ياعلي
.... .
ماعوفك لو خلو ... بيدي الشمس
خل يسمع كل حاقد ... اصله نجس
بيك امن دلالي ... بأول درس
مو من هسه ولامن ... أول امس
ياروحي
بعيوني ... راسملك صور
محبوبي ... حد كطع النحر
ما بدلك ... بكنوز الدهر
مولاي مولاي ... مولاي مولاي ... مولاي ياعلي
....
من فتَّحَّت أعيوني ... اسمك شفت
مخطوط اعله اكماطي ... واتعلقت
بحروفك ياحيدر ... همت وهمت
عايف كلشي وحبك .. لا ماعفت
ياغالي
وي حبك .... باقي للأبد
مجنونك ... عن اباً وجد
ياروحي ... هاك اخذ العهد
مولاي مولاي ... مولاي مولاي ...مولاي ياعلي
.......
يامالك احساسي ... وكلشي ألي
من الذر واليتك ... نعم الولي
اعروك الدم البية ... تهتف علي
كاتبلك من زغري ... ياكل هلي
حبيتك
بايعلك . روحي ابلا ثمن
مارايد ... كلشي بهل الزمن
خليني ... مده بهل صحن
مولاي مولاي ... مولاي مولاي ... مولاي ياعلي
.....
باقي اوياك الاخر ... نسمة عشك
دلالي ونبضاته ... بسمك يدك
عن دربك يا غالي ... ما افترك
ابحبك راضي اتعذب ... راضي احترك
واليتك
ياحيدر .... يا خير العمل
افدواتك ... واتكطع وصل
لعيونك ... خطيت الجمل
ماعوفك ... واليوم الاجل
مولاي مولاي ... مولاي مولاي ... مولاي ياعلي
.....
كلمات
موسى الخادم
رئيسية
اكعد يروحي .. ما لايكه النومه الك ...اكعد يروحي
عاين جروحي .. بدموعي بويه اتوسلك .. عاين جروحي
سبب موتي فركاك
الي افتحه عيناك
.......
بغلات امي ... عليك اقسم .. تفك ليه العيون
يمحبوبي ... الك فدوه ... رحت اَنه يكون
اذا تمشي ... تهد حيلي ... عليك أمري يهون
وردة وبلا ماي اضل بعدك اني
تسبيني الادموع واضل منهه اعاني
من بعدك اهواي أحير ابزماني
انه بعدك ياهو اليه
ياحبيبي رد عليه
من رحتلك فدوه بوية
الزم ايدي هاي اديه
وياك اخذني ..لو ناوي ترحل للكبر .. وياك اخذني
يالماشي عني..كلشي يهون الا الهجر .. يالماشي عني
اخذ روحي وياك
الي افتحه عيناك
.....
بعد كلبي ... جرح راسك .. يريته ابراسي صار
الوجع بيه ... تمنيته ... يمن كلك وقار
انه بدونك ... شبه ميته ... اعيش الاحتضار
فدواتك الروح اخذ مني روحي
عمري بلياك اخلصه اويه نوحي
يالجرحك اهواي اشد كل جروحي
عمري بعدك ما أريده
موتي ارحم من وحيده
بوية يالكلك محنه
بعدك افراحي بعيده
شيصبره حالي .. لو ما اشوفك كل صبح ... شيصبره حالي
ضيم الليالي ... تلفيني واتهيَّج الجرح ... ضيم الليالي
يبويه العمر هاك
الي افتحه عيناك
......
صعب احمل .. خبر موتك .. يبوي الكله خير
على امجانك ... انه امعوده ... اصبَّح يا جبير
صور ذكرك .... تشل حالي... امنصفح بيهه احير
الماعده ابو ايصير اسمهه اليتيمه
تسبيها الاحزان تعيش الهضيمه
محتاجه لفياي وابوي انت خيمه
ياحبيبي المالي غيره
رد عليه انه الاميره
وين حيلك ذاك بوية
ارحم بحالي زغيره
يابو المحنه ...احتاجك ابكد الهوه ... يابو المحنه
ياخير اهلنه .. داري اظلم وشوفك ضوه ... ياخير اهلنه
حنيني اعله ملكاك
الي افتحه عيناك
......
احس داري .. بعد ساعه ... يغطيهه السواد
على الوحشه .. تعودني ... وتصير الدمعه زاد
بعد عينك ... حزن كلبي ... علي يعلن حداد
بعدك دمع عيني ياهو الينشفه
بعدك يبوية بحضن منهو اغفه
وجرحي اعله فراك فلا ضنه يشفه
جنت اليه كلشي احبه
هسه اعيش بدونه صعبه
عيني متعوده اعله شوفك
كاس موتك مر اشربه
ناعي المصيبه ... ماخله عندي كل فكر ... ناعي المصيبه
حال الغريبه ... صرت انه بعدك يا بدر... حال الغريبه
نبض كلبي ينعاك
الي افتحه عيناك
.....
انه بحاجه ... الك بويه ... امن اضل ابلا خيام
وعلي تفتر ... زلم صلفه .... يجرحوني بكلام
اروح المن .. واهل بيتي ... ذبايح يا حرام
وحسيني عالكاع تدوسه الحوافر
دم منحره يسيل عالخيام يناظر
متكَّسر اظلوع اعاينله باجر
راسه مو يم جسمه انضره
والدمه ايغطيله نحره
بحاجتك بوية تجيني
انلملم اعظمات صدره
لوما تجيني ... معناهه أنجر بالحبل.. لوما تجيني
باخر سنيني..أبلا هودج اركب عالهزل...باخر سنيني
علي بوية بحماك
الي افتحه عيناك
.......
كلمات
موسى الخادم
لا فتى ... لافتى الا علي
....
حب حيدر ينجينه من كل حاطمه
نعمت حيدر بيها انباهي اهل السمه
غلطان اليظن يوم ... نترك سيد الكوم ...حماي الحمية
ماخاب الي والاه ... دنيه واخرة اوياه ... محسومة القضية
نحجي ابعالي الصوت ... ما يمنعه كل موت ...
اهلا بالمنية
لا فتى .. صيحت الحق تعتلي
.....
ماحب حيدر بس الزلمه المن صدك
مالك الاشتر عدنه اثبات الهل عشك
واليكره علي انشوف ... تاريخه كظاه خوف ... وهواية الادله
ابن لعاص شنهو سواه ... من حيدرنه لاكاه ...
عن هدمه تخله
صولاته علي اهواي ... تشهدله الزلم هاي ...
عيِّش خصمه ذله
لافتى ... هالاسم شرف هلي
لا فتى ... لا فتى الا علي
.....
يالسامعني اتخيل لو ماكو علي
اشلون اتخلص يومك بالهم مبتلي
همزين الله سوّاه ... وخلانه انتولاه .... واجب ربنه نشكر
لو ما حيدر امنين ... نحضى ابخدمت حسين ...
جا حالتنه تقهر
جا والينه الاصنام ... واكظيناهه الايام ... وسط الظلمه نفتر
لا فتى ... نهج حق ليك والي
....
ميشم ريح الجنه اليبغض حيدرة
درب اجهنم دربه اعليه يلزم سرة
دين الله ابعلي اتمام ... مركز قطب الاسلام ...
خل تسمع خصومه
حيدر كحل العيون ... بي كل شيعي مجنون ...
خي يلوم اليلومه
ميثم جن ببو حسين ... عابس جن بالحسين
وصلتهم علومه
لا فتى ....بيها منجن كل ولي
.....
هنياله اليتوفق يحضر مجلسه
مجلس حيدر بيدة المهدي امأسسه
المهدي وفاطمه اهناه .. تتلكه الي ينعاه ... هاي الكم بشارة
يله انوسد الاصدور ... فاطم يمكم ادور ... تنطينه الاشارة
يالكلكم بطولات ... حي اعله العزاءات ... ناخذه ابجدارة
لا فتى ... بيها كل هم ينجلي
.....
الحمد الله رب العالمين
اللهم صل على محمد وآل محمد
موسى الخادم
ياعلي احضر وحشتي ... لو نزلت الحفرتي
مالي غيرك ياعلي اينجيني
....
ظلمه تدريه الكبر وبلا نور
وانه انتظرك تجيني يالغيور
مالي غيرك يحضر الكبري ويزور
كلهه راح اتعوفني وتجفيني
....
ساعت ايهيلونه فوكاي التراب
ويمي يحضر منكر بسوط العذاب
ابقى حاير مالي طاقه الكل جواب
انتظر جيتك علي اتحاميني
.....
اشلون بية من يوفيني الاجل
انه اخافن سيدي من المغتسل
احضر احضر لية ياخير العمل
انه خادم حضرتك تدريني
......
من ينزلوني يحيدر للكبر
وعن يمشون الاهل وبلا عذر
جيتك يا ابا الحسن ابقى انتظر
يمي تحصل جيتك حاجيني
.....
صعبه ما احملها طبت المكبرة
اشلون بية انظر حفرتي امحضرة
والذنوب اهواي نعشي امحاصرة
انت بس انت علي اتنجيني
......
الحمدالله رب العالمين
اللهم صل على محمد وآل محمد
موسى الخادم
وحشة """ هالليلة دارك يا علي
وحشة """ صوت اليتامة معتلي
وحشة .. وحشة
"""""""
وحشة دار أهل الرسالة ابهل المسية "" وحشة صارت "" ياعلينة
من عفتهة احزان صبت عاليتامة "" الفرحة غابت "" مادرينة
تمشي وتخليهه زينب تبجي سكتة "" بيك حارت "" ياولينة
زينب """ يم راسك الطاهر بجت
زينب """ دمعتهه بالخــد حفرت
زينب """ ضيم السداهة مايلي
""""""""""""
ياعلي الايتام عكبك ياهو ليهة "" لوعفتهة "" يا املهه
بالحسن وحسين وصت أمهم امهم "" واعدتهة """ كد حملهه
ارجع ورجع بتسامة زينب اله ""فاركتهه "" وية أهلهه
ارجع """ ايتامك اشكد تنتظر
ارجع """ ماضل بعد عدتهم صبر
ارجع """ ونفذ الوصية يا علي
""""""""""""""""
من يتاماك العفته صوت نسمع "" لا لتبعد "" يا شمسنة
ظلمة دنيانة بغيابك ظلمة تصبح "" فدوة اكعد "" يانفسنة
احنة ايتامك يحيدر لا تردنة "" أكلوبنة أسعد "" يا فرحنة
حيدر """ ما ينحمل فكدك صعب
حيدر """ وكف نبض دكت الكلب
حيدر """ ردنة يا اعظم ولي
""""""""""""""""""""
غايب وغابت رسموك ما نصدك "" عــــن بنينك "" تمشي سكتة
الموت أرحم صار الهم يا علينة "" أخلاف عينك "" زاد ونـــــتة
اليتيم أعليك ينعى دمعـة جاري "" ينـادي ويــنك "" مـا حضرتة
وينك """ يا والــــد حسين وحسن
وينك """ بعدك قسة أعلينة الزمن
وينك """ واحدنة بالــــهم مبتلي
"""""""""""""""""
الحمد الله رب العالمين
اللهم صل على محمد وال محمد
موسى الخادم
يابو صالح يا امامي ... يابو صالح يا امامي
متى الفرج .. متى الفرج
................................................................................
خلصت عمري انتظار الجيـتك امتانيهة
يمتى اشوف ابنور وجهك هل السمة امضويهة
احضر بساعك يوالي وكلبي نارة اطفيهة
يا وكت يا ساعة تظهر يا علامة اتنيهة
كل وكت بيك اهتمامي ... يابو صالح يا أمامي
متى الفرج ... متى الفرج
...................................................................................
مثل يعكوب ابغيابك جاري دمع اعيوني
من كثر ما بيك منجـن عابـس ايسموني
خاف اموت او كبل جيتك سيدي ايدفنوني
ادعي ربي ايطول عمري الخدمتك يا عوني
واعلى شوفك كلبي ظامي ... يابو صالح يا امامي
متى الفرج ... متى الفرج
...................................................................................
أمنيت عمري او حياتي احظة اني ابشوفك
ولوتحقق هذا حلمي اوياك اظل ما اعوفك
يا كبر بختي تلامس هل الجفوف اجفوفك
كلبي هايم يا امامي من الـزغر بحروفك
انه الك اعلن هيامي ... يابو صالح يا امامي
متى الفرج. متى الفرج
………… .
غيرك اعلم يا ابو صالح ما يصح محبوبي
انت بس انت حبـيـبـي اموضح ابمكتوبي
يلـمحبتك باب رحمـة تمحي كـل اذنوبي
ساهرت ليـل انتظارك والدموع ابثوبي
كل صباح ابعث سلامي ... يابو صالح يا امامي
متى الفرج ... متى الفرج
..................................................................................
غـاية ما عندي ابحياتي انـت كل غاياتي
لحظة عمري بيـن اديك اوبينت شيباتي
سيدي كـثر المدامع جّرحت وجناتي
ما أسولفلك وحكك بـس حزن ضحكاتي
فرحة للشامت كلامي ... يابو صالح يا امامي
متى الفرج ... متى الفرج
...................................................................................
الحمدلله رب العالمين
اللهم صل على محمد وال محمد
موسى الخادم
باجر ليلة القدر… راح احيهة بالكبر…
واقرأ المناجات
مات الوصي مات
… ..
ليلة القدر ابهل السنة .. وسط الكبر أحييهة
اقرأ المناجات ابدمع .. عيني الي راح ابجيهة
سجادة اسوي امن الترب .. واوكف اصلي اعليهة
تسبيحت امك فاطمة . بيهة ابدي واختم بيهة
باقي الليالي التمر .. وحدك تصلي الفجر
يوليدي مأسات
مات الوصي مات
… ..
ما تتم صيام الشهر .. يالحسن بوية اوياكم
راحل كبل عيد الفطر … حيدر علي اليهواكم
انه ادري الموادع صعب .. يل عاشك الملكاكم
اقرو اعلى كبري الفاتحة . عين السمة ترعاكم
بهّلال عيد الفطر… جيتكم انه انتظر
مصعب اللحضات
مات الوصي مات
… .
اكتب الك يبني الحسن ..بدموعي هاي اوصيتي
بوية انت مسؤول اصبحت..عن عيلتي وعن بيتي
ادري انه حملك مو سهل ..يالنيّتك من نيتي
لحسين صير انت الابو ..يالهوه التارس ريتي
اوصيك يبني الطهر… بحسين اخوك البدر
ايامة وحشات
مات الوصي مات
… .
لو غمض اعيوني الاجل .. وانت بجفوفي املازم
لتحسس العيلة ابد .. كلهم ابوكم نايم
زينب خطية اشتحتمل ..لساهة تبجي الفاطم
لا تفشي سر هذا الخبر… . تفجع گلب كل صايم
لتخبّر ابهل الامر … صيام اهلنه انتظر
تفطر معانات
مات الوصي مات
… ..
لو غسلتني يولدي .. لا تنفجع بجروحي
لساته جرح ام الحسن .. ما طايب ابنص روحي
ماتت الزهرة امن الكسر .. وانه اموت ابنوحي
نظراتك الكلهة حزن ..هدت كيان اصروحي
حسرات اشوفك تجر .. منك اريد الصبر
يالكلك اهات
مات الوصي مات
… ..
عن هاي دنية الفانية ..راح انتقل يوليدي
والتقي أبأمك فاطمة .. الوياهة اجمل عيدي
روحي الهة مشتاكة اشكثر..يا موت أخّذ أبأيدي
فرحان وبنفس الوقت..حزني عليك أشبيدي
خلصت ليالي العمر ..والموتي باقي انتظر
سامع هالاصوات
مات الوصي مات
… .
الحمدلله رب العالمين
اللهم صل على محمد وال محمد
موسى الخادم
السلام عليكم احبتي خدام الحسين ع
سنقوم بنشر قصائد استشهاد الامام علي ع
عظم الله اجوركم ...
قصيده اربعينية مولاتي زينب ع
Читать полностью…
ب ١٥ شعبان .. 🌷 .. قد كبّر الأذان
أشهدُ أن المهدي هل اهلاله
🌷🌷🌷🌷🌷🌷🌷🌷🌷🌷🌷🌷🌷
------------------/_///_/__//////////
؛١////🌷
كبّر اذان الفريضه ابهل مسيه
أنْولد صَاحب الدوله المهدويه
اليملي باجر هالأرض قِسطاً وعدلاَ
وبسمه تتباهه تضل كل البريه
نوره سطع … غطه الشمس …غطه الشمس
هذا المسه …. احله امنمس…احله امنمس
هذا الخبر من كل كَـلبنه انذيعه
رغماً على الشيطان
قد كبر الأذان
اشهد ان المهدي هل اهلاله
__-------------------------
؛٢🌷🌷
ياسلام الله على المهدي ورسومه
أجمل أعياد السنه صارلنه يومه
الما يحب هاليوم مو منه نحسبه
أعلينه محسوب اليحب ساعة قدومه
وسط الگلب …اسمه انقش …اسمه انقش
ودربه ورد … كله انفرش ..كله انفرش
جا هو غير المهدي روح الشيعه
اعظم ولي وسلطان
قد كبر الأذان
اشهد ان المهدي هل اهلاله
__------------------------
؛٣🌷🌷🌷
اليوم بيبان الفرح مفتوحه كلهه
اترحب ابكل محب للمهدي وصلهه
ألف هنياله الحضر هاي المسيه
هالمسيه املاك ربنه تحسبلهه
كلمن حضر … هذا الحفل …هذا الحفل
نال الأجر … نال الفضل …نال الفضل
هاليوم من ربنه امر تشريعه
يا أيُها الإنسان
قد كبر الأذان
اشهد ان المهدي هل اهلاله
_--------------
؛٤🌷🌷🌷🌷
وينه اليشاركنه هالفرحه الجبيره
خل يجي ويجيب وياه العشيره
مولد المهدي فخر للشيعه كلهه
أي وحق كافل الحره الكله غيره
هذا الشهر …. اعظم شهر …اعظم شهر
صيته كبر … بالمنتظر …بالمنتظر
أجمل شهر محد يحب توديعه
اتحبه الإنس والجان
قد كبر الأذان
اشهد ان المهدي هل اهلاله
--------------🌷🌷🌷🌷🌷------------------
✍️🏻 كلمات موسى الخادم