963
قصائد مع الحانها لخادمكم موسئ الخادم
مات الرسول الطاهر الامين
وعيونه تجري دمعه للحسين
من سمع بالطف ينقتل
وزينب يجروها بحيل
وعيونه تجري دمعه للحسين
.......
مات الحبيب المصطفى ... والدمع تارس عينه
اعله حسين ما بطل بجي ... لا نوحه لا ونينه
عاش الذبح كبل الذبح .... جن اله مو لحسينه
ذابل مثل غصن الورد .... اصبح بخير اسنينه
حكه اذا يذبل من النحيب
مشغول فكره بذبحت الحبيب
هالمسأله ياهو اليحل
من سمع بالطف ينقتل
وعيونه تجري دمعه للحسين
....
صورة حسين ابكربله .... ما فاركت وجدانه
كل لحضه ينظرها ابالم ... جانت سبب أحزانه
يمه الحسين ويلتفت .... ايدور عليه بمجّانه
خايف عليه من الهوه .... من بين كل خوانه
خايف علية من حرمله الطفوف
من سهم العمى الي مايلزمه شوف
ياخذ حبيب امه الطفل
من سمع بالطف ينقتل
وعيونه تجري دمعه للحسين
......
نايم على افراش المرض ...بحسين سارح فكرة
كل سا يوصيني عليه ... ما جني امه الزهرة احسين امانه ابركبتج ... بالج شخص يقهرة
كل ليلة شمي منحرة .... واهديلي شمت نحرة
باجر شمر ما يرحم ابضناج
من الكفه ايذبحه تعب رباج
منظر يشتت كل شمل
من سمع بالطف ينقتل
وعيونه تجري دمعه للحسين
......
مصيبه حسين المابدت ... عاشاها طه بلوعه
جم ماتم ابماتم بنه ... بروحه العليه مفجوعه
خياله عشرة تسحكه .... ايكلي وتكسر اضلوعه
يحجيه الي بحركه كلب ... يحجيه الي بدموعه
يافاطمه ايكلي ابنج الامير
يلمونه ساعت دفنته بحصير
بالنعش لا ما ينحمل
من سمع بالطف ينقتل
وعيونه تجري دمعه للحسين
.....
عاشور صارت دنيته .... عاشور كل ايامه
جي سمع ابني ابكربله .... ينذبح بين ايتامه
البكّاء اصبح والدي .... الاول الحرك اخيامه
لحسين تجري دمعته ... بيقضته وابحلامه
حزنه تعده حزن الانبياء
يشهدله ادم حزنه كربلاء
ايوب يم صبره يمل
من سمع بالطف ينقتل
وعيونه تجري دمعه للحسين
......
للمهدي اروي هالقصص ... بدموعي التجّارة
ثارات تنتظرة اشكثر .... ثار النبي اول ثارة
يملي الارض قسط وعدل ...الله بعظمته اختارة
ما ينسى ثارات السبي ... والحرك بابي بنارة
اوليدي باجر ياخذ الثارات
وايحاسب الكل عالجنين المات
عالظالم ايقيم العدل
من سمع بالطف ينقتل
وعيونه تجري دمعه للحسين
......
الحمدالله رب العالمين
اللهم صل على محمد وال محمد
موسى الخادم
هالليلة تبجيك السماوات
والفاطمه اتقدم مواسات
الله يامصعبها ليله
نعشك علي الوحده يشيله
مو انت ميت جن علي مات
........
يارسول الله محمد ... ليلتك ليله عظيمه
بيها ام حسين صارت ... من بعد عينك يتيمه
وحيدر الكرار بعدك .... حزنه ما توسعله غيمه
اه يانار المصيبة ... يصرخ بصوت الهضيمه
مكسور ظهره حيدر اعليك
مو من دمع دم صار يبجيك
موتك ترك روحه عليله
.....
كل نبي ومرسل حضرلك...يجري دمعاته على الخد
بموكب الاحزان نزلو .... بالبواجي الله يشهد
والحداد اعليك علنو ... ولبسو اعله امصابك اسود
ادم ونوح بدمعته ... ويوسف ابكترك تمدد
وايوب ما بطل نحيبه
شاف بمصابك جم مصيبه
وناته لفراكك طويله
......
من بعد ما حامي جاره .... وسدك بيده الشريفه
انكشفت اوجوه النواصب ... والايادي المو نظيفه
الجانو اصحابك تكلهم .... اتأمر تحت السقيفه
مارضو حيدر خليفه .... اختارو الظالم خليفه
نكرو وصيتك ياضوه العين
لجل الخلافه باعو الدين
بان افعلهم كل رذيله
.......
اول افعال السقيفه .... من بعد نكر الوصية
هجمو الدار الامامه ... بكل حقد وبكل ردية
وبظهر بابك نخبرك ... جانت الزهره الزجية
اعليها حيل الباب دفعو ..وطاح ابنها اعله الوطية
وحيدر علي كادو بالحبال
ايبايع خليفتهم الانذال
كسرت ظلع فاطم ثجيله
......
ننتظر مهدينه يظهر .... ابراية الحق الشهيره
وياخذ الثارات كلها ... كل ظلم ينهي مصيرة
يبتدي بثارك يطاها ... ويختمه ابدر العشيرة
المهدي ما ينسه وعوده... اوجده اتلف بحصيره
وثار السبايه لا مينساه
مثل الانفاس يعيش وياه
ثار الطفل ثار العقيله
......
الحمدالله رب العالمين
اللهم صل على محمد وال محمد
موسى الخادم
........
يا انيس النفوس ... ياغريباً بطوس
يا ملاذ الحياره ... الحياره
اكتبلي يمك زياره ... زياره
......
الك مديت الجفوف وادري متردهه خليه
سخي معروف بعطائك مثل حماي الحمية
عليك امشي حسينك وعباس والزهره الزجية
اعلية تتكرم ازورك كبل ميعاد المنية
يا كريم العطاء ... لا ترد الدعاء
امنيتي اشوف المناره ... المناره
......
ارزقني مولاي الزياره منهه لا تحرمني فدوه
كلشي بالدنية ميسوه ازيارتك بس هي تسوه
الف هنياله الاجاك ومن عذب مايك ترَّوه
ياملاذ الخائفين الشوفته الاملاك تهوه
يا امير الخلود ... انت سر الوجود
بيدك الكون ومساره .. ومساره
.....
سارح ابعالم جمالك يا امامي عمري جبته
اعليه كل يوم اليعدي اجري الك دمعاتي سكته
انا ذاك الماله غيرك انت المترجمهه قصته
كلبي حبيته اعله مودك جي يحب ذكرك عشكته
انت معنى الجمال ... انت زين الرجال
يا امير الغياره ... الغياره
.....
على جنح الطير ابعث الك اشواكي وسلامي
خادم ازغير اعله بابك ريت اصيراً يا امامي
اليوزع الماي بسمك يروي كل انسان ضامي
كلشي ما ريد ابحياتي بس رضاتك يا غرامي
خادمك ريت اصير ... عبد عندك ياامير
خدمتك اعظم تجاره ... تجاره
......
سامع الزارك يحصَّل كل طلب منك يطلبه
وانه كل طلبات عندي تحضر الكبري وتطبه
من يحفروهه حفرتي وعني يمشون الاحبه
جيَّتك مولاي اتاني تدري هاي الساعه صعبه
مالي غيرك ينور ... يحضر الكبري يزور
وحشه كبري ابلا زياره ... زياره
......
كلمات
موسى الخادم
https://youtu.be/VNkcAl5twxM?si=qi94A0rdwYcufs5_
Читать полностью…
https://youtu.be/CjTWY-5qQBo?si=uhJllr8VzJbCC2Dg
Читать полностью…
https://youtu.be/_Ttw_pzsBLw?si=gpHpYAQPPNqlWy1q
Читать полностью…
ان شاء الله نبني ضريحه . ونعتنيه مشايه
اوموش رايه وحده نطلع . رايه تتبع رايه
......
ننتظر جيَّت المهدي ابن الحسن
ونبني وياه مرقد وكَبه وصحن
لبو محمد شبل حماي الحمه
والعهد باقي لحد طول الزمن
ونعتني من كربله .... مشي بدمعه هامله
كل تعب ميهمنه
بعدد قطرات المطر .... نكَصد الأكرم بشر
كل تعب ميهمنه
راحه ممشانه بطريقه . وتعب ماكو ابهايه
......
وبعدد اهل الكساء نبني القبب
و المناير كد عددهن من ذهب
وابو صالح نفسه يشرف عالعمل
راحه عدنه الخدمه وياه مو تعب
شكَد حلو اويه ابن الحسن ... نبني مرقد للحسن
عاليات اسواره
بخت ما مثله بخت .... الروحه للمهدي اتنخت
وصار تحت انظاره
الخدم وي ابو صالح . هذا بي الكفايه
......
والمدينه اتصير ثاني كربله
والجموع اطبهه طبت العائله
مثل يوم الاربعين ابكل صفر
هيجي اعداد الجموع الهائله
عل جهات الاربعه ... الجموع اموزعه
تمشي يوم امصابه
للحسن كل الخدم ... مشي تطلع عالجدم
وبخدمته احبابه
والعدد يتعده اكبر . نهر جاري ابمايه
....
باجر التاريخ يكتب وبفخر
حاضر ابهاي الزياره المنتظر
وحايطه الزوار بي من كل جهه
ورايته اترف اعله كل واحد حضر
صوره ما الهه وصف ... كلشي بيهه مختلف
منهه ما موجوده
والمواكب عامره ... بسفرت ابن الطاهره
الما يخلص جوده
تشبع الزاير سفرته . ويبقى منهه اهوايه
......
✍ كلمات : موسى الخادم
أني امصابي اهون بهواي
من الحرمو شرب الماي ... يا من تبجون امصابي
كامل جسمي بموتي انشال
ما متكطعه منه اوصال .. يا من تبجون امصابي
......
كل مصيبه هونتهه امصيبة حسين
انه وين امصيبتي والمنذبح وين
انه ناسي يمي جانت باجيه اعيون
بس اويلي اعله البقى ابلا دفن يومين
عالتربان ابلا تغسيل
عطشان ودم نحره ايسيل .... يامن تقرون اكتابي
.....
اني كلي انزلت كبري يل تسمعون
نقص ماجان اعله طولي وسالم امتون
حسين اخيي بالحصيره انجمع ياناس
وراسه ماكو كَاطعينه المايرحمون
ماصارت كبله ابهل ناس
ميت مدفون ابلا راس... وجسمه موذر يصحابي
......
انه اخوتي شيعوني بشيل عالروس
وما بقيت اتلث ليالي ابذيج الاشموس
كلشي بية ما تكَطع من الاسيوف
بس عضيدي الخيل فوكَاه جانت ادوس
جم حافر ساحكَله اضلوع
وشابع رفسات اوموجوع ... اصوابه اعظم من اصوابي
......
صح تكَطع جبدي بالسم حين سموه
حسين جبده بالمثلث ويلي طلعوه
انه آخر شوفه اليه ابين الاحباب
حسين شاف السيف ذاك البي يذبحوه
متربع فوكَه الذباح
بذبح حسين شكَد مرتاح ..شمر الزيدلي امصابي
......
ارد اوصيكم وصيه يغلى الاحباب
اعليه لا تبجون ابجو الظل عالتراب
الجسمه مثل السبحه ويلي انطش على الكَاع
الجرحه باقي الهسه بيه وابد وما طاب
لا يوم اليشبه عاشور
بي ظلت عالكَاع انحور ... تنظرهه اعيون احبابي
......
✍ كلمات : موسى الخادم
قصائد شهاده الامام الحسن المجتبى ع
Читать полностью…
https://youtu.be/GU1XCCdgv-c?si=5AjUjPmFgrvjQX6G
Читать полностью…
هذا ما وفقني به الله
وفضل ساداتي ال محمد
سائل من الله ان يتقبل منا هذا القليل
ببركة الصلاة على محمد وآل محمد
لا تنسوني ووالدي من صالح دعائكم
تعلمنه الاعزوبية
بمواكب الاربعينية
حسين ابا عبدالله .... حسين ابا عبدالله
...1...
جبناهه امن الزغر .... بالموكب نفتخر
ما يوم النعتذر .... عن خدمت حسين
واحدنه ابروحه اله .... امعزب مو مشكله
سر هاي المسأله .... ما نعرف امنين
مو حجي السان ابفخر نحجيهه
لو يريد الروح هم ننطيهه
حسين غالي وعزبنه ابروحه
شما نقدم روحه منوافيهه
شنقدم نشعر اشوية .... بمواكب الاربعينية
حسين ابا عبدالله ....حسين ابا عبدالله
2............
سفرتنه عامره .... للزاير ناطره
والعين مساهره ... تستقبل الجاي
بأهلاً نستقبله .... كل زاير كربله
بالخدمه اندلله .... من جاي مشاي
شما يريد ويطلب انوافيله
لو يريد النجم هم نمشيله
الجاي زاير للحسين الضامي
على العين وعلى الراس انشيله
الكَصد زاير لبو ارقيه
بمواكب الاربعينية
حسين ابا عبدالله ....حسين ابا عبدالله
.....
...3.....
خدمتنه بكل سنه ... مو بس هاي السنه
والعاده انجننه .... حال اليلومون
متحزمين الخدم ..... للباجي اعله الخيم
واحدهم يبجي دم .... من يذكر ام عون
ما يهمنه خل يلوم اللايم
موكب الخدام باقي ودائم
لو يضل امن العمر بس ليله
هم نجي ونخدم الهاي الوادم
طريق حسين حرية
بمواكب الاربعينية
حسين ابا عبدالله ....حسين ابا عبدالله
.......
.....4....
علمنه اهل العشك ... معنى الحب الصدك
ما بينه اليفترك ... عن سيد الاحرار
ميهمه كل تعب ... لحسينه الكَلبه حب ...
ميبدله بالذهب .... لو يدخل النار
بينه ما واحد يخون العشره
فدوه كلنه انروح لابن الزهره
يا ذهب يا مال الي ايخلينه
انعوف ابو اليمه حبيب الفقره
مشاعرنه حسينية
بمواكب الاربعينية
حسين ابا عبدالله ....حسين ابا عبدالله
5...........
كل عشرين ابصفر ... موعدنه اويه النحر
نحجيهه ابكل فخر .... خدامه للموت
عن دربه ما نزل .... والخدمه ما نمل
وبالرحمه ننشمل .... رددنه فد صوت
للمواكب نعتني احنه اعنايه
ابكلشي نملك نخدم المشايه
اتعلمينه انعزب ابأرواحنه
للذبيح و ما ندور غايه
فدائية فدائية
بمواكب الاربعينية
حسين ابا عبدالله ....حسين ابا عبدالله
........
✍️ كلمات موسى الخادم
يصاحب ضحكتي وكل الأماني ... قميصك بالدمه امخضب أجاني
يالذبحك اخذ عمري
الكطع نحرك كطع نحري
...1...
من شفته ابدمه امخضب
قميصك صرت اون وانحب
وركضت العمتي زينب
كلتلهه الابو اتسلب
لحمه ابحافر امجلب
علي هذا الامر يصعب
انه طفله وما اتحمل هذا الحال
صور الشافتهه اعيوني اتهد اجبال
عميه اعيوني اتمنيت ابهل ساعات
ولا شفت ابحافر لحمك بويه انشال
اعاين عالحوافر كلهه حمره ...
حرت امشي ألك لو كلبي اصبره
دمك عالارض يجري
...2...
جنت اتأملك ترجع
سالم مو تجي امكطع
اعله طول المشرعه اموزع
صيحاتي الك تسمع
ما اكدر اجي المصرع
ومنك شوف اريد اشبع
ما شايفتك صار أكثر من ساعات
ومتعوده اعيوني اتشوفك باللحضات
متعوب اهواي ادري وما ظلك حيل
شيرجعك ماترجع سالم هيهات
جروحك نازفه اشيشفي جروحك
اعرفك ما ترد طلعوهه روحك
يتموني وانه بزغري
الكطع نحرك كطع نحري
...3...
كبل لا تمشي عن عيناي
جانت امنياتي اهواي
اكثر من نبع هالماي
الهسه الرايده بس هاي
يمينك تاخذ ابيمناي
عليك امشيه بوية ابجاي
مشتاقتلك بوية ابكد هذا الكون
كلشي ايهون الا افراكك لا ميهون
موتك ما يتقبل عقلي ولا روح
لو ترجع لو تاخذني اتحلهه اشلون
اخذني العالمك ما بية اكابر
صبر ما عندي اظل اصبر لباجر
نفذ من عندي كل صبري
الكطع نحرك كطع نحري
....4....
كلشي ابداخلي ينعاك
روحي اتحن على ملكاك
حل موتي بخبر فركاك
خوفي لا اجي والكاك
مطشريهه يبويه اعضاك
يكولون الذبح أذاك
ما بيه انظر جسمك ساحكته الخيل
وبكلبك نابت رمح ابطول الليل
خليني امن ابعيد اتوادع وياك
يالمنك باكو روحك كبل الحيل
اودعك من بعيد احسن الية
ولا المك وذر بالغاضرية
صعب ما احتمل تدري
الكطع نحرك كطع نحري
..............5
لقانه ما يطول اشهور
اشوفنك بعد عاشور
بخرابه خالية امن النور
راسك بالطشت مشمور
يجيبونه الي منحور
واعاين سنك المكسور
اركضلك ركضت لهفانه امن اسنين
اوي حضنت راسك اموتن بوية حسين
جرح اغيابك ما يحمل كلبي يعيش
مثلك والد لرقية ايصح امنين
اموت احسن الي بعدك حبيبي .... نصيبك موت اذن موتي نصيبي
من بعدك شلي بعمري
الكطع نحرك كطع نحري
.....
✍️ موسى الخادم
ياجرح الاكثر ماذيك
جرح الشام اجروح البيك
ياخامس سلطان النوح
شنهو اصعب شي مر اعليك
......1.....
يالخلصت ... عمرك قهر ... موكافي
حزنك فلا ... واحد وصل ... موكافي
يالمارحم بيك الدهر لا رحم حالك
منك اخذ كلشي التحب كلشي الحلالك
صبِّحت ماعندك اهل والهم صفالك
وكل التحبهم عالترب ماتو اكبالك
يالعمرك خلصته آهات
ما ظلت عندك دمعات
من كد ما تبجي اعله حسين
مت اوياه ساعت ما مات
....2....
جرحك اشد ... من كل جرح .... يالوالي
طول الرمح ... نازف دمه ... يالوالي
مرت عليك اجم سنه والفرح عايف
وبركبتك باقي اثر جم جرح نازف
امن الكَيد ودروب اليسر ما جنت خايف
خايف جنت لا راس ابوك ايكون شايف
حالك وانته ابلايه اخوان ..
واعليك اتنوح النسوان
كل همك جان المذبوح
هذا الشاغل فكرك جان
....3..
دمعك نهر ... جاري بقه ... حد موتك
شيبك كثر ... جسمك نحل ... حد موتك
حقك تموت امن القهر يابو المواجع
جم واحد ابواحد شفت عالغبره واكع
عمرك خلص باللوعه والهم والمدامع
ما راحه شفت ابهل العمر خلصته ضايع
من زغرك ما شفت افراح
ما يوم المّرك مرتاح
جبت سنينك ضيم بضيم
وحسينك من ايدك راح
...4...
زينب جرح ... ما ينحمل ... طاريه
ما ينسي ... ذاك الحبل ... طاريه
صوره ابخيالك خلَّتك عايش تكابر
ركض اليتامه يا علي وركض الحراير
وذبحت ابوك وسحكته بذيج الحوافر
من كربله شفت العجب مصباح عاشر
حركَ اخيام وحركَ ايتام
اومسبيات ابدرب الشام
وطبت السوكَ اويه الشمات
ما خلالك عين اتنام
...5...
سهم الغدر ... ما صوبك ... هالليله
صوب كَلب ... طه النبي ... هالليله
مو هسه ميت صار الك ميت اهوايه
من شفت اهل بيتك يدورون اعله مايه
من شفت زينب تنسبي بيد البغايه
من شفت جفين الكمر فكَدت الرايه
ميت من شفت المحبوب
ساحكَته الخيل ومكَلوب
الشافت عينك يعمي الكون
مسلوب اسنينك مسلوب
.........
✍️ كلمات موسى الخادم
راية رفت بالحرم .... يا رسول الله
بسمك انباهي الامم .... يا رسول الله
....
راية رفت بل الاعالي تحمل اسمك
اتعزي بنتك فاطمة الوادعت رسمك
يارسول الله اعلى بابك باقي رسمك
الله يلعن كل شخص يالهادي سمك
السمموك بمعرفة .... يا رسول الله
نورك الطاهر خفة .... يارسول الله
...
يالحيت الدين بسمك والله نهواك
عايش بوسط الضماير ما نسيناك
اشما يعادينة الزمن باقين وياك
صرخة الاحرار ثورة تسمع اعداك
ثارك ابوسط الكلب .... يا رسول الله
عايش وما ينشطب .... يا رسول الله
.......
يا شمس رب الجلالة الضاوي نورك
للأبد ما يخفى عل الاسلام دورك
رحمة الله اجسدت كلهة بظهورك
الف هنيالة الوصل كبرك يزورك
لجلك الكون انخلق ... يا رسول الله
اي وحك رب الفلق ... يا رسول الله
........
يارسول الله لضريحك نوصل ازحوف
بلمدامع والبواجي كبرك نطوف
مايمنعونه النواصب عينك اشوف
احنه تربات الكفيل الرجف الخوف
نسحك ابصدر الرجس .... يارسول الله
لجلك انضحي النفس .... يارسول الله
........
مثل عاشر من محرم نحي ذكرك
والمواكب تنصب هيج على دربك
ابد ما خاب اليخدمك خدم ربك
دنيه فاز واخره كل شخص حبك
جنة الله جنتك .... يارسوك الله
يا شفيع الامتك ..... يا رسول الله
.......
الحمدلله رب العالمين
اللهم صل على محمد وال محمد
موسى الخادم
.........
كلمن ايفارك حبيب .... ليلة يكظي بالنحيب
وانه فاركت الابو الجانالي خيمة
.....
الجانالي خيمة اتفي الي خلصت حياتة
عن عيني غاب وما بقت بس ذكرياته
راح وتركني للحزن ساعة وافاتة
يا وسفة ضماه الكبر حلوة صفاتة
ويلي من عظم المصاب ....وجه غطاه التراب
عني غاب وغابت ارسومة العظيمة
......
مو هين افراك الابو اعظم مصيبة
يترك جرح عاجز يظل يشفي طبيبة
ما بي يحس بس الفكد مثلي حبيبة
مالومة لو عمرة انكظة بونة ونحيبة
الفارك احبابة يجن ..... ليلة وانهارة يون
كل فرح ما يبقى عندة يا هضيمة
.......
ما ينشف بعيني الدمع ﻻخر حياتي
عالفاركاني ابقى انتحب حتى ابوفاتي
ثكل المصيبة والحزن غير صفاتي
ا يا عظمهة الفاجعة يشرحة ذاتي
عيشتني بالقهر ..... حنت من عندي الظهر
امصيبة مو هينة الصرت بيهة يتيمة
.....
انه البتول الطاهرة انه الزجية
نار بدليلي اموجرة العظم الرزية
وينة اليواسيني المسة بدمعة جرية
مات الحبيب المصطفى راعي الحمية
راح وتركني للهظم ...... والدمعت الخد واللطم
والبيت الاحزان البنيتة بوسط هيمة
.......
دنياتي بعد المصطفى يخنك هواهة
ظلمة اصبحت وابلا ضوة غايب ضواهة
غيمت حزن غيمت دمع مطرت سماهة
الفكد النبي روحي اصبحت وحشة تراهة
كل فرحة ما ظلت الي ..... بعد النبي يشهد علي
قصتي انه من بعد النبي صارت أليمة
.......
كلمات
موسى الخادم
على مر العصور .... صور متناقله
الكصد بابه يزور ... كزاير كربله
سلام الله ... على الضامن ... ابو محمد رضا
.......
تشبه حضرته حضرت ابو سكينه
اليدخلهه يحس جن زاير حسينه
مثل جده الحسين ايحيي بالزاير
وينطي امراد للكاصده ابجفينه
كرم جوده يفور .... عظيم المنزله
الكصد بابه يزور .... كزاير كربله
سلام الله ... على الضامن ... ابو محمد رضا
.......
كلمن عنده حاجات ويهم بيهه
خل يكصد غريب الطوس يكضيهه
ما واحد كصدله ومنه رد خالي
موش انه الاحجيهه الناس تحجيهه
ذكر اسمه يدور .... يحل كل مشكله
......
حاير ما يعوفه اليعتني البابه
مفتاح الفرج دمعه على اعتابه
من طبعه سخي مثل الحسن طبعه
للغربه يعزب اشلون بحبابه
عطاءاته بحور .... شهد كلشي اله
......
ابو محمد رضا شمحلاه محله اسمه
شمس الله الجبيره التجلي كل ظلمه
يمه الصعبه تسهل ما تظل صعبه
وكل مهموم صدره ينشرح يمه
على كل السطور ... ذكر اسمه حله
.......
الضامن للغزاله ضامن الزاره
يحضر دفنته ويصير خطاره
يشفع لليزوره بعمره لو مره
هاي اعظم ابشاره الكم يزواره
كبر زواره نور .... امن اخيره الاوله
.......
هنياله الصبح خادم لبو محمد
باجر بالقيامه جاهه ما ينعد
يجوز اعله الصراط ابصاية الخدمه
ويدخله الجنه بيده المصطفى احمد
الحواري والقصور ... ابهله تستقبله
.......
كلمات
موسى الخادم
https://youtu.be/fmwEhAttQiE?si=FAcpo3tutU6722mv
Читать полностью…
https://vt.tiktok.com/ZS28jkJUx/
Читать полностью…
https://youtu.be/zTyRINKNFdI?si=Jz8L19_5zBPRSoa6
Читать полностью…
يم الحسن حضرت .. العلوية . العلوية
والحالته نظرت .... المسبية . المسبية
يبن امي لا تروح ... عينك افتحه الي
يبن امي لا تروح .. اعليك ابونه علي
.......
من سمعت بسم الجبد
زينب اجت مفجوعه
دخلت حجرته بالدمع
والنايحه المسموعه
صاحتله يابن والدي
بعدك اعيش اللوعه
كلشي يهون اعلي لجن
موتك أشد موضوعه
موتك يعز ناسي ... ياخذ حيلي ... يا خذ حيلي
يشهدلي عباسي ... يضلم ليلي ... يضلم ليلي
بعدك اضل انوح .... نوح كل مبتلي
يبن امي لا تروح .. اعليك ابونه علي
.....
من شافه ابعينه الحسن
صاح اعله اخوه بحركه
ضم الطشت يحسين اجت
ام الهلا والملكه
ما ريدهه اتشوف الجبد
خايف تموت بشهكه
زينب حنينه ابكَد علي
ما تحتمل كل فركَه
ضم الطشت عنهه.. خاف اتشوفه .. خاف اتشوفه
ما احتمل ونهه .. اجت ملهوفه .. اجت ملهوفه
ساعه البقت واروح .... والدموع اتهلي
يبن امي لا تروح .. اعليك ابونه علي
.......
طاحت عليه مثل النده
اتحب يمنته واجبينه
وادكله بدموع التصب
لا تمشي وتخلينه
يالدللتنه امن الزغر
بعدك منو ايراعينه
وعباس يم زينب يون
وادموعه ترست عينه
منظر صعبه وصفه .. حان اوداعه .. حان اوداعه
الكافل لزم جفه... ذيج الساعه ... ذيج الساعه
عطر الحزن يفوح .... والبجي معتلي
يبن امي لا تروح .. اعليك ابونه علي
.........
كَعدت اكَباله تنتحب
والدمعه عالخد تجري
ودكَله خويه اشيوجعك
نيران كلبي تسري
لا تخفي عني كل خبر
يالدللتني ابصغري
كلشي عليه اصبر لجن
موتك نهاية عمري
من فارك احبابه ... شله بعمره ... شله بعمره
ليليه بصوابه ... جرحه يذكره ... جرحه يذكره
وبسره الك يبوح ... كلبي يا كل هلي
يبن امي لا تروح .. اعليك ابونه علي
.........
خيمتنه انت يالحسن
مو مالت اتفاركَنه
اكَعد يسباح الكَلب
نار الهجر تحركَنه
امن اعمارنه ننطي الك
بس كون ما تتركنه
عل حلوه والمره منو
بعدك يجي ايشاركنه
أب ثاني انته النه ... أمحسبينك .. أمحسبينك
لا تمشي يا خلنه ... أفتح عينك ... أفتح عينك
لو تبقى لو نروح .... اوياك يبن الولي
يبن امي لا تروح .. اعليك ابونه علي
.......
امحسبه جنت انه تضل
عايش لحد العاشر
اويه حسين والكافل تهد
هدت الجيش الثائر
وبحركَة الخيمه تجي
اتلمم اعيالي باجر
وعن جسم ابو اليمه ترد
سهم الجبد والحافر
ومن اركض وحافي ... تتلكاني .. تتلكاني
وتكَلي لتخافي ... موجود اني .. موجود اني
من تكثر الجروح .... من يضمدهه الي
يبن امي لا تروح .. اعليك ابونه علي
....
✍ كلمات : موسى الخادم
جبده نفض بالطشت ... وانه اعله وجهي طحت
من شفته كوه ايلاكف انفاسه
يبن امي بالهم صحت
.......
كبل الخيم ما تحترك كلبي احترك عالحسن
وصورة ابخيالي اجمعَّت هالليله ليلة محن
اليشبه رسول الله وعلي باجر يلفه الجفن
هالصوت اجاني امن السمه ساعات اخيره بقن
كومي استعدي بعجل ... كرب لخوج الاجل
خلي يودع كل هله وناسه
لا يبقى عندج امل
.....
من عاينت جبد الحسن صاير وصل بالطشت
ماكمت اشوفن واعثرت بدموعي يمه وطحت
ياخوية شنهو اليوجعك يبن امي بالهم صحت
فتحلي عينك يالاخو لختك منو لو متت
نزلت دمعته وبجه ... بس كلمه وحده حجه
ودعيني كَلي والوجع جاسه
حزني اعله حزنه انتجه
....
لحسين اعاين منكسر مثل انكسار الظهر
وبعينه ما ظل كل دمع كلهن بجاهن قهر
وعباسي من كثر الحزن كابر دهر مو شهر
شفته عالاخو شابع هضم وعيونه اخذها السهر
مثل الكمر منخسف ... واكف لجن منجتف
ما صد الية ولا رفع راسه
ودموعه تجري وتجف
.....
جان الحسن عون وسند لخوانه كلهم والي
وبموتته كلشي انتهى والهم صبح معتلي
السمم جبدته بالغدر نفسه الطبرلي علي
سم الغدر سم الحقد من عندي اخذ كل هلي
بيه الزمن ما رحم ... واشهودي باب وخيم
ما راعه شخصي وراعه بس ناسه
جرَّعني كاس الالم
.....
جرح الحسن اول جرح وحسيني ثاني جرح
طف الحسن ما بي ذبح بحسيني صار الذبح
من كربله جتني صور جم راس فوك الرمح
وجم خيمه نار اموجره امن الليل حد الصبح
جم طف كتبلي الدهر ... طف الجبد والنحر
وطف ثالث اعله المشرعه احساسه
راسملي صورة نهر
......
كلمات
موسى الخادم
......
https://youtu.be/MBftM6ZV9Iw?si=a7q6ES5DKLf3vC8r
Читать полностью…
https://youtube.com/watch?v=ypRg6UIIbUA&si=Zz-sI6l-0uuJhYRp
Читать полностью…
منَّ أول الدنيه الأخير الدنيه نمشي
يوم اربعينك ما نعوفه وعفنه كلشي
...1....
متهمنه المسافات .... نجيك ابكل عزم
حفاي اعله الاجدام ... زلم تتبع زلم
على مد البصر ممشانه كل عام
نكَصد حضرتك حفاي الاجدام
نحسب لربعينك احنه ساعات
مثل ما نحسب المهدينه ايام
( زوار بدربك خلينه )
.... 2 ....
تتناقلنه الاخبار ... على كل الصحف
ثورة عشكَ لحسين... تعدت كل وصف
من كل الجهات اعليك مولاي
تتوافد تزورك ناسك هواي
مو مليون لا عشرين مليون
عدَّاد الارقام اتحَّير ابهاي
( من كل الكون التمينه )
......3.....
كل نكَلة جدم ليك ... يبن حامي الحمه
تتمناها الاملاك ... تصيح امن السمه
الزارك عارف ابحقك توافيه
حجه وعمره رب الكون ينطيه
هنياله اليزورك باجي الاعيون
ما تبقاله كل اذنوب تاذيه
( ربحان الزارك والينه )
....4....
يا ابو الأكبر اوياك .... نظل لاخر عمر
فدوه الأجلك انروح ... يبن فارس بدر
ما نخلف وعدنه اوياك يحسين
كل يوم اربعينك نجي ماشين
ما يمنعنه عنك يا بو الاحرار
بس موت الله يا سلطان الاسنين
( تشهدلك نبضات البينه )
....5....
كل يوم اربعينك .... نجي انحب عتبتك
وبدمعات الاعيون ... نطب الحضرتك
يحسين اعله بابك نوكَف اصفوف
والعالم ابأسره ربعك أيشوف
شياب وشباب وحرم واطفال
نكصد مرقدك وابيوتنه انعوف
( والراية اترف المهدينه )
......
كلمات .. موسى الخادم
جيتك اوجبت الراس وياي
واعله الكَبر رشيتلك ماي
اه يعطشان
...1...
جيتك وجبت الماي وياي ارد ارويَّك
مذبوح جبدك بالعطش يا خوية ادريك
ألماي شح اعليه ذاك اليوم انطيك
هسه انه جبته اوياي الك بلكي الله يحييك
عطشان عفتك يوم الاطفوف
ما بيك حيل اترد الاسيوف
وحيل تعبان
...2...
من بعد ضيم الشام اجيتك يابن امي
بالكوه امشي اعله الجدم كايدني همي
جم ليلة مرت وانت غايب ماهو يمي
رديت الك مو زينب، المسبية اسمي
ابنوك الهزيله الشام طبيت
وبسوكهم جم شامت الكيت
امتاني الي جان
.....3.
مر تسعه وتلاثين يوم اعلية غايب
ماشفت طولك يالنمت جوه الترايب
كوم اعله حيلك يالعليك الكَلب ذايب
افراكَك كتلني وعاشت ابروحي النوايب
بعدك يخوية حالي يا حال
وياك راحت راحت البال
والكَلب حزنان
...4...
كبرك وصلته اكعد يخوية اتلكه أخيَّتك
عطشانه تدري الشوفتك وانته ابغربتك
زيح التراب وكوم روايني كشختك
ما ريد اشوف اسهام بيك ولا ذبحتك
مشتاكه اشوفك ببيض الثوب
واكف تصلي فرض الاغروب
حان الاذان
...5...
جبت الدرب وي روحي اسولف يابو الاكبر
هلبت ارد والكاك سالم ما موذر
ويطلع خبر موتك جذب ما لايحك شر
وابعيني اشوفك سالم اعله اخيامي تفتر
وعبدالله فوك امتونك الكاه
شابع ضحك ما شابع اضماه
موش ذبلان
.....6....
جيتك يخويه ابلا نبض كلبك رقية
بذيج الخرابه انه ادفنتهه ابهاي ادية
من جابو ابطشت الذهب راسك اليه
اتلكته بلهفه وشبكَته شبكت منية
ما ودعتني ماتت ابساع
وانه ادفنتهه بدمعة اوداع
جوه تربان
........
✍️ كلمات موسى الخادم