405
قناة الشعائر الحسينيه ادارة القناة الشاعر عقيل حسين الگرعاوي https://t.me/akiellal
قصيده عن ثورة الامام الحسين ع الخالده
〰〰〰〰〰〰〰〰〰
ثورة حسين ثارت بوجه الطغـاة الظالـمـين
ثورة حسين خالده تبقى على طول السنين
الدين من مسـه الضـمـه حـسـين رواه بـدمـه
ثورة حـسين ثورة حـسين
🔶🔶🔶🔶🔶🔶🔶🔶🔶🔶🔶🔶
1
ثـوره مـن وحـي الـرسـالـه بـيـهـا ايـات
قـصــة الـقــاروره تـشــهــد بـالـروايـات
يگـول ينزف دمـه مـنهـاحسين لـومـات
الـلـي امـنهـا الرسـول ويجـري دمـعـات
هـالامـانه للعـليله ضلت تسولف مصاب
هـالامـانه بالفـجـيعـه حـولت دم التراب
وبجـت امـلاك السمـه حسين رواه بدمـه
ثورة حسـين ثورة حسـين
🔶🔶🔶🔶🔶🔶🔶🔶🔶🔶🔶🔶🔶
2
وانـطـلـق مــن الـمــديـنـه مـوكــب الـنـور
يـريـد احـيـاء الـرســالـه امـفـدي الـنـحـور
ويـنـقـذ الامـه الحـكـمـهـا الـظـلـم والجـور
وصـار تـوقـيـت البطـولـه بـشـهـر عـاشـور
بالظـعـينه سارت اطـفـال وحـرم بأمـرالامام
بالظـعـينه تـوجـهـو لـجـل العـدالـه والسـلام
ضـد عـصـابه مـجـرمه حـسـين رواه بـدمـه
ثورة حسـين ثوره حسـين
🔶🔶🔶🔶🔶🔶🔶🔶🔶🔶🔶🔶🔶
3
وبـده تـجــســيد الـبـطــولــه والـمـراجـل
مـن ابـوفـاضـل عـضـيـده الاسـمـه كـافـل
مـن گـصد صـوب الشـريعـه جـربه حـامل
وذاعــو اخـبـار ابـوفــاضـل خـبـر عــاجـل
هذاعباس جندل الشجعان يم جرف النـهـر
هذاعباس عـينه فـداهـا وجـفـوفه والنـحـر
رخـص عـمـره وقدمه حسـين رواه بدمـه
ثورة حسـين ثوره حسـين
🔶🔶🔶🔶🔶🔶🔶🔶🔶🔶🔶🔶🔶
4
مــن بـعــد ذيـج الـمــواقــف ذبـح الإمـــام
احـتاجـت الثـوره العـظـيمه موقـف اعـلام
زيـنـب اتــولـــت قــيـادة حـــرم لـلــشــــام
مــشــن والـحــره كــفــيـلـه ظـعـن الايـتـام
يـاهـضـيـمـه وي غرب مسبيه هـالدرب الطويل
يـاهـضـيـمـه مـن بعـد عـباس بت حـيدر كـفيل
والـنـعـم بـت فـاطـمـه حسـين رواه بدمـه
ثورة حسـين ثوره حسـين
🔶🔶🔶🔶🔶🔶🔶🔶🔶🔶🔶🔶🔶
5
وثــقــت ثـوره عــظــيـمـه بـنـت الابـطـال
ونـقـلـت احــداث البـطـوله عـبـر الاجـيال
وبـيـنـت احـيـو الـعــالـم بـالـدمــه الـسـال
وصـوت الاحـرار يـتعـالـه بـعـلـو الـجـبـال
ربت اجيال ثوره مابردت ابدطـول الدهـر
ربت اجيال وامـتـداد وباقـيه للـمـنـتـضــر
رايـه الـحـق قـادمـه حـسـيـن رواه بـدمـه
ثورة حسـين ثورة حسـين
🔶🔶🔶🔶🔶🔶🔶🔶🔶🔶🔶
6
كــربـلـــه عـــاصــمـه صــارت لـلـيــريـدون
عـيـشـه حــره ولـلـطـواغـي مـايـخـضـعـون
الـشـيـعـه يـوم الاربـعـيـن الـهـا يـگـصـدون
بـأربـعـيـنه وتـحـيـي ذكـرى بـدمـع الـعـيون
نحيي امره الاحيه روح الدنيه هـوه بالدماء
نحيي امره نجـدد البيعـه بمـسـيره الكـربلاء
الـغـالـي بـيـهـا انقـدمـه حسـين رواه ابدمـه
ثوره حسـين ثوره حسـين
🔶🔶🔶🔶🔶🔶🔶🔶🔶🔶🔶🔶🔶
تمت بعون الله تعالى
عـقـيل حـسـين الگـرعـاوي
حـال السـيده زينب ع عـند ذهـاب الامـام الـعـباس ع للـمشـرعـه
ـــــــــــــــــــــــــــــــــــــــــــــــــــــــــــــــ
هـــــا يـكـــــافــلــهــــــا مــــارجــــعــتــلــهـــــــا
بـعـدك بـحـيـره اصـبـحـت بـزيـنـب نـدار الـوكـت
**
1
تـنـتـضــر يــم الـمــخــيـم زيـنـب الـمــضــلـومـــه
ويـن عـبـاس شـيـرجـعـه ومـن يـجـيـب اعـلـومـه
ادري بـي عـاشـگـهــا كـلـش طـبـتـه لـلــحــــومــه
وانـي اخـاف مـن الـيـغـدره الـمـشـرعـه مـلـزومـه
بـونـه وبـحـسـره صـحـت بـزيـنـب انـدار الـوكـت
****
2
ادري اخـوي الـغــيـره طــبـعـه مــايـفـر لـمـن يـكــر
لهـذاانـي الـخـوف بـيـه وگـلـبـي يـلـهـب بـي جـمـر
وادري مـايـگـدرلـه واحـد بـس شــجـاعـتـهـم غــدر
ردلـــي يـاعــبـاس مــايـك مــو اعــز مــن الــخـــدر
بــعــدك انـي اتـلـوعــت بـزيـنـب انـدار الـوكــت
****
3
تـأخـرت يـم الـشــريـعـه خــويـه طـالـت غـيـبـتـك
شـلـون مـرسـال انـي اودي يگـلـه عـجـل رجـعـتـك
شــنـهـي طـابـتـلـك يـخـويـه وطـولـتـهـا جــيـتــك
انــي بــفــراگــك اخـــاف وكــل امـــانـي بـرايـتـك
خــويـه ردلـي تـمـرمـرت بـزيـنـب انـدار الـوكــت
*
4
طــول الـعـبـاس ضــلـتـه ولـــيـه مـارجــع جــواب
لبـو اليـمـه اگـصـدت ابـجـي لـگـيـتـه گـاعدعلتراب
گــلـي لاتـحـجـيـن زيـنـب مــثـلـج انـي بـالـعــذاب
غـيـبـه الـعـبـاس هـذي تـنـبـأت بـيـهـــا الـمـصــاب
من الدمـع عـيـنـي صـفـت بـزيـنـب انـدار الوكـت
*
5
عــلـتـراب احــنـه گــعـدنـه ولـلـگــمـر مـتـنـطـريـن
وابو اليـمـه ايجـرهـا ونه انـكـسـر ضـهـرك ياحسين
ولنـه نسـمـع صـوت اجانـه وين اخـوي حسين وين
حسـيـن صاح بعـالـي صوتـه راح ضخـرام البـنـيـن
ولـلـمـصـيـبـه اتـحـزمـت بـزيـنـب انـدار الـوگـت
****
6
راحـلـه بـحـســره الـحـسـيـن وصــل يـمـه ورتـعــد
گـلـه سـلـمـلـي اعـلـزيـنـب مـاوفـيـت الـهـا الـوعــد
الـمــاي مـاجـبـتـه انـي الـهـــا لـلـخـيـم مــاريـد ارد
ســكـنـه تـربـيـنـي ورقــيـه والـرضــيـع الـبـلـمـهــد
لـجودي كـلـه تـنـطـرت بـزيـنـب نـدار الـــوكــــت
*
تمت بعون الله تعالى
عـقـيـل حـســيـن الـگــرعــاوي
زيـنـيـب ع تـنـدب ابـاهـا امـير الـمـؤمـنـيـن
ـــــــــــــــــــــــــــــــــــــــــــــــــــــــــــــــ
صـحــت ودمـعي بالعـين وينـك يبـو الـحسـنـين
مـاتـلحــگ عـلــيـنـه وليـه احنـه انولـينه
ـــــــــــــــــــــــــــــــــــــــــــــــــــــــــــــ
1.
بــويــه لـوشــفــتـنـي مـــاتــعــرفـنـي زيـنـب
مـن ثـگـل الـمـصـايب حـتـى الـگـلـب شــيـب
وشـحجـيلك وظـعـنه وخـدري الـلـي تـسـلـب
ومـن حـرگـو خـيمـنه وبـيـنـه الـشـمـر يظرب
صـحـنـا ياعــلـيـنـه وليـه احـنـه انـولـيـنـه
ــــــــــــــــــــــــــــــــــــــــــــــــــــــ
2.
رحـت عـنـهـم سـبيـه شـلـون اتـحـمــلـوهـــا
وبـالـكـوفــه اســيـره اخــتـهـــم نـزلــوهـــــا
ادري لـــو يـگـــدرون اخـتـهـم جـان اجـوهـا
هـسـه ياابـوحـسـيـن زيـنـب يــــم ابـوهــــــا
مـاتـگــدر تـجـيـنــه ولـيـه احـنـه انـولـيـنـه
ـــــــــــــــــــــــــــــــــــــــــــــــــــــ
3
ادري بـالـكـــفـلـنـــي ضـحـه لـجـلـي جــفـوف
ومـاهـاب الـعـسـاكـر طـب ومـاعــرف خــوف
وظل اعلـه الـشـريعه هـنـاك الگـمـر مـخسـوف
وعـفـنـاه ومـشــيـنـه الكـافـل بـرض الـطـفوف
وبعده احنـه انسـبينه ولـيـه احـنـه انـولـيـنـه
ــــــــــــــــــــــــــــــــــــــــــــــــــ
4
هـســـه بـلاكــفـالــــه تـمـشـي بـنـيـتـك اليـوم
ومـتـكـلـفـه بظـعـينه وعـلـيـهـا الـظـالم يحـوم
الـكـوفـه مـن دخـلـنه نـطـلـب فـزعـتـك گـــوم
لاشـمـس وگـمـر ظـل غـابـت حـتـى الـنـجــوم
وظـلـمـت عــلـيـنــه ولـيـه احـنـه انـولـيـنــه
ــــــــــــــــــــــــــــــــــــــــــــــــــــــ
5
نـمـت ولــن اجــانـي ابطـيـف وشــاهـد الـحـال
ابـوي يـصـدلـلـوجوه ويــن ام الـخــدر گـــــــال
اضـنـه مـاعــــرفـنـي مـغـيـره رسـومـي الـرمـال
گـربـلـي انـي گـتـلـه زيـنـب والــدمـــع ســــــال
بـجـه بـدمـعـه حـزينه ولـيـه احـنـه انــولـيـنـه
ـــــــــــــــــــــــــــــــــــــــــــــــــــــــــــــــ
6
مـعـقـولـه انـتـي زيـنـب خـدرج هــذا تـالـــــي
هـيـجـي حـالـج اتـصـير بـعـد عــزي ودلالـــي
بـجـيـت انـي وگــلـتـلـه غــيـرك بـويـه مــالـي
راحــــو كـــل اخــوتـي ولاواحـــــد صــفـالـي
ردنــــي لـلـــمــديــنــه ولــيــه احــنـه انــولـيـنـه
ـــــــــــــــــــــــــــــــــــــــــــــــــــــــــــــــ
تـمـت بـعـون الله تـعــالـى
عـقـيـل حـسـيـن الـگــرعــاوي
نحر الإمام الحسين ع يتكلم مع جفوف
اباالفضل العباس بعد مااخذو السيدة
زينب ع والعيال سبايا
🔸🔸🔸
نحر يحجي ويالجفوف بعد معركةالطفوف
راحـت زينب روح الزهره
واني وياجـن فوگ الغبره
راحت زينب راحت زينب
🔸🔸🔸▫️▫️▫️🔸🔸🔸
1
صوت من النحر مبحوح لجفوف الكفل ناده
هـم عـدجن علم هاليوم شصار بعمة الساده
مشت مسبيه والأنـذال گـام اعـليهـا تتماده
احنه عله الأرض نومه وشمرهم ماخذمراده
فرحان بسبي ام عون بـأخـيتنا يعـذبون
ونار بگـلـبي علـيهم كبره
واني وياجن فوگ الغبره
راحت زينب راحت زينب
🔸🔸🔸▫️▫️▫️🔸🔸🔸
2
بعبره لجف الأيمن صاح من يمنه الضعن حَّدَر
مشت مسبيه صـوب الشـام اياوسفه هالخدَر
رد الجـف الأيسر گـال جـنت لازم علـم حيدَر
ومن گطـعـوني ماهـمـيت مـن ربي عَلَي قَّدَر
المـوته من سـبايا مـرو عـالضحايه
وماكو اخوان الضعنك تبره
وانـي وياجـن فـوگ الغبره
راحت زينب راحت زينب
🔸🔸🔸▫️▫️▫️🔸🔸🔸
3
النحـر جـاوبـهـن الجـفـين اهون امـر ذبـاحي
ولاموقف گمرهاشم من اجيته لازم اصفاحي
مااشعر بألم من جان مثخن جسمي بجراحي
بس جرح لسبي يوجع عليه اشتدت انياحي
من شفت الضعن سار من نحري تشب نار
بـلا كـفـال تـروح الـحـره
واني وياجن فوگ الغبره
راحت زينب راحت زينب
🔸🔸🔸▫️▫️▫️🔸🔸🔸
4
بهاي الساعه لن صرخه من صوب النهر تدوي
النحـر ميزهـا من عباس كلمه توجع اوتجوي
يصيح اهنا يخوي شلون اني اعله لنهر مرمي
وزينب تمـشـي مسـبيه واسـمع تنده ابأسمي
مـاهـمتـني اديـه بگد صرخت رقيه
اخذت روحي وزرعت جمره
وانـي ويـاجـن فـوگ الغـبره
راحت زينب راحت زينب
🔸🔸🔸▫️▫️▫️🔸🔸🔸
5
نحر حسين اله غايه من يحجي ويه جفينه
يدري مـسـتحـي مـنه مـاروه ضـمـه سكينه
واجت الّي اشد واكلف منها تصب دمه عينه
من مرو على الاجساد وشاف الضعن سابينه
لسهم ابعينه مكسور شيفزع هوه منحور
مات امن ايصد خدَّر اسره
واني وياجـن فـوگ الغبره
راحت زينب راحت زينب
🔸🔸🔸▫️▫️▫️🔸🔸🔸
6
اي والله ينحر احسين خجل متزاحم ابالي
صارت ضربة العامود وسهم ابعيني اشوالي
ولاهـمني الجـفين بگـد منضـر سـبي عيالي
مـتـت لـمـن تنـاديني اخـيتي اهـنا يكـفـالي
وانه ابلا وسـيله وتحشمني العـقيله
هنانه الحيل اتهدم صبره
واني وياجن فوگ الغبره
راحت زينب راحت زينب
🔸🔸🔸▫️▫️▫️🔸🔸🔸
تمت بعون الله
عقيل حسين الگرعاوي
السيده زينب. ع. في مصرع الامام العباس. ع
وتستذكر مصاب والدها الامام علي. ع
🔸▪🔸▪🔸
يا جرح ما ينقاس. وبطيحتك عباس
هدمت حيلي.
🔸▪🔸▪🔸▪🔸▪🔸▪🔸
1
وگفت ليل هدعش يم مصرع الخوه
محـنـية ضـهـر بأنفـاسـي اجـر گـوه
من شـفـت الگـمـر مـن السمـه يهـوه
ابـوي الـمـرتـضـى جـن انـطــبـر تـوه
وطبرة علي بالـراس. وبطيحتك عباس
هدمت حيلي
🔸▪🔸▪🔸▪🔸▪🔸▪🔸
2
اعـايـن لـلـگـمـر يــم الـنـهــر مـمـدود
ويمه اجفوفـه طاحـن والعلم والجود
احس اتسع طعـش رمضـان رد اردود
مـن شـفـتـك يبـو الغـيره بـلايه ازنود
ياكـعـبه الاحسـاس. وبطيحتك عباس
هدمت حيلي
🔸▪🔸▪🔸▪🔸▪🔸▪🔸
3
گـعدت يمـه وبست اجفـوفـه والرايه
وفـيـت الـكـفــالـه وگــد الـحـجــايـه
قـــرأن الــوفـــه يـاالـجـــربـتـك أيــه
ذلـيـت الـنـهــر مــن اشــمــرت مـايـه
من ايدك يبو النوماس. وبطيحتك عباس
هدمت حيلي
🔸▪🔸▪🔸▪🔸▪🔸▪🔸
4
كـل جـف يـرسـم لـهـذا الـزمـن عـبـره
جف يرسم شجاعه وجف عظم صبره
مـثل حيدر مجـاهـد گـضـه كـل عمـره
تـالـي يـنـخـتـم مـن يسـجــد ابـطـبـره
بالكوفه من ارجاس. وبطيحتك عباس
هدمت حيلي
🔸▪🔸▪🔸▪🔸▪🔸▪🔸
5
انـعـادت لـوعــه المـحـراب والـطـبـره
شـعـلـت بـالـگـلـب يـم الـنـهـر جـمـره
ورجـعـت ذكـريـات الـبـاب والـعـصـره
وگـع محـسن شـهـيد امن امي الزهـره
ويلـفـظ اخير انفـاس. وبطيحتك عباس
هدمت حيلي
🔸▪🔸▪🔸▪🔸▪🔸▪🔸
6
نصـبت يم النـهـر مـأتم انه الوحـدي
وصحت باجـر شمر ابناگـتي يحـدي
وسـديـت العـتـب بس الجـرح يـدي
يظـل مذخـور ثـارك خـويه للمـهـدي
من يظهر اعله الناس. وبطيحتك عباس
هدمت حيلي
🔸▪🔸▪🔸▪🔸▪🔸▪🔸
تمت بعون الله تعالى
عقيل حسين الگرعاوي
السيده زينب عليها السلام
وهيه على تل الزينبي تشاهد
الإمام الحسين ع حينما ذهب الى مصرع
اباالفضل عليه السلام
🔸🔸🔸
من على تـل المصـايب والنضر رايح
الشمس محني ضهرها والگمر طايح
وبـتـدت قـصــة ضـمـه
والـمـصـيبـه الـمـؤلـمـه
راح اخوي راح اخوي
🔸🔸🔸◽◽◽🔸🔸🔸
1
حسين گـاصد للشـريعـه واني عـالتل
حين قـربله نضـرته بـمـشـيـته اخـتل
عبر الإحساس انه اسمعه عليه يسأل
والدمـوع بعـيني تنـعـه وتقـره مقـتل
سـلامـي لـلاخـت ياخـويه گـلـلهـا
اخيتي ابلايه ماي اشلون ارد الها
عـذري وصلـه الـزينب وهـذا كـلامي
چفوفي ضلن عالشريعه واني ضامي
وگِلها هـامه مهشمه
والمـصـيبه المـؤلمه
راح اخوي راح اخوي
🔸🔸🔸🔸◽◽◽🔸🔸🔸🔸
2
رجـع مـن يـم الشـريعـه تـغـلـي ناره
ابـولـيـمـه ويـايـه يحـجـي بالإشـاره
بلايه صوت وبس دمع عينه يتجاره
الفـهـمـته انگـطـعـن ايمـينه ويسـاره
بـوجـهـه وبـالـضـهـر بـانت تجـاعـيـده
يجـر حتى لنفـس گـوه على عـضـيده
بالشهگه يسـولف والهـمس گام
طب الخيمته ويلطم على الهام
يگـول صبري هـدمه
والمـصـيبه المـؤلـمه
راح اخوي راح اخوي
🔸🔸🔸🔸◽◽◽🔸🔸🔸🔸
3
العـمـد وگـعـهـا والخـيمـه يشـمـها
يگـول عـيـني رايد تـرَّجِـع نضـرها
يوسفچ يـم البنين اضلوعـي طرها
چفوفه تربيتج عله لشاطي شمرها
غـرف نهر الفرات وماشـرب گطره
ودگ نيشـان للخـوه بعـظـم صبره
يلي راضعـته شجـاعه وغيره ومروه
راهن بطبت الشريعه وماي اخذ گوه
لقدر وسـفه داهمه
والمصيبه المـؤلمه
راح اخوي راح اخوي
🔸🔸🔸🔸◽◽◽🔸🔸🔸🔸
4
گـلـي يازيـنـب تـعـالـي وكـض الصـفـاح
عفت اخينه عله الشـريعـه مثخن جراح
اهون مصاب ابني الاكبر خويه من طاح
طيحـة العباس هـدمـت حيلي من صاح
ادركـني يخـويه بس ضعيف الصوت
مِــد ايـدك الـيـه مــن گــبــل لامــوت
جيت احضنه ونبتن ابصدري سهامه
وسَهَـم عـينه چَـلـب بطـرف العِمـامه
تشابگن دمعه ودمه
والمصـيبه المـؤلمه
راح اخوي راح اخوي
🔸🔸🔸🔸◽◽◽🔸🔸🔸🔸
5
خويه بالغيره ابوالغيره تعده الحدود
عيونه متصد الچفوفه عيونه عالجود
يصفگ بزنده اعله زنده وحيله مهدود
كَسَّرت ضَهر الشـريعـه الچـان مسدود
بـس غـداره صـابو بالسـهـم جـودي
وعـيني اعله الخـيم قَلَّلي مجهودي
شنهو عذري اواعدتها المـاي اجيبه
وگـام يـنـعـى ايـزينـب يـالـغـريـبه
وروحه صعدت للسمه
والمـصـيبـه المـؤلـمـه
راح اخوي راح اخوي
🔸🔸🔸🔸◽◽◽🔸🔸🔸🔸
6
وجهت للقـبله وجهه ومارضه ينام
انه اهده وهوه يرجع عينه عالشام
گمت افسر بالملامح حرگ الخـيام
عُبُر نضـراته سـوالف بالگـلب ضام
عـفـته ومـن سـهـم فـرگـاه حـيلي انرض
مشيت وبس ثلث خطوات جدمي وكض
حيلي عفته عله الشريعه شلون حيره
خـويه زينـب فـرگـة الـكـافـل چـبـيره
الخـدر بيدچ سلمه
والمصيبه المـؤلمه
راح اخوي راح اخوي
🔸🔸🔸🔸◽◽◽🔸🔸🔸🔸
تمـت بعـون الله تعالى
عقيل حسين الگرعـاوي
صوت الخدام المخلصين
🔸🔸🔸🔸
هيهات من الذله يصيح صوت الخِدام
بخـدمتك نتعلـه يصيح صوت الخِدام
ياهله بشهر المحـرم والدمـع
🔸🔸🔸🔸🔸🔸🔸🔸
1
الخادم التشوفه وبجفوفه يخسف صدره
يحضر المجـالس جَـَّنه عـابس فَـَّده عمره
ولـوحـضـر عـزيه عـالـرزيه گـلـبـه جـمـره
كـل يقينه وهـذا دينه روحـه لأبن الزهـره
وبـعـهــدنـا بـاقـيـن يصيح صوت الخِدام
موتنا بدرب حسين يصيح صوت الخِدام
صـوتنه بكـل المـنابر ينسمـع
🔸🔸🔸🔸🔸🔸🔸🔸
2
تـايه وجـبـتني وحضـنـتـنـي جـنت ابـلا راي
انـتـه عـلـمـتـنـي وفـهــمـتـنـي طـبـع الـوفـاي
الـغـيره عـنـده مـايـرده الـف فـارس لـوجــاي
البيده جـربه ومايشـربه شمر من ايده المـاي
بهـالرسـاله مـقياس يصيح صوت الخِـدام
من جناب العـباس يصيح صوت الخِـدام
على نهجـه وبمحبته ننجـمـع
🔸🔸🔸🔸🔸🔸🔸🔸
3
الضحه ولده وكلشي عنده شنهومقصوده وليش
رادنـه بخـيـمـة حـنـانـه وبـأمـانه احـنـه انطـيش
الـقَــدَّم الـغــوالـي مــايـبـالـي تـعــداد الـجــيـش
ثـبـت الـعـقـيـده والـيـريـده سـلـطــان ايـعـيـش
خـيرك امغطي الكون يصيح صوت الخِدام
بحـبـك انـه مـجـنـون يصيح صوت الخِدام
نذوب بِمحَبتك مثل طبع الشمع
🔸🔸🔸🔸🔸🔸🔸🔸
4
الخدمه سرها وكل امرها حسن نيه مريود
طـبـع كـافـل مـايجـامـل قـدم بحـبه ازنـود
انطه اِدينَه لجل دِينه وخاطر اعيون الجود
يوفي وعده ويبقى عـهده للأمـام المـوعـود
الينقذ الأمه من الجور يصيح صوت الخِدام
ســر الاهــي مـذخـــور يصيح صوت الخِدام
نـنـتـضر نـوره علـى الأُمـه يـشِـع
🔸🔸🔸🔸🔸🔸🔸🔸
5
التبجي عينه على حسينه هذا فعلا محضوض
البـس مضـاهـر بالشـعـائر هـذا خـادم مرفوض
كـون گـلـبـه ويـه دربـه نـهـج واحــد مـفـروض
للـي فَّـده كلشي عنده لأجلي صـدره مرضوض
انوحد الكلمـه بهـاي يصيح صوت الخدام
احسين للدنيا الماي يصيح صوت الخدام
عـن خـدمـتـك مـاازل وامـتـنـع
ياهـلـه بشـهـر المحـرم والدمـع
🔸🔸🔸🔸🔸🔸🔸🔸🔸
تمت بعون الله تعالى
عقيل حسين الگرعـاوي
قصيدة لفاطمة العليله روحي فداها
فاطمة العليله تسأل ام البنين ع
🔸🔸🔸
هسه وين. ضعن الأحباب المشو
هسه وين. وبـرُكُــــبـهـم نـوخــو
احجيلي ياام البنين. گلبي ذاب من الونين
هسه وين. هسه وين
🔸🔸🔸◽◽◽🔸🔸🔸
العليله
1
اشـتـيـاق الـبـالـگـلـب خـلـف حـراره
روحي وجـت خل يجي يطفيها ناره
امـنـيـتي ياام البـنـيـن اعـرف قـراره
يرجـعـلـنه لـويضـل شـنـهو اخـتـياره
ادري بي. والدي تأخره الضروف
ادري بي. بصحره ورده مايعوف
تعطش اشواگ وحنين. گلبي ذاب من الونين
هسه وين. هسه وين
🔸🔸🔸◽◽◽🔸🔸🔸
ام البنين
2
كفـي دمعـج يالعـلـيله شـوگـي يلهَب
بالمـنام بـطيفي شـفـته بكـربلـه طَب
وزينـب اديـر بنضـرهـا والـدمـع صَب
الساتر الله من الحلم شوضهري حدَب
گمت اشوف. سيوف وارماح ونبل
گمت اشوف. عـالخـدر ملتف حبل
والأطفال مگيدين. گلبي ذاب من الونين
هسه وين. هسه وين
🔸🔸🔸◽◽◽🔸🔸🔸
العليله
3
ليش تمـشي والمنايه اعـليكـم ادور
وانته نجمات وكواكب ضعنك اينور
قـابض الروح بقدومه شهـر عـاشور
من شفت منضرهلاله ضهره مكسور
گلبي نار. من شفت حمـرة السمه
گلبي نار. من امطرت مو مي دمه
وكلشي بالعالم حزين. گلبي ذاب من الونين
هسه وين. هسه وين
🔸🔸🔸◽◽◽🔸🔸🔸
ام البنين
4
كل اشـارات الهجر توحي بسفـرته
من الضلام الخـانگ الروح بعتمـته
من التسـألـه ومايجـاوب لـوسـألته
هـوه اليفـارگ جمالك شنهـو ضلـته
حسرة تبقى. مـنـها دلالـي انـطـعـن
حسرة تبقى. مامشيت ويه الضعـن
وعالهجر الله المعين. گلبي ذاب من الونين
هسه وين. هسه وين
🔸🔸🔸◽◽◽🔸🔸🔸
العليله
5
والله ماتكفي السوالف والعـتب فات
بـس رسـالـه لـوتـصـلـك بـيـهـا ابيات
انعى بيهن عالعفـتها تعيش مـأسـات
ولـيـش قـرأنـك عـزلـهــا مـن الأيـات
بلايه روح. مختصر نص الكتاب
بلايه روح. تنتضر مـنك جـواب
مروتك اليوم بسنين. گلبي ذاب من الونين
هسه وين. هسه وين
🔸🔸🔸◽◽◽🔸🔸🔸
ام البنين
6
يلّـي حمـلـت الضعـون بليلة ضلمه
بروحي وبروح العليله اتركت ثلمه
فـدوه الك اربع بـنـيـنـي والله يمه
ريتي مشـتاگه النسيمك ولـو شمه
شلون اعيش. وانته لعيوني ضوه
شلون اعيش. وانته نسمات الهوه
لاحياة ابلاحسين. گلبي ذاب من الونين
هسه. وين. هسه وين
🔸🔸🔸◽◽◽🔸🔸🔸
تمت بعون الله تعالى
عقيل حسين الگرعاوي
(دموع العـليله)
الى سيدتي فاطمه (الـعـليلـه)عليها السلام
(وزن الحدي التام )
🔸▪🔸▪🔸
دمعي يظل يجـري نهـر
شوگي الك صحره لمطر
گـد مابجيت بغيبتك. ذبلت عـيوني من السهـر
بـابـه بـابـه بـابـه بـابـه
🔸▪🔸▪🔸▪🔸▪🔸▪🔸
1
اول معاناتي ابتدت. خلت دموعي تصب دمه
من انضر الظعن الاهل. هـالمسـتعد للـمـوزمـه
من والدي جـاني الخبر. تبقى العليله فـاطـمـه
هـنا اول اسهـام الدهـر. اتوجـهـت من كـربلـه
وصحت ابدمع ياوالدي
تتركـني لـيش الوحـدي
وانـي العـزيزه ابـنـيـتك. فراگك صعب ياسيدي
بـابـه بـابـه بـابـه بـابـه
🔸▪🔸▪🔸▪🔸▪🔸▪🔸
2
اه الوداع شگـد صعب. من ودعت كل اخـوتي
ومنضر اخـياتي رسـم. نهر الهجـر من دمـعتي
ودعت الاطفال واجت. رقـيه تـون وي عـمـتي
گالتلي عمتي اتوادعن. وزادت عـلـيـه عـلـتـي
گــلـبـي عــلـم مــانـنـجـمـع
سكتنه ودمع يحجي لدمع
لمن سره ضعن الاهل. ضلمه ورحل منها الشمع
بـابـه بـابـه بـابـه بـابـه
🔸▪🔸▪🔸▪🔸▪🔸▪🔸
3
من المـعـانات اصـبحت. لاعــايـشــه ولامـيـتـه
مـن والـدي عـندي أمـل. يرجـع خـبـر لـبـنـيـتـه
يطمني عن حال الاهل. شنهو الخبر عن سفرته
بنتك صفت حتى الهوه. هـم تنجـرح لوشـهگته
بويه الهوه المابي عطر
مـنك احـس جـنه جـمر
ادركـنـي بـويـه مـروتك. ماضل بعد عندي صبر
بـابـه بـابـه بـابـه بـابـه
🔸▪🔸▪🔸▪🔸▪🔸▪🔸
4
حتى الحلم بعد الاهل. كـل لـيلـه جـايبلي خبر
لـيلـه يراويني الخـيم. ليله اشـوف ابشـع صور
من الحلم اصحه وافز. تبـدي مـعـانـات السـهـر
خوف ورعب گلبي انمله. وين التفت كلها خطر
راح الـدلال ابـغـيـبـتـك
ادركـني بـويه مـروتـك
كل ساعه بسهام الهجر. مذبوحه بويه ابنيتك
بـابـه بـابـه بـابـه بـابـه
🔸▪🔸▪🔸▪🔸▪🔸▪🔸
5
جن ورده محتاجه المطر. ذابل غصنها وملتوي
ولـواشـرب ابحور الارض. بـعـدك ابـد مـاارتـوي
يالي اكسرت غصن الورد. ماضن بعديرجع قوي
يالطـاوي فكـره رجـعـتك. نار الهجر بيها انجوي
اخـــر ســلامــي لـلأهــــــل
ليش هيجي كل هذاالحصل
محـرومــه اظـل ابـغـربـتي. مثلي بشر محد حمل
بـابـه بـابـه بـابـه بـابـه
🔸▪🔸▪🔸▪🔸▪🔸🔸▪🔸
تمت بعون الله تعالى
عقيل حسين الگـرعـاوي
رفعـوالرايه وبات بگـلـيبي همـه
وللمهدي ضل مذخور ثار الائمـه
رفعـو الرايه وصار للحزن نيشـان
گلب الموالي اليوم غارگ بالحزان
المقصر الخادم عقيل حسين الگرعاوي
قصيده لبيعه الامام علي. ع. في يوم الغدير
(من كنت مولاه فهذا علي مولاه)
(وزن المنسجم)
🌺🌺🌺🌺🌺
حب علي من الله فرض. خارجي اللي يعترض
بـأمـر مـن رب الـسـمــاء. انـعـلـن يـوم الـولاء
🌺🌺🌺🌺🌺🌺🌺🌺🌺
1
ياحـجــه الله الأيــدك. فـي مـحـكـم الايـه
بـعـد النـبـوه تـسـتلـم. حـيـدر علي الـرايـه
واليـوم كـلهـا تبايعـك. سـبحـانه الـه غـايـه
يدريك گـدهـا بالـفـعـل. يالـگـد الـحـجـايـه
يـاوريـث الانـبـيـاء. انـعـلـن يـوم الـولاء
🌺🌺🌺🌺🌺🌺🌺🌺🌺
2
نص اية الله الـمـنزلـه. مـن العـلـي لحـيدر
انته امـيـر اعـلـه الـمـله. ونورك بـده يكـبر
احـبابك الليله اصبحـت. اعله البشر تفخـر
اشمـا نشـم ريح البغض. ريحك يضل عنبر
ونفدي حبك بالدمـاء. انعـلـن يـوم الـولاء
🌺🌺🌺🌺🌺🌺🌺🌺🌺
3
بشرياني تمشي محبتك. ومخالطه ويه الدم
ياورده من جـنـه عـدن. هـنـيـاله من يشـتـم
الــي نـكــرهـــا مـحــبـتـك. بـالاخـره يــنـدم
والـي يوالـيـك ابفـخـر. من كـلـشي مـايهـتـم
لـلـولايـه احـنـه فـداء. انـعـلـن يـوم الـولاء
🌺🌺🌺🌺🌺🌺🌺🌺🌺
4
ياعـلي صارت بـيـعــتك. هيه اكـبـر الاعـيـاد
يوم الغـديـريه صـبـح. عـيدك يـبـو الامـجـاد
ونـجـدد الـبـيـعـه الـك. بـيـك الـفـرح يـنـعـاد
ونتعـايد ونحجـي ابفـخـر. ونــقــــدم الاوراد
ونـصـرخ بهـذا النـداء. انـعـلـن يـوم الـولاء
🌺🌺🌺🌺🌺🌺🌺🌺🌺
5
ياحبك الساكن وسط. گـلبي ويجـس نبضـه
يالـبـيك تمم لـلخـلـگ. سـبحـانه بي فـرضـه
والي نكـرهـا بيعـتك. خل يبقـى في بغـضـه
يالاسمك بساگ العـرش. والحجه في ارضـه
عـلـي يـابـاب الرجـاء. انعـلـن يـوم الـولاء
🌺🌺🌺🌺🌺🌺🌺🌺🌺
6
امحـبتك صـارت وصـل. ويه السـمـه تمتـد
الـبـايـعـك ديـنـه كـمــل. والـيـنـكـرك مـرتـد
هـنيالـه الينول الشـرف. من شـيعـتك ينعـد
وبيـاعلي لـسـانـه لـهـج. والـبـيـعــتـك جـدد
يـاولــــي الاولــيـــاء. انـعـلـن يـوم الـولاء
🌺🌺🌺🌺🌺🌺🌺🌺🌺
تمت بعون الله تعالى
عقـيل حسـين الگـرعـاوي
بعدما انتها المسلمون من حجة الوداع
جاء الأمر الإلهي للنبي الأكرم ص
🔸🔸🔸
انتها حج الوداع وهامت الناس
اتـودع الـنـبـي بـالـحـج الأكــبـر
نـاده بـعالـي صـوتـه ساعة انذار
نـبـي الـرحـمـة عـالحـجـاج اشـر
وگـفـوهـا القـوافـل هسه جبريل
نـزلـي بـأيه مـنـهـا الجـلـد قشعر
???
بسم الله الرحمـن الرحيـم
۞ يَٰٓأَيُّهَا ٱلرَّسُولُ بَلِّغۡ مَآ أُنزِلَ إِلَيۡكَ مِن رَّبِّكَۖ وَإِن لَّمۡ تَفۡعَلۡ فَمَا بَلَّغۡتَ رِسَالَتَهُۥۚ وَٱللَّهُ يَعۡصِمُكَ مِنَ ٱلنَّاسِۗ إِنَّ ٱللَّهَ لَا يَهۡدِي ٱلۡقَوۡمَ ٱلۡكَٰفِرِينَ .
صدق الله العلي العظيم
ناده عله الصحابة بعالي الصوت
من اقـتاب الأبـل شيدولي منبر
رفع يمنة علي وبانت بياضين
ابـطـيـهـم وبالـحـجـاج اجـهـر
مــــن كـنـت انـا مـولاه فـهـذا
علي مولاه ابوالحسنين حيدر
لزمهم سره لخيمة ابوحسين
وگـلـلـهـم الله اختاره الأجدر
المـيوالي علي مـايـعـبـد الله
المـاحط ايده بـيده هـذا ابتر
وگـفـو بـايعـو مـخـتلـف نيات
منهم صافي نيته واكولمضطر
اكــو بـخــن لـك يـاعلي يـهـنـي
وهوه بگلبه غيض وحاشه يطهر
واكـو بـايَـع وبـايِـع كلشي للدين
وحب حيدر علي بأحشائه يفتر
علي لـو مـاعلي مـاقـام الإسـلام
بـسـيـفـه وتـضـحـيـاته الدين نَوَّر
الباري اختصه في هذي الكرامات
وخـلـه بـنـوره هــالأكـوان تـزهــر
مـنـهــا وبـانـت الحـيـدر عـداوات
وحـقـد بـگـلـوبـهـم عـالعـتره يكبر
گالو جي قرابه وصهره ابوحسين
وتـحــايـز نـبـيـنـه بـهــــاي قـصـر
فــتـره مــــن الـزمـن ونـتـقـل لله
هـاديـنـا وحـديث الـبـيـعـه اُنـكـر
وعـقـدو بالسـقـيفه مـؤتـمـر هـام
انتخـابات الخـلافـه هـالجمع قرر
بده التضليل والتحريف والسيف
والـمـاقـابـل اعـلـه البـيـعـه يُجـبَر
اغتصبوهـا الخـلافه وباعو الدين
كـل ضـنـهـم عـلـي الـكـرار يُـدثـر
متـوهـمـين مـنـجـم لـو الـف عام
نـطـلـع والـكـنـوز تـصـيـر جـوهـر
ونـلـتـم بـالـغـديـر انـردد الصـوت
بـايـعـــنـه عـلـي الـكــــرار حـيـدر
عقيل حسين الگرعاوي
قصيده. للأمـام محمد الجـواد. ع
ليلة أحزان ودمـع. المـهـدي بيهـا منفجع
هالمسيه. هالميسه
🔸🔸🔸🔸🔸🔸🔸🔸🔸🔸🔸
1
اليوم أرض الكـاضـمـية عـلـنت الليله الحداد
عالجـواد أمست حزينه ولبست اعليه السواد
وقـامـت الليله عـزيه تبجـي دم اعلـه الجـواد
وجني أشـوف اني الزجـيه گاعده اباب المراد
تبجي وتون عالمصاب. تنادي اه اعله الشباب
هـالمـسـيه. هـالمـسـيه
🔸🔸🔸🔸🔸🔸🔸🔸🔸🔸🔸
2
شي اكيد المهدي حاضر شـارك بهذا العـزاء
ويگـعد يواسي الزجيه ومايكـف من البكـاء
ويذكر حسين وغربته الضل وحـيد بكربلاء
ولو ذكر سبي العـقـيله تنزل ادمـوعـه دمـاء
يمشي مكسور الضهـر. وتجري دمعاته نهر
هـالمـسيه. هـالمـسيه
🔸🔸🔸🔸🔸🔸🔸🔸🔸🔸🔸
3
سـاعـد الله يابوصـالـح گـلبك بهـذا المصـاب
تذكـر القاسم والأكـبر وتجر ونه اعله الشباب
ادري وي عبدالله شـوغـه عـنـدك اويه الـرباب
شلون اجه مذبوج ابنها والحـلم اصبح سراب
مـملي گـلبك بالجـروح. وبالعـزه تون وتنوح
هـالمـسيه. هـالمـسيه
🔸🔸🔸🔸🔸🔸🔸🔸🔸🔸🔸
4
ياجـرح هـدم كـيانك خـلـه دمـعـاتك تسيل
شي اكيد امن العقيله صعدت ابنوگ الهزيل
تصورتها الناكه عرجه بزينب الهـودج يمـيل
وانته تلطـم عـالجواد اتذكـرت قصة العليل
گـام بدمـوع النضـر. يبجـي دم المـنـتضـر
هـالمـسيه. هـالمـسيه
🔸🔸🔸🔸🔸🔸🔸🔸🔸🔸🔸
5
احس نبره تقـره بيـهـا لحـن مـن ارض الطفوف
من جبت طاري لشجاعه سولفت قصة لجفوف
مـن رمن ماي الشـريعـه والنهـر عـاف الجـروف
وتالي تخـتمـهـا ابواجـي تذكـر سـهـام وسيوف
اجـمـعـت صـوب النـهـر. حـتى تـغـدر بالگـمـر
هـالمـسيه. هـالمـسيه
🔸🔸🔸🔸🔸🔸🔸🔸🔸🔸🔸🔸
تمت بعون الله تعالى
عقيل حسين الگـرعـاوي
ابيات للأمام علي. ع
▪▪▪▪
علي يمـرضـع الـدنـيـه أمـان وحـق
بوكت جانت جنود الخوف منتشره
انـصـفـت الـفـقـير بـدولـتك مـولاي
وخـلـيت الـغـني يتـحـسـد الـفـقـره
تتفـقـد رعـيتك سـيدي ابنـص لـيـل
وتـفـرش لـليتـيم جـفـوفـك السفـره
بدون اعـلام تمـشـي ولاحرس وياك
تجـيهـم بالـترافه ومـهـجه منكسـره
فـريد ابطـبعـك وحكـمك يبو الايتام
مــاهـمـك مـنــاصـب لاردت شـهــره
لـــذالـك حـــاربــوك وقــررو غــدرك
وفـجـعـونه بـغـدرهـم ياابـو الـعـتره
▪▪▪▪▪▪▪
✍ عقيل حسين الگـرعـاوي
(من لليتامى بعدك يااااعلي)
يتيم ابمجلس الأيتام يحجيها
دنيا ابلا علي بالدمعه نگـضيها
اليطعمنه امان وسادعنه الجوع
وبصوته الحنين اجروح يشفيها
املثم صحيح اوماتعـرفه الناس
بـس ايتامه تشـعـر لـوگـرب ليها
احسـاس الأمـان وطمئـنينة روح
يرفـع روس جـان المـاسـح اعليها
هـنياااال اليتيم بوكـت حيدر جـان
مـن عـطفـه وحـنـانه الـروح ساگيها
هسه بدون حيدردنيا وحشه وخوف
يامـسجـد الـكـوفـه شـلـون تـالـيها
علي بذمتك امانه شلون تغدر بي
عطشانين وانته ابختك احـجيها
هوه الجان يتروه من ابو الحسنين
يـااااازمـزم بـعـد يـگــدر يـرويـها
اعظم الله لكم الاجر ياايتام علي ع
وااااعليااااه
عقيل حسين الگرعاوي
السيده زينب. ع. تخاطب كربلاء في ليله الحادي عشر. وااااحسيناااااه
▪▪▪▪▪▪▪▪
كـربله حـيلي انهـدم حـاجـيني
حسين جـسـمه بياكـتر دليـني
🔸🔸🔸🔸🔸🔸🔸🔸🔸
1
انـضـر اجـسـاد بكـربـلـه مـطـروحـه
وحسين مرمي وعيني ليه مشبوحه
وعـباس ضـل اعلـه النـهـر بجـروحه
شـلون اودعـه الجنت روحي بروحه
ونـضـرات عـدواني علي تـاذيـني
🔸🔸🔸🔸🔸🔸🔸🔸🔸
2
شـلــون ودعـت الحـسـين مــوادع
وانــي عــالـنـاگـــه وهــل الـمـدمـع
نـهـدم حـيـلي من نضـرت المصرع
گــتـلــه ياخـويـه بـعــد مـاارجــــع
واني عـالناگه واسمعـه ونيني
🔸🔸🔸🔸🔸🔸🔸🔸🔸
3
واني عالناگه واشوف اجسـادكـم
شلون احمله والله صعب فراگكم
روحي صعدت للسمه ويرواحكـم
لاكـن شـبيدي غـصـب عـدوانكـم
لشـام اخـذوني ودمعتي بعـيني
🔸🔸🔸🔸🔸🔸🔸🔸🔸
4
يريد يمـشي الحـادي ويتـاني الامر
واني اگـضـي الـليل بالحسـره اجـر
وتـركـونـه الـحين مــاطــر الـفـجـر
والـگـلـب لـفـراگـكـم يـسـعـر جـمـر
وانته طـيفـك اغـفـه ويحـاجـيني
🔸🔸🔸🔸🔸🔸🔸🔸🔸
5
مـر بـالأجـسـاد وعـايـنـت خـوانهـا
صـرعـه كـلـهـم عـالأرض ولـيـانـهـا
وغــيـرت حـــر الـشـمـس الـوانـهـا
واصـعـب مصـاب اليفجـر احزانهـا
شـلـون ذبـاحـك شـمـر يحـديني
🔸🔸🔸🔸🔸🔸🔸🔸🔸
6
شحـال گـلـبي من اشـوفه مسـلب
ضـهـري من ثگـل المصايب حـدب
وانضـر الشـيبه الشـريف مخـضب
وصـاح بـيـه لـمـي ضـعـنج زينب
ودمعـة افراگـك اضن تحمـيني
🔸🔸🔸🔸🔸🔸🔸🔸🔸
تمت بعون الله تعالى
عقيل حسين الگرعاوي
زيـنـب ع مــع اخـيـهــا ابـاالـفـظـل الـعـبـاس ع
ـــــــــــــــــــــــــــــــــــــــــــــــــــــــــــــــ
حـگــج انـتـي بـالـعــتـب مـــن تـعـــاتـبـيـنـي
بـس يـخـيـتـي عـالـنـهـر يـســاري ويـمـيـنـي
اعــــذريـنـي اعـــــذريـنـي
ـــــــــــــــــــــــــــــــــــــــــــــــــــــــــــــــ
1 الـعـبـاس ع
ادري بـيـج انـتـي الــج هــگــوه بـكـــفـيـلـج
ومــن وگــعــت اعــلـنـهــر مـانـمـتـي لـيـلـج
وادري بـي حـــر الــعــطــش فـطــر دلـيـلـج
وتـصــرخ اطــفـال وحــرم زيـنـب دخــيـلـج
ســــــاعـــديـنـي ســـــــاعـــديـنـي
اعــــــــذريــنــي اعــــــــــذريــنــي
ـــــــــــــــــــــــــــــــــــــــــــــــــــــــــــــــ
2 زيـنـب ع
انـتـه مـعــذور ولـجــن مـــاعــنـدي والـــي
وادري مــن بـعــدك تـظــل ســود الـلـيـالـي
ومـن بـعــد ذاك الـخــدر مـســبـيـه تـالـــي
بـــس الـــم اطـــفــال بـالـبــر تـاه بـالـــــي
مـــــاتـجـــيـنـي مـــــاتـجـــيـنـي
اعــــــذريــنــي اعــــــــذريــنــي
ـــــــــــــــــــــــــــــــــــــــــــــــــــــــــــــــ
3 الـعــبـاس ع
والله صــعــبـه الـجـيـه لــو اگـــدر اجـيـكـم
جـــنـت مــتـأمـــل بـجــودي اعـــتـنـيـكـــم
وانـضـر خـيـول الـعــده هــجـمـت عـلـيـكـم
وانـي بـالـحـســرات اظـل اســمـع بـجـيـكـم
تــرتــجــــيـنـي تــرتــجـــــيـنـي
اعــــــذريــنــي اعــــــــذريــنــي
ـــــــــــــــــــــــــــــــــــــــــــــــــــــــــــــــ
4 زيـنـب ع
خـويـه بـس عـيـنـك غـفـت هـجـمـو عـلـيـنـه
حــرگــو اخــيـمـنـه وخــذو عــــز الـعــلـيـنـه
وتـالـــي مــســـبـيـه بــعـــد رايـــه ولــــيـنــه
وبـس عـلـي الـســجــاد يـمــي مــگـــيـديـنـه
ويــنــتــخـــيـنـي ويــنــتــخـــيـنــي
اعــــــــــذريــنــي اعـــــــــــذريــنــي
ـــــــــــــــــــــــــــــــــــــــــــــــــــــــــــــــ
5 الـعــبـاس ع
مـــن وصــلــت الـمــاي انـي وجــســتـه بـارد
غــرفــت مــنـه ومـاشــربـتـه صــبـري عــانــد
ذكـــرت ســكـنـه تـنـتـخـيـنـي وانـي اواعــــد
عـمـي شـنـهـولمـاي اجـيـبـه وسـيـفـي شـاهـد
تــنــطــــريــنــي تــنــطــــريــنــي
اعــــــــذريــنــي اعـــــــــذريــنــي
ـــــــــــــــــــــــــــــــــــــــــــــــــــــــــــــــ
6 زيـنـب ع
اطـفــال كـلـهـه بـذمـتـي وهــاي الـنـســـاويـن
ومــن اجــيـت الابـــو الــيـمــه بـأخـــر ونـيـن
گــــلــي يــازيـنـب ارجــعــي لـلــصـــــواويـن
انـتـي قـائـد گـلـي يـخــتـي بـعــد الـحـسـيـن
ســــامــحــيــنــي ســــامــحــيــنــي
اعــــــــــذريــنــي اعـــــــــــذريــنــي
ـــــــــــــــــــــــــــــــــــــــــــــــــــــــــــــــ
تـمـت بـعــون الله تـعـــالـى
عــقــيـل حــســـيـن الــگـــــرعـــاوي
لــدفـن الاجـســاد الـطـاهـره
عـفـت ظـعـن الـعـايـله الـيـوم اجـيـت الـكـربـلـه
انـي زيـن الـعـــابـديـن راجـع الـدفـن الـحـسـيـن
ـــــــــــــــــــــــــــــــــــــــــــــــــــــــــــــــ
1
مـن رجـعت الـكـــربـلـه بـأمـــر مـن رب الـجـلـيـل
شـفـت نـاس مـجـمـعـه بـالـنـحــيـب وبـألـعــويـل
رادو يــدفـنــون ابــوي الظـل على الـغـبـره جتيل
مـن گـربت انـه جـفـلـو مـنـهـو انـتـه انـي العلـيـل
ابـن مـحـزوز الـوتـيـن راجـع الـدفـن الـحـسـيـن
ـــــــــــــــــــــــــــــــــــــــــــــــــــــــــــــــ
2
كــلـهـم يـعـزونـه اجـو نـريـد نـدفــــن هـالـبـطــل
لـتـمـت اعـشــار الـزلـم ركـــن مــنــه مــنــحــمــل
گال احفروهـنانه حفره دفـن بـيـهـا ابـن الـفـحــل
سمع صوت من الحفيره وســـد ابـكــتـري الـطـفـل
وسـده ويـسـمـع ونـيـن راجـع الـدفـن الـحـسـيـن
ـــــــــــــــــــــــــــــــــــــــــــــــــــــــــــــــ
3
وعـلانصـارعـيـونه دارت گـال احـفـروهـنـا لـحـد
دفـن بـيـهـاانـصــارابـوه تـريـض شـويـه وگــعــد
وصـرخ لايـهـل الـحـمـيه عـالـشـريـعـه ضـل اسـد
عـمـي عـبـاس ارد ادفنه الراسـه مـفـضـوخ بـعـمد
وعـنـده مـاضـلـت اديـن راجـع الـدفـن الـحـسـيـن
ـــــــــــــــــــــــــــــــــــــــــــــــــــــــــــــــ
4
گــربـو يـم الـشــريـعـه ولـــنـه يـرهــب مـنـضــره
مبـيـنـه اثـار الشـجـاعه ســيـوف يـمـه مـكــســره
جفـوفـه يمـه مگـطعات وجـوده سـبـع الـگـنـطـره
جـنـه يسألـنـي اعلزينب ويـن اخـيـتـي الـصـابـره
يـسـرى مـاعـنـدي ويمين راجـع لـدفـن الـحـسـيـن
ـــــــــــــــــــــــــــــــــــــــــــــــــــــــــــــــ
5
بـنـي اسـدسألـوني عـنـه شـنـهـو مـوقـف هالگمـر
عن ابوفـاظـل شـسـولـف هـزهـز جيـوش الـشـمـر
صـال صـولـه اعلشـريـعه مـايـهـاب مـن الـخــطــر
يصـيـح يازيـنـب ابـشـري لـخـتـي نـاذر هـالـعـمــر
وبـقـى يـم جـوده رهـيـن راجـع لدفـن الـحـسـيـن
ـــــــــــــــــــــــــــــــــــــــــــــــــــــــــــــــ
6
كـمـلـت دفـن ابوالغـيره وصوب جسـام اعتـنـيـت
صـحـت عريس الطفوف وعلى ابن عـمـي انحنيت
شـنـهـو ذنبـك يالشـباب وحـزن گـلـب امك مـليت
دفـنت جـاسم يم ابوي بحسـره من يمـه مـشـيـت
وصـحـت يـارب الـمعين راجـع لـدفـن الـحـسـيـن
ـــــــــــــــــــــــــــــــــــــــــــــــــــــــــــــــ
7
نوب موقـف بـالـطفوف وشنهـو من موقـف رهيب
مـن علـي الاكبـر نضرته مـوذر وجـسـمـه سـلــيـب
صحـت ياشـبه الـرسول شلـون جـرح امـك يطيب
وانحنيت اني اعلخيي وكـثـرت يـمـه الـنـحـيـب
وعمري راح ابقى حزين راجـع لـدفـن الـحـسـيـن
ـــــــــــــــــــــــــــــــــــــــــــــــــــــــــــــــ
تـمـت بـعـون الله تـعـالـى
عـقـيـل حـسـيـن الـگـرعــاوي
قصيده للقاسم
لسان حال امه رمله في يوم العاشر
〰〰〰〰〰〰〰〰
بلياك مايسوه العمر جسام يالوجهك بدر
يبني يجسـام يبني يجسـام
🔷🔷🔷 🔷🔷🔷
من الحسن ماخذ علايم هيبته وشخصيته
اثـنين مـعـصـومين ابني اشـتركـو بتربيته
شگـد حلو طولك يجاسم وسفه ماحاويته
لاكـن ابـدا مـوخـسـاره للحـسـين افـديـتـه
فدوه لأبو اليمه ونذر جسام يالوجهك بدر
يبني يجسـام يبني يجسـام
🔷🔷🔷🔷🔷🔷🔷🔷🔷🔷🔷
2
شگد جبير بعيني اشوفك يمه اشوفك قائد
روح يـبـنـي مـودع الله ويـه عـمـك جـاهـد
الله اليعـين التفـگـده وعدها بس هـالواحـد
لاتـهـــم بـأمـك يـغـالــي خـلـي گـلـبـك بـارد
واني امشي اعله الجمر جسام يالوجهك بدر
يبني يجسـام يبني يجسـام
🔷🔷🔷🔷🔷🔷🔷🔷🔷🔷🔷
3
يمه اصد عمك بحيره ينادي هل من ناصر
يعاين انصاره واخوته صرعه يوم العـاشـر
وصرخه اسكينه ورقيه والله تكسر خـاطر
من العطـش عمي تنادي وين جودك صـاير
عالعطش ماضـل صبر جسـام يالوجـهك بدر
يبني يجسـام يبني يجسـام
🔷🔷🔷🔷🔷🔷🔷🔷🔷🔷🔷
4
بحسره وبصفنت خيالي التفت يسره ويمين
فكـرت لازم اضحـي كـلشـي لعيون الحسين
يمه شفـت الحره ضحـت للحسين اربع بنين
يصـيح عـباس واخـوته اباب زينب واگـفـين
رگـابنه تفدي الخـدر جسـام يالوجـهك بدر
يبنـي يجسـام يبنـي يجسـام
🔷🔷🔷🔷🔷🔷🔷🔷🔷🔷🔷
5
الغالي للغالي اقـدمه واني احـس مقصره
كون عشرة ولد عندي وافدي لأبن الزهره
والله لوعـمك رخصني گلبي مثل الجـمره
اهجم بعـامودخـيمه فدوه روحي النحـره
وخـلي اتـگـطـع وذر جسـام يالوجـهك بدر
يبني يجسـام يبني يجسـام
🔷🔷🔷🔷🔷🔷🔷🔷🔷🔷🔷
6
يمه شـمس الله احسهـا اليوم ضـلمه بعيني
مـن اصـد الـوجـه عـمـك دمـعـتي تجـويني
يـمـه روح ارخص حياتك رايده اتگـر عيني
يبني احـس مخـتنگـه لمن زينب تحـاجيني
گـلبي بالـهـم ينعصـر جسـام يالـوجهـك بدر
يبني يجسـام يبني يجسـام
🔷🔷🔷🔷🔷🔷🔷🔷🔷🔷🔷🔷
تمت بعون الله تعالى
عقيل حسين الگرعاوي
زينب. ع. تندب مسلم ابن عقيل. ع عندماوصلت قافله السبايا الى الكوفه وكئني بلسان حالها تقول
🔸🔸🔸🔸🔸🔸🔸
گــوم يامـسلـم وصـلـنـا الـكـوفـه
اگـعـد لضـعـن السـبـايـه وشـوفـه
تلگـه القـافلـه. اجت من كـربله
🔸🔸🔸🔸🔸🔸🔸🔸🔸
1
جـيـت مـن الـغــاضـريـه امشـي مـهـدوده حـيـل
بـكـربـلـه خـلـيت اخـوتي مـوذره ودمـهـا يـسـيل
حسينه اعله الغبره عاري وسحگت بصدره الخيل
وحـشـه ليل هـدعـش خـويه انـه احـرس بالـلـيل
الدنـيا ضلـمـه لأن مـذبوح الگـمـر
بلاجفـوف وغافي يم جرف النهـر
كفيل العـايله. اجـت من كـربله
🔸🔸🔸🔸🔸🔸🔸🔸🔸
2
عـن حـمـيده لاتنـاشـد خـويـه بـنـتـك بحـمـاي
هـيـه وسـكـيـنـه ورقـيـه احـيـن الثـوره ويـاي
مـاتهـمـنه جـيوش امـيه من منعـت عنه المـاي
والله هـيـهــات الـمـذلــه وانـي اخــت الــرواي
الضحه بجفـوفه وبقـه بنار الضـمه
ورفـظ مـايشـرب قـبل بت فاطـمه
امـير المـرجـله. اجـت من كـربله
🔸🔸🔸🔸🔸🔸🔸🔸🔸
3
بعـالـم الـرئيـا واشـاهـد جـاني مـسـلم بالـطـيف
هـيجـي حـالج يالعـقـيله الـف وسـفـه وياحـيف
انتي بنت اهـل الكـرامه البألهـله تحـيي الضـيف
وسفه شمر اليحدي ضعنج ورافع اعليج السيف
شـلون بـت حـيدر علي وبنت البـتول
تنـسـبي وعـالرمـح راس ابن الرسـول
ودمـوعج سـايله. اجـت من كـربله
🔸🔸🔸🔸🔸🔸🔸🔸🔸
4
شـبـيدي يابن عـمـي اصـبر الكـاتبه الله يصـير
نـبـي يـوسـف وي اخــوتـه تـالـــي ذبـوه ابـيـر
شـترجـه مـن انذال امـيه مااضـن مـنهـم خـير
ذولـه تربات السـقـيـفـه البـيـهـا صـار التـدبـيـر
البـيـهـا نكـرو حـيدره بـيـوم الـغـدير
نـصــبـه الـبــاري عـلـى الامــه امـيـر
وعلن بيعـه الـه. اجـت من كـربله
🔸🔸🔸🔸🔸🔸🔸🔸🔸
5
خـويـه يـازينـب كـلامـج هـيـج هـواي احـزان
تذكـرت بالكـوفه وحـدي من اصدماكو اخوان
انكـسـر ضـهـري بغـربـتي والتـفـت كـألحـيران
وينـهـم بالـشـده اخـوتـي ويـن فـتـيـه عـدنـان
انـي بـالـغــربـه وانــادي يـاحـسـيـن
وحــدي لانـاصـر بـقـالـي ولامـعـيـن
ودموعي هامله. اجـت من كـربله
🔸🔸🔸🔸🔸🔸🔸🔸🔸
6
حجيلي عن قصه سفركم وليل عشرة عاشور
لـيلـه يامسـلم عـضـيمـه گـلـب الحسين يفـور
ومن يطر فجر المصـايب نعوف عالغبره بدور
خـولي اخـذ راس ابواليمـه وبيـته بنـص تنور
وتـركـت اجـســـادهــم تـنـزف دمــاء
ومـطـرت يـوم هـدعـش دم الـسـمـاء
اعله ابن عقد الوله. اجت من كربله
🔸🔸🔸🔸🔸🔸🔸🔸🔸
تمت بعون الله تعالى
عقيل حسين الگـرعـاوي
قصيده الى (مسلم ابن عقيل)
في طريق الأمام الحسين ع الى كربلاء
وصل اليه خبر استشهاد مسلم ...
بدئت تتضارب الأراء هل سوف يأمر الأمام الحسين ع بالرجوع
هنا سوف يوضح حجم المهمه السماويه
والاصرار على الذهاب الى كربلاء
◾◾◾◾◾
بالطريق ولـن خـبر مُسلِم وصـل
وصلـو لحـسين السـلام وللأهـل
لاتـكَـــمـــل بـالـمـــســيـر
الكـوفـه غِـدرت بالسَفِـير
ياحسين ياحسين
🔸🔸🔸🔸🔸🔸🔸🔸🔸🔸
1
خـبر عـاجـل وصـل تواً عـظـم الله الاجُـر
من على قصر الاماره وسفه مسلم ينشُمُر
ولأبـو الـيـمـه كـتـابـه ارجَــــع ولاتـنـغِــدُر
يحجي مضمون الرسـاله بالمشي لاتستمُر
يقره والدمعه حجت قبل الكلام
وسالت الكلمـات وي دمع الامام
تحجـي عن موقف خطير
الكـوفـه غـدرت بـالسـفـير
ياحسين ياحسين
🔸🔸🔸🔸🔸🔸🔸🔸🔸🔸
2
اجـتمـاع اليوم طارئ عن وضـع جداً رهين
موقف الدين وثباته يحدده اليوم الحسين
حتماً انكمـل المـسـيره بـأمـر رب العـالـمـين
لازم ابـدم الهـواشـم هَـدِم عَـرش الضالمين
واني عازم عـالمسيره الراجلـه
لازم ابـدمـنـه نـحَــني كــربـلـه
وخل يصير شما يصير
الكوفه غدرت بالسفير
ياحسين ياحسين
🔸🔸🔸🔸🔸🔸🔸🔸🔸🔸
3
الغموض الصار حتماً لازم يوضحه بخطاب
عـن غـدر مسلـم يبين شـنهـو سـر الانقـلاب
البايعو مسلم الـوف شبالعجل هـالأنسحاب
بينلهم شنهو سرهـا الناس من تبعت سراب
انغـرو ابدينـار باعـو لـجـلــه دين
واشترو ذِلّه وخِزي طول السنين
شتحجي وي بايع ضمير
الكوفه غــدرت بالسـفـير
ياحسين ياحسين
🔸🔸🔸🔸🔸🔸🔸🔸🔸🔸
4
والتسـائل گـام يحجي كيف نسعى للهلاك
تـقـدم العـباس فـوراً سِـر ونـا قـائـد لـواك
كل يقيني وهذا ديني ربي يرضى لـِرضاك
وحَّـد الكلمه بندائه الكل صرخ نحنُ معاك
لثورتك نرخصها يحسين الدماء
يـلـه أئـمـر بالـمـسـير الـكــربـلاء
تـحـت امـرك يـاامــيـر
الكوفه غدرت بالسفير
ياحسين ياحسين
🔸🔸🔸🔸🔸🔸🔸🔸🔸🔸
5
وسولفلهم عن شواهـد بالحلم شاف النبي
كلـفـه بـهـاي المـهـمـه وگـلـه نفـذ مـطـلـبي
مـايـقـم الـديـن الـه بـسـيـل دم الـطــالـبـي
ويبدي توثيق البطوله بمشي زينب للسبي
المـايتبعـك يعـني لـم يبلـغ فتح
انته صـح وغـيرك ابـداً مـايصح
مـاكـوغـيـرك اي نضـير
الكوفه غـدرت بالسفير
ياحسين ياحسين
🔸🔸🔸🔸🔸🔸🔸🔸🔸🔸
6
توحدت كلمت انصـاره نعم هيهات الرجـوع
سـمـعـاً اوطـاعـه لأمـرك سـيدي لاللخـضـوع
مـانسـاوم عـالعـقـيده وماتخـوفنه الجـمـوع
عدنه والله گلوب جمره لأمرك تكَسِرالضلوع
انته يابوالدنيا دربك بي حـياة
لليموت يعيش من بعد الممات
يـامــلاذ لـكــل فـقــيـر
الكوفه غدرت بالسفير
ياحسين ياحسين
🔸🔸🔸🔸🔸🔸🔸🔸🔸🔸
تمت بعون الله تعالى
عقيل حسين الگرعاوي
فاطمة العليله ع
تتوسل فاطمة العليله بسحابة في السماء
وتقول لها
🔸🔸
ياسحابة. نزلي مني ادموع عيني اخذيها
ياسحابة. روحـي بيـهـا الكـربله مـطـريها
بلكن اتبرد غـليل. حرم واطفال وعليل
ياسحابة. ياسحابة
🔸🔸🔸🔸🔸🔸🔸🔸🔸
1
ياسـحـابـة اعـلـيه نـزلـي واخـذي مـني
دموعي وعتابي وجروحي وصوت وني
گـلـبي حـار ويحمي بضلـوعـي وجوني
لـو وصـلـتي لـكـربلـه ادمـوعـي هـذني
هالمدامع. رايده اتبرد گلب مسه الضمه
هالمدامع. خـبريهـم من نواضـر فاطمة
الكم توزع سبيل. حرم واطفال وعليل
ياسحابة. ياسحابة
🔸🔸🔸▫️▫️▫️🔸🔸🔸
2
كل احـاسيسي وضـنوني وقـلـة الشوف
توحي عطشانين احسكم برض الطفوف
واني مـاعندي وسـيلة معـاشـره الخوف
توسـلتلي بغـيمـه وابجي وگلبي ملهوف
توسلتها. عـندي احـباب وامـانة هـالدمـع
توسلتها. لووصلتي لكربله شرحي الوضع
گولي مدمعها يسيل حرم وايتام وعليل
ياسحابة ياسحابة
🔸🔸🔸▫️▫️▫️🔸🔸🔸
3
اشـعر الغـرگـني عطفه هسه عطشان
الهاجر وخلاني وحدي ابيت الأحزان
بياوسيله البيها اروي گـلوب الأحنان
فـارشـه امصـلايتي وادعـي يرحـمن
ياالهي ياغياث امن العطش سلم لحبيب
ياالهي دعـوت ابنيه وعـلـيلـه استجيب
مالها غيرك دليل حرم وايتام وعليل
ياسحابة ياسحابة
🔸🔸🔸▫️▫️▫️🔸🔸🔸
4
عندي عمات وخوات واخـوه واعمام
اوالدي ابأحضـانه العـب ونغـفه وانام
ليش هسه بكل طيوفي شابگه اسهام
ولـيش من كـربله اكـتب تطـلـع الشام
يادموعي روحي مرسال وارجعيلي بخبر
يادموعي زغـرت الدنيا وجرح حزني كبر
صيري للتايه دليل حرم وايتام وعليل
ياسحابة ياسحابة
🔸🔸🔸▫️▫️▫️🔸🔸🔸
5
راحــت ورجـعـت الـيه ردت اجـواب
هـاج دمعـاتج واحـملي فگد الأحباب
مـاتـرويهـم دمـوعـج كـفـي الأعـتاب
من بعد حضنج شبگهم حضن التراب
اعذريني من رحت شفت لضمه ميبس لشفات
اعذريني مودموعج البخل نهر الفرات
خان عباس الكفيل حرم وايتام وعليل
ياسحابة ياسحابة
🔸🔸🔸▫️▫️▫️🔸🔸🔸
6
خابت اضنوني اوبعد من ينتخيلي
مـابقـالي كـل وسيله اومـات حيلي
نذبح بعيوني الضوه اومانمته ليلي
هـذا مـرسـال السـحـابه مـنه ويلي
وضحتلي كربله من العطش صارت رماد
وضحتلي المصيبه المرت اتبجي الجماد
اومانفع دمعي اليهيل حرم وايتام وعليل
ياسحابة ياسحابة
🔸🔸🔸▫️▫️▫️🔸🔸🔸
تمت بعون الله
عقيل حسين الگرعاوي
(فاطمه العليله)تستقبل بعالم الرئيه ضيفها الغالي
والدها الامام الحسين ع
➖➖➖
وزن القصيده
المستهل/ تجليبه +مقاصير الفجر
النص/ مقاصير الفجر +نصاري
⚫⚫⚫
(ضيف العليله)
➖➖➖➖➖
هـله بضـيف الطـيوف الـهـاجر الـواقِـع
إسـتِريح ابنُص دِليلي گـلبي الك واسِـع
على احـوال العِـيال اسـألك جَـم سُـؤال
🔸🔹🔸🔹🔸🔹🔸🔹🔸
1
هله بريح الابو هله بحضن الدُفو
وحَـگـك روحـي مَّـلـت گـعـدَت الـبـاب
اريد اسـأل علـه الجِـفوني الكربله
شنو الغيبه الطـويله وشنهي الاسـباب
اسـألك عـالكفـل عَـلـَّيه هـم سـأل
مـن اطـبـاعـه يـتِـفَـگــد كـل الاحـبـاب
اشم طيفَه اليمُر واسولفلـه شكثُر
افز من حلمي واصحه بحضن الغـياب
يضل طيف الهَجُر بضلوعي يجويني
بكوابيس الطفـوف من اهلي يلفـيني
وانه اتوَّسـل تعال اسألك جم سُـؤال
🔸🔹🔸🔹🔸🔹🔸🔹🔸
2
غصن عودي لتوه وعلي ضاگ الهوه
وانــه بـذكــراكــم الـهـج لــيـل ونـهــــار
رقـيه من مشـت الگـلب مني خذت
اثــر بـوســــات مـنـهــا بـقــت تـذكـــــار
وينسمات التجي ادزلـهـــا حــجــي
يـاتـوأم روحــي بـيـج اشـصــار مـاصــار
ولايرجـع جـواب يبويه من العتاب
ونـذر يـومــيـه انــذر لـــوتـجـي اخــبــار
يبويه فَـضّـي خـلگـك تدري مجـروحـه
ونه بسـيف الصَـبُر والفَـرگـه مـذبوحـه
عـگـب ذاك الدَلال اسـألك جـم سُـؤال
🔸🔹🔸🔹🔸🔹🔸🔹🔸
3
بوريدي الدَم جِمَد بخيالي جن مهد
اهـز بي وابجـي وحـدي بعـالم الطيـف
يـعـــبـدالله تــــره بقـيت مـنـاطـره
تجـيني وروحـي افـدي اكرام للضـيـف
ولاكِــنـه الـحـلـــم يراويـنـي سـهـم
يـتـشــابـگ وي رگـبـتـك الـف يـاحـيـف
يبويه احجي لجره تـراني مـنـاطـره
مـطـر غـيمـه حـنانك جـاسـني الصـيـف
احـس گـمت امـن اشـبـگـك بويه تتألـم
عـطـر حـرگ المخـيم بالقـمـيص اشـتـم
يمـفـخـرة الـرجـال اسـألك جـم سُـؤال
🔸🔹🔸🔹🔸🔹🔸🔹🔸
4
عـلـيـه لاتـظُـــم الگـلُب شـابِع هظُم
عـن الـي راح اذكـره انـطـيـنـي رُئـيـاي
شفت عَمي الگُمَر اتجه صوب النهَر
والاطـفـال بـخـيـمـهُـم نـاطِــره الـمــاي
شفت نار بخـيَم وصياح من الحرَم
صرَخَـت عـمـتي العـقـيله راحو احمـاي
ولاصاحب بخَت فِـزَع مـن انـتَـخَـت
بـقـى يـبـاوع عـلـيـهــا الــراح والـجــاي
طلَعت روحي واردها بشَـهگَت اليقضـه
گـبـل لامـوت شـوفَـتـكـم ردت لـحـضـه
گـرَب موتي مُحال اسـألك جـم سُـؤال
🔸🔹🔸🔹🔸🔹🔸🔹🔸
5
يضل طيف الهَجُر يراويني شـكـثُر
وابوي بجـسمه اجـاني سهـام وجـروح
شغت من باوعِت بثيابه الدم شفِت
الأشـد من هـالمـصـيـبه راسـه مـذبـوح
وانه بـلايه وعـي تـلـگـيـتـه بـنـعــي
يـبـو روحــي عــفــت بـنـتـك بــلا روح
سمعت گوه كلام ينطقه امن لسهام
يبت روحـي اسـتعـدي المـوسـم النوح
انه بشوگي وحنيني جيت الج عطشان
البگـه ابـراسـج يبـويـه راحـت الولـيـان
عفـتهـا اعلـه الرِمـال اسألك جـم سُـؤال
🔸🔹🔸🔹🔸🔹🔸🔹🔸
6
صحيت امن لحلم وبقى بعيني رسم
ورحـت لأم البـنـين اوضـهـري مـكـسـور
شفـت مـأتم عـزاء وخـبر مـن كـربلاء
وشـفـت قـاروره يـمـهـــا بـالـدِمـه تـفـور
اجـاهـا بالـطـيوف خـبـر من الطفوف
ذخــر بـيـت الـرســـالـه شــافـت انـحـور
صـريعـه ابكـربلـه ودمـاهـم سـايـلـه
كِـسَـر ضَـهـري الـزَمـان ابعَـشره عـاشـور
يـبـويـه وداعـت الله يـالـخـذت كـلـشـي
احــلـفــك بـالــزجــيـه رد اخـــذ نـعـشـي
الـي شِــد الـرِحــال اسـألـك جـم سُـؤال
هـلـه بضـيف الطـيوف الـهـاجـر الـواقـع
🔸🔹🔸🔹🔸🔹🔸🔹🔸
تمت بعون الله تعالى
عقيل حسين الگرعاوي
گرب شهر المضاهـر والتجاره
تشوف الكل دمع عينه تجـاره
يهـنـيالـه اللذي الزهــره تجـره
أيتوفق يلطم الاعـظم رزيه
عقيل حسين الگرعاوي
واحـد محـرم صـار مطـلع عـزائي
اتمـنـه مـودمـعـات افـدي بدمـائي
واحد محـرم صار مفـتاح الاحـزان
خله الدمع لحسين عالوجنه نيشان
واحـد مـحـرم صـار لـوعـة يتامـه
من خادم ازغيرون عـاشگ امامـه
واحد محـرم صـار نوح اومدامـع
ذكـر الحسين هـواي هيج مواجـع
✍ عقيل حسين الگرعاوي
قصيده[لبيعه الامام علي عليه السلام
في يوم (الغدير)
من كنت مولاه فهذا علي مولاه
🔶🔶🔶🔶
ايه من رب البريه النبي حيدر وصيه
حيدر بيوم الغدير نصبه الباري امير
🌹🌹🌹🌹🌹🌹🌹🌹🌹
1
استبشرت ارض وسماء بهل خبر من جاهه
مـن نـزل جـبـريل گـلــه عـلـي بـعــدك طـه
نـاده بـلــغ يـامـحـمـد وضــح ابـمـعــنـاهـه
ايـه مـن رب السـمــاء ولـلـجـمـيع اقـراهـه
وخـل يعرفون المصير نصبه الباري امـير
🌹🌹🌹🌹🌹🌹🌹🌹🌹
2
النـبـي الايـه قـراهـا عـلـى كـل الـمـسـلـمـين
گـلـهـم الخـالـق بعـثـهـا بـيد جـبـريل الامـين
وفسـر الايه العـضـيمـه على كـل الحـاضرين
گـالهـم من بعـدي يصبح علي امير المؤمنين
امـر مـن ربـي القـدير نصـبـه الـبـاري امـير
🌹🌹🌹🌹🌹🌹🌹🌹🌹
3
بايعـوه وبيـعـه حـصـرا نـازله من الله بـوحـي
بـانـت البسـمه اعله وجهه الـيـحـب حيدرعلي
فـرحه سرت كل فقـير البشرى من زفـهـا النبي
لأن يــدرون الـعــدالــه عـنـده لــوصـار الـولـي
علي كـهـف لكل فقـير نـصـبـه البـاري امـير
🌹🌹🌹🌹🌹🌹🌹🌹🌹
4
والله محتاره القوافي بوصفك شتحجي وتگول
ياعـلي الـســر الـئـلاهـي مـاتـدركـه ابـدا عـقـول
اني والخـالـق نـعـرفـه گـالـهـا بخـطـبه الـرسـول
شـنهو من معـنـى بكلامه الاصل حيدر والاصول
يبـقـى هـالـمـعـنى اسـير نـصـبـه البـاري امـيـر
🌹🌹🌹🌹🌹🌹🌹🌹🌹
5
يافـرحــنه الـشـيـعــه حـصــرا ابـنـزول الأيـه
ثـبـتـت انــه الـعـقـــيـده وفـتـهــمـنه الـغـايـه
مـن الله تـنـصـيب الـولايـه لـحـيـدر موصايه
والحسـن وحسـين بـعـده يـسـتـلـمـهـا الرايـه
وكـربلـه گـعـبـه تـصـير نصـبه البـاري امـيـر
🌹🌹🌹🌹🌹🌹🌹🌹🌹
6
حگـنه من نتفاخـر احـنه والله مابين البشـر
اثـنعـش معـصـوم عدنه وبنهـجـهـم نفـتخـر
من الحسين النور يبدي وينخـتم بالمـنتضـر
غـايب وننطـر قدومه صحرى واتاني المطـر
مـاشـفـت مـثلـه نضـير نصـبه حـيدر امـير
🌹🌹🌹🌹🌹🌹🌹🌹🌹
تمت بعون الله تعالى
عقيل حسين الگرعاوي
السيدة زينب ع
حينما عَزم الامام الحسين ع. بالذهاب الى مكة
ومن ثم الى كربلاء ذهبت الى زوجها
عبدالله ابن جعفر. وهيه متلهفة
لتأخذ منه الإذن بالسفر مع اخوتها كأني بها تقول.
🔸🔸🔸🔸🔸🔸
ابجي اجيت بحرگة. والـدمـوع ابـعـينـي
حسين راح ايسـافر. رخصة اريد انطيني
الواجـب الشـرعي الأمـر بيدك يصير
فـدوة ياعـبـدالله حـددلـي الـمـصـير
🔸🔸🔸🔸🔸
١
يـاابـن عـمـي اجَـتَـك زينـب ابـلايـه شـعـور
لـواضـل ومااسـافر احسبني من اهـل القبور
حسين حضرهاالمحامل وانته اعرف بالأمور
وانه ابقى بلايه اخـوتي مملكة ومابيها سور
روحي صارت بيدك. والـقـرار انـتـضـره
امنيتي كون اتوافق. گـلبي يلهب جمرة
ويه اخوتي الروح مشتهيه المسير
فـدوةياعـبدالله حـددلي الـمـصـير
🔸🔸🔸🔸🔸🔸🔸🔸🔸
٢
يابنت عمي افِهمج بس صعب هذا القرار
راح اوافق بس تراني بعدج اعلن انكسار
ادري هـالثورة عظيمة ولاغبار بهـالمـسار
بس اليفـارگـله زينب عمره ليل ابلا نهـار
ادري بيها اجروحك. ولجلي گمت اتكابر
شحـالي لمن اسمع. ينادي هل من ناصر
ابريلي ذمتي وخلي يرتاح الضمير
فـدوة ياعبدالله حـددلـي المصـير
🔸🔸🔸🔸🔸🔸🔸🔸🔸
٣
رحت اركض صوب اخوتي ومـامكفيني لهوه
شافني حسين وتفاجئ بضحكة وبدمعة سوه
گـلـه ياعـباس اجـتـنـه الـبـعـدك تشـيل اللـوه
فرحو وصارت بواجي بس احس گلبي ارتوه
شفت كل اخـواني. بـالـهـلـه يـحـيـوني
وابوفاضل جـاني. ومسح دمع اعيوني
من وصلتي الضعن گمت اشعر جبير
فـدوة يـاعـبـدالله حـددلـي المـصـير
🔸🔸🔸🔸🔸🔸🔸🔸🔸
٤
من گـعـدنا وابواليـمـه يسـولـفـنـا المـرتسم
وگـال عـبـاس يتكـفـل اخـته ويشـيل العَلم
صَـدالي بأحلى ابتسامه وگال عدعينج نعم
وصـار تـوديع المـدينة بلـيل وبلـوعـة والـم
زرنــه جـدي وامـي. اودعــيـنـا الــديــرة
حسين جر حسراته. ابوجهه اقره الحيرة
يخفي حزنه بگلبه ابوالگلب الجبير
فـدوة يـاعـبدالله حـددلـي المصـير
🔸🔸🔸🔸🔸🔸🔸🔸🔸
٥
من طلعـنا من المدينة اودعينه ام البنين
العـلـيلة من بجـيها گطعت گلب الحسين
يگلها هالسفـرة طويلة وانتي ماتتحملين
اقـتنعـت وكـلـمـة وداعـاً رددتها بالـونين
في امان الباري. تگول صعب افراگكم
بس تضل امنيتي. كون امشي وياكم
راح ابقى وحالي من حال الضرير
فـدوة يـاعبدالله حـددلي المصـير
🔸🔸🔸🔸🔸🔸🔸🔸🔸
تمت بعون الله تعالى
عقيل حسين الگرعاوي
قصيدة لمولد السيدة معصومة اخت الأمام الرضا عليهم السلام
🌹🌹🌹🌹🌹🌹
من ارض الحسين لأرض معصومه
ابعـثلـج تهـاني وفـرحـه ملجومه
كريمة ال هـاشم مولـدج ميمون
لأن مشتاق ازورج روحي مالومه
يـاكـعـبة الـعـفـه ولـهــفـة الـزوار
اليدخـل ضريحـج زالت اهمومه
من زينب ورثتي الموقف المشهود
رغم انف الطغات الحره محشومه
يااخت الرضا وبنت البطل موسى
اسد بغداد ذاك الشايعه اعلومه
تضل رفـة بيارغكم حجر سجـيل
مـاينزل عـلمكم شـايعه اعلومـه
عقيل حسين الگرعاوي
دارميات. لشهاده الامام علي. ع
لسان حال السيده زينب. ع
▪▪▪▪▪▪▪
1
من انطبر بالمحراب بيد ابن ملجم
گام الانس والجان يبجـيله من دم
▪▪▪▪▪▪▪
2
من دم بجينه اليوم يابويه صحنه
رحـت وخـذت ويـاك كـل المـحـنه
▪▪▪▪▪▪▪
3
كل المحنه وياك راحت يحيدر
ومن انضر الايتام گلبي يتكسر
▪▪▪▪▪▪▪
4
ينكـسر گـلبي وصـار يومـيه اعيده
نوحي اعله ابوي الراح ابدن مهيده
▪▪▪▪▪▪▪
5
مـاهــــود امـن الـنـوح لـيـلي ونـهـاري
اعله اليتماني اوراح ضل دمعي جاري
▪▪▪▪▪▪▪
✍عقيل حسين الگرعاوي
الى سيدي ومولاي علي ابن ابي طالب
عــلــيـــه الـســــــــلام
ـــــــــــــــــــــــــــــــــــــــــــــــ
الّي عـارض عــالـولاء هـذا نـاصـب بـالـعـداء
المارضه الـمولى علي يعنـي موصاحـب نبي
ــــــــــــــــــــــــــــــــــــــــــــــ
1
الباري مـن راد الـختام بلغ الـهـادي السـلام
واعلـن بــيــوم الـغـديـر
انعلن يــوم الـــولاء ونَّـزلـت أيـه الـسـمـاء
بـيـنـت انــه الــمـصــيـر
الـنــبـي وضـح كلام مـن رفـع ايـد الامــام
ونـاده بالصـوت الـجـهـير
شنهو عذره اللي يگول ماسمع حجي الرسول
هــالامـــر جـدا خـطـيــر
مـااطــول بالـحجـي يعـني موصـاحـب نبي
ـــــــــــــــــــــــــــــــــــــــــــــــ
2
المارضه بحيـدر امام خارجي بـمـعنـه الكلام
الـبايـع وبـغـضـه دفـيـن
گـالو نـحاز الرسـول جـي لان زوج الــبـتـول
نـصـبـه عـلـل مـسـلـمـين
ظـلـو بـهـذا الـعـنـاد وظـللو بـعـض الـعبـاد
عـن امـيـر الـمـؤمـنـيـن
ولّي جان مخبي ثار كشف عن وجهه الستار
بـعـد سـيـد المـرسـلـيـن
لأسـلم بـضرب العصي يعني موصاحب نبي
ــــــــــــــــــــــــــــــــــــــــــــــــــــــــ
3
الي منـصف مو اجير خل يـحكم بالضـمـير
ويـنـضـر الـمـعـنـه الكـلام
گـال اسـمـعـو امتـي الـكتـاب وعـتــرتـــي
الـيـرفـض يـعـيش بظـلام
لاسلم منـهـم كـتـاب الـعتره جازوهـابـحراب
وحـرگـــو بـيـت الامـــام
الكسـرظلـع البـتـول بـالحـشر لله شـيگول
الـديـنـه قـتـل وانـتـقـام
والحرگ دار الـوصـي يعني مـوصاحب نبي
ــــــــــــــــــــــــــــــــــــــــــــــــــــ
4
زمـره احقـاد اضـهـرت وبألسقـيفـه اجمـعت
بـغـظـن بـأل الــرســـول
ونـكرو اشـوصه النبي بأنـقلاب اعله الوصي
ونـســفــك دم الـبـتـول
تسايلت منه الدموع بعينه من شاف الظلوع
مكـسـره ودمـهـا سـيـول
عاشـرالغربه سنيـن عله البتول وضل حزين
وفـرگـتـج صـعـبـه يـگـول
العافك وضل ناصبي يعنـي مـوصاحب نـبي
ـــــــــــــــــــــــــــــــــــــــــــــــــــــــــــــــــــ
5
حاربـوك بكـل جـهـود تـفـاجئو مـنـك ردود
تـنـصـح الـي يـعـادي بـيـك
مـانـفــع بـيـهــم كلام اصـفحو عـن الـسلام
والـحـرب عـلـنـو عـلـيـك
دسـو اعليك الطـغات وانته تسجد بالـصلاة
ابـن مـلـجـم يـعـتـنـيـك
يضربـك عالهـامه حيل والـدمه مـنك يسيل
بـالـغـدر يـنـدس عـلـيـك
الحرضه هـذا اجنـبي يعني موصاحب نـبي
ــــــــــــــــــــــــــــــــــــــــــــــــــــــــــــــــــــــــــ
تـمـت بـعـون الله تـعـالـى
عـقـيـل حـســيـن الـگــرعــاوي