211
Адабий-танқидий канал. Баъзи постлар аччиқ туюлса, демак-мавзу ҳаётий. 19 декабрь 2018 йил
Дунёдирсан –
юрагимдан сал каттароқ,
Пешонамдан бироз кенгроқ осмонинг бор.
Кафтим боссам лоппа-лойиқ ерсан, бироқ,
Икки дунё сиғдирмаган армонинг бор!
Тоғларинг-ку, елкамни ҳам бўйламайди,
Тағин, кўкка суялган мўрт нарвонинг бор.
Ҳаққушларинг ҳақни сира сўйламайди,
Ҳалқ олдида кесилган бир забонинг бор!
Дарёларинг тўпиғимга чиқмас ҳатто,
Мавжлангувчи хаёлий бир уммонинг бор.
Ўзинг баттол, ўзинг жоҳил, ўзинг хато,
Етмагандек, ҳар кишида гумонинг бор!
Сарҳадинг тор, менинг кўнглим қарамингда,
Шарқу – шимол...тўрттагина томонинг бор.
Етти миллиард яхшинг бордир ҳарамингда,
Не ажабки, яна шунча ёмонинг бор!
Шеъримдан ҳам ғализ, асли айтар сўзинг,
Яна Ҳаёт номли ёлғон достонинг бор.
Мазлумларга номеҳрибон даврон ўзинг,
Золимларга зиёратли замонинг бор!
Ўлмасбек Самарқандий.
@achchiqtosh
🌸 🌸 🌸
Баҳорда
"Баҳорда ҳаммаси яхши бўлади",
Оқ-яшил либосин кияди боғлар.
Ҳар қандай одамнинг тасаввурида,
Жонланиб кетади севишган чоғлар.
Баҳорда ҳаммаси яхши бўлади,
Баҳорда ҳаттоки тошлар нозиктаъб.
Мастона тебранар телба дарахтлар,
Сочдан тирноқ қадар севилмоқ истаб.
Баҳорда ҳаммаси яхши бўлади,
Ойнинг шуъласида ёришар йўллар.
Баҳодир адирлар бағрин тўлдириб,
Уялиб қизарар қизғалдоқгуллар.
Баҳорда ҳаммаси яхши бўлади,
Ҳаёт ифорига тўладир олам.
Жаннатий ҳисларни яшайди уч ой,
Баҳорга қўшилиб кетолса одам.
Эй дўст, мен умидвор, сен умидбахшсан!
Ёруғ ёдинг билан кўксим тўлади.
Бир йўқлаб кел энди, мен ёмонингни,
Баҳорда ҳаммаси яхши бўлади.
11.02.2025 й
Гулжамол Асқарова
@achchiqtosh
СИЗ ТОМОНДА...
Сиз томонда қор
Ёғаётганмиш...
Чиройлидир, оппоқдир йўллар?
Қорхатларни ёзаётганмиш,
Кўришмоққа муштоқ кўнгиллар.
Соғинсангиз шивирланг секин,
Севаман деб бир мактуб ёзинг...
Деразага бир "куҳ" денг, кейин,
"Юракча"нинг расмини чизинг.
Ўртасидан ўқ тортманг фақат,
Раҳм қилинг, муштдек юракка.
Бир бўлакка исмингиз ёзинг,
Менинг исмим бошқа бўлакка.
Совуқ бўлса чиқманг кўчага,
Қўлқопингиз йўқдир биламан.
Сиз томонга йўлларим тушса,
Бир жуфт қўлқоп совға қиламан.
Бизга ҳамроҳ ширин хаёл ва
Аччиқ кофе, икки дона қанд.
Бунча олис яралган, эй воҳ,
Сиз томон ва кўҳна Самарқанд!
Қодирбек Усмонов
@achchiqtosh
***
ҚОР СОҒИНЧИ
Тушдамикин, ўнгдамикин сени учратдим,
исмингни ҳеч сўровдимми, сўрмабмидим ёр?
Танирмидим, ё кимгадир сени ўхшатдим,
эсимда бор қолганлари~ ёққан эди қор.
Сенга севгим айтгунимча қанча вақт ўтди,
ё аслида қилмовдимми мен буни ошкор?
Бу сирнида ўша кунки занжирлаб кетди,
фақат эсда қолгани шу ~ ёққан эди қор.
Йиллар ўтди...
Ҳар наҳорда ёдинг ўйғотди,
ўйлайвердим, гулим, сени ҳануз интизор.
Сени қачон топган эдим қачон йўқотдим,~
фақат эсда қолгани шу ~ ёққан эди қор.
...Ва ниҳоят қаршимдасан гулгун очилиб ~
келтирганинг бу кузакми, қишми ё баҳор?
Бу сенлигинг тусмоллайман билмай ё билиб,
агар бу сен бўлсанг нега ёғмаяпти қор?...
Азамат ЭЛИЕВ
@achchiqtosh
***
Қайда бўлсанг, омон бўлсанг, бас,
Мудом шод-у хандон бўлсанг, бас.
Муҳаббатдан сўз очилганда,
Сен садоқат томон бўлсанг, бас...
Зикрилла Неъмат
@achchiqtosh
#Кечинма
Баъзан эрталаб уйғонганимда юрагим қаттиқ ҳаяжон билан тез-тез ураётганини ҳис қиламан. Қон босимимнинг ошиб кетиши ёки кўрган тушимнинг таъсирида бўладиган бу жараён баъзи-баъзида ёқимли кечмаса кўп ҳолларда оғриқли ўтади.
Шунда уйқудан олдин нималарни ўйлаб ётганим ёки кўрган тушларимни эслаб ҳаяжоннинг сабабларини ахтаришга тушаман.
Бугун ҳам эрта тонгдан юрагимнинг шиддат билан потирлаб ураётгани ва бутун вужудимда кечаётган қаттиқ ҳаяжон ҳиссидан уйғониб кетдим. Одатдагидек кечаги ўй фикрларим, кўрган тушларим таҳлилига ўтиб, ҳаяжон сабабини қидира бошладим.
Қанча бош қотирсам ҳам бу ҳаяжон сабабини топа олмадим. Кечаги мулоҳазаларимда, кўрган тушларимда ҳам ҳаяжонли сабаблар йўқ. Аммо борган сари юрагим тез-тез урар, нимадандир энтикиш, нимадандир безовталик танамни тобора қамраб бораверарди.
Ўзимни англолмай турган ана шундай бир фурсатда жонимнинг бир парчаси, Гулруҳбегимдан видеоқўнғироқ бўлди. Айни фурсатда Аллоҳнинг муқаддас байти олдидан бўлаётган бу қўнғироқ мени бироз эсанкиратиб қўйди. Ўзимни тўғирлаб олишга ҳам улгурмасимдан Гулруҳ “Холажон, Аллоҳдан сўрайдиганларингизни сўранг” деб Каъбатуллоҳ томонга ишора қилди.
Йиғлаб юбордим. Аллоҳдан сўраб-сўраб йиғладим. Аввало мени минг азоблар билан туққан онажонимни яна бир бор шу муқаддас Маккага қадамлари етишини, кейин Аббосжонимга жаннатдан бир жой сўрадим...
Аъзамбегим, Дилнурам камолоти, ғойибдан кўриб турган Каъбатуллоҳни оилам билан бирга кўзга суришликни, мени бугунги отган нурли тонгимнинг сабабчиси бўлган Гулруҳбегимдан Аллоҳ рози бўлиши-ю, ота ва она авлодимдаги барча қариндошларимнинг тинчлиги, соғлигини сўраб дуо қилдим.
Алоқа узилгач, бироз ўтириб мулоҳаза қилдим. Аллоҳнинг байтини кўрган кўзларимга ойнадан қараб сочларим ёзиқ бир ҳолда шу муқаддас жойга кўринганимдан бироз ранжидим.
Аммо тонгги шиддатли ҳаяжон билан уйғонганим Аллоҳнинг менга берган бир ишораси эканлигини англаганим сари кўнглим ёриша бошлади. Демак Аллоҳ мени ўз ҳузурида шу ҳолда кўришни истади!
Ё Роббим! Неча минг километр масофалардан, телефон орқали кўрсатган Каъбатуллоҳинг мени шунча ҳаяжонга солган бўлса, уни яқиндан кўриш, тавоф этиш юрагимни қай даражада ҳаприқтириб, қандай ҳолга тушираркин?!
Демак, турфирмалар кўпайиб, йўллар очилгани, бориб келиш осонлашгани билан инсон бу муқаддас маконга бориш учун руҳан тайёр бўлмоғи керак экан...
Мен бундай бахт таъмини жуда-жуда тотгим келди. Мени шунга мушарраф этишингни ёлвориб сўрадим. Ўзинг ўша кунга тезроқ етказ...
Дилноза Аҳророва
@achchiqtosh
***
Кошки мен меҳримга меҳрибон топсам,
Қадрини айларга қадрдон топсам.
Дўст топсам дунёда, унга лаҳзада –
Жонимни берсам-у, яна жон топсам.
Бобур БОБОМУРОД
@achchiqtosh
Унгача чидайвер, бовурим,
Симобдай ютилса ҳаволар.
Унгача яғриндан яғирин
Тулпорлар оларда даволаб.
Унгача, куюклим, суюклинг
Аёзда кўз ёши музласа,
Чидайвер, чидайсан бу юкнинг
Ипини баҳорлар узмаса.
Унгача қушларнинг ортидан
Дарахтлар учади олланиб.
Қақшаган дарёлар юртида
Оғочдай қоларсан зорланиб.
Отанг ҳам чидаган, сиқилма,
Эгатга эш билиб бошини.
Остонанг бошига тиғ илма,
Ўғрига едиргин ошингни.
Бахтидай ёрилиб товони
Орзуси кулук бу оналар
Унгача чидатиб дунёни
Туғади сендайин болалар.
Чидайвер ғурбатда меҳнатдан
Нон топган ҳеч кимса ўлмас-а?
Бу чидоқ қон сурар, албатта,
Боланг ҳам чидайди ўлмаса.
Чидовга ўргатгин барчани
Ғойибдан келгувчи кунгача.
Чидайвер, минг йиллик арчанинг
Умри ҳам тугайди унгача.
Қисматинг қуяди қулоққа:
“Ҳислат бу, эмасдур иллатинг!”
Чидаш-ла борурсан узоққа,
Унгача бормайди миллатинг...
Унгача чидайвер, бовурим.
Нажмиддин Эрматов
Декабрь, 2024
@achchiqtosh
***
Ҳаёт - ёвузлик билан курашишдир.
Александр Дюма
"Граф Монте Кристо" асаридан
@achchiqtosh
***
Муҳаббат инсонларни кучли, аёлни жозибали, эркакни меҳрибон, юракни хотиржам, ҳаётни гўзаллаштирадиган туйғудир!
@achchiqtosh
***
Сенга нимадир бўлдими, дедилар...
Сукутландим, аслида коинот қадар дардларим бор эди...
@achchiqtosh
***
Дардини оддий тушунтирган киши дардлидир. Гўзал тушунтирган киши адиб, ҳоли билан тушунтирган киши ошиқ, табассум билан тушунтирган киши эса, орифдир.
Сардор Тунжер
@achchiqtosh
***
Кўҳна ҳовли. Ташландиқ ўчоқ —
занглаб кетган рўзғор буюми...
Бир чеккада сарғайиб турар
чириётган хазон уюми.
Қадди эгик қари олманинг
шохларига ин қурар қушлар.
Айвондаги эскирган намат
уйқусида кўрмоқда тушлар.
Ойнаклари синган дарчадан
рухсат олмай ҳатлайди шамол.
Бир замонлар оқарган тандир
қорайганча суради хаёл.
Ажриқ босган тош йўлакларда
болаликнинг излари ётар.
Бу ҳовлида маъюс тун чўкиб,
яна ғамгин-ғамгин тонг отар.
Тўйлар кўрган хароба кулба
нураб борар кун ўтган сайин.
Пахса девор тагида мудрар
ҳўл ёғочга айланган қайин.
Бу ҳовлига юз йилдан буён
қайта-қайта келаверар куз.
Ҳув бир пайтлар бош олиб кетган
баҳор қайтиб келмади ҳануз...
Орифжон Комил
@achchiqtosh
"Аччиқтош"ни Facebookда эътироф этиб ёзган Гулинозга катта раҳмат!
Читать полностью…
#назм
Сен келмадинг. қор ёғди. Узун.
қор оралаб ўтди кун... Кеча...
Юрагимда титроқ бир тузум.
Сен келмадинг. Совуқ. Жон - кўча.
Сен келмадинг. Шамоллар учди,
қор умримда изғиди махсус.
Бор изғирин дунёга тушди,
Сен келмадинг. Совуқ. Кўнглим - муз.
Сен келмадинг. Увлади олам.
Бўғзимга тиш ботирди қайғу.
Бир томчи ёш дунё. Музлаган.
Сен келмадинг. Эримайди у.
Усмон Азим
@achchiqtosh
***
ҚАЛАНДАР ИШҚИ
Муҳаббатнинг саройи кенг экан, йўлни йўқотдим-ку,
Асрлик тош янглиғ бу хатарли йўлда қотдим-ку.
Карашма денгизин кўрдим, на нозлик тўлқини бордир,
Ҳалокат бўлғусин билмай, қулочни катта отдим-ку.
Ажаб дунё экан бу ишқ дунёси, аё дўстлар,
Бу дунё деб, у дунёни баҳосиз пулга сотдим-ку.
Унинг гулзорида булбул ўқиб қон айлади бағрим,
Кўзимдан ёшни жў айлаб, аламлар ичра ботдим-ку.
Қаландардек юриб дунёни кездим, топмайин ёрни,
Яна кулбамга қайғулар, аламлар бирла қайтдим-ку.
Муҳаббат осмонида гўзал Чўлпон эдим, дўстлар,
Қуёшнинг нурига тоқат қилолмай ерга ботдим-ку.
ЧЎЛПОН
@achchiqtosh
***
Сиртингдаги кибр ичингдаги фақирликнинг асаридир.
Жалолиддин РУМИЙ
@achchiqtosh
40 дан кейин...
Гарчи ҳали яшаганим йўқ,
Умр ўтди сувдек, хаёлдек.
Сочларимни йиғаман энди,
Ақлин йиғиб олган аёлдек.
Ҳа, баҳормас кузга ўхшайман,
Сочларимни ўйнамас шамол.
Лекин энди ичимда яшар,
Бир улуғвор, дилбар Гулжамол.
Ва бесамар курашлар ичра,
Толиққандек жисмим, саботим.
Гарчи худди Тўмарис каби,
От устида ўтди хаётим...
Гоҳ париман, гоҳ паришонман,
Осмондаман ойдек, ҳилолдек.
... Ва ақлимни йиғиб оламан,
Сочларини йиғган аёлдек.
15.01.2025 йил
Гулжамол Асқарова
@achchiqtosh
Муҳайё, "Қадрлилар" сизни соғинди. Канални ўқиётган бўлсангиз менга алоқага чиқинг. Излаб қолдик сизни... @rasulberdiyevna
Читать полностью…
***
Биз одамни нимани билишига қараб эмас, нимадан қувонишига қараб англаймиз.
Робиндранат Тҳокур
@achchiqtosh
***
БУ ЗАМОН ҒАЗАЛИ
Тиллашибдир бўри бирла тозилар,
Бирлашибдир ўғри бирла қозилар.
Не деб айтар ул баобрў анжуман?
Қўл кўтарсин ушбу ҳолга розилар.
Зўр баҳодирмиз, жасорат биздадир,
Пашша қонин тўккан эй мард ғозилар.
Биз чунон хизматга белни боғладик,
Борми ҳиммат ўлчагич торозилар?
Бизга нелар дер халойиқ бу замон?
Нелар айтар келгуси ҳам мозилар?
Мен ғазал ёзмоқчи эрдим, не қилай?
Бу замон тарихга шундоқ ёзилар.
ЭРКИН ВОҲИДОВ
@achchiqtosh
***
Биз мулоқот қилаётган одамларимизга ўхшаб борамиз. Ўз қуршовингизни саралаб йиғинг — биз қанчалик ноёб бўлмайлик, у барибир бизга ўз таъсирини ўтказади.
Роберт де Ниро
@achchiqtosh
🎼🎼
Хайрли оқшом 🌖
(Меҳр қозонганлар меҳр беришни биладиганлардир. )
@achchiqtosh
***
МАСТОНА БЎЛМАГУНЧА
Шаъм шуъласи безиё,
Жонона боқмас қиё.
Ошиқлигинг бир рўё,
Парвона бўлмагунча.
Кўзларингдан оқса дур,
Ҳижрони ҳам бир сурур.
Жунунлигинг лоф эрур,
Девона бўлмагунча.
Банди бўлмай ўзига,
Зор боқмасанг изига.
Ойнинг доғли юзига,
Ҳайрона бўлмагунча.
Гарчи шоддир ё кулар,
Қўл очиб дуо қилар.
Май таъмини не билар,
Мастона бўлмагунча.
Кўча тўла маст-аласт,
Ҳар улфат майхўр эмас.
Майхонага талпинмас,
Риндона бўлмагунча.
Яшайсан алдаб токай,
Ёр кўйида қилмас саъй.
Ул ошиқ саналмагай,
Афсона бўлмагунча.
Шерали Икромов
@achchiqtosh
***
Эй, ўзини ишга берган,
Ҳасратга берган,
Турмушга берган,
Фақат соғинчинг қолди менга,
Ўзингдан чиройли соғинчинг.
Сенга қарай десам,
Кўз ололмайман соғинчингдан,
Излаб борай десам,
Қўймайди соғинчинг...
Усмон Азим
@achchiqtosh
***
Ишинг билан — эсда қолишга, меъёр билан — эҳтиёткорликка, феъл-атвор билан — улуғворликка, меҳнат билан — сабрга, қўрқув билан — тақводорликка, бойлик билан — дўстликка, сўз билан — ишончга, сукут билан — одобга, фикрлаш билан — адолатга, жасорат билан — мардликка, хатти-ҳаракат билан — ҳукмронликка,
шуҳрат билан устунликка эришасан.
Абу Райҳон Беруний
@achchiqtosh
