443
قصائد حسينيه منبريه
٥١١
اخر جمادي الاخر
شهادة السيد محمد بن علي الهادي عليهم السلام #سبع_الدجيل
ه ه ه ه ه
قصيدة گعده
ه ه ه ه ه
ياگاضي الكل الحاجات
ياسبع الدجيل
هيهات نعوفك هيهات
ياسبع الدجيل
وياك انضل دوم وياك
يبن الهادي وماننساك
ياسبع الدجيل
ه ه ه ه ه
منين ياسبع الدجيل اشلون نبدي بالقصيده
وانت سيد وبن سيد وابن الاخلاق الحميده
وبالشجاعه وبالكرامه توارثتهه من الصميده
بابك وسيعه امّْفتحه واليعتنيهه اتفرحه
جيناك نقره الفاتحه.
وكلمن ايمد الك ايده
هالليله بدمعات العين
ياسبع الدجيل
كلنه بجودك طمعانين
ياسبع الدجيل
هيهات اترد الينخاك
يبن الهادي وماننساك
ياسبع الدجيل
ه ه ه ه ه
ياكريم وبلد تشهد مكرماتك من يعدهه
خيرك النازل عليهه والفتن عنهه تردهه
الله راد الهلمدينه. يعله بوجودك مجدهه
رايتك فوگاهه ترف
بكل المفاخر تنوصف
جن عاقد وياهه حلف
وبيك تفخر يااسدهه
جيناك وانت المگصود
ياسبع الدجيل
يالچفينك بحر الجود
ياسبع الدجيل
كل احنه الليله برجواك
يبن الهادي ماننساك
ياسبع الدجيل
ه ه ه
مصيبتك كلش چبيره. يالعشت عمرك بغربه
ويه ابوك اويه اخوك وچنت ويه الجرح صحبه
صعبه وانته تشوف ابوك. يعيش ذاكه الظلم صعبه
السمت ابيّك سمتك
والظلمته هم ظلمتك
وطفّو يويلي نجمتك
ياحسافه عله النّحبه
مجلس حزنه المعقود
ياسبع الدجيل
انعزي الامام الموعود
ياسبع الدجيل
وكل عام احنه النتعناك
يبن الهادي وماننساك
ياسبع الدجيل
ه ه ه ه
مثل اجدادك گضيت بسم بني العباس عمرك
عشت كل ذيچه سنينك وانته المرافگ الصبرك
بالغرب خلصت حياتك بعيد عن الاهل گبرك
تغربتو ياال النبي
من الاضطهاد الناصبي
شفتو القتل شفتو السبي
ابگبرك ورادت تفجرك
من البقيع البغداد
ياسبع الدجيل
وبالطف حيل الظلم ازداد
ياسبع الدجيل
وبمشهد تبچي الاملاك
يبن الهادي وماننساك
ياسبع الدجيل
ه ه ه ه ه
انت ياباب الحوائج مثل عباس بعطائك
وعله الايمان بيمينك ترفرف ويعله لوائك
ياگمر هاشم ويضوي گمر هاشم من سمائك
العباس ضحه الخوّته
وصرت انته مثله بنخوته
للحسن ظله وخطوته
مثله چنت بكل أخائك
بتربيت الهادي تربيت
ياسبع الدجيل
وللعسكري اشگد داريت
ياسبع الدجيل
بحماك الليله بحماك
يبن الهادي وماننساك
ياسبع الدجيل
ه ه ه ه ه
المصيبه
الليله يمك يافخرنه انجدد عهود العلينه
بصحنك براية عزانه يبو الغيره احنه اجينه
مصيبتك مولاي كلفه وعالصدر نلطم بدينه
تصعب علينه مصيبتك
نواسيك اجينه بغربتك
ونلعن الناس الظلمتك
والله ياسبع الدجيل يمكم انظل للمنيه
ابو احمد الهنداوي
/channel/aboahmed1956
القصيده العاشره
نرجس ومعصومه
ه ه ه ه ه ه ه ه
اليوم يم معصومه اظل وياهه
بجاه نرجس انه جيت انخاهه
ه ه ه ه
هاي معصومه الكريمه الطاهره
انه يمهه الليله روحي مسيّره
بيّه لوعه وبيّه حسره موجره
انخيت نرجس انه اظل بحماهه
ه ه ه ه
والله صعبه عليه انه بحسرتي
وانه يمي الليله شمعة دنيتي
بعيني اصدلهه. وتلالي دمعتي
ونرجس بوسط الصحن الگاهه
ه ه ه
انخه بت الكاظم ام المعجزه
واسم نرجس بالدعاء امركِّزه
كل مطاليبي ابّْختهه منجزه
رحمة الباري بعطف ترعاهه
ه ه ه ه
اليوصل المعصومه يوصل للامان
تحت گبتهه الشريفه اطهرمكان
ولون تسمع بالمنارات الاذان
تطمإن النفس من نجواهه
ه ه ه
بجاه نرجس انه جيت بنخوتي
وادري ادري ماتردلي دعوتي
يمهه جيت وقصرت في خطوتي
وحشه تبقه دنيتي بلياهه
ه ه ه
بت امام واخت امام اشهلبخت
وكل دعاوي الخلگ يمهه نوخت
ودعوتي بنرجس بديهه ترسخت
وادري بيهه ماترد دعواهه
ابو احمد الهنداوي
٥٠٨
القصيده الخامسه
نرجس ٥
ه ه ه ه ه
يم الامام المهدي حنينه
غياب الامام الحجه ياذينه
يمته يطر الفجر يانرجس ونعتذر
غياب الامام الحجه ياذينه
ه ه ه
هالليله اجيناج بدمعنه وكل الاحزان
غايب گمرنه عن سمانه ولسه مابان
دنيانه ماليهه الظلم جور ويه حرمان
مصاب العليكم ماهده وعلينه ماهان
يم الامام همومنه هوايه
ويمته نشوف ترفرف الرايه
يمته الوكت يبتشر يانرجس ونعتذر
غياب الامام الحجه ياذينه
ه ه ه ه
جارت علينه اهل الكفر والمايوالوچ
مارحمو الشيعة علي نفس اليعادوچ
من الامام المهدي ذولاكه اللي حرموچ
بحزن ودمع طول العمر والونه خللوچ
يانرجس واحنه النواليكم
وحَّدكم ابدا مانخليكم
جبنالچ الهلعمر يانرجس ونعتذر
غياب الامام الحجه ياذينه
ه ه ه ه
من ذيچه عصرة فاطمه والنار والباب
ماوگفت ادور الارض بمصاب لمصاب
سم الحسن عگب الوصي وطبرة المحراب
وحسين واولاده وهله انذبحو علتراب
وراحت سبيه زينب الحره
وحته الطفل ينذبح من نحره
بسيوف اهل الغدر يانرجس ونعتذر
غياب الامام الحجه ياذينه
ه ه ه ه ه
يانرجس وظلت تجر ذيچه المصيبات
كل الايمه الطاهره شافت الويلات
سم وكتل ال النبي وعاشو باهات
وشفتي الامام العسكري چبده غده افتات
هذا الجره والصار بالعتره
وشفتي الظلم والجره بسامره
والجور من كل كتر يانرجس ونعتذر
غياب الامام الحجه ياذينه
ه ه ه ه ه
مجلسنه هذا انوثقه بدمعات العيون
وعنكم فلا نرجع ابد وشما جره يهون
نكتب عهد يمچ نضل للمذهب نصون
ونتنطر الغايب يرد والنصر مضمون
هذا العهد بالمدمع انكتبه
ويوم النصر نتفائل بگربه
بالتضحيه وبالصبر يانرجس ونعتذر
غياب الامام الحجه ياذينه
ابو احمد الهنداوي
٥٠٦
القصيده السادسه
ه ه ه ه ه ه ه ه ه
نرجس ٦
قصيدة الگعده
__
مجلس حزن باطيب امانينه انحس
نكتب عهدنه بكل وفاء النرجس
بمجلس عزانه. بهاي الامانه
نكتب عهدنه بكل وفاء النرجس
ه ه ه
منين نبدي بهالامانه السيده الحره الجليله
هاي ام المهدي هذي بت الاشراف الاصيله
مجلس انقيمه لجلهه رايدين الهه وسيله
جيناهه نكتب للعهد
مانرد عنهه للابد
اتكرمت من الله بولد
ابد ماصاير مثيله
لم الامام الحجه نقسم هاليوم
للمهدي متحزمين يايوم يگوم
ننطر بيانه بهاي الامانه
نكتب عهدنه بكل وفاء النرجس
ه ه ه ه
الباري هوه اختار نرجس وهيه اهلا للامانه
بت الانساب الشريفه اتربت ابيت الديانه
النبي الهادي بسمه العليه
گصد يم عيسه بجنانه
يمه گعد واستبشره
وعيسه النبي يتشكره
گايله رايدلي مره
نرجس الطيبه المصانه
هذا الجره مابين عيسه واحمد
طيف النبوه بكل فكر ماينرد
وهذا بيانه بهاي الامانه
نكتب عهدنه بكل وفاء النرجس
ه ه ه ه ه
بالحلم نرجس تشوف المريم وفاطمه الزهره
اجن يمهه يخطبنهه والقن عليهه المسره
وانطن الهه اچم علامه وبيدهه سلمن بشره
وگعدت ومن ذاك الحلم
بايمان واصل للنجم
باشواگهه گامت تلم
لهلامر ظلت تنطره
وراحت اسيره وتنتضر ساعتهه
وذيچ الرساله بكل شرف ادتهه
لصاحب زمانه بهاي الامانه
نكتب عهدنه بكل وفاء النرجس
ه ه ه ه ه
عاشت ويه الحسن نرجس ومثله عاشت للظلامه
اتحملت لجله الماسي بصبر وايمان وشهامه
وتنتضر جية وليهه. المنتظر روح الامامه
وجاهه الامام المنتظر
منقذ الدنيه من الخطر
والعسكري بيه ابتشر
وامه تدعي بالسلامه
والحسن مسموم بغدر عدوانه
وصله عليه المنتضر باحزانه
وزايد حنانه بهاي الامانه
ونكتب عهدنه بالوفاء النرجس
ه ه ه ه
راح من نرجس وليهه وراح من يمهه ابنهه
وظلت عليهم حزينه وابد مابطّلت ونهه
الليله ماتت من المهه واحنه جينه نأبنهه
جينالچ بفيض الدمع
ابهذا عزائچ نجتمع
وكل شيعي لجلچ منفجع
اشوكت ياام الامام ايعجل بامره ولينه
ابو احمد الهنداوي
٥٠٤
نرجس ٤
ه ه ه ه ه ه
القصيده الرابعه
ه ه ه ه ه ه ه ه ه
يحله هوايه الليله المجلس
لونذكر للمهدي ونرجس
اتفيض الرحمه. المهدي وامه
ه ه ه ه ه
بكل الالم نادينه يلمهدي
وجرح الكلب ويه الدمع يدي
اجينه الليله اجينه انحشمه بامه
وفرشنه همومنه واحزانه يمه
اشوكت للغالي بين جفوفنه انلمه
صار سنين صار اندبه وانحشمه
صار اسنين احنه النتنطر
وگلب امه من الشوگ اتفطر
اشوكت اللمه المهدي وامه
ه ه ه ه
ام وابن والحسره والفرگه
متلهفه عله الطلعه والملگه
زغير وغاب عنهه الله يساعدهه
وگلبهه عليه يعاتبهه ويناشدهه
گمر غاب وبگت بالظلمه وحدهه
وبس لجروحهه هوه اليضمدهه
خمس اسنين ورايح منهه
ويامكثر حسرتهه اونهه
حيره وزحمه المهدي وامه
ه ه ه ه
عگب الامام العسكري عانت
من الطغمه لاچن للعهد صانت
تحملت للاذه من طغمة الارجاس
حكام الظلم والشر بني العباس
ولجل حفظ الامام اجرعت مر الكاس
وچانو يحسبون النرجس الانفاس
رادو منهه اتسلم القائم
واتماده بعدوانه الحاكم
اشلون اتسلمه. المهدي وامه
ه ه ه ه ه
نرجس ابنهه للبشر قائد
ويحفظه لله گامت اتناشد
ابنهه الراح منهه وغيبته طالت
والينشدهه عنه الوالده اشگالت
اشكثر همومهه وشگد هظم شالت
وعليهه النوايب صالت وجالت
مهديهه الغايب يتنطر
امر الله وللوادم يظهر
ويجلي الظلمه المهدي وامه
ه ه ه ه
نرجس مشت يم رحمة الباري
والمهدي غايب والدمع جاري
عله فراش النوايب والدمع ساچب
وتتنطر يجيهه وليدهه الغايب
عاشت كل عمرهه جروح ومصايب
وظل گليبهه عله وليدهه ذايب
نرجس راحت بس بدمعه
والغايب يرثيهه انسمعه
اهل النعمه. المهدي وامه
ابو احمد الهنداوي
٥٠٢
نرجس ٢
ه ه ه ه ه ه
القصيده ٢
ه ه ه ه ه ه ه
الليله يم سامره نمشي نزورهه
ونشكي يم نرجس الدنيه وجورهه
ه ه ه
نشكي جور الدنيه لم المنتظر
والوكت راوانه جور الماخطر
العين تدمع والجرح بينه كبر
ودارت الدنيه علينه بسورهه
ه ه ه
عكب عين المهدي ماظل كل امان
جينه يمهه نشكي الام الزمان
هاي ام المنتظر كلهه حنان
ياسفينتنه التعبر ابحورهه
ه ه ه ه
الحب اخذنه الليله يم الطاهره
الله هاي اختارهه دون الوره
ام امام العصر قدوه اموقره
اتنورت سامره من ضي نورهه
ه ه ه ه ه
جينه يمهه نشكي من جور الزمن
والوكت راوانه انواع المحن
كل گلب من الالم لا ماسكن
والفتن كثره وكثر محذورهه
ه ه ه ه ه
الله لاينطي الذي الهم ظلم
حارب الخير وتجاوز عالقيم
عاشو الارهاب والدنيه بالم
ال طه اتهجرت من دورهه
ه ه ه ه ه
احنه وياهم نضل لا مانرد
وللزكيه الطاهره مانبتعد
الجية الموعودكلحنه نصد
يظهر ويمحي البدع وشرورهه
ه ه ه ه
حين يضهر يمشي يم امه وابوه
يزورهم وانصاره للمرقد يجوه
سنين وسنين الاحبه فارگوه
ويگصد الزهره ابدمعته يزورهه
ه ه ه ه
ينادي يايمه صعب يوم العصر
ويصعب عليه بگيتي بلا گبر
ويرفع ابجانبهه اعلام النصر
ويبني لال البت ذيچ اگبورهه
أبو أحمد الهنداوي
قصائد أم الإمام المهدي عج
نرجس خاتون
٤٩٩
استشهاد الزهراء
لمة عزاء
ه ه ه ه ه
يم حسين گبرج وين
يالزهره يمته نزوره
ه ه ه
يابت نبينه المصطفه يالبضعه
هالليله انصارچ اجت بالدمعه
يومچ يبت المصطفه شيجرعه
وگبرج علينه ضايع بهلوسعه
ماننساچ. انضل وياچ
رغم الزمان وجوره
ه ه ه
يمته نزوره ونرفع عليه رايه
ونروحله يم الحسن مشايه
ونسوي يمچ يالزجيه قرايه
يالزهره الچ متلهفين هوايه
بينه اشواگ ماتنطاگ
وحسره بگلب مكسوره
ه ه ه
جمرة حزن بالروح ابد ماتطفه
مصابچ يبت الهادي يصعب وصفه
ظلعچ ابابچ بنكسر ياوسفه
ودمچ الطاح عله الارض شينشفه
لا ميهون اهتز الكون
مصابچ مله المعموره
ه ه ه ه
يمته الامام المهدي يظهر للناس
ويرفع بچفه الطيبه راية عباس
وياخذ بثارچ من جميع الارجاس
والناس تمشي تزورچ بكل احساس
يالموعود يمته تعود
كل السنن مهجوره
ه ه ه
انصارچ الليله واجينه ابابچ
ماننسه يومچ لاوحگ صوابچ
نشتاگلچ يالزهره واحنه احبابچ
نوصل الگبرج نشم ذاكه ترابچ
يم حسين مشتاگين
وگلوبنه مجموره
ابو احمد الهنداوي
ابو ذيه معصومه
ه ه ه ه ه ه
بيران
گلبي من الحزن والهظم بي ران
وزماني المارماني ابير بيران
نخيت الاخو وذيچ الاخت بيران
الرضا ومعصومه يلتفتون اليه
ه ه ه ه
وقمهه
وحگ الاسس الكعبه وقمهه
احن بزيارتي المشهد وقمهه
بصحن معصومه اتوجه وقمهه
صلاتي وخل بعد شيصير بيه
ابو احمد الهنداوي
٤٩٦
معصومه ونرجس
ه ه ه ه ه
اليوم يم معصومه اظل وياهه
بجاه نرجس انه اجيت انخاهه
ه ه ه ه
هاي معصومه الكريمه الطاهره
انه يمهه الليله روحي مسيره
بيه لوعه وبيه حسره موجره
انخيت نرجس انه اظل بحماهه
ه ه ه ه
والله صعبه عليه انه بحسرتي
وانه يمي الليله شمعة دنيتي
بعيني اصدلهه. وتلالي دمعتي
وجبت دعوة نرجس الملگاهه
ه ه ه
انخه بت الكاظم ام المعجزه
واسم نرجس بالدعاء امركزه
كل طلب عندي مؤكد تنجزه
رحمة الباري بعطف ترعاهه
ه ه ه ه
اليوصل المعصومه يوصل للامان
تحت گبتهه الشريفه اطهرمكان
ولون تسمع بالمنارات الاذان
تطمأن النفس من نجواهه
ه ه ه ه
معتنيهه ابدمعي وبهذا المصاب
واسم نرجس جبته وياي بعتاب
طول المهدي علينه بالغياب
واسال الله الفرج في دعواهه
ابو احمد الهنداوي
٤٩٤
استشهاد الزهراء
ه ه ه ه
المستهل
ه ه ه ه ه ه
ياعلي بالحزن عندي وصيه
زينب وديعه عندك يحيدر
زغيرونه بتي الفگدي متكدر
ياعلي بالحزن عندي وصيه
ه ه ه ه
ياگمر بيتي هذي وصيتي اسمعهه مني وآنه الزجيه
راح آنه ارحل وخافنهه تسال وين امي بويه وتنشد عليه
تنضر مكاني وتفگد حناني المافارگتني. وچن آني هيه
ياعلي والفگد امه خطيه
زغير گلبهه لاچن تفطر زغيرونه بتي الفگدي متگدر
ياعلي بالحزن عندي وصيه
ه ه ه ه
بتي العزيزه فتره وجيزه ويايه تبگه. وامشي آنه عنهه زينب بعدهه وذابل وردهه ويتيمه تصبح. وبهذا سنهه
البت ويه امهه تحس بحلمهه
والام تحسهه ظلهه وامنهه
ياعلي زينبي عگب المنيه
لسه جدمهه من تمشي تعثر زغيرونه بتي الفگدي متكدر ياعلي بالحزن عندي وصيه
ه ه ه ه
الباب الدفعهه الزينب فجعهه
شافتني اعاني. وجروحي تنزف الزمره الاجتني والصوبتني تصدلي بالمهه. وعضاهه ترجف النار عله بابي وحرت بحجابي
دمعتهه تجري. الدمعي تنشّف ياعلي دمي عالحايط امسحه وبدل يحيدر الباب التكسر زغيرونه بتي الفكدي متگدر ياعلي بالحزن عندي وصيه
ه ه ه ه
الزهره بالمهه الزينب تضمهه تشوف المصايب تدري بعدهه
واكبر مصيبه بالطف غريبه اخيام العقيله. النار التشبهه مذبوح اخوهه حرمه وسبوهه الروس الشريفه. انذبحت گربهه
ياعلي زينبي تصبح سبيه
عليهه المصايب من عگبي تكثر زغيرونه بتي الفكدي متگدر
ه ه ه
يلزهره ادري مايبقه عمري امشيتي بجروحچ. عفتيني وحدي
الزينب اصدهه العبره تهدهه وتنشدني عنچ يلزهره ردي بساعة صلاتچ تلبس عباتچ وتنشدني عنچ. عليه دصدي ياعلي هيجت ضلعي ولچمته ضلعي عله زينب رد وتكسر زغيرونه بتي الفگدي متگدر ياعلي بالحزن عندي وصيه
ابو احمد الهنداوي
٤٩٢
تجليبه
معصومه بنت الامام الكاظم عليها السلام
ه ه ه ه
يم معصومه اجيت وشايل همومي
وحاير شكتبلهه بهذا منضومي
ه ه ه ه ه
حاير شكتب انه اگبالهه إشأكتب
اجيت بحزني يمهه الدمعتي اسجب
غريبه وانه هم الليله مستغرب
واٌنه المشتاك اجيهه ابكل وكت دومي
ه ه ه ه
معصومه الجليله بروحي أفديهه
واظل كل عمري اخدمه واواليهه
جبت حاجاتي كلهه ويمهه اخليهه
وعله الشباچ روحي بشوگهه اتحومي
ه ه ه ه
صحنهه اليضوي وشگد حلوه گبتهه
ومنايرهه الجميله عيوني شافتهه
تطب يمهه كأنك طاب جنتهه
والبيبان من بعيد الك تومي
ه ه ه ه ه ه
يابت الامام الكاظم ادعيهه
يالجاهج چبير الحاجتي اگضيهه
وكل عله ابحضرتج ربنه يشفيهه
گومي الحاجتي اتوسلج گومي
ه ه ه ه ه
گضَّت كل عمرهه بحسره مهمومه
بين الوالد المسجون وخصومه
وبين الرضه ابمشهد خافيه علومه
وعله القاسم الغاب المدمع يهومي
ه ه ه ه
آنه الأحِن لزيارتهه كل وكتي
وهاي الليله يمهه ياعظم بختي
نسيت الحسرتي ونسيتهه الونتي
وتمنيت ابقه يمهه هناكه كل يومي
ه ه ه ه
قم اتشرفت بجدامهه الطيبه
بعيده عليّه بس ابلهفتي گريبه
بت الكاظم ام الخير الحبيّبه
علٌه ودهه اشكر الباري العلي القيومي
ه ه ه ه ه
افارگهه واروح اشلون ماادري
تمنيت ابقه يمهه هناكه كل عمري
اصد عليهه والهم ياكل بصبري
وياحسراتهه الخنگت البلعومي
ابو احمد الهنداوي
ايام
معصومه بنت الكاظم عليها السلام
٢٢/ربيع الاول ذكرى دخولها الى قم المقدسه
واستشهادها فيها يوم ١٠ ربيع الثاني
٤٨٩
مولد الرسول الاعظم
ه ه ه ه ه
ياصلاتك يانبينه. حلوه هالليله علينه
ه ه ه
حلوه هالليله وجميله من طلع نور الگمر
بيهه شرّف عله الدنيه مولد السيد البشر
مكه حاطتهه السعاده وبيت للباري ابتشر
جنحت طيور المحبه والحزن كله عبر
واحنه عالموعد اجينه
حلوه هالليله علينه
ه ه ه ه
الليله مولود الامان الليله مولود السلم
الليله هل إبّْسمه الطيبه. گمر بالحب ينرسم
الدنيه غمرتهه السعاده تگول غرگانه بحلم
وبجمل حروف السعاده خطّت لاشرف اسم
يارسول الله وامينه حلوه هالليله علينه
ه ه ه ه ه
الفرحه هالليله چبيره. لآمنه بنت وهب
انولد هالليله واجاهه سيد الكل العرب
ساجد يسبِّح ومزهر وجهه ضاوي چالذهب
هذا من الله حبيبه. وقاب قوسين اقترب
چفوفه مامونه وحنينه حلوه هالليله علينه
ه ه ه ه ه ه
ياامل للناس كلهه جايب الكل الامل
تخلص الوادم ويگضي حكم طاغوت الجهل
منتهه الاحلام انت انت ياخير العمل
الليله يتحقق مناهه وبيك دين الله اكتمل
الصفگه خل تعله بدينه
حلوه هالليله علينه
ه ه ه ه
صلو عالهادي الشفيع. اليمه كل هم ينجلي
واذكرو الحيدر عضيده بصوت واحد يعتلي
والله احنه انسره لمن نذكر الاشجع ولي
وهوه ويانه ينادي. لاولي الا علي
ولو ذكرنه اسمه العلِينه
حلوه هالليله علينه
ابو احمد الهنداوي
ولادة الصادقين
ه ه ه ه ه ه ه ه ه ه ه ه
مولدين الليله عدنه مولدين
مولد الصادق وسيد المرسلين
ه ه ه ه
اسبعطعش هذا الشهر بيه انولد
اشرف وافضل بشر بالحگ شهد
خاتم الكل الرسل ماكو بعد
ابو الزهره المصطفه طه الامين
ه ه ه ه ه
ونفس هذا اليوم وبنفس الشهر
انولد للاسلام والعالم گمر
جعفر الصادق نسل سيد البشر
سابع اليمه الهداة الطاهرين
ه ه ه ه
ابو الزهره الهادي مصباح الظلام
الرحمه والايمان والحب والسلام
لو نوصفه انقصر احنه بالكلام
مرسل وسيد الكل العالمين
ه ه ه ه ه
والامام الصادق الماله مثيل
هذا ابو المذهب العلامه الجليل
للمذاهب بالعلم هوه الدليل
هذا منجم للعلم كنزٍ ثمين
ه ه ه ه
الرسول وياهو يوصل للرسول
الهادي الواثق المختار الذلول
هذا ابن عم حيدره زوج البتول
هذا ابو الزهراء جد الحسنين
ه ه ه ه ه ه
مدرسه الصادق بقه ومن مولده
وعلمه ظل الدهر لسه يردده
الدين بالدنيه ابو الكاظم جسده
ومثله ماصاير على مر السنين
ه ه ه ه ه ه
مولد ومولد جمال بصف جمال
مايوصفهم ولا حته الخيال
بالخلق والخلق وصلو للكمال
الليله بيكم تحتفل هالمؤمنين
ابو احمد الهنداوي
/channel/aboahmed1956
٥١٠
تكريم من مضيف السيده نرجس
الى دار كافل اليتيم ((الشعله))
القصيده العاشره
ه ه ه ه ه
الف الصلاة عله النبي والتسليم
هالليله احنه بدار كافل ليتيم
ه ه ه ه
شكرا والف شكرا وكل التوفيق
وهذا الحچي منّ الگلب مو تسويق
التنضير يصبح على الواقع تطبيق
وبصدور ايمانيه هذا التكريم
ه ه ه ه
الله الذي يامرنه نرعه الايتام
وهذا الحكم قرآني قره الاسلام
الانسان يبقه انسان بالخلق التام
كامل بانسانيته تام التقويم
ه ه ه ه ه
الهادي بحديثه اكد بهاي هواي
كال الكفلَّه ايتيم بالجنه وياي
زين اليراعي ايتام شتگول بهاي
هذا العمل للاخره وياه يديم
الف الصلاة عله النبي والتسليم
ه ه ه
يم الجبوري اليوم يم الاحسان
وهنياله لليرضي بعمل للرحمن
فاتح گليبه لليتامه ديوان
من مضيف نرجس جينه اله بكل تعظيم
ه ه ه
ام مصطفه ومصطفه وياهم سجاد
ومرتضه وصادق يرسمون الامجاد
وياهم مؤمل وي رضا هالاولاد
من الوالدين التربيه والتعليم
الف الصلاة عله النبي والتسليم
ه ه ه ه
واكتب بحب استاذنه السوداني
واستاذنه كاظم حسن باحساني
واستاذ ذو الفقار طيّب ثاني
وللست سناء اعتذر قصر التقييم
ه ه ه ه
واستاذ علي جمعه حسن ماننساه
والخادم المخلص رضه كلنه وياه
ويم طه محمود الكريم بمحياه
شاعر ورهّم و اعتذر عالترهيم
الف الصلاة عله النبي والتسليم
ه ه ه ه
لاتاكلو مال اليتيم اوافوه
واللي يدك بيبانكم لتنهروه
والطايح بشده ابد لتعيفوه
ابنو النفوس وحاذرو من التهديم
ه ه ه ه
من نرجس الاسم المبارك للناس
اسسنه هذا مضفينه بالاحساس
وشمعتنه تضوي من رياض ابو عباس
استاذنه ومنه التمسنه التنظيم
ه ه ه ه
الكلمن يريد الخير احنه الخدام
ويامحله هذا الجمع من الاعلام
لاماتهمنه شما تدور الايام
الكل عمل خيّر كون واحدنه يقيم
ه ه ه ه
خدام ابو اليمه اجينه بهاليوم
نرضي الزجيه وحيدره والمظلوم
كل عمل خيّر لازم يظل ويدوم
وللصالحات الباري راد التعميم
الف الصلاة عله النبي والتسليم
ابو احمد الهنداوي
٥٠٩
القصيده التاسعه
نرجس ٩
ه ه ه ه ه ه ه
نرجس ام المهدي وبمجهودهه
حفظته وماقصرت المولودهه
ه ه ه ه ه ه
هاي بت ايشوعا ابن قيصر الروم
كامله ومتفهّمه بكل العلوم
تذكر الله لون تگعد لوتكوم
وماسلت تتگرب المعبودهه
ه ه ه ه
امر من الباري تصبح للامام
والده وتتكفل ابهاي المهام
اتحفظه من الظلم واولاد الحرام
والنعم من هالمره ومن زودهه
ه ه ه ه
الهادي من عيسه خطبهه بالسماء
وحضرت بخطبتهه بعض الانبياء
اتفضّْلت بذاكه وكتهه عله النساء
ايصير ابو صالح فخرهه وعودهه
ه ه ه ه ه
فاطمه ومريم اجنهه بالحلم
وهنه خطبنهه لبن خير الزلم
وحطن بچفيهه نيشان ورسم
وگعدت وچانت الفرحه تسودهه
ه ه ه ه
واجه اليوم البيه علامه للقاء
راحت ويه الاسر والملگه الرجاء
ورادو يبيعوهه وبسوگ السباء
وهيه منتضره يجي موعودهه
ه ه ه ه
والامام الهادي يدري ابهالامر
وامر ذاكه الثقه وانطاه الاجر
وكتب ورقه اوصلت النرجس ابسر
واجت بيت العصمه عزهه يقودهه
ه ه ه ه ه
وعاشت ويه العسكري بضعة سنين
وجانت تشيل الحزن عنه وتعين
ومن رحل عنهه فلا بطلت ونين
وذيچ ايامه بعد شيعودهه
ه ه ه ه
ومن حكيمه اتعلٍّمت هوايه امور
هاي اخت العسكري بت الخدور
يمهه چانت وبمسائلهه تشور
اشوكت مارادت تجي وتعودهه
ه ه ه ه ه
وحافظت عالمنتضر من كل خطر
وبالحمل ماراوته الاقرب بشر
حته يوم انولد مايمهه حضر
بس حكيمه اليمهه هيه تقودهه
ه ه ه ه ه
وصارت الغيبه ومشه عنهه الامام
وانگطع حبل الوصل حبل السلام
وعگب عينه عين للحره تنام
يم اىٔمتهه صبح ملحودهه
ابو احمد الهنداوي
٥٠٧
القصيده السابعه
نرجس ٧ (ميمر)
ه ه ه ه ه ه ه ه ه
طال الصبر وماظل عمر
ولايمته احنه ننتضر
الراعي الفرج منتضرين ننخاچ يم الحجه
ه ه ه ه ه
ننخاچ وانتي الدعوتچ متردين
يم الامين بدونه احنه متيهين
ابنچ الحجه البالغه الكل الدين
عين المحب اتظل عالدرب
فراگ الامام اشگد صعب
انسألچ بدمعات العين للضيج هذا يفرجه
ه ه ه ه
الله اصطفاچ الوالده للآيه
وهاي الرساله ندري صعبه هوايه
بس انتي يم الحجه نلتي الغايه
ويه الحسن عشتي المحن
وماكسرتچ ذيچ الفتن
للحسن وابنه اتدارين وابذلتي حته المهجه
ه ه ه ه ه
بدموعچ واحزانچ والامچ
گضّيتي يم المهدي ذيچ ايامچ
تشوفين مسموم الحسن جدامچ
وعانه الحسن وحته اندفن
وچم مره حجزو وانسجن
اوياه چنتي تعانين وعشتي السنين الحرجه
ه ه ه ه
جارت علينه الدنيه وشگد جارت
يم الامام بيوم عنكم دارت
ومن رحتو كل الغانمات انهارت
ماظل عدل سجن وچتل
بس ماگطعنا للوصل
شيعتكم ومتمسكين بفكر الامام ونهجه
ه ه ه ه ه
يانرجس احنه الليله يمچ جينه
ومانرد عنچ للابد تدرينه
ونتنطر ايرد الامام علينه
ايوگّف الظلم ايرد الخصم
وللوادم الفقره يضم
انسالج عله المهدي وين خيول العده متسرجه
ابو احمد الهنداوي
٥٠٥
القصيده الخامسه
ه ه ه ه ه ه ه ه ه ه
نرجس ٥
ه ه ه ه ه ه ه
نرجس بت يشوعه اشلون اواسيهه
ام المهدي ياهو الگدر يوعيهه
ه ه ه ه
ريحانه ومليكه وسوسن ورحمه
هاي اسمائهه المذكوره ملتمه
انه اشلون اگدر اوصل النجمه
وياچلمه وشعر يگدر يوافيهه
ه ه ه ه ه
النبي الهادي بسمه الله للمسيح أسْره
وطلب منَّه الكريمه الطاهره الحره
واتباركو بيهه وزادت البشره
وعيسه اتبارك وفرحان ينطيهه
ه ه ه ه ه
الزهره ومريم الراحن وخطبنهه
وعلي الهادي اجتباهه وهوه ضامنهه
اجت ويه السبي وتعوف موطنهه
وضحت بالاماره وكل اهاليهه
ه ه ه
امر رباني توصل منزل الهادي
وهذا الامر ياهالخلگ مو عادي
نرجس هاي صارت ام الامجادي
الله الرايد النرجس يعليهه
ه ه ه ه
الله اختارهه للعسكري زوجه
وتصبح والده للقائم الحجه
ام وربّته وأمنت كل نهجه
وبذلت كل جهدهه وكل مساعيهه
ه ه ه ه
ماركنت الظالم حاشه من عدهه
اخفت كل حملهه وخفت مولدهه
حليمه وعالمه اتجاوب التنشدهه
حفظت للامام وهاي تكفيهه
ه ه ه ه
انه الليله انخاهه واحشمهه
وبدموعي القصيده هذي انظمهه
ردت اتشرف وتقبلني خادمهه
وهالدعوه الكريمه بدمعي اوديهه
ه ه ه ه ه
وندعي الله بدعاء الفرج وانشده
يعجل طلعة الموعود وايرده
ويتمم الهاي الخلگ كل وعده
وكل ذيچ الظليمه الباري ينهيهه
ابو احمد الهنداوي
٥٠٣
نرجس ٣
ه ه ه ه ه
القصيدة الثالثه
ه ه ه ه ه ه
يانرجس يومچ بچانه
ه ه ه ه
يومچ يصعب حيل علينه
ومايوم احنه اللي ناسينه
يم الحجه انتي التدرينه
مصابچ يم گبرج ودانه
ه ه ه
جينالچ ياام الحجه
يمچ بالمدمع نترجه
جمره وتسعر جوه المهجه
واسود يمچ رف الوانه
ه ه ه ه
عشتي الجور وذيچ سنينه
وفارگتي الغايب والينه
خلافچ لو تدرين اشبينه
والغايب مثلچ ماجانه
ه ه ه ه
يانرجس واحنه الماننسه
مصابچ بالروح احنه انحسه
الظالم وياچ اشگد اقسه
سدو لبنچ كل بيبانه
ه ه ه ه
واحنه وياچ انضل للتالي
ماننسه الغايبنه الغالي
للموت وياه ومنبالي
انواليه ونحارب عدوانه
ه ه ه ه
عجل يامولانه واظهر
العالم بس بيدك يتحرر
وصوت يدوي الله اكبر
والوادم عگبك حزنانه
ه ه ه
ياام الحجه ونتمنه
يوم اللي وياچ يلمنه
مصابچ كل ساعه يالمنه
ماننساه وما ينسانه
أبو أحمد الهنداوي
٥٠١
نرجس ١
ه ه ه ه ه
القصيده الاولى
نرجس ١
ه ه ه ه ه
انه جيت النرجس باحزاني
اشكي من الوكت حيل اذاني
ه ه ه ه ه ه
انه يم المهدي جيت بشكوتي
وادري يمچ تنگضي كل حاجتي
حالي متمحن وادور بمحنتي
الزمن بالهم جابني اوداني
ه ه ه ه
يااميره عليچ اجيت وماارد
وانتي متردين من جاچ بنشد
انتي مولاتي واصيرلچ عبد
وثوبي الاسود صارلي نيشاني
ه ه ه ه
اليوگع بشده يجي يم البخيت
اليملك بحل الشدد والمحن صيت
وانه يم المهدي يمچ انه اجيت
واسمچ الكله كرم جاباني
ه ه ه
انتي الله الكارمچ والفضلچ
وماتردين التعنه ويسالچ
جبت كل حاجاتي يالحره الچ
اگبال بابج غلگت بيباني
ه ه ه ه ه
گبال بابچ انه اجري الدمعتي
وثگلت هوايه وتمادت دنيتي
ماترديني اظن بحيرتي
حاير هوايه الوكت خلاني
ه ه ه ه ه
حاير هوايه وحرت وتمحنت
لاچن اگبالچ اجيت وامنت
من شفت شباچچ انه اطمنت
اربع اگبور التشد ايماني
ه ه ه
والله يم المهدي يمچ استچن
واگف گبالج وكاسيني الامن
لبنچ الغايب والچ كلبي يحن
واسمچ ايظل كل وكت برهاني
أبو أحمد الهنداوي
٥٠٠
استشهاد الزهراء عليها السلام
ه ه ه ه ه
دافنلك حبيبه الله شمصيبه
تهمل دمعة العين ياحيدر يبو حسين
الله شمصيبه
ه ه ه
ياعلي جروحك تاكل بروحك
وياجرح يشفه بعد فرگه الزجيه
تلملم الدمعك ومحد يسمعك اونتك يمكن توصلك للمنيه
يعينك الله شلون فارگت الامينه
اليدفن المحبوبه بس الله اليعينه
وينه يابا الحسن صبرك ذاكه وينه
بدمعك غسلتهه وبيديك ادفنتهه
وخليت الگبر وين ياحيدر يبو حسين
الله شمصيبه
ه ه ه
الليله ماتگضي وعنهه ماتمضي
يم گبرههه اكعدت والكعده طويله
ماترد وياك ومايفيد بچاك
الگبر يأخذ مايرد كلمن يجيله
انت چنت وياهه روح وجسد واحد
وهسه نامت هيه وانت شلون كاعد
راحت الزهره يحيدر ماتعاود
مصيوبه بضلعهه ومالومه ابوجعهه
وهسه بطلت ونين ياحيدر يبو حسين
الله شمصيبهه
ه ه ه
عينك التهمل وگلبك اشيحمل
الراح راح ومابگت عدك سلامه
راجع الوحدك الخطوه التردك
وراسك امفرع عليه ماكو عمامه
البيتك انت رجعت تتعثر بالتراب
اول اللاگوك باب ويمه عطاب
وتصد عالبسمار وانت بضلعك صواب
وزينب من شفتهه چنك معرفتهه
تنشدك امي چاوين ياحيدر يبو حسين
الله شمصيبه
ه ه ه
حگك من تون ياعلي وتحن
انت عگب النبي وبته امسيت وحدك
والحسن وحسين بدمعة العينين
وزينب بنضرتهه حيره من تصدك
تنضر عله الحسن وانت اعرف بحاله
وعله حسين وكربله وحيرة عياله
وفوگ نهر العلگمي چفوف الكفاله
وزينب حرمه بالشام سبيّه بين ضلام
وتطب الدواوين ياحيدر يبو حسين
الله شمصيبه
ه ه ه
الفاطمه وحشه المغرب وغبشه
الليل حيل ثگيل والنجمه بعيده
تذكر ايامك وزهرة احلامك
والعزيز المات ياهو اللي يعيده
راحت ويه الزهره كل ذيچ امنياتك
وادفنت وياهه ياحيدر حياتك
وضلت بگلبك توجر ذكرياتك
لاتنتضر منهه مشت هيه لابنهه
منين اتجيبهه منين ياحيدر يبو حسين
الله شمصيبه
ابو احمد الهنداوي
٤٩٨
ذكرى شهادة حسن نصر الله
ه ه ه ه ه
ماتوكع الرايه. كل احنه وفايه
ياحسن نصر الله
ه ه ه
راية حسين ابكل وفه نرفعهه للعالي
ولجل الامام المنتظر نرخص اله الغالي
شيعه ونضحي ومانرد بالروح منبالي
ودربك يبو هادي يضل نمشيه للتالي
وهالروح نفديهه الرايه نعليهه
ياحسن نصر الله. ياحسن نصر الله
ه ه ه
عدنه ابو اليمه بكربله بهالعمر قدوتنه
ومانرد عنه للابد. ثابته خطوتنه
أمن يبو هادي نضل نلزم بعروتنه
وفكدك علينه اشكد صعب للباري شكوتنه
مانرد عن دربك. ياسيدي نحبك
ياحسن نصر الله. ياحسن نصر الله
ه ه ه ه ه
شيعة علي وراية علي تتنطر الغايب
يظهر امام اهل العدل وللظالم يحارب
دمنه نضحيه كل وكت. وهذا الامر واجب
ويحاكم الكلمن طغه. وبدمك انطالب
يحاكم بني صهيون مصابك عليه ميهون
ياحسن نصر الله ياحسن نصر الله
ه ه ه ه ه ه
انصار ابو اليمه نضل ويامحله هالنعمه
ومحله الشهاده لو تصح لحسين ابو اليمه
دمه يضل نور ويضل نبراس للامه
ياسيد ونكتب عهد وهذا العهد ذمه
وياك مانرجع خل الخلك تسمع
ياحسن نصر الله ياحسن نصر الله
ه ه ه ه
غاية الحب المذهبي نرضيهه للزهره
واليفدي دينه ومذهبه عالي يظل قدره
يلجاهدت اهل الكفر وللمذهب تنصره
هنيالك الهلمنزله ياناصر العتره
سيد بميدانك. ذليت عدوانك
ياحسن نصر الله ياحسن نصر الله
ابو احمد الهنداوي
٤٩٧
معصومه والكاظم
ه ه ه ه ه ه ه ه ه ه
سم ابوهه والمصاب ويومه
هوايه اذه الفاطمه المعصومه
ه ه ه ه ه
مصاب للخامس وعشرين برجب
مصاب بالالام علحره انكتب
راح ابوهه الكاظم ونوره انحجب
وظلت خلافه تون مالومه
ه ه ه ه ه
مصابهه ابوالدهه ماصاير ابد
اسنين عنهه بغربته الكاظم بعد
جمر يسعر نص كلبهه ومابرد
مغيب وماتدري سنهو علومه
ه ه ه ه
من المدينه رحل عنهه بالغصب
وبعد عنهه هوايه وطويل الدرب
شنو عليه ال عباس الحرب
وصارت ايامه شبيهه الحومه
ه ه ه ه
راح عنهه وتدري بي ظل ممتحن
وكيدوه ويمشي من سجن السجن
وعكبه ظلت فاطمه بذاكه الحزن
البنت من عكب الابو مهضومه
ه ه ه ه
تنتضر ظلت ولامنه خبر
ويجري ذاكه الدمع من ذاك النضر
غاب عنهه وتدري بي طاح بخطر
الفگد ابيه اليون ياهو يلومه
ه ه ه ه
مادرت بالكاظم بسجن الرشيد
مكيد بذيج السلاسل والحديد
انفرادي بحكم بالسجن الشديد
وبابه مغلوگه بشمع مختومه
ه ه ه ه
ياجرح معصومه مايرضه يطيب
عالكضه ابغداد وبسجنه غريب
جرح المفارك ابو يعجز الطبيب
وصعبه تبقه الونه لو مكتومه
ابو احمد الهنداوي
٤٩٥
استشهاد الزهراء
المستهل
ه ه ه ه ه
يارحمة الله الواسعه ويااكبر ابوابه
مشتاك ازور الگبرج واشتمن ترابه
كليلي گبرج وين يم الحسن وحسين
يلزجيه يزجيه
ه ه ه ه
يم الحسن يافاطمه
يالاسمچ يرد الروح
چاليش دمعج عالوجن
وچاليش جفنج مجروح
خلصتي عمرج يم حسن
مخنوكه من كثر النوح
وانتي النبي يستاذنچ.
لو رايد عليج يروح
عينچ يقبلهه النبي وتلالي من نوره
شو حمره ياام الحسن شو جنهه مسطورن ياهو السطر للعين يم الحسن وحسين
يلزجيه يلزجيه
ه ه ه ه ه
روحي اللذي بجنبي النبي
ويتبسم امن يصدهه
ولو اجت يمه بمجلسه
يگوم الهه ويگعدهه
تشبه ابوهه بكل طبع
جاهوه مو والدهه
بت النبي غير الصلاة
والصوم گلي شعدهه
لو شافهه متحاصره البسمار بحشاهه
چافجه لتراب الگبر حاسر تعناهه
وجا ادب الشيخين يم الحسن وحسين
يلزجيه يلزجيه
ه ه ه ه ه
طه النبي ورث الج
نحلة فدك يلزهره
جاليش ماعدج كبر
خبرينه يم العتره
العنده أبو مثل النبي
معقوله ضايع كبره
يم النبي ليش اندفن
السبب الضلعج كسره
الاذه النبي يم النبي يندفن معقوله
وبت الرسول وبضعته دفنتهه مجهوله
هاي العداله منين يم الحسن وحسين
يلزجيه يلزجيه
ه ه ه ه ه
اجر الرساله بمصحفه
الباري يكول القربه
وانتي الوحيده للنبي
. بته وعزيزة گلبه
بعمر الورد يافاطمه
تمشين وانتي محدبه
اشكد المج كسر الظلع
وبالعين ذيج الضربه
طبع اليعاني من الألم يتزايد بونه
مو خارج الديره إنّفه ومحد نشد عنه
ابيت الحزن تنعين يم الحسن وحسين
يلزجيه يلزجيه
ه ه ه ه ه
بعينج دمع يم الحسن
وضلعج مدمه مترب
والأكثر مصابج وشد
من شفتي خافت زينب
جفهه الزغير تمده الج
تكومج تريد وتنحب
تاليهه يمج مددت
وجفهه الزغير تخضب
زغيرونه زينب عالهضم يلزهره عفتيهه
الجبد الحسن ذبح النحر لا لا تخليهه
الطبرة أبو الحسنين يم الحسن وحسين
ه ه ه ه
يافاطمه خلافج بقه.
حيدر يدير بعينه
يوم اندفن يمج دفن
روحه وهذيج سنينه
يناديج والمدمع يهل
يلزهره عهدج وينه
موكلتي نكضي للعمر
عالزينه والموزينه
الله اليعين المرتضى اشكد نهضم لجلج
تعوفيني وحدي بحيرتي يلغاليه يكلج
اشلون العلي تعوفين يم الحسن وحسين
يلزجيه يلزجيه
ابو احمد الهنداوي
٤٩٣
استشعاد الزهراء عليها السلام
(آياة الزهراء)
ه ه ه ه ه ه
للزهره اشكد من ايات نزلن لجلهه
الله يفضلهه عله الناس. ياهو مثلهه
اليمدح بيهه القران. سكنت بيت الاحزان
ياهو مثلهه
ه ه ه
اول ايه. اية التطهير الچبيره هوايه
اول ايه وياهو بمثل وبفضل هاي الايه
فضل الزجيه الطاهره بهلسوره
عالكون كله وعالارض شع نوره
چاليش هاي ظلوعهه مكسوره
وفوگ الوجه بت النبي مسطوره
ضلت تجري دموع العين ذاكه عمرهه
من عصرتهه بذاك الباب وجمرة كسرهه
وحرگة ذيج النيران. سكنت بيت الاحزان
ياهو مثلهه
ه ه ه
ثاني ايه بيوم التباهل ياهي من النسوان
ثاني ايه شمس الشرف طلعت لهالي نجران
ماگدرو يباهون ام العتره
ماگدرو ينضرونهه للزهره
چاليش وصلو بابهه اهل الغدره
وطاحت الدنيه وياهه فو گ الغبره
صاحت انه الزهره شلون وين الوصيه
يابويه انضر هاي الناس. شمسويه بيه
الودهه يوده الرحمن
سكنت بيت الاحزان
ياهو مثلهه
ه ه ه
ثالث ايه
اية الكوثر كلهه اجت للكوثر
ثالث ايه
ياايها المرسول صلي وانحر
چاليش سقطو كوثراهه الاول
وجاليش ثاني كوثر بسم يقتل
والثالث عله الرمح راسه يحمل
وكوثر الزهره زينب عله الهزل
الناس المتهاب المرسول وكالتله الابتر
هاي الناس عله الزهراء ردت تتجسر
غلكو كل البيبان
سكنت بيت الاحزان
ياهو مثلهه
ه ه ه
رابع ايه
اية القربه الزهره اول قربه
رابع ايه
وگال النبي حرب الزجيه حربه
باگو فدك من فاطمه وغصبوهه
وبين الزلم بت النبي وكفوهه
هذي الوحيده بنيته يعرفوهه
جاليش من ورث الابو يحرموهه
بت الهادي وام الدين لنهه غريبه
دمعه وحسره وهم وونين حاله عحيبه
عاشت جنهه بميدان
سكنت بيت الاحزان
ياهو مثلهه
ه ه ه
خامس ايه
ابن السبيل السائل المَتصِده
خامس ايه
لوجه الله تنطي فطورهه ومترده
تسبيحة الزهراء الله انطاهه
والدنيه تنزل للصلاة وياهه
ماتت زغيره من عظم بلواهه
وبلا گبر ظلت عزيزة طه
شيعهه الكرار بليل ياللمصيبه
والگاع بممشاه تميل بموت الحبيبه
ماهان عليه ماهان
سكنت بيت الاحزان
ياهو مثلهه
ابو احمد الهنداوي
٤٩١
معصومه
ه ه ه ه ه
مصابچ باقين وياه
وليومچ ماننساه
انصارچ يامعصومه
نعيش الاحزان بيومه
بالمدمع خطيناه
وليومچ ماننساه
ه ه ه ه
چنتي ويه ابوچ واخوتچ مامونه
كل واحد مخليچ جوه عيونه
لاجن الدنيه ابد ما مامونه
مسجون ابوچ وگيده حز متونه
تالي الكاظم مسموم
وگلبچ عگبه مالوم
هناكه عله الجسر امدد
والگيد بچفه يشهد
وعشتي الحيره بلياه
وليومچ ماننساه
ه ه ه ه
يلجرحچ بگد الاخوّه واكبر
وگلبج عليه اشلون مايتفطر
دمعچ ابد مانشف ظل يتگطر
ذاكه الرضا الرايح بعد مايحضر
دمعاتچ وسط العين
وانتي الفارگتي اثنين
واحد رايح والثاني واليفگد يبقه يتاني
وعمرچ ضاع ابملگاه
وليومچ ماننساه
ه ه ه ه
عانيتي عالقاسم وذيچ الالام
من غاب اخوچ النازح من الظلام
يافاطمه عين التفارگ متنام
ولو تبچي دم عله الاخو ماتنلام
للقاسم تتنطرين
وبحاله ماتدرين
عينچ مشبوحه الدربه
ذاكه العايش بالغربه
وتحلمين برؤياه
وليومچ ماننساه
ه ه ه
المشهد گصدتي للرضا بدمعاتچ
ولجل ابو محمد تستعر اهاتچ
بسم الرضا تخطين كل خطواتچ
ورفعتي لله الشوفته بدعواتچ
درب بعيد واخطار
برد وحر واشرار
كلبچ رايح جدامج وتعيشين بالامج
السانچ دوم بنجواه
وليومج ماننساه
ه ه ه
معصومه وبقم المنيه اتانيچ
وتشرفت واعتلت يالحره بيچ
نتمنه يمچ بالمصيبه نواسيچ
ونزورچ ونتنومس بخدمتنه ليچ
ويّاچ انظل ويّاچ
يالحره وماننساچ
مجلسنه عليج انقيمه
وانتي الهلوادم خيمه
نتشرف نتعناه وليومچ ماننساه
ابو احمد الهنداوي
٤٩٠
ولادة الرسول الاعظم صلى الله عليه وآله
ه ه ه ه ه ه ه ه ه ه ه
أشرق الكون بحضورك
والشعر تاه بسطورك
الك قدمنه الولاء ياختام الانبياء
يامحمد يامحمد
ه ه ه ه
ياامان الدنيه كلهه الدنيه كلهه
انت يمحقق املهه وكل املهه
ياحسنهه وياضواهه
في ارضهه وفي سماهه
باحبيب الله يطه
انهيت كل ذاكه ظلمهه وكل جهلهه
تحققت بيك الاماني وجينه نهديك التهاني
ونرفع چفوف الدعاء. ياختام الانبياء
يامحمد يامحمد
ه ه ه
مولدك هالليه ياخذنه بمحنه
وبالايادي ورد يامولاي جبنه
الليله مسروره وجميله
وكل حزن بينه نشيله
تشفي للروح العليله
ودارت الاحلام بينه ياحلمنه
ياامان الدنيه كلهه
وانت التحقق املهه
وتسمع الهذا الرجاء
ياختام الأنبياء
يامحمد يامحمد
ه ه ه ه
انت موبس خير حل عله الوطيه
انت اخلاق وسلام ومعنويه
انت احييت العداله
وسطرت افضل رساله
وسقطت حكم الجهاله
وسقطت كل الوجوه العنصريه
صرت للعالم منار وعالظلم انت انتصار
رحمه انت من السماء.
ياختام الأنبياء
يامحمد يامحمد
ه ه ه ه
يبو الزهره اتحملت كلشي لجلنه
وكون نبقه وياك مانگطع وصلنه
ياحبيب الله ونبيه
نبقه يمك للمنيه
جينه الك هاي المسيه
ياشرفنه وياحلمنه ويااملنه
مانرد عنك يغالي
اشما نضحي مانبالي
نكتب بدمنه النداء
ياختام الانبياء
يامحمد يامحمد
ه ه ه ه
الدنيه صح مالت علينه احنه نصدهه
بس الك منقذ نتانيه اليردهه
مثلك يجيب السلم
وللامم كلهه يلم
يحقق الذاك الحلم
وكل مفاهيم الظلم بيده يهدهه
وتحل عالناس العداله
ويحكم بدين الجلاله
والخلگ كلهه سواء
ياختام الأنبياء
يامحمد يامحمد
ابو احمد الهنداوي
٤٨٨
فرح فرح فرح مولود الفرح
ه ه ه ه ه
انولدت الفرحه من السمه منحه
اشرف الناس والاحساس
انولد سيد الكون
انولد هادينه. انولد والينه
شع بالانوار والازهار
ضوت كل العيون
سيد الامه للبشر رحمه
راعي الايمان والاحسان
هله براعي الاخلاق
العدل عنوانه فتح بيبانه
والكرامات علامات
ملت كل الافاق
سلامات يا أبو الزهره بفرح نادينه
سلامات براية الاخلاص الك رفينه
سلامات عالعهد كلنه نظل نادينه
فرح فرح فرح مولود الفرح
ه ه ه ه ه ه
عمت البشره بصادق العتره
ذكره نحييه. نوافيه
جميل اسمه محلاه
سيد بعلمه جعفر الحكمه
من يضاهيه يساويه
العلي هوّه علاه
كلهه تشهدله. بعلمه وبفضله
بلسم الروح والجروح
امام الكرامات
راعي للمله. الطيبه تندله
بمولده وياه اجيناه
ننادي سلامات
موالين ونبقه دوم بمنهجه ونوفيله
موالين ولجله هاي ارواحنه نفديله
موالين وجينه كلنه بمولده هالليله
فرح فرح فرح مولود الفرح
ه ه ه ه ه
الليله محلاهه الصادق وطه
الحفل معمور. والبخور
وزهت كل الاوراد
الصفگه مريوده وتحله الانشوده
والفرح طاب بالاحباب
اشكبر هاي الاعياد
صادق وصادق والفرح ناطق
انجمعت اثنين. ميامين
وصف ماله تعبير
والفرح اكبر اشمحله هالمنظر
كل الاملاك والافلاك
واجه يرفرف الطير
الفرح طاب والنبي وال النبي فرحانه
الفرح طاب وابو صالح جن حضر ويانه
الفرح طاب والله فاتح رحمته وبيبانه
فرح فرح فرح مولود الفرح
ه ه ه ه ه
ليله مامونه بخير مضمونه
طابت الروح والجروح
شفت من الهموم
العين نربيهه صوب واليهه
للنبي تلوح اله نروح
وعله دوحته تحوم
وللبقيع هناك تكطع الاسلاك
تزور الاطياب. الاحباب
وتمسح الدمع العيون
الصادق تهنيه والتعب تطويه
يمته نبنيه نعليه
وتطوفه اليزورون
امامي وافتخر انه انتمي الساداتي
امامي وبيهم انه تنقبل دعواتي
امامي ويبقه وياهم اجل ميقاتي
فرح فرح فرح مولود الفرح
ابو احمد الهنداوي
٤٨٧
ولادة الرسول الاعظم صلى الله عليه واله وسلم
ه ه ه ه ه
ياربيع الاول واحله ربيع
مولد الهادي النبي طه الشفيع
بالصلاة عله النبي بالصلاة عله النبي
ه ه ه ه
ياربيع الاول وبسبعطعش
بيه كل الخير عالدنيه انفرش
الورد بالاغصان ريّان انتعش
والحزن بالكره الارضيه انكمش
الخير عم الخير وانسر الجميع
مولدالهادي النبي طه الشفيع
بالصلاة عله النبي بالصلاة عله النبي
ه ه ه ه ه ه
مولد الهادي ربيعه مستمر
بالصلاه والصوم وانواع الاجر
مولد الهادي اليتامه بي تسر
وادب واستغفار وايمان وستر
وايد ترفع تدعي للباري السميع
مولد الهادي النبي طه الشفيع
بالصلاة عله النبي بالصلاة عله النبي
ه ه ه ه ه ه
اني اجيت المولده وبي منسعد
وادري ابو الزهره النبي عليّه يصد
جبت بچفوفي الشمع ويه الورد
بس يريد ويه الورد انه استعد
جندي للمذهب وللمرجع مطيع
مولد الهادي النبي طه الشفيع
بالصلاة عله النبي بالصلاة عله
ه ه ه ه ه
بيوم ميلاد النبي الهادي السميح
كل صنم للظلم والباطل يطيح
كالهه الهادي بشذه السانه الفصيح
الله يرفض كل عمل سيء قبيح
والبديع ايحب عمل كلمن بديع
مولد الهادي النبي طه الشفيع
بالصلاة عله النبي بالصلاة عله النبي
ه ه ه ه
مولد الهادي زرع بينه الامل
وجينه نهتف حي على خير العمل
ابد مانرجع ونبقه للاجل
وللامام المهدي ندعي بالعجل
وتنفرش هالدنيه بازهار الربيع
مولد الهادي النبي طه الشفيع
بالصلاة عله النبي بالصلاة عله النبي
ابو احمد الهنداوي