8098
Ўзингизга ёққан ҳикматни бошқаларга ҳам улашинг!
Ё АДОЛАТ УНИ ОЗОД ҚИЛАДИ, ЁКИ ЗУЛМ УНИ ҲАЛОК ҚИЛАДИ!
Бир куни Набий саллоллоҳу алайҳи ва саллам саҳобаларга дедилар:
“Ўн кишига амир бўлган киши қиёмат кунида қўл-оёқлари боғланган ҳолда келтирилади. Уни ё адолати озод қилади ёки зулми ҳалок қилади!”.
Биздан ҳар биримиз ўз майдонида амирдир. Бунинг ўзига хос масъулияти бор...
Эй оталар! Фарзандларингиз ўртасида адолат қилдингизми ёки уларни бир-биридан фарқладингизми?!
Эй кўпхотинлилар! Хотинларингиз ўртасида адолат қилаяпсизми ёки ёш хотин томонга кетаяпсизми?!
Эй мудирлар! Ишчиларингизни тенг кўраяпсизми ёки кимнидир эркалатиб юбораяпсизми?!
Ҳой ички ишлар ходимлари! Қонунни ҳаммага бир хил татбиқ қилаяпсизми ёки бошлиқнинг ўғлини қўйиб юбориб камбағалларнинг боласини қамаяпсизми?!
Ҳой кишиларни мансабга қўядиганлар! Мансаб-вазифаларни муносиб инсонларга бераяпсизми ёки кимнингдир томонидан юборилган танишларгами?!
Ҳаммамиз қиёмат куни мансаб ва масъулиятимиз томонидан кишанланган ҳолда келамиз. Ўшанда бизни фақатгина адолатимиз кишандан озод қила олади, бошқа нарса эмас. Адолат қилайлик!
/channel/Abdulqodir_Polvonov
ТИЛИДАН ВА ҚЎЛИДАН!
Бир киши Набий саллоллоҳу алайҳи ва салламдан сўради:
-Қандай мусулмон афзал?
Набий саллоллоҳу алайҳи ва саллам дедилар:
-Мусулмонлар унинг қўлидан ва тилидан омон қоладиган мусулмон афзал!
Ҳақиқий дин бу масжиднинг ўзида хосланган эмас. Ҳақиқий дин сизнинг тижоратда алдамаслигингизда, ёлғон қасам ичмаслигингизда намоён бўлади. Ҳақиқий дин сизнинг қўшнингиз билан қилаётган муомалангизда кўринади. Ҳақиқий дин сизнинг ҳамкасбларингизни сотмаслигингизда, улар орасида чақимчилик қилмаслигингизда кўринади. Ҳақиқий дин қариб қолган ота-онангизга қилаётган хизматингизда намоён бўлади. Ҳақиқий дин сизнинг ака-укаларингиз, опа сингилларингиз, қариндош уруғларингиз билан қилаётган силаи-раҳмингизда, уларга қилаётган яхшилигингизда, уларнинг юкини гарданингизга олишингизда кўринади. Шайтонга сизнинг орангизни бузишига йўл берманг!
Мусулмонларнинг обрўсини тўкмаслигингиз динингиздир. Уларнинг гўштини ғийбат қилиб емаслигингиз динингиздир. Улар орасида чақимчилик қилмаслигингиз динингиздир.
Динингиз оддий инсонлар билан қиладиган муомалангизда кўринади. Баъзилар мансабдорлар, домлалар билан ўзгача муомала қилишади. Оддий инсонларга эса бошқача муносабатда бўлишади. Динингиз уйингиздаги оддий хизматкорга қилаётган муомалангизда кўринади. Динингиз кўчада озгина нарсани олдига қўйиб савдо қилиб ўтирган мискинларга қилаётган муомалангизда кўринади. Динингиз кўча тозаловчи оддий фаррошларга қиладиган муомалангизда, қоровулларга қиладиган муомалангизда намоён бўлади!
/channel/Abdulqodir_Polvonov
ТАНАЗЗУЛ
Рус ёзувчиси Антон Чеховдан таназзулга юз тутган давлатнинг табиати қандай бўлиши ҳақида сўрашди. Чехов деди:
"Таназзулга юз тутган давлатда битта ақлли инсон рўбарўсида мингта аҳмоқ, битта онгли жумла қаршисида мингта аҳмоқона гап туради. Аксар инсонлар аҳмоқ бўлади. Ақлли инсонлар доимо мағлуб бўлади.
Агар мажлисларда арзимас масалалар муҳокама қилинса, арзимас инсонлар мажлис тўрида бўлса демак сиз таназзулга юз тутган жамиятдасиз.
Мисол учун бундай жамиятда маъносиз ва арзимас қўшиқларга минглаб инсонлар рақсга тушиши, уни такрорлаб айтиб юриши мумкин. Ашулачилар машҳур бўлади. Уларнинг гапи жамиятда ўтадиган, жамият учун улар ўрнак-намуна бўлади.
Аммо олимлар ва китобларга эътибор берилмайди. Уларни ҳеч ким танимайди. Уларнинг жамиятда ҳеч қандай ўрни бўлмайди. Кўпчилик инсонлар беҳуда ишларга, алдовларга берилишади.
Бундай жамиятда бизнинг ақлимизни эгаллаш учун бизни алдайдиган, бизни арзимас нарсалар билан кулдиришга ҳаракат қиладиган кимсалар бизни кўзимизни очадиган, бизга ҳақиқатни англатадиган кимсалардан кўра афзал бўлади.
Шунинг учун илмсиз жамиятга демократия тўғри келмайди. Чунки бу жамиятда кўпчилик жоҳил бўлгани учун ақллиларнинг йўлини айнан шулар белгилаб беради!".
/channel/Abdulqodir_Polvonov
"Бахтингиз калитини ўзгалар чўнтагига солиб қўйманг!".
Эрнесто Че Гевара
/channel/Abdulqodir_Polvonov
Аллоҳдан бошқа ҳеч кимдан бир нарсани икки мартадан ортиқ сўраманг!
Қадрингизни билинг!
/channel/Abdulqodir_Polvonov
БЕШАФҚАТ ҲАЁТ
Ўшанда маҳзунлик йили эди!
Расулуллоҳ саллоллоҳу алайҳи ва салламни Қурайшдан ҳимоя қиладиган метин девор бўлмиш Абу Толиб вафот қилди.
Завжалари, ҳабибалари, дўстлари, суянчиқлари Ҳадича розиёллоҳу анҳо вафот қилди.
Кишининг ички ва ташқи фронтидан бирданига ажралиши нақадар оғир синов!
Инсон ўзини ёлғиз ва кимсасиз ҳис қилади!
Макка бутунлай бутлар ва санамларга ибодат қилишга ғарқ бўлган эди. "Дорун Надва" ҳийла-найранг ва фитналарга тўлиб-тошган эди!
Ана шунда Набий саллоллоҳу алайҳи ва саллам Тоифга боришга қарор қилдилар. Маккадан топмаган меҳрни у ердан топишга, Маккада кўрган бағритошликни у ерда кўрмасликка умид боғладилар.
Тоифга етиб бориб Тоифнинг каттаси ибн Абди Ёлилга мақсадларини айтдилар. Аммо у разилнинг берган жавобидан кўзларимиз ёшланди, қалбимиз парчаланди. У суюкли Набиййимиз саллоллоҳу алайҳи ва салламга шундай деди:
- Аллоҳ менга юборишга сендан бошқа одам топа олмадими?!
Сўнгра аҳмоқлари ва ёш болаларига айтиб у зот саллоллоҳу алайҳи ва салламни тошбўрон қилдирди. Икки муборак оёқларидан қон оқди!
Кейин замон айланди, йиллар алмашди. Макка фатҳ бўлди. Билол розиёллоҳу анҳу Каъбанинг устидан азон айтди. Аллоҳу акбар садоси илк бор оламни тўлдирди!
Бу буюк маскан ўзлигини токи қиёматгача яна қайтариб олди!
Мана, Набий саллоллоҳу алайҳи ва саллам Мадинадалар. Ислом салтанати бутун араб ярим оролига ўз ҳукмронлигини таратди. Оиша розиёллоҳу анҳо Набиййимиз саллоллоҳу алайҳи ва салламдан сўраяптилар:
- Эй Аллоҳнинг Расули! Сиз учун энг оғир кун қайси кун бўлган?
Оиша розиёллоҳу анҳо Уҳуд жангининг оғир кечганини билар эдилар. У кунда қўшиннинг қўмондони, Расулуллоҳ саллоллоҳу алайҳи ва салламнинг амакилари Ҳамза розиёллоҳу анҳу шаҳид бўлган эди. Ҳамза розиёллоҳу анҳу билан бирга етмишта энг буюк саҳобаларини дафн қилдилар. Ўша ғазотда суюкли Набиййимиз саллоллоҳу алайҳи ва салламнинг бошларини ёришди, тишларини синдиришди. Шунинг учун Оиша розиёллоҳу анҳо буни энг оғир кун деб ҳисоблаяптилар.
Аммо Набий саллоллоҳу алайҳи ва саллам тўсатдан Тоифдан гап бошладилар:
- Тоифдан чиққанимда ўзимда йўқ эдим. Фақатгина Қарнус Саъолиб деган жойда ўзимга келдим. Бошимни кўтардим. Тепада Жаброил турар эди. У деди:
- Аллоҳ таоло тоғларнинг фариштасини юборди. Истасанг бу фариштаТоиф аҳли устига иккита тоғни ағдариб уларни йўқ қилади! Мен Жаброилга дедим:
- Мен уларнинг наслидан ёлғиз Аллоҳга ибодат қиладиган, Унга ҳеч нарсани шерик қилмайдиган кишилар чиқишидан умидворман!
Энди биродарлар қалбингизни менга берингда, Расулуллоҳ саллоллоҳу алайҳи ва салламнинг гапларини мен билан бирга тааммул қилинг!
"Тоифдан чиққанимда ўзимда йўқ эдим. Фақатгина Қарнус Саъолиб деган жойда ўзимга келдим".
Набий саллоллоҳу алайҳи ва саллам ўзларининг пайғамбар эканликларини билар эдилар. Куни келиб динлари ғолиб бўлишини ҳам билар эдилар. Аммо у киши ҳам барибир инсон эдилар. Ота-онам фидо бўлсин у зотга!
Дунё кўзларига тор бўлди. Ҳатто бутун олам у кишининг нигоҳларида нинанинг тешигидек бўлиб қолди. Нима қилишни билмадилар. Маҳзунлик ва оғриқдан синиб қолдилар. Юзлари ерга боқиб, оёқлари қаерга боришни билмай қолди. Шу ҳолатда бугунги ҳисобимиз билан 46 км юрганлар. Ногоҳ Жаброил алайҳис саломнинг овозидан ўзларига келиб тепага қарадилар!
Эътибор беринг! Роббимиз Набиййимиз саллоллоҳу алайҳи ва салламдаги инсончиликни нақадар риоясини қилаяпти. Аллоҳ таоло у кишига итоб қилмади. Балки Жаброил алайҳис саломни юбориб тасалли берди. Истасалар зулмга қарши жавоб беришини айтди!
Биз иймоннинг озлигидан эмас, ҳаётнинг бешафқатлигидан заифлашамиз. Тоиф куни Набий саллоллоҳу алайҳи ва салламнинг иймонлари оз эмас эди. Аммо зулмнинг таъми аччиқ эди!
Тушунинг, инсон баъзан синиб қолади. Танаси бизнинг дунёмизда юрсада, руҳи биз билмайдиган бошқа дунёда юрган бўлади. Инсоннинг бошидан шунақа пайтлар ўтадики, унда бир сўз айтишга ҳам, насиҳат эшитишга ҳам, бировни кўришга ҳам тоқати етмайди!
Суянчиғи фақатгина Аллоҳ бўлганлар билан эҳтиёт бўлиб муомала қилаверинг!
/channel/Abdulqodir_Polvonov
Ҳамма тенг бўлган биргина жой қабристондир!
Ёлғиз ўзингиз зиёрат қилиб туринг. Фойдаси беқиёс бўлади, ишонинг!
/channel/Abdulqodir_Polvonov
ЖОҲИЛИЯТДАГИ ОДОБ
Мушрикларнинг каттаси бўлмиш Абу Жаҳлга Набий саллоллоҳу алайҳи ва салламнинг уйларига ҳужум қилиб, бостириб кириб у зотни қатл қилиш тавсия қилинди. У бундан бош тортиб деди:
- Аллоҳга қасамки, мен арабларнинг: "Абу Жаҳл Муҳаммаднинг хотин-қизларини қўрқитибди,!", деб юришларини истамайман!
Бу жоҳилиятдаги хусумат одобидир.
Биз ахлоққа доим муҳтожмиз!
/channel/Abdulqodir_Polvonov
Кемани биз истаган томонга ҳайдайдиган киши капитандир!
Кемани ўзи истаган томон ҳайдайдиган киши эса қароқчидир!
Содиқ ал-Ҳаддод
/channel/Abdulqodir_Polvonov
Қалблар сирдир. Уни Аллоҳдан ўзга ҳеч ким билмайди. Ҳижоб ўрамайдиган аёл қизларимиз фоҳиша эмас. Мусиқа эшитадиганлар қуръонни ёмон кўришмайди. Мен гуноҳкорларни ҳимоя қилиб оқламоқчи эмасман. Мен уларнинг қўлидан тутиб Аллоҳ томон бошлайлик демоқчиман!
Тўртинчи дарс:
Агар инсонлар билан гўзал ахлоқ ва юмшоқлик орқали муомала қилмасак диндорлар ҳақида уларда ёмон таассурот қолдирамиз. Натижада улар “диндор сенга ўхшаган бўлса мен сенга ўхшамаганим бўлсин!” деб, гуноҳларини тарк қилишмайди. Ўзимиз ўрнак бўлмасдан туриб кишиларни маломат қилмайлик. Аллоҳни инсонларга ёмон кўрсатмаслигимиз лозим.
Масжидга қатнайдиган кишининг намоз ўқимайдиган киши билан очиқ юз ила қўл бериб сўрашиши эҳтимол унинг намоз ўқишига сабаб бўлар. Ҳижобли аёлнинг очиқ юрган аёл билан табассум ва ширин сўзлар ила муомала қилиши эҳтимол унинг ҳам ҳижобга киришига сабаб бўлар. Итоатгўй инсоннинг гуноҳкор инсонга айтган ширин сўзи эҳтимол уни Аллоҳ томон бошлар...
Борди-ю инсонлар сиздан таъсирланмаса ҳам сизга яхши йўлга чақириқ савоби битилаверади.
Юқоридаги киши ўғрига, зинокор аёлга, бойга садақа қилди. Роббимиз ундан: “Нега иффатли кишига, покиза аёлга ва фақирга садақа қилмадинг? Агар шуларга садақа қилганингда яхшироқ бўлар эди!” деб сўрамади. Аммо унга солиҳ туш кўрсатди ва садақаси қабул бўлганини айтди. Эҳтимол ўғри ўғрилигини у сабабли тарк қилар!
Эҳтимол зинокор аёл у сабабли иффатли аёлга айланар!
Эҳтимол бой у сабабли садақа қилишга киришар!
/channel/Abdulqodir_Polvonov
ЁРДАМ БЕРАДИ!
Аллоҳ таоло бир ботилни ҳалок қилмоқчи бўлса унга овози эшитиладиган, кишилар ундан ҳайиқадиган бир аҳмоқни сабаб қилади.
Бадр жангида икки томоннинг ҳам мақсади карвон эди. Мусулмонлар карвонни қўлдан чиқарган эди. Карвон ишини бажариб Абу Суфён бошчилигида Макка томон қайтмоқда эди. Мушриклар карвоннинг қутилганига ишонишган эди. Ана шу онда Аллоҳ таоло Абу Жаҳл каби аҳмоқ ва ҳамма уни тинглайдиган бир кимсани гапиртирди. У Бадрга бормагунча Маккага қайтмаймиз, ўша ерда туялар сўямиз, қизлар ашула айтади, буни араблар эшитсин, кўриб қўйсин, деди.
Кўпчилик уни фикридан қайтармоқчи бўлди. Аммо бу ҳеч кимнинг қўлидан келмади. Ҳатто Қурайш катталаридан бўлмиш Утба ибн Рабийъа деди:
-Маккага қайтайлик. Майли Утбани қўрқоқ десинлар!
Абу Жаҳл уни қаттиқ сўкиб ҳақоратлаб ташлади...
Бир муддат ўтиб Қурайш саййидларининг жонсиз таналари Бадрдаги чуқурга ташланди ва сассиқ жийфага айланишди. Набий саллоллоҳу алайҳи ва саллам уларнинг жонсиз танаси устига келиб дедилар:
- Роббингиз айтган нарса ҳақлигини кўрдингизми?! Мен Роббим ваъда қилган нарсанинг ҳақлигини билдим!
Бугунимиз нақадар кечаги кунга ўхшаш!
Нетаньяҳу дарахтдан тушиши учун бутун олам қанча-қанча фурсат бермади дейсиз. Ҳарбий ташкилотлар, махфий хизматлар етакчилари, Моссад бошқалар уни дарахтдан тушириш учун ялинишди. Аммо у маймунга ўхшаб дарахтга ёпишиб олган. Субҳаналлоҳ! Унинг журъатига қаранг. Олдин ўлгудек даражада қўрқоқ эди.
Нетаньяҳуни Фаластинликлар каби ҳеч ким билмайди. Ўзгалар ундаги бугунги "жасорат"дан ажабланишади. У жуда ҳам қадимги қўрқоқ ва заифлардан. Фаластинликларнинг у билан боғлиқ ҳикоялари кўп.
Шояд Аллоҳ уни ҳам, давлатини ҳам Абу Жаҳлни ҳайдаб келгани каби уруш майдонига ҳайдаб келган бўлса...
Фаластинликлар Нетаньяҳу ҳукмронлиги даврида бир неча марта урушни кўрди. Нетаньяҳу урушларнинг барчасида тезроқ уни тугатишни истайди.
Нетаньяҳу бир юз ўттиздан ортиқ аскарини Фаластинлик асирларга алмаштиришга рози бўлмаяпти. Ҳолбуки, у олдинроқ битта аскари эвазига мингдан ортиқ Фаластинликни озод қилган эди. Улар ичида Қассом гуруҳларидан бўлган одамлар ҳам бор эди. Шахсан Синвар ҳам улар ичида бор эди.
Ўз халқига бугун "Филадельфия коридори"нинг тинчликни сақлашдаги аҳамияти хақидаги гапираётган Нетаньяҳу олдинлари унинг тинчлик учун ҳеч қандай аҳамияти йўқ, деб ундан халқини эвакуация қилишга чақирган эди.
Аҳмоқлик ҳам Аллоҳнинг лашкарларидан биридир. Субҳаналлоҳ! Роббимиз инсоннинг хаёлига келмайдиган лашкарлари билан динига нусрат бераверади. Босқинчилар унчалар узоққа бормайди. Улар Аллоҳнинг изни билан қулаш арафасида. Уларни ҳар томондан ёмон кўрувчилар ўраб турибди. Вақти келиши билан уларни ҳеч ким ҳимоя қила олмайди. Уларни Фаластинга олиб келиб экканлар ҳам, уларни бу ерда кўкартириш учун югураётганлар ҳам қутқара олмайди!
Бу гапни биз айтаётганимиз йўқ. Буни уларнинг билимли ва маданиятли кишилари айтишаяпти. Булардан ҳам олдин биз Аллоҳ ва Расулининг ваъдаларига ишонамиз. Юқоридаги аҳмоқ эса мана шу ваъдаларнинг рўёбга чиқишига Аллоҳнинг изни билан ёрдам беради!
/channel/Abdulqodir_Polvonov
ШИКОЯТ ҚИЛАЯПТИ!
Набий саллоллоҳу алайҳи ва саллам ансорлардан бирининг боғига кирдилар. У ерда бир туяни кўрдилар. Туя Расулуллоҳ саллоллоҳу алайҳи ва салламни кўриши билан инграб кўзларидан ёш тўкди. Расулуллоҳ саллоллоҳу алайҳи ва саллам унга яқинлашиб бошини силадилар. У жим бўлди. Сўнгра сўрадилар:
-Бу кимнинг туяси?
Ансорлардан бир йигит келди ва “Меники, эй Аллоҳнинг Расули!”, деди. Расулуллоҳ саллоллоҳу алайҳи ва саллам унга қараб:
-Аллоҳдан қўрқмайсанми бу жонивор тўғрисида?! Аллоҳ уни сенга мулк қилиб берган. У менга сендан шикоят қилаяпти. Сен уни қаттиқ ишлатар экансан, оч қолдирар экансан, қийнар экансан!
Бугун башарият бизга инсон ҳуқуқлари ҳақида ўқиётган маърузаларини биз бундан минг тўрт юз йил олдин ҳатто ҳайвонларга татбиқ қилганмиз.
Азизлар! Динимиз ниҳоятда буюк дин. Аммо биз уни татбиқ қилмайяпмиз. Динимиз раҳм-шафқатга чақиради, аммо бизнинг қалбимиз қотиб бораяпти!
Динимиз оддий бир туяга шунча эътибор бераяпти, биз бўлсак инсондек буюк мавжудотга эътибор бермаймиз. Бир аёл бир мушук туфайли дўзахга кирган. Биз бўлсак инсонларни зое қилмоқдамиз. Бизлар четдан келтирилган қадриятларга муҳтож эмасмиз, консерваланган фикрларга зор эмасмиз. Бизга фақат ҳақиқий мусулмон бўлиш етишмаяпти холос!
/channel/Abdulqodir_Polvonov
"Ҳасад фақатгина моддийликка боғлиқ эмас. Баъзилар сизни одамлар яхши кўрса ҳам бемор бўлиб қолади!".
Вильям Шекспир
/channel/Abdulqodir_Polvonov
Шайхи унга дебди:
"Ҳой болам! Агар гуноҳ қилсанг уни одамларга айтма. Чунки сен тавба қилсанг ҳам одамлар унутишмайди!".
/channel/Abdulqodir_Polvonov
Ҳамма нарсага куч билан эришишингиз мумкин, аммо муҳаббат ва эҳтиромга эмас!
/channel/Abdulqodir_Polvonov
ГЎЗАЛ АҲД ИЙМОНДАНДИР!
Набий саллоллоҳу алайҳи ва салламнинг ҳузурларига Жассома ал-Музанийя исмли аёл кирди. Бу аёл Хадича розияллоҳу анҳонинг дугоналаридан бири эди. Набий саллоллоҳу алайҳи ва саллам унинг ташрифидан ниҳоятда шодландилар. Уни эҳтиром қилдилар. Аёл чиқиб кетгач Оиша розияллоҳу анҳо сўради:
- Эй Аллоҳнинг Расули! Битта кампирга шунча эҳтиромми?!
Набий саллоллоҳу алайҳи ва саллам дедилар:
- Эй Оиша! Бу аёл Хадича тириклигида келар эди. Гўзал аҳд иймондандир!
Турмуш ўртоғингиз билан келишмовчилик бўлиб қолганида у билан ўтган муҳаббат лаҳзаларини ёдга олинг.
Дўстингиз билан ўртангизда тушунмовчилик бўлганида у билан ўтган хурсандчилик онларини эсланг.
Дунё сизни акангиздан, укангиздан, опа-синглингиздан ажратмоқчи бўлганида томирингизда оқадиган қон бир хиллигини ёдга олинг. Ёшликдаги кулгуларингизни, тупроқларда улар билан ўйнаганингизни, қалбнинг қалбдан қониққанини эсланг.
Ким билан кулишган, йиғлашган, овқатланган бўлсангиз демак улар билан ўтказган аҳдингиз-замонингиз бор. Гарчи дунё сизни ажратсада, уни муҳофаза қилинг. Сирларни очманг. Заиф нуқталарга зарба қилманг. Гўзал аҳд иймондандир!
/channel/Abdulqodir_Polvonov
УНУТМАНГ!
Набий саллоллоҳу алайҳи ва саллам саҳобаларга қиёмат манзараларидан бирини ҳикоя қилиб бермоқдалар:
"Аллоҳ таоло бир бандасига мол берди. Ундан сўради:
- Бу мол билан нима ишлар қилдинг?
Банда жавоб берди:
- Мен кишилар билан савдо қилдим. Қарздорларнинг қарзидан ўтиб юборар эдим. Қийналганларга енгиллик берар эдим. Бойларга эса муҳлат берар эдим!
Аллоҳ таоло деди:
- Бунга мен ҳақлироқман. Бу бандамнинг гуноҳидан ўтиб юборинглар!
Яхшиликка нисбатан вафодор бўлинг. Яхшиликни унутманг. Бизнинг яхшиликларни унутмайдиган вафодор Роббимиз бор. У вафолиларни яхши кўради.
Дўстингиз қилган яхшиликни унутманг. Қўшнингиз қилган гўзал амални ёддан чиқарманг. Биродарингизнинг ёшлик хотираларини ёдда тутинг. Сизга иш берганларнинг яхшилигини эсдан чиқарманг.
Сизнинг хизматингизда жонини тиккан турмуш ўртоғингизни унутманг. Сизга ёрдами теккан ҳамкасбингизни ёдингиздан чиқарманг.
Бир онлик хусумат сабаб бир умрлик муҳаббатни барбод қилманг!
Ёдингиздан чиқмасин, бизнинг унутмайдиган Роббимиз бор!
/channel/Abdulqodir_Polvonov
Ўзимни солиҳлардан деб ўйламайман. Шариатни ҳам қаттиқ тутганман деган даъводан йироқман. Фаришталик даъвосидан узоқдаман...
Аммо Аллоҳ ҳақида гапириб мазза қиламан, лаззатланаман. Умидим шундан!
/channel/Abdulqodir_Polvonov
Келинг, бир-биримизнинг маҳзунлигимизни ҳам эҳтиром қилайлик. Бироз ёлғиз қолишга рағбати борлигини ҳурматини қилайлик. Бироз тинчлангач, елкасини силайлик, тасалли берайлик. Қалб қалб билан, руҳ эса руҳ билан гаплашсин!
Маҳзун бўлган лаҳзаларингизни яшанг. Зарари йўқ. Оғриқдан йиғланг. Кўз ёшларингизни беркитманг. Қалбда қолиб кетадиган маҳзунлик уни парчалайди.
Синганингизни бошқалар кўрмаслиги учун бироз ёлғизланинг. Роббингизга нидо қилинг. Дардингизни айтинг Унга!
Унинг ҳузурида сажда қилинг. Шундай муножот қилингки, Ундан бошқа барчадан умид узганингизни билсин!
Бармоқларингиз билан қалбингизга ишора қилиб:
"Эй Роббим! Дардим бу ерда. Даво бер!", деб ёлворинг!
Сўнгра инсонлар олдига кўзёшларингизни артиб худди ҳеч нарса бўлмагандек кучли бўлиб чиқинг!
Чунки инсонларнинг сизга раҳми келиб қараши ҳам янги бир жароҳат аслида.
Аллоҳ таоло суянадигани йўқларга суянчиқдир!
/channel/Abdulqodir_Polvonov
ЎРГАТМОҚЧИ БЎЛИШАДИ...
Европада Европаликлар аёлларни нажас деб Инжилни ушлагани қўймайдиган бир пайтда Қуртубанинг бир маҳалласида 170 та қуръонни нусхалайдиган хаттота қизлар ва аёллар бор эди.
Муҳаммад Акрам ан- Надвий ўзининг "Аёл муҳаддислар" номли китобида 8000 (саккиз минг) та ҳадис олималари бўлмиш аёлларнинг таржимаи ҳолини зикр қилади. Бу китоб қирқ мужалладдан иборат.
Имом Ҳофиз Заҳабий роҳимаҳуллоҳ ўзининг "Мийзонул иътидол" номли китобида 4000 (тўрт минг) та айбли ва тарк қилинган эркак ровийларни зикр қилиб сўнгра шундай дейди:
"Аёл муҳаддислар ичида эса айбланганини ва тарк қилинганини билмайман!".
Аллома Ҳофиз Ибн Асокир роҳимаҳуллоҳ ўзининг илм олган устозларидан саксондан ортиғи аёллар бўлганини айтади.
Имом Саховий роҳимаҳуллоҳнинг "Аз-зуъул ломиъ" китобида тўққизинчи ҳижрий асрда яшаб ўтган мингдан ортиқ муслима олималар ҳақида гапирилган. Айнан ўша асрда Европаликлар жодугарлик айби билан 600000 (олти юз минг) аёлни оловда куйдириб қатл қилишган.
Бугун Европа ислом аёлларга зулм қилади деган даъво билан мусулмонларга аёлларга қандай муомала қилишни ўргатмоқчи бўлаяпти!
/channel/Abdulqodir_Polvonov
ИНСОНИЙЛИК
Рус ёзувчиси Максим Горький айтган эди:
"Америкаликларда инсон истаган ҳамма нарсалар бор. Фақат уларда битта нарса етишмайди. Бу инсонийликни ҳис қилиш!".
Ирландиялик адиб Оскар Уайльд Нью-Йорк портига тушганида уни божхона зобити тўхтатиб сўради:
- Сизда ман қилинган ҳеч нарса йўқми?
Оскар Уайльд деди:
- Бор. Менда инсонийлик бор!
/channel/Abdulqodir_Polvonov
ҚУЛЛИК
Қуллар озод инсонларнинг озодликка интилиши сабабларини билишмайди...
Қуллар озодлик томон бўлган ҳаракатни исён, олийликни бузуқлик, азизликни жиноят деб номлашади...
Шунинг учун улар ўзини азиз ҳисоблайдиган, қуллар карвонида юришни истамайдиган озод инсонлар бошига турли азобларни солишади...!
/channel/Abdulqodir_Polvonov
АЛЛОҲ БУ ИШИНГНИ УНУТМАЙДИ!
Қурайш Набий саллоллоҳу алайҳи ва салламни ва мусулмонларни ҳажв қилиб шеърлар айта бошлади. Ислом шоирлари ҳам уларга бир-бир муносиб раддиялар бера бошлашди. Расулуллоҳ саллоллоҳу алайҳи ва саллам Каъб ибн Молик розияллоҳу анҳуга дедилар:
- Эй Каъб! Сен: "Сухайна Роббисини мағлуб қиламан деди. Аллоҳ билан жанг қилганлар албатта мағлуб бўлажак!", деганмидинг?!
Каъб деди:
-.Ҳа, эй Аллоҳнинг Расули!
Набий саллоллоҳу алайҳи ва саллам дедилар:
- Аллоҳ таоло бу гапингни унутмайди!
Бу динни ҳимоя қилиб айтилган ҳар-бир гапингиз унутилмайди...
Аллоҳни инсонларга суйдириш учун қилган ҳар-бир ваъзингиз албатта сақлаб қўйилади, мукофотини оласиз...
Инсон фитратини, ахлоқни ҳимоя қилиб ёзилган мақолангиз асло унутилмайди. Албатта ажрингизни оласиз...
Жаннат гоҳида ботил мажлисда айтилган ҳақ гап остида ҳам бўлиши мумкин...
Бир кишини ортидан обрўсини ҳимоя қилишингиз эҳтимол буюклигингизга далолат қилиши мумкин...
Қалам, фикр, балоғат, фасоҳат, минбарлар, газета ва журналлар билсангиз кураш майдонидир....
Ёдингиздан чиқмасин, Аллоҳ унутмайди!
/channel/Abdulqodir_Polvonov
Юсуф алайҳис саломни қудуққа ташлаган қўллар куни келиб у зотга "садақа қил" деб чўзилган эди...
Аллоҳ Ўзи хисобни тўғирлайверади!
/channel/Abdulqodir_Polvonov
САДАҚА
Имом Бухорий роҳимаҳуллоҳ ривоят қилади. Набий саллоллоҳу алайҳи ва саллам дедилар:
“Бир киши садақа қилишга қасд қилиб пул олиб чиқди. Уни ўғрига берди. Кишилар “ўғрига садақа қилинди” деб гапира бошлашди. Ҳалиги киши Аллоҳга ҳамд айтиб яна садақа қилишга қасд қилди ва пул олиб чиқиб зинокор аёлнинг қўлига берди. Кишилар “зинокор аёлга садақа қилинди” деб яна гапира бошлашди. Ҳалиги киши яна Аллоҳга ҳамд айтди ва сақада қилишга қасд қилиб пул олиб чиқди ва уни бойга берди. Кишилар “бойга садақа қилинди” дея буни ҳам гапиришди. У киши: “Алоҳим! Сенга ўғри учун ҳам, зинокор аёл учун ҳам, бой киши учун ҳам ҳамд бўлсин!”, деди. Тушида унга шундай дейилди:
“Ўғрига берган садақанг эҳтимол уни иффатли бўлишига сабаб бўлар. Зинокор аёлга берган садақанг эҳтимол унинг иффатли бўлишига сабаб бўлар. Бойга берган садақангдан эҳтимол бой ибрат олиб ўзидаги Аллоҳ унга берган бойликдан инфоқ қилар!”.
Биринчи дарс:
Инсонлар доимо шу. Уларга раддия бермасанг қўрқоқ дейишади. Садақа қилсанг риёкор дейишади. Олимнинг ортидан юрсанг хушомадгўй дейишади. Гуноҳкор билан юрсанг унга шерик дейишади. Хотинингга яхшилик қилсанг хотинқули дейишади. Улар билан гуноҳда шерик бўлмасанг тепса-тебранмас дейишади. Пора олмасанг содда дейишади. Ҳижоб ўрасанг қолоқ дейишади. Юзингни ёпсанг террорчи ёки хуниклигини яшираяпти дейишади. Аёл киши эрига итоат қилса шахсияти заиф аёл экан дейишади.
Улар сизни ўзгартиришига йўл қўйманг. Уларни хурсанд қилиш учун асосларингиздан воз кечманг. Агар инсонларга эътибор берсангиз кўпи ҳатто Аллоҳдан ҳам рози эмас. Сиздан рози бўлармиди!
Иккинчи дарс:
Инсонларни Аллоҳ сари етакланг. Ёдингиздан чиқмасин, Аллоҳ таоло Пайғамбарларини осийларни тўғри йўлга солиш учун юборган. Агар инсонлар тоат аҳли бўлишса Пайғамбарларга муҳтож бўлишмас эди.
“Мен сизнинг олий Роббингизман” деган кимсага Аллоҳ Пайғамбар юбориб юмшоқ сўзлашни тавсия қилди.
“Санамлар Аллоҳнинг қизларидир” дейдиган кимсаларга Аллоҳ инсонлар ичида энг сараси бўлган зотни Пайғамбар қилиб юборди.
Инсонларнинг гуноҳига худди хўжайиндек қараманг. Уларга худди қулдек боқинг. Аллоҳ сизга берган ҳидоят неъматининг закоти адашганларни Аллоҳ томон етаклашингиздир. Ўзингиз ҳидоят топа олмас эдингиз. Аллоҳ таоло сизга буни неъмат ўлароқ тақдим қилди. Гуноҳкорларга худди бало аҳлига, ногиронларга қарагандек қаранг. Чунки беморлик залолатдан енгилроқдир. Бемор инсоннинг беморлиги гуноҳларига каффорат бўлади. Залолатнинг эса оқибати ёмон!
Учинчи дарс:
Тўғри, биз ишларга зоҳиран қарашга ва ҳукм қилишга буюрилганмиз. Аммо ташқи кўринишга алданиб ҳам қолмаслигимиз керак. Шунақа гуноҳкорлар борки, улар аксар дин савдогарларидан кўра кўпроқ Аллоҳ ва Расулини яхши кўришади. Аммо уларнинг шаҳвати ғолиб бўлган. Шайтонлари ҳукмрон бўлиб олган. Имом Бухорий роҳимаҳуллоҳ Умар ибн Хаттоб розияллоҳу анҳудан ривоят қилади:
“Набий саллоллоҳу алайҳи ва салламнинг даврларида бир киши бор эди. Унинг исми Абдуллоҳ, лақаби эса эшак эди. Жуда ҳам ҳазилкаш ва қувноқ эди. Набий саллоллоҳу алайҳи ва салламни кулдириб юрар эди. У ароқ ичар эди. Набий саллоллоҳу алайҳи ва саллам унга ароқ ичгани учун бир неча бор дарра урдилар. Яна бир сафар ичганида кишилардан бири уни лаънатлади:
“Эй Аллоҳим! Уни лаънатлагин. Намунча кўп ичмаса!”.
Набий саллоллоҳу алайҳи ва саллам унга дедилар:
-Уни лаънатламанглар! Аллоҳга қасамки, у Аллоҳ ва Расулини яхши кўради!
БИЛЛУРЛАРГА ҲУШЁР БЎЛ!
Набий саллоллоҳу алайҳи ва саллам аёллари билан ҳажга чиқдилар. Йўлнинг анча қисмини юргандан сўнг карвонни бошқаришни Анжага исмли ғуломларига топширдилар. Анжаша карвонни тез ҳайдай бошлади. Набий саллоллоҳу алайҳи ва саллам Анжашага:
- Эй Анжаша! Биллурларга ҳушёр бўл!-дедилар.
Ҳаёт сўқмоқларида биллурларга ҳушёр бўлинг. Бир мартагина овози кўтарилса кўтарилибди, сабр қилинг. Жуда ҳам узоқ вақт сизга сабр қилиб юмшоқ гапириб юрган-ку ахир.
Уй ишларида камчиликка йўл қўйса билмасликка олинг. Уй ишлари қийин. Оила ташвишлари эзиб юборади. Энг буюк муҳаббат қийинчилик пайтидагисидир.
Сиз истаган куйлакни дазмолламаган бўлса осмон узилиб ерга тушмабди. Агар нонуштани вақтида тайёрламаган бўлса қиёмат қоим бўлмабди. Ҳатто сизга ёқмайдиган иш қилса ҳам бақириш билан эмас, битта ўзгача қараш билан ҳал қилинг!
Фарзандларингиз олдида хотинингизни танқид қилманг. Сизга айтмаса ҳам бу унинг қалбини жароҳатлайди!
/channel/Abdulqodir_Polvonov
Шахсиятингизни икки нарса белгилаб беради:
1. Қўлингизда хеч нарса бўлмаган пайтдаги сабрингиз.
2. Қўлингизда ҳамма нарса бўлган пайтидаги ахлоқингиз.
/channel/Abdulqodir_Polvonov
"Ҳақиқатни гапиришдан олдин оёқ кийимингизни топиб тайёрлаб қўйинг!".
Африка мақоли
/channel/Abdulqodir_Polvonov
ДУНЁ ТИЛИ
Набий саллоллоҳу алайҳи ва саллам Мадинага келгач, кишилар у зотнинг ҳузурларига Зайд ибн Собит розияллоҳу анҳуни келтириб шундай дейишди:
- Эй Аллоҳнинг Расули! Бу йигитча Бани Нажжор қабиласидан. У ўндан ортиқ сурани ёд олган!
Набий саллоллоҳу алайҳи ва саллам ундан "Қоф" сурасини тиловат қилиб беришини сўрадилар. Зайд тиловат қилиб берди. Набий саллоллоҳу алайҳи ва саллам унинг тиловатидан ажабландилар ва дедилар:
- Эй Зайд! Мен учун яҳудийлар тилини ўрган. Мен мактубимни уларга ишонмайман!
Зайд ибн Собит розияллоҳу анҳу иброний тилини ўн беш кунда мукаммал ўрганиб келди!
Бу уммат дўстининг ҳам, душманининг ҳам тилини ўрганиши шарт. Бу сайёрада биз ёлғиз эмасмиз. Бошқалар билан алоқа қилиш учун албатта тил керак.
Энди ўз она тилимизга ўзга ажнабий тилларга оид сўзларни қўшиб ишлатишимизга келсак, бу жуда ҳам қабиҳ тобелик ва кўр-кўрона тақлиддир.
Тиллар ичида қирол араб тилидир. Бу тилнинг бошидаги тож Қуръони каримдир!
Агар француз тили мулозамат ва муомала тили бўлса, инглиз тили турли илмлар тилидир. Хитой тили тижорат тили бўлса араб тили буларнинг барининг тилидир!
/channel/Abdulqodir_Polvonov