Telegram-канал abbotrr - روايات صنعانية 📚😍: Неотсортированное

روايات صنعانية 📚😍

04 января 2021 19:55

#حزوية_صنعانيه 🇾🇪

يوم...حملت لاعندي حموده وهيه فارحه....فاطمه ...فاطمه ....
😃..قلت ماهو نجحتي ...قالت ماهو نجحت شلوش..😡 قلت ماكان تفرحي هكذا الا اذا نجحتي 🤣🤣..
قالت..من ناحية أن انا نجحت فأنا نجحت ..... نجحت في اكتشاف برنامج التجسس
. وحملته
علاسب نراقب ازواجنا😃
قلت شلوش بين أقل مدري ما اكتشفتي ...نراقبهم يشلوهم الجن .. .مانراقب بينهم ..قالت ياخضعا مابتبسريش قصص المستورات وكيف بيتزوجو ازواجهن ...ضروري المره توبه لزوجها وتحاصره وتعيشه في رعب وتخليه ماعد يصطا يفكرو حتى تفكير...في غيرها....... ...قلت يله اسكه راقبي زوجش ابسر عيشتغل البرنامج. ......
قالت ضروري اصور تلفونه وانا ماعد اروح الا يوم الجمعه نبداء بزوجش يافاطمه
...قلت لكن اخوش مابش معه شي هوذا مخلي لتلفون بدون رمز.....وبعض الاحيان مابش معه قيمة كرت عاد المجابره تشتي ضمار ..قالت شلوش ياخضعا بيفعل تمويه .يخليش تأمني ...والا..هو نزغه انا اعرفه .....😳.. المهم اقنعتني ..أن مابش رجال مسكين كلهم كلاب وعيونهم زايغه....قمت ..حملت البرنامج
قالت خلاص لوما يجي و صوري تلفونه
جلست مراعيه له
... على احر من الجمر ...وكل شويه واتصل هيا اين انت
قال كفلش الليله بتتصلي قلت اشتي اراقبك...🤣🤣🤣..قال ماهو ..قلت فاقده لك ..😉.المهم وصل ... وجلس كعادته يأنتر وانا جلست جنبه بين ادعي انو يفلت التلفون اصوره واسير عند حموده نراقبه ..قال مالش اليوم ...جالسه جنبي ساع العسكري ...قلت حرام اجلس ....قال مشيه عوايدش....مر الوقت وهو لا تحلحل من بقعته ....وحموده بتشغلني هيا مه صورتي ...قلت مع ... .ينفع اصوره هو..🤣🤣🤣🤣..قالت قدنا نومه ....قلت وانا والكل ...قالت ييه اجمعي حسش لاترقدي الا وقد صورتي التلفون ....
جلست اتقعم جنبه قال سيري ارقدي .......قلت مابش نووم
...قلت اسكه ابسر تلفونك..كم الساعه يامنعاه قد عيوني بيغمضين من نفسهن.....قال ابسري في تلفونش قلت مدري من عجن التوقيت قال الساعه واحده
قلت مابلا ابسر بعيني مالك بتفتجع 😏.......مكني وعادنا غر طرحت تلفونه قلت اصور ...قال مابتفعلي قلت هههه بين ابسر من أطول تلفوني والا تلفونك ...🤣......قال مالش أو حمى

قلت هههه مابلا صاحبتي قالت اصور لها تلفونك تشتري ساعه
قال ليش ساعه ماهو السر
قلت تشتي ساعه هيه حره..😳 ..قال قلي لها مسمه وخلاص... 😡.كنت اصور وانا مفتجعه ولا يطلع شي...قال صورتي وشله.. 😬😬😬😬.. ...قلت له مابتفكرش تشخ ....🤣..حموده عترقد..😩😩
ابسرني 😳 قال ماتشتي قليلي بتلفي ودوري من اول
قلت ولاشي حسيت أن مابش فايده
سرت تمددت وفعلت نفسي راقده قلت اخر محاوله وكنت اشخر قلت علاسب يحس بالامان وانا اصلا مابين اشخرش...ابسرته قام وطرح التلفون
هو غر دخل الحمام وانا نبعت ..ولاعاد دريت كيف افتح التلفون
شليت تلفونه ..وكنت اصور اصور 😨 ولابه شي....وقدنا متوتره و بين انتفظ من الفجيعه .....ماعد الا بزيت التلفون....وحملت ساع الريح لاعند حموده وقديه راقده نبعت لافوقها حموده ...حموده حموده ..😩😩.....😩..وهيه قامت ساع الجنيه كان تصيح بطول الصوت يماه يماه
كان اقلها التلفون ....كان تقل شله ولاتقتلنيش يماه يماه غوري عليا ..😩😩😩 جلست فوقها وسديت لقفها ولطمتها وقلت التلفون حق اخوش وهيه ذهنت
قالت هاه...وفرحت 😀.. فتحت الوتس قلت للمه ..قالت وكان منين الناس يصورو..... قلت وانا بين اصور التلفون من اول 🤣 عاديه غر بتوضع المربع
مابسرت الا زوجي وعمتي جو
وانا غمضت وجلست اخنق حموده وهم هزروني وانا جالسه مغمضه ...كان يصيح زوجي مابتفعلي وانا ياسعم نكزت
قلت هاه ما اداني لاهانا.....😳 🤣🤣🤣🤣🤣🤣🤣

#فاطمه_علي
ـــــــــــــــــــــــــــــــــــــ

╭─═┅┅┅═─╮
•🇾🇪 @Abbotrr 🇾🇪 •
╰─═┅┅┅═─╯