4278
Маҳрум бўлгач намозимдан- Бўлгунча марҳум. Марҳум бўлгач- Намозимдан бўлайин маҳрум.
Сумайя розияллоҳу анҳо!
🎤Ижрочи: Зуҳриддин Муҳаммадалиев
✍️Муаллиф: Абдураҳмон Мешаян
Айни кунларда Qudratulloh Ubaydulloh укамиз ўпкасидаги ўсимтадан даволаниш учун Ҳиндистонда бўлиб турибди. Алҳамдулиллаҳ, таҳлил натижаси ижобий чиққан, яъни ўсимта олиб ташланса, қайтиб чиқмаслигига кафолат беришяпти. Фақат маблағдан муаммо бор, жаррохлик амалиётинг нархи 11200$. Қудратуллоҳга етмаётган сумма эса 5000$.
Ўзи қарзи хасана сўраяпти, лекин улуғ кунларда эҳсон, закотларимиздан ёрдам қилсак ҳам айни жойига тушади иншааллоҳ.
Қуйида ёрдам бермоқчи бўлганлар учун ҳисоб рақамлар:
Uzcard
Garant bank
Qudrat Ubaydullaev
5614 6803 0311 6210
Visa
4195 2500 4702 4128
Алоқа учун:
Телеграм @qudratulloh93
Телефон +998 99 808 99 03
#Пайғамбарнинг_шоири
#Абдуллоҳ_ибн_Равоҳа_розияллоҳу_анҳу.
Султонларга атаб ёзмадингиз шеър,
Бир карра маддоҳлик қилганингиз йўқ.
Пайғамбарнинг ўзи хақингизда дер:
"Абдуллоҳнинг шеъри бамисоли ўқ-
Ёмғиридан кўра таъсирлироқдир,
(Аслида) Қурайшнинг мушрикларига"
Сиздан кўра қайси шоир бойроқдир?
Сўз найза суқдингиз ёв итларига.
Аллоҳ ўзи айтган шоир зотига,
Фақат гумроҳларнинг эргашмоғини.
Бу оят вайрона қилмасин нечун,
Сиз ва мендайларнинг кўнгил боғини.
Аммо Аллоҳ ўзи берди бизларга,
Қуръони Каримда таскин шу асно:
"Иймон келтирган ва эзгу иш қилган,
Хақни ёд этганлар бундан мустасно".
Бир кун чўрингизни калтакладингиз,
Ва шу дам кўнглингиз бироз тортиб ғаш.
Хато қилганингиз тез англадингиз,
Кўнглингизни ёқди тавбадек оташ.
Холатни айтдингиз Расулуллоҳга,
Набий сўрадилар: "У қандай ўзи?"
-"У иймон келтирган қодир Аллоҳга,
Намоз ўқир, рўза тутар, рост сўзи"
-"Эй Абдуллоҳ (унда) у мўминадир!
-У холда мен уни қиламан озод.
Ва оилам аро у топар қадр,
Унга уйланаман, қалби бўлсин шод.
Чўрини қилдингиз бир зумда озод,
Сизда эди ахир иймон саломат.
"Чўрига уйланган Абдуллоҳга боқ",
Сизни аҳли нодон қилди маломат.
Бу воқеадан сўнг Аллоҳ Таоло,
Нодонларнинг оғзин ёпди бирма-бир.
Тушдику Бақара сурасидаги,
Оят нозил бўлиб икюз йигирма бир:
Аллоҳ олиб турса тарафингизни,
Нақадар маззая, нақадар зўра:
"Хақ деди: "Мўмина чўри яхшидир,
Ўшал мушрика хур аёлдан кўра".
Сиз шаҳид бўлдингиз мутъа жангида,
Тилию қиличи бирдек ўткир зот.
Мен бир умр сизга тақлид қиламан,
Шояд солмам шунда жаҳаннамда дод".
Нақадар бахтлисиз гўзал Абдуллоҳ,
Буюк бахт аслида шаҳиддек ўлиш.
Сизга насиб бўлди хавас бу ох, ох,
Буюк пайғамбарнинг шоири бўлиш.
@A_meshayan
15:31-02.01.2024
Абдураҳмон Мешаян
#Осим_ибн_Собит_розияллоҳу_анҳу.
Осим ибн Собит Бадрда қатл-
Қилди Уқба ибн Абу Муайтни.
Уҳуд урушида Мусофиъ бирла,
Килобни ўлдирди топганча пайтни.
Осимни кўрганда душман юраги,
Қўрқувдан бўларди кўп така-пука.
Мусофиъ боғланмай туриб ияги,
Килоб ўлди унга у эди ука.
Мусофиъ ярадор ҳолда онаси-
Сулофа олдига бориб тўкди ёш.
Яролари эса бир-бир қонади,
Қўяркан волида тиззасига бош.
-"Ўғлим сени ким бу аҳволга солди?"
-Менга ўқин отган одам олди тан:
Қулоғимда унинг сўзлари қолди,
"Буни ол мен Ибн Абу Аҳлақман".
Она деди шунда бўлиб дарғазаб:
" -Агар имкон топсам ичаман ҳамр.
Ўғлим ўлдирганнинг бош суягида,
Мен шуни айладим қатъиян назр".
Гўёки ўзича қилиб марҳамат,
Мушрика аёлдек қилиб илтифот.
Осимнинг бошини узганга албат,
Эълон қилиб қўйди катта мукофот.
Уҳуд жанги битиб гўё барчаси,
Гўёки турганди ўз жой-жойида
Ҳузайл қабиласин икки уруғин,
Набийга йўллади сафар ойида.
Улар Мадинага келгач дедилар:
"Биз ҳам истайдирмиз билмоқ шариат.
Бир гуруҳ саҳоба биз билан бирга,
Кетиб илм берсин шу бизнинг ният".
Набий рози бўлиб бу илтимосга,
Билмасдан уларнинг ичи лиқ кирга.
Юборди бир гуруҳ саҳобаларин,
Илтимос айлаган зотлар-ла бирга.
Саҳоблар асли Мадина ёқдан,
Анчалар олислаб кетганларида.
Бўлди келганларда хоинлик маълум,
Ражийъ қудуғига етганларида.
Ўшанда Ҳузайл қабиласининг,
Хоин бўлган Бану Лиҳён уруғи.
Икки юз киши-ла қуршаб олдилар,
Беш-ўн саҳобани асли бор йўғи.
-"Биз сизларни асло ўлдирмоқчимас,
Сизга тегмасликка бергандирмиз аҳд"
Биз сизни Маккага топширамиз бас,
Эвазига бироз пул оламиз нақд".
Осим ибн Собит деди ўшанда,
"Мен асло мушриклар ёнига бормам"
Марсад розияллоҳу анҳу ҳам деди:
" Мушриклар ёнига қайтмагум мен ҳам".
Зайд ибн Дасинна, Ҳубайб ибн Адий,
Ва Абдуллоҳ ибн Ториқлар эса.
Таслим бўлмишлар ва олинмиш асир,
Ишониб душманлар ёлғон сўз деса.
Осим ибн Собит шаҳид этилди,
Сўнг шаҳид қилинди шериги Марсад.
Кейинчалик қолган уч саҳоба ҳам,
Шаҳид қилиндилар ўтиб бир фурсат.
Қасос оловида ёнган Сулофа,
Ҳузайлликларга элчи билан пул.
Жўнатди Осимнинг бош суягида
Энди ичажакман ҳамр деб буткул.
Қотиллар Осимнинг бошин олмоқ-чун,
Борсалар азиз зот ётарди ўлиб.
Ва лекин қарашса бир гала ари
Осим узра учар соябон бўлиб.
Қотиллар дедилар: "Бўлди бас етар,
Келинг яна найранг йўлини тутсак.
Арилар албатта тарқалиб кетар,
Фақат сабр қилиб кечгача кутсак".
Аллоҳнинг қадари шундай бўлади,
Тақдир йўлларини у берган чизиб.
Сал ўтиб шиддатли бир ёмғир ёғиб,
Сел Осим жасадин кетди оқизиб.
Кеч тушгач хоинлар Осимнинг бошин,
Олмоқ учун яна келдилар қайтиб.
Уни тополмагач ортга қайтдилар,
Бир бирига қараб сўкишлар айтиб.
Осим ибн Собит тирик чоғида,
Назр айлаганди йўли тўғри йўл:
"Мен бирор мушрикка қўл теккизмайман,
Менга ҳам мушриклар теккизмаслар қўл".
Қатъий қилинган аҳд, қилинган назр,
Ўзини кўрдикки тўлиқ оқлади.
Осим тирик чоғда, ўлганида ҳам
Аллоҳ мушриклардан уни сақлади.
Бундай ходисани кўрган қай ғаюр,
Бундай ажиб ҳолни қайси мард билган?
Осимдан бошқа ким "Ҳамийюд даюр",
Арилар тўдаси ҳимоя қилган?
Ё Аллоҳ мендан юз бургил демасман,
Душман тўдасини мендан қил нари.
Аммо нетайки мен Осим эмасман,
Соябон бўлмайди менга тўп ари.
Мен фақат ўзингдан умидвордирман,
Дуолар қиламан кўзимда ёшим:
Савоблар селида оқиб кетай ман,
Жоним уз саждадан кўтармай бошим".
@A_meshayan
23:54-02.01.2024
Абдураҳмон Мешаян
РЎЗАДОРЛАРГА ТАКЛИФ.
Гуноҳкорлик либосин ечиб,
Савоб ишда қилай илғорлик.
Кетолмайман ажрдан кечиб,
Кел, қилайлик бирга ифторлик...
Бажарилиб Тангри фармони,
Бўй кўрсатсин савоб хирмони.
Тенг бўлишиб битта хурмони,
Кел, қилайлик бирга ифторлик.
Дастурхонга боримни сочай,
Зиқналикдек атвордан қочай.
Санинг бирла оғзимни очай,
Кел, қилайлик бирга ифторлик.
Кўнглим боғдир, саҳромас тақир.
Хамр тутиб қилмайман таҳқир.
Икки кўзим интизор тақсир,
Кел, қилайлик бирга ифторлик.
Қилар бўлсак Хақ-чун эътикоф,
Малаклари айлар эътироф.
То унгача эй иймони соф,
Кел, қилайлик бирга ифторлик.
Орамизда элчи эмас кек,
Қалб боғингга ишқ уруғин эк.
Сахарликни сенсиз қилдим лек,
Кел, қилайлик бирга ифторлик...
@A_meshayan
10:48-27.05.2017
Ҳижрий 1438-йил Рамазоннинг илк куни.
Абдураҳмон Мешаян
Абдуллоҳ ибн Амр розияллоҳу анҳу
Абдуллоҳ сўзлади ўғли Жобирга,
Кўнглига бермасдан асло азият:
"Уҳуд жанги куни дўстларга бирга,
Ўлмоғим мумкиндир сенга васият:
Бўйнимда қарзим бор, қарзларим тўла,
Сингилларингнинг қил, таъминотини"
Эртаси Уҳудда шаҳид зот бўла,
Ўлди айтсам, жангнинг тафсилотини.
Жобирнинг аммаси акаси ўлгач,
Ўз жигари учун кўзин ёшлади.
Расулуллоҳ эса бу ҳолни кўргач,
Унга қараб туриб сўзлай бошлади:
"Сен Абдуллоҳ учун йиғламасанг ҳам,
Ёки йиғласанг ҳам, унга кифоя,
Марҳаматли Аллоҳ буйруқ берган дам,
Фаришталар унга солгани соя"
Абдуллоҳнинг ёри туяга ортди,
Эрининг жасадин, қалби тўла ғам.
Аёлнинг юраги анча ғаш тортди,
Ортганди туяга у акасин ҳам...
Аёл йўл оларкан Мадина томон,
Жарчилар солдилар ҳар тарафга жар:
Шаҳидларни кўминг берган жойда жон,
Набийнинг буйруғин эй уммат бажар.
Бир кун Абдуллоҳнинг ўғли Жобирнинг-
Кўнглин кўтармоқни Набий кўзлади.
Соҳибини кўрин гўзал тақдирнинг,
Гўзал ҳушхабардан Расул сўзлади:
"У Аллоҳ ким билан сўзлашган бўлса,
Ҳижобнинг ортидан шу вақтга қадар-
Сўзлашгандир сенинг отанг-ла эса,
Пардасиз гаплашди" не бахтли падар?
У Зот унга "Сўра берурман деди,
Абдуллоҳ "Дунёга яна бир қайтиб-
Сен учун яна бир қатл қилинсам,
Жанг қилар чоғ" деди тилагин айтиб.
"Менинг улар унга қайтарилмаслар,
Деган қавлим ўтган" деганда Аллоҳ.
Ортда қолганларга менинг ҳолимнинг,
Ҳабарин бер деди шунда Абдуллоҳ.
Ўшанда бўлгандир аслида шаксиз,
Буни билар асли ҳар аҳли фозил.
"Оли Имрондаги юз олтмиш тўққиз,
Юз етмиш биринчи оятлар нозил".
"Аллоҳнинг йўлида қатл қилинган,
Зотларни сиз асло ўликлар деманг"
Ох бу ўн тўрт аср олдин билинган,
Шаҳидларни ўйлаб дўстлар ғам еманг.
Эй Абдуллоҳ ибн Амрдек инсон,
Мен сиз хақингизда шеър битдим шу куз.
Сиз бахтли саҳоба шубҳа йўқ бир он,
Сиз бирла сўзлашган Аллоҳ юзма-юз.
@A_meshayan
22:21-05.11.2022
Абдурроҳман Мешаян
Бир киши билан гаплашгандим. 2001-йиллар эди. Сурхондарёда. Термизда. У шундай деганди:
" Бир жойда ишлайман. Қаердалгини айтмайман. Ўша ишхонада одамларни қийноққа солинадиган камера бор. Эшиги темирдан. Деразаси ўрнида панжарали туйнук бор. Чироғиям хира. Тез-тез ўша хонада бетон пол ва деворларга қийноққа солинганларнинг сачраган қонини юваман. Қон караска эмас-ку, лекин ювилиши қийин. Девор ва пол қанчалик қонга беланганини кўриб бу хонада кимдир қанчалик қийноққа солинганини таҳмин қиламан. Гоҳо девор ва пол роса қонга беланган бўлади, шуни кўриб қийноққа солинган кимса ўлган бўлса керак деб ўйлайман. Яқинда ишдан бўшамоқчиман. Ёмон тушлар кўряпман. Тушимга ўша қонли хона киряпти, қўрқинчли овозлар эшитяпман".
Шу гапларга ҳам 23 йил бўлибди.
Вақтнинг тез ўтишини қаранг.
Умр ҳам бир ҳовуч нарса, тезда тугайди.
Қийноқ камерасида ва қийноқдан сўнг жони узилганлар ҳозир жаннатда сайр қилиб юргандир.
Деворларга одам қони сачраган камера ҳеч эсимдан чиқмайди.
#Азвожи #мутоҳҳарот
#ХАДИЖА #БИНТИ #ХУВАЙЛИД #РОЗИЯЛЛОҲУ #АНҲУ
Абу Ҳурайрадан (розияллоҳу анҳу) ривоят қилинади: «Жаброил (алайҳиссалом) Пайғамбар (алайҳиссалом) ҳузурларига келиб: “Эй Аллоҳнинг Расули! Мана, Хадича ҳузурингизга келди. Унинг қўлида идиш бор. Унда хўрак ёки таом ёки ичимлик бор. Қачон у ҳузурингизга етиб келганида унга Рабби азза ва жалладан ва мендан салом айтинг ва унга жаннатда луълуъ (дуру ёқутлар ила безатилган) ато этилган: шовқин сурони ҳам, чарчоғи ҳам йўқ. Шунинг башоратини беринг”, деди» (Имом Бухорий, Имом Муслим ривояти)
#ҲАДИЖА #РОЗИЯЛЛОҲУ #АНҲО
#ОНАМСИЗ.
Жаҳолат зулматин дин қилгач ойдин,
Хақ йўлида сарфлаб олмос-у олтин.
Хатто Абу Бакр Сиддиқдан олдин-
Иймон эшигини қоққан онамсиз.
Жаҳолат етмаган чоғда охира,
Шунда хам дердилар сизни "Тоҳира".
Билар Андалусдан тортиб Қоҳира,
Набий кўзларига боққан онамсиз.
Муборак оғзидан Расулуллоҳнинг-
Илк тинглари бўлиб Каломуллоҳнинг.
Ризосини топиб қодир Аллоҳнинг,
Набийим кўнглига ёққан онамсиз.
Кўрсангизда Умму Жамилдан жабр,
Расулимиз ўйлаб қилдингиз сабр.
Ниҳол чоғларидан бу хам бир тақдир,
Хазрати Алини боққан онамсиз.
Тамоғин Зам-зам-ла хушнуд хўллаган,
Йўқ асло Набийни сиздек қўллаган.
Жаброил орқали Аллоҳ йўллаган-
Салом деб бахт ёши оққан онамсиз.
Осиё аёллар ичра муҳтарам,
Марям ҳам аслида улуғ мукаррам.
Аммо сиз шуларнинг иккисидан хам
Бахт қуёши порлоқ балққан онамсиз.
Ёлғизлик истаган севар ёрига.
Таомлар элтганча яраб корига,
Йўл олганча ўшал Хиро ғорига,
Итоат машъалин ёққан онамсиз.
Қосим ва Зайнабни бергач Буюк Зот.
Руқайя ва Умму Кулсум бирла шод-
Айлади сизларни, эй қалби обод,
Халоллик расулдан юққан онамсиз.
«Олти олмос»лисига бўлмаскан қийин,
Сиздайин "заргар"га тасанно дейин.
Асли Фотимаи Заҳродан кейин,
Абдуллоҳингизни туққан онамсиз.
Охир кетди ажал сизни хам олиб,
Аввал сиз кетдингиз сўнг Абу Толиб...
Лек бўлмади асло мушриклар ғолиб,
Ваҳийнинг ростлигин уққан онамсиз.
,
Ўн тўрт аср сўнг хам чулғайди хайрат,
Бу не ишқ, не севги бу не мухаббат?
Қалбларда Хадижа хамда Муҳаммад(Алайҳиссалом)
Ишқ ниҳолин қалбга суққан онамсиз.
@A_meshayan
14:04-12.02.2019
Абдураҳмон Мешаян
#ХАДИЖА...
Илк ёридир Пайғамбарлар сарбонининг Хадижа,
Илк томчиси улкан уммат, уммонининг Хадижа.
Бир минг тўрт юз йилдан зиёд, бош Қаҳрамонидир у,
Ул «Муҳаммад ва Хадижа» достонининг Хадижа.
Барпо айлаб Набий бирла, илк таҳорат, илк намоз,
Илк юлдузи бўлди Ислом осмонининг Хадижа.
Жаброилнинг еткурганин, хабар қилмиш Мухаммад,
Аллоҳ сенга салом айтмиш, қил дуоинг Хадижа.
Бири кумуш, бири олтин, Осиё бирла Марям,
Лек чин олмоси расуллар султонининг Хадижа.
Ярми бўлмиш Расулуллоҳ қалқонин, Абу Толиб,
Қолган ярми бўлмиш набий қалқонининг Хадижа.
Соҳибаси Қосим, Зайнаб, Руқайя, Умму Кулсум-
Фотима ва Абдуллоҳдек бахт конининг Хадижа.
Тақмас Умму Жамил янглиғ дўзахийлар тожини,
Маликаси бўлгай жаннат бўстонининг Хадижа.
Умрин китобин ўқисам кўзларим тўкур ёмғир,
Эгаси бўлмиш бақувват, иймонининг Хадижа.
Хожунда ухлаюр хозир, умр бўйи Хақ ишқи-
Махбуси бўлмишдир юрак зиндонининг Хадижа.
12:47-12.02.2017.
Абдураҳмон Мешаян
#Ҳадижа_ва_Умму_Жамил
(Бир эркакнинг иқрори)
Хасадгўй кўнгилга рахмат ёғилмас,
Менга Нонекбин деб, қўйманг лақаблар.
Муҳаммаддек ёрлар қайтиб туғилмас,
Хар кун туғилмоқда Абу Лаҳаблар.
Бу кўҳна гардунда турфа аёл бор,
Билдимки жуфт бўлиб ўтказиб йиллар.
Кўҳинурдек ноёб Хадижадек ёр,
Қумдан бисёр экан Умму Жамиллар...
@A_meshayan
11:09-12.02.2017
Абдураҳмон Мешаян
ҚЎШИЛМИШАМ РЎЗАДОРЛАР КАРВОНИГА.
Одамзот жаннатни истар, аммо қадам-
Қўймоқни истамас ўлим нарвонига.
Минг шукрки Арш Султони бериб ёрдам,
Қўшилмишам рўзадорлар карвонига.
Бу карвоннинг йўловчиси кўп минг нафар,
Йўлга чиқмиш Шаъбон тугаган илк саҳар.
Шаввол қадар давом этар энди сафар,
Қўшилмишам рўзадорлар карвонига.
Ифтор чоғи йиғлаб қилдим дуом баён,
Юрагимда Ишқ борлиги Хаққа аён.
Шояд менга эшик очар дея Райён,
Қўшилмишам рўзадорлар карвонига.
Қадам қўюр мўмин жаннат воҳасига,
Савоб қилмоқ айланса гар соҳасига,
Суянса гар тоғасимас, "Тоҳа"сига,
Қўшилмишам рўзадорлар карвонига.
Зам-зам янглиғ мўмин кўнгли бунча зилол,
Рўзадордир мисли Салмон, Билол.
Кулиб чиққач осмон саҳнасинга хилол,
Қўшилмишам рўзадорлар карвонига.
Мендан сўранг, хасрат надир, армон надир,
Айламади насиб на "Ухуд", на "Бадр".
Лек насиб қилсин деб ул "Лайлат-ул Қадр",
Қўшилмишам рўзадорлар карвонига.
Ажр тўплаб лаъин тинчин бузаман деб,
Гуноҳ номли аждар бўйнин узаман деб,
Ўттиз кун бахт уммонида сузаман деб,
Қўшилмишам рўзадорлар карвонига.
Бойман дея саҳарликда суюндим лек,
Ифтор чоғи диндошлар деб куюндим тек.
Аллоҳ қўйсин мўмин элда урушга чек,
Қўшилмишам рўзадорлар карвонига.
Қори келсин, тинглаб "Ёсин"нинг товушин,
Роҳатланай, сўнг майли қўллар совушсин,
Киприкларим майли мангуга қовушсин,
Фақат...қадам қўяй ўлим нарвонига,
Қўшилган чоғ рўзадорлар карвонига...
17:50-05.06.2018
Рамазон ойининг мағфират дахаси 20-куни.
#УСМОН_РОЗИЯЛЛОҲУ_АНҲУ_ВА_ЗАВЖАЛАРИ
Қалбида тошганда илҳом булоғи,
Шоир хақиқатни оққа кўчирди.
Сиз билан сиз бўлгач суянган тоғи,
Руқайя бахтиёр ҳаёт кечирди.
Пайғамбарнинг қизи топгунча вафот,
Унга юзландингиз муҳаббат билан.
Сўнг никоҳ риштасин боғладингиз шод,
Умму Кулсум бинти Муҳаммад билан.
Бошқа ёрингиз ҳам сизни улардан,
Оз севмади тарих гувоҳдир албат.
Безиб Муовия совчиларидан,
Отика подшоҳнинг ишқин қилди рад.
Ғофиқий ибн Ҳарб ҳамла қилган дам,
Темир қилич ила сизни урди воҳ.
Сўнгра ўқиётган мусҳафингизни,
Тепиб юборди у муттаҳам гумроҳ.
Мусҳафга тўкилди шунда қонингиз,
Тарихчилар буни битди қалам-ла.
Энди олмоқ учун сизнинг жонингиз,
Савдон ибн Ҳумрон қилганда ҳамла-
Қизингиз йўлини тўсди у итнинг,
Ва хотинингиз ҳам жон жаҳди ила.
Шунда унинг қўли кесилиб кетди,
Панжасидан жудо бўлди Ноила.
Душманлар қутириб сиз ўлгач энди,
Ғазабга чунонам тўлганларида.
Яна йўлларини ёрингиз тўсди,
Бошингиз кесмоқчи бўлганларида.
Ҳайратда қоляпман Руқайя асли,
Сизнинг қадрингизни албатта сезган.
Пок Умму Кулсум ҳам пайғамбар насли,
Сизни жонидан ҳам ортиқроқ севган.
Отика сиз ўткач қурмади турмуш,
Совчи қўйганда ҳам улуғ ҳалифа.
Ноила тик боқди душманингизга,
Қизларимиз бўлсин шундай афифа.
Ҳаётингиз ўқиб шунди уқдим мен,
Оғир мусибатмас кундошлик демак.
Агар аёлларинг севдиролсанг сен,
Ҳам яна бўлолсанг хақиқий эркак.
@A_meshayan
17:27-09.08.2023
Абдураҳмон Мешаян
#Буюк #Саҳобалар #ҳаётидан
#Муовия #ибн #Абу #Суфён #розияллоҳу #анҳу
О, азиз сахоба, о Муовия,
Ёдимга тушдингиз бу қаро тунда.
Иймон келтирдингиз Аллоҳ бир дея,
Йигирма уч ёшда эдингиз унда.
Буюк Расулуллоҳ Алайҳиссалом,
Сизга сўрадилар гўзал ҳидоят.
Вахий бўлаверди энг гўзал Калом,
Вахий бўлаверди сураю-оят.
Сиз ваҳий котиби бўлдингиз эй зот,
Ўшал Мадинаи Мунавварада.
Ҳунайн жангида этиб иштирок,
Расул-чун қадрингиз ошди янада...
...Ўн икки минг аскар сиз-ла қилди жанг,
Қалб кўзи очиқлар хақни кўради.
Юзидан қон қочиб, оқарганча ранг,
Арман халқи сиздан бир сулҳ сўради.
Сиз сабаб тузилди тарихдир гувоҳ,
Ислом умматин илк денгиз кучлари.
Қубрусда илк масжид қурдириб э воҳ,
Сиздирсиз севинчдан қиз(и)ган ичлари.
Тўрт рошид халифа даврида асли,
О сиз йигирма йил бўлдингиз амир.
Сизга хавас қилар мўминлар насли,
Сизга ҳавас қилмай бўлурми ахир?
Аллоҳ истамади мушрик холатда-
Хор ва тубан бўлиб ўлишингизни.
Набийнинг сўраши бахтда албатта,
Ҳидоят топган зот бўлишингизни.
Сиз сабаб ёйилди пок дини Ислом,
Атлантик океан қирғоғи қадар.
Жаннатий кимсасиз, қалбда эҳтиром,
Ажрингиз оласиз келганда маҳшар.
Бутун дунёдаги етти миллиардни,
Бир жойга йиғганча қилолсакда жам.
Арзимайди сочу соқолингизнинг,
Оқарган бир тола,бир тукига ҳам...
Лек шу етти миллиард ичида ҳам бор,
Ўзин саҳобадан зўр билгувчилар.
Сиз қилган савобнинг мисқолин қилмай,
Танқидни ҳаммадан зўр қилувчилар...
Мен сизни эсласам ғийбатчилардан,
Ҳеч хафа бўлмайман энг оғир дамлар.
Мен гуноҳқор қулни қўярмиди тинч,
Саҳобани ғийбат қилган одамлар...
@A_meshayan
Абдурроҳман Мешаян
#ЎЗИНГНИ_БИЛ
Эҳтирос аталмиш гулҳанда ёнгач,
Виждони уйғонгач, айбидан тонгач.
Тунги капалакка насиҳат қилмиш,
Зинокор зот нафси тамоман қонгач.
“Санинг бу қилмишинг инсофдан эмас,
Нечун эгри кўнглинг, тўғри йўл демас?
Дунё ғамини еб чарчамадингми,
Нечун сен охират ғамин хеч емас?
Шунда жавоб қилмиш тунги капалак,
Демак сен оппоқсан, мен қароюрак?
Ахир ўзингмасми зинодан аввал,
Шом бўлмай мен билан еган зот емак?
Маним ишим фаҳшдир, буни биляпсан,
Менга жирканчсан деб, гуноҳ иляпсан.
Мен эгри, сен эса тўғри экансан,
Ўзинг қучоғимда нима қиляпсан?
Тилинг зикрдаю, қўл тасбеҳдамас,
Гап танбеҳчидадир, гап танбеҳдамас!
Маним ишим харом, эй "халол одам",
Нечун ўзинг хозир таровеҳдамас?
@A_meshayan
05.06.2017-17:27
Абдураҳмон Мешаян
#Сени_асролмадим_гулим.
Салоҳиддин Айюбийдан-
Эрта бева қолган тулим-
Фаластиним қотди дийдам,
Сени асролмадим гулим.
Кўксингга нишлар санчдилар,
Совурилди кўкка кулим.
Товонлар билан янчдилар,
Сени асролмадим гулим.
Сайёдлар отгач бўғзидан,
Қонлар отилган булбулим.
Дер алам тутиб бўғзидан:
Сени асролмадим гулим.
Кеча ўлди қўлларимда,
Мовийкўз сочи сумбулим.
Интизорсан йўлларимда,
Сени асролмадим гулим.
Масаллиққа тўлмиш қозон,
Таом тузин кўрар тилим.
Сенчи сув ичолмай ҳазон,
Сени асролмадим гулим.
Бўлганимга уммат кўпик,
Қақшар юрак, оғрир дилим.
Ўзим-тирик, журъат-ўлик,
Сени асролмадим гулим.
Жаббор Фурқонда деса ҳам:
"Фақат мендан қўрққин қулим."
Итлардан қўрқиб чекдим ғам,
Сени асролмадим гулим.
Ўн миллион ари ширанг ер,
Азобда топяпсан ўлим.
Икки миллиард боғбонинг дер:
"Сени асролмадим гулим!"
@A_meshayan
21:47-19.10.2023
Абдураҳмон Мешаян
Рўзадорлик эсга тушганда
Гаштакка чорлашди хизматга бордим,
Самовар қайнатдим, сўнг ўтин ёрдим.
Дедилар: Толиқдинг қариндош сен хам,
Дастурхон бошида бироз олгин дам...
Келтиришди шўрва, кетидан норин,
Камига шарбатдан қаппайди қорин.
Лек келтиришган чоғ лаган тўла ош,
Рўзадорман дея ошдан тортдим бош...
@A_meshayan
2017-йил
Абдураҳмон Мешаян
#ЗАМИННИНГ_ИФТОРЛИГИ
Рамазонда ўйлаб Ғазоликларни,
Юрак ўйнаб қолиб мазам қочади.
Ер ҳам рўзадордир ғазоликни еб,
Ҳар кун оғзин "ёпиб", оғзин" очади".
Саҳарликка қилар мудом тановул,
Фаластинликларни афсус она ер.
Ифторлик ҳам қилар уларни нуқул,
Ё Раб диндошларга Ўзинг ёрдам бер!
@A_meshayan
20:17-22.03.2024
Абдураҳмон Мешаян
#Саҳобалар #ҳаётидан #шеър
#СУМАЙЯ #РОЗИЯЛЛОҲУ #АНҲО
Кўздан уйқум қочиб қоқ ярим тунда,
Саодат асрига элтади хаёл.
Кўз олдимга келар дафъатан бунда,
Икки туя аро боғланган аёл!
Бир туяга эди шўрлик аёлнинг,
Бир оёғи бирла бир қўли боғлиқ.
Бошқа бир туяга иккинчи қўли-
Оёғи боғлиқдир... оғриқ нечоғлиқ...
Туялар хайдалди бир бирдан узоқ,
Оёқ-қўллар э вох мажбур керилди.
Сўнгра вақтинчалик тўхтади қийноқ,
Аёлга шу қадар азоб берилди.
Абу Жаҳл топиб бу ҳолдан хузур,
Аёлнинг қошида жилмаярди шод.
Оғриқлар дастидан бўлсада мағрур,
Сумайя чидолмай кўтарди фарёд.
Туялар жойига қайтарилдилар,
Аёлнинг бўшашди оёғи, қўли.
Сўзлашга киришди Абу Жаҳлнинг,
Ўзиданда жирканч кирланган тили:
Афсус у забондан сочилмади бол:
-Хўш қалай Сумайя қилдингми мазза?
Азоб уқубатинг тугайди дарҳол,
Муҳаммадни инкор қилганинг лаҳза!
-Ўлсам хам мен уни қилмайман инкор!
Шу бўлди Сумайя айлаган жавоб.
Абу Жаҳл қилгач ишора бир бор,
Туякашлар яна бердилар азоб...
Ёрдам беролмади на эри Ёсир,
Ёвдан қутқармади на ўғли Аммор.
Бу вақтда улар хам ғам чекиб ахир,
Сумайя ёнида чекарди озор.
Азоб чекар эди бутун оила,
Дашт ичра, дашт номи аталар Рамда.
Бир кун қалбларида чексиз дард ила,
Ёнларидан ўтди Расулим ғамда.
-Сабр қилинглар, эй Ёсир оиласи!
-Сабр қилинглар, эй Ёсир оиласи!
Дедилар: Сизларга мукофот жаннат,
-Сабр қилинглар, эй Ёсир оиласи!
Шу он қум устида судралаётган,
Сумайянинг ёри Ёсир чекиб ох-
Деди: Замон доим зўравонники-
Бўлаверадими ё Расулуллоҳ?
Бу савол жавобсиз қолдирилди лек,
Аллоҳга ёлбориб аста ушбу дам.
-Ёсир оиласидан раҳматинг дариғ-
Тутма Аллоҳ, деди Расули Акрам.
Ёсир оиласининг энг сўнгги куни...
Тўрт жон қийналарди жуда хам ёмон.
Оғир хатто қилмоқ тасаввур буни,
Кетарди дод фарёд саси хар томон.
Ўғиллар Аммор ва Абдуллоҳ, хамда-
Эри Ёсир шерик дард борасида.
Боғланиб Сумайя қолганди ғамда,
Иккита туянинг нақд орасида.
Шароб тўла коса бўшатгач Амр,
Деди: сен бу динга қўйдинг муҳаббат.
Чунки ошиқ қилган Сумайя ахир,
Сени дин келтирган ўшал Муҳаммад!
Сумайя нетарди ожиза эди,
Қони аввалгидек гупуролмасди.
Фақатгина: Олчоқ, уятсиз! деди,
Унинг юзларига тупуролмасди!
Абу Жаҳл бирдан бўлиб дарғазаб,
Қўлдаги косасин отганча ерга.
Хизматкорларига айтди атайлаб:
Туяларни саванг ботганча терга!
Туялар шундайин саваландики,
Улар жонхолатда югурган маҳал.
Сумайянинг тани бўлинди икки,
Унга жаннат эди жуда хам маҳтал...
Шунда хам тинчимай ит Абу Жаҳл,
Энг маҳрам жойига санчиди найза.
Жон берди лек бўлди жаннатга доҳил,
Гўё еру осмон тутдилар аза.
Сумайядан кейин маҳрами Ёсир,
Хақнинг рахматига аста қовушди.
Шаҳидлик шаробин ичганча охир,
Иссиқ қони оқиб охир совушди.
Бизчи нима қилдик динимиз учун,
Гарчи ҳеч ким йўқдир савалагани.
Қўрқиб зиндон ёки сургундан нечун,
Умр тикдик жонни авайлагани?
Ожиз уммат бўлиб қолганимиздан,
Кофирга мўминнинг қони халолдир.
Илм олмоқликдан толганмиздан,
Нусратга эришмоқ амримаҳолдир.
Эркакларда йўқдир номус, хамият,
Оқсоч бўл деб қилар аёлни даъват.
Бўлдик тарозуси бузуқ жамият,
Биз хотин зотини хўрладик фақат.
Биз хотин зотига қўшиқ дедирдик,
Уялмай хорижга юбордик сўнгра.
Аёлга хаттоки нажас едирдик,
Сўнг дедик: Иста ўл, хохласанг хўнгра.
Биз Ёсир бўлолсак хотинлар албат,
Сумайя бўлишга шайланажакдир.
Абу Лаҳаб бўлсак улар хам фақат,
Умму Жамилларга айланажакдир.
Келинг, айламайлик аёлни тахқир,
Айтиб ғарбликларнинг фахш латифасин.
Эркак эмас аёл безаган ахир,
Шаҳидлик дафтарин илк саҳифасин!
@A_meshayan
02:54-13.10.2020
Абдураҳмон Мешаян
#Ҳассон_ибн_Собит_розияллоҳу_анҳу...
#Саҳоба_шоир
Мушриклар кўксига ўқдан ҳам кўра,
Оғриқлироқ ботган сен айтган шеърлар.
Замондош бўлсайдик бўлардик жўра,
Сени арабнинг зўр шоири дерлар.
Дин душмани ўқиб ёзган шеърларим,
Заҳарханда кулиб қотирсин энса.
Менга нима аҳир мен кўнгли ярим,
Роббим: "Қулим сендан розиман" деса...
Сарой шоирлари урчиган бизда,
Кўзлаган томони унвон тарафи.
Не бахтдирки насиб айламиш сизга,
Пайғамбар шоири бўлмоқ шарафи.
Мен оддий армани Аллоҳга банда,
Ўзгадир ўзбекнинг Ҳассон Собити.
Шараф талашмайман токи жон танда,
Бўлсам бас Хақсевар ислом зобити...
18:31-10.04.2023
Абдураҳмон Мешаян
Абдуллоҳ ибн Умму Мактум розияллоҳу анҳу
Айланиб кичикдан катта галага,
Қалбда на дўстлик на муҳаббат билан.
Киришдилар бир кун мужодалага,
Қурайш "катталари" Муҳаммад билан.
Пайғамбар уларни қиларди даъват,
Шояд бу нусҳалар кўнгилин деб чаяр.
Ахир улар эди соҳиби давлат,
Иймонга кирсалар Ислом кучаяр!
Ўтирарди Утба ибн Робия,
Амр ибн Ҳишом-Шайба ёнида.
Даврада бор Валид ибн Муғийра,
Умайя ҳам оқур зино қонида.
"Менга ҳам Аллоҳнинг билдирганларин,
Ўргатингиз дея қилинди нидо"
Кўр Абдуллоҳ ибн Умму Мактумдан,
Чиққан нидо эди асли бу садо.
Пайғамбар қошларин чимириб қўйиб,
Юзларини ундан бурдилар аммо.
Абдуллоҳ кўрмади асло бу ҳолни,
Чунки сўқир эди, кўзлари аъмо.
Лек Аллоҳ кўрарди бу ҳодисотни,
Ўзига минг бора айтайлик тасбеҳ.
Абаса сураси ўн олти оят,
Пайғамбарга берди Хақ ўзи танбеҳ:
"У олдига кўзи ожиз келган дам,
Қошларин чимирди ва ўгирди юз.
Эй пайғамбар қайдан биладирсиз сиз,
Эҳтимол гуноҳдан поклана олар,
Ё у сиздан панду насиҳат олар?
Ва бу панд унга кўп фойдалар берар?
Энди ўзин иймондан беҳожат тутган-
Зотга юзландингиз ҳолбуки унинг-
Покланмаслигидан сизга зарар йўқ"
Қуръондан мисолим тугади менинг....
О Абдуллоҳ ибн Умму Мактумни,
Азиз қилиб қўйди Аллоҳнинг ўзи.
Муаззин ҳам бўлди, Қуръон ёдлади,
Жангларда қатнашди гарчи кўр кўзи.
Бир куни сўзлади ғазот олдидан:
Гарчи мен эмасман баҳодир ва зўр.
Менга байроқ беринг, икки саф аро
Жанг қизиб кетсада қочмам кўзим кўр"
Хижратдан ўн тўрт йил ўтгандан кейин,
Даркор бўлди жангда мардона туриш.
Қарши бориб Эрон подшоҳлигига,
Форс империясига бошланди юриш.
Супуриб ташланди энг кучли давлат-
Тарихдан ҳаммангиз биларсиз чоғи?
Бошланди сўнг ўша гўзал бир ҳолат,
Форсда хирпиради Ислом байроғи.
Кимлардир отлиқдир, кимдир пиёда.
Кимдир у кун эди зотдор туяда.
Шаҳидлар берилди ҳаддан зиёда,
Абдуллоҳ ҳам ўлди Қодисияда.
Инсоф билан айтинг ёдламай Қуръон,
Кўзи кўрадиган биздайлар кўрми?
Ё сўқир бўлсада жангда бериб жон,
Жаннатни нақд қилган Абдуллоҳ зўрми?
@A_meshayan
19:31-11.01.2023
Абдураҳмон Мешаян
СУҲАЙБ РУМИЙ РОЗИЯЛЛОҲУ АНҲУ
ЭНГ ФОЙДАЛИ САВДО.
Отангиз Синанни Форс подишоҳи-
Кисро-Убуллага қилганди волий.
Аллоҳ бандасини синайди гоҳи,
Баъзида қилади вақтинча олий.
Фурот дарёсининг қирғоғидаги,
Мусил яқинида жойлашган қаср.
Отангиз волийлик қилган чоғдаги,
Маконингиз эди ҳавасга арзир.
Бирдан шаҳрингизни римликлар босиб,
Гўзал диёрингиз талаб қолдилар.
Ўлжа илинжида ақлдан озиб,
Юртни талаб сизни асир олдилар.
Сотила-сотила қулдорлар аро,
Оёғингиз қўйди Маккага одим.
Яна қул бўлдингиз, яна фуқаро,
Ул Абдуллоҳ ибн Жадъонга ҳодим.
Ҳожангизнинг меҳри товланиб сизга,
Озод бўлмоғингиз афзалроқ билди.
Ишларингиз тушиб охири изга,
Тижоратга сизни тенг шерик қилди.
Иймон келтирдингиз кулди мушриклар
Қолдингиз дам тазйиқ, дам масҳарага.
Хижрат қиларкансиз эзгач хўрликлар,
Гўзал Мадинаи Мунаварага,
Қурайш ортингиздан бир тўп кимсани,
Жўнатди сиз эса аямай жонни.
Дедингиз:"Эй Қурайш биласиз мани,
Ўқлар отгум сизга шайлаб камонни.
Ичингизда энг зўр мергани ўзим,
Эҳтиётингизни қилаверасиз.
Ўқларим тугагач қиличга кўзим-
Тушса мазасини билаверасиз.
Қурайшликлар деди:"Сен юртимизга,
Келганингда эдинг ночор ва фақир.
"Бойлигим қаерда эканин сизга,
Ошкор қилсам кетсам бўларми ахир?
Улар ҳа дедилар, бойлигингизнинг,
Жойини айтдингиз қилганча журъат.
Ҳайратимиз ошар ох ҳунуз бизнинг,
Ибратларга тўладир сиз қилган хижрат.
Бу ҳабар Набийга етган пайтида,
Не содир бўлганин айтмасам бу айб.
Пайғамбар ҳушхабар бир гап айтдида:
(Бу) савдо (кўп) фойда келтирди Суҳайб.
Бутун Мадинага сиз ҳақингизда,
Гўзал Пайғамбардан хушхабар етди.
Аллоҳнинг марҳамат қилгани сизга,
Бақара сураси икки юз етти.
Инонмаганларнинг берсин жазосин,
Оятнинг маъноси шундайдир дўст-ёр:
"Ва одамлар ичра Аллоҳ ризосин-
Тилаб ўз жонини сотувчилар бор"
Мадина волийси бўлган чоғингиз,
Ҳазрати Умарга, дилни қилиб ғаш.
Тиғ санчди нафрати бўлганча денгиз,
Феруз деб аталмиш зоти паст, пасткаш.
Убайдуллоҳ номли Умарнинг ўғли,
Деди: "Тўкканларни отамнинг қонин.
Ўзим суробини қиларман тўғри,
Ҳаммасининг бир-бир оларман жонин.
Сиз амр қилдингиз Убайдуллоҳни,
Тез фурсатда тутиб қамаб қўйишга.
Содир қилмасин деб бирор гуноҳни,
Ўтиб қолмасин деб кўзни ўйишга.
Саъд ибн Абу Ваққосникида,
У ушлаб турилди билмайди ҳар ким.
Убайдуллоҳ эса кутгани ростда,
Янги ҳалифанинг қилмоғин хукм.
Мадина волийси эдингиз у чоғ,
Аввалроқ эса қул, бу недир асли?
Бу ҳеч нарса эмас бу қодир Аллоҳ,
Азиз қилиб қўйган Исломнинг фазли.
Кўзларини юмди Умардек одам,
Тушиб шаҳидларнинг вазиятига.
Унинг жанозасин ўқидингиз ҳам,
Амал қилиб унинг васиятига.
Эй набий мақтаган буюк саҳоба,
Номингиз азиздир ҳар қайси жойда.
Биз ҳам қилар бўлдик Аллоҳга тавба,
Бизнинг ҳам" савдо"миз келтирсин фойда!
@A_meshayan
20:45-11.11.2022
Абдураҳмон Мешаян
#Солим_ал_Форсий_розияллоҳу_анҳу
Абу Ҳузайфанинг ёри Сахланинг-
Қули эди Солим.Камтарин бир зот.
Тарих қатин титиб билганим манинг,
Солим қилинганди кейинроқ озод.
Озод қилингач ҳам дўстлик ипини,
Ҳузайфа узмади келгунча ўлим.
Аллоҳ азиз қилсин жаннатда уни,
Солимни атарди тутинган ўғлим.
Қуръон ота-бола тутинмоқликни,
Кун келиб мутлақо айлагач ҳаром.
"Ҳузайфа мавлоси" аталди Солим,
Ўша-ўша дўстлик этарди давом.
Ит Мусайламатул Каззобга қарши-
Жангда ўлди мўмин қанчадан-қанча.
Шаҳид бўлмоқликка қилдилар чин аҳд,
Ҳузайфа ва Солим қучоқлашганча.
Албатта бу кекса, бу кўхна олам,
Гувоҳдир мардликнинг кўпдан-кўпига.
Ширин жонни бермоқ қилмасдан алам,
Дўстлар ўзин тутди душман тўпига.
...Ямома жангида байроқни тутган,
Ўнг қўлин душманлар қиличи кесди.
Солим эди оғриқ буткул унутган,
Шаҳидлик яқиндир юракдан сезди.
"Абу Ҳузайфага не бўлди?" боя,
Сўрагач у шаҳид бўлганин билди.
"Мени ҳам ёнига қўйинглар" дея,
Жон таслим қиларкан табассум қилди.
Аллоҳ яхшиларни айласин раҳмат,
Улар тўхташмади савоб ишидан.
Пайғамбар қилганди шундай марҳамат:
"Қуръонни ўрганинг сиз тўрт кишидан:
Тўрт кишининг бири ибн Масъуддир,
Иккинчиси эса саҳоба Солим.
Учинчиси эди Убай ибн Каъб,
Муоз ибн Жабал тўртинчи олим".
Шоир кўзларинг оч, юз бур дунёдан,
Мақтанма ёд олиб рубоий, ғазал.
Қуръонни умуман билмас подшодан,
Қуръонни зўр билган собиқ қул афзал.
Аллоҳ инсон ақлин шошириб қўяр,
Марҳамат дарёсин тошириб қўяр.
Истаса энг тоза араблар ичра,
Ажамларнинг қадрин ошириб қўяр.
Ранг-у миллатингни пеш қилма қақшаб,
Бир ожизман дея қилаверма арз.
Гар Аллоҳ истаса, Солимга ўхшаб,
Арабга Қуръондан форс беражак дарс!
Арабга Қуръондан ажам берар дарс...
@A_meshayan
18:28-06.08.2023
Абдураҳмон Мешаян
#Айёш_ибн_абу_Робия_розияллоҳу_анҳу
Мусулмон бўлдингиз ўгай оғангиз-
Абу Жаҳл буни ёмонга йўйди.
Аламга тўлсин деб кўнгил воҳангиз,
Оёқларингиздан кишанлаб қўйди.
Волидангиз келди кўзларин ёшлаб,
Абу Жаҳл эса гоҳ бўларди мард
Кишандан бўшатди у кундан бошлаб,
Хижрат қилмасликни сизга қилиб шарт.
Барибир кетдингиз Ҳабашистонга,
У ерда ўғлингиз туғилди омон.
Сўнг хижрат қилдингиз келгач иймонга-
Ҳазрати Умар-ла Мадина томон!
Ватанидан ким ҳам кетарди шодон?
Маккадан олислаб кетганингизда.
Абу Жаҳл келди кўзга тўлиб қон,
Қубо масжидига етганингизда.
"-Ортимдан не учун келдингиз яна?
Бу ерларга ака хукмингиз етмас.
Энди қолар ерим гўзал Мадина,
Укангиз сиз билан ортига қайтмас!"
-"Онам сўз бердики сен қайтмагунча,
Ўзини қилмаскан қуёшдан пана.
Ахир волидангни қийнама бунча,
Сочим ҳам тарамам дедилар яна"
Онангизга жуда раҳмингиз келиб,
Чека бошладингиз афсус-надомат.
Ишонма дедилар буларга Умар,
Динингдан чиқармоқ истарлар фақат.
Абу Жаҳл деди: "Тушмоқдамисан-
Ака-укаларнинг ўртасига сан?
Ҳазрат Умар деди: "Ака бўлсанг сан-
Мен эса Айёшнинг биродариман!"
Дедингиз чеккага тортиб Умарни:
"-Менимча акамнинг сўзимас ёлғон.
Тинчлантириб келай онамни бориб,
Ҳам молимни олай Маккада қолғон"
Умар эса сизга айлади жавоб:
Биласан қавмимининг кишисиман бой.
Агарки аҳдингдан қайтолсанг шу тоб,
Ярим молим сенга, ўйлаб кўргин хой.
"-Бораман ишимни Хаққа топширдим"
"-Қарор қилган бўлсанг майли унда бор
Аммо ортга қайтгин сал хатар сезсанг,
Кетиш олдидан ол туям наслдор".
Қайтдингиз, Маккага яқинлашар чоғ,
Абу Жаҳл деди: Туямда толдим.
Мени ўз туянгга мингаштирсангчи,
Негадир жуда ҳам ҳўб чарчаб қолдим.
Туянгизни аста чўктирдингиз сиз,
Акам минади деб жонворни чоғлаб.
Аммо туя чўккач астагина тиз,
Абу Жаҳл қўйди қўлингиз боғлаб.
Абу Жаҳл эди бундан жуда шод,
Бадр куни ўлиб солгунича дод.
Тутқунда бўлдингиз Набий буюриб,
Валид ибн Валид қилгунча озод.
Тутқунликдан кейин яна Мадина-
Сизга макон бўлди Хақ бериб нажот.
Ул маконга қайтиб қолдингиз яна,
То пайғамбаримиз қилгунча вафот.
Шаҳидлик шаробин Ярмук жангида,
Ичиб жон бердингиз ўзингиз еса.
Кўзимга ёш келар у кун аслида,
Айёш унда шаҳид бўлганлар деса.
Оғир яраланиб ётар эдингиз,
Ҳориса ҳам эди ярадор оғир.
Икрима ҳам бунда эмасди ёлғиз,
У ҳам жон берай деб турарди охир.
Ҳориса сўради чанқаб кетиб сув,
Сув олиб келишгач ёшлари оқиб.
Қараса ўзидан кўра чанқоқроқ,
Икрима турарди шу сувга боқиб.
Сувни Икримага олиб боришгач,
Оғриқдан бўлсада икки кўзи ёш.
Қараса сувга сиз қараб турибсиз,
Деди: Сувни беринг, ташнадир Айёш.
Ўзларингиз чанқоқ бўлган ҳолатда,
Сув ичмай жон бериб воҳ бирин кетин.
Бизга дардс ўтдингиз биз жаҳолатда,
Нафс ити талаган биздайлар бетин.
Эй Аллоҳнинг эрка бандаси Айёш,
Сизларга муҳаббат қалбим ёндирар!
Сизнинг чанқоғингиз Набийдек қуёш,
Кавсардан узатиб албат қондирар!
@A_meshayan
15:40-10.01.2024
Абдураҳмон Мешаян
#АЛЛОҲ_ТАРАФИНИ_ОЛГАН
#САҲОБАЛАР
Суҳайб, Билол, Аммор, Хаббоб розияллоҳу анҳум ва бошқалар...
Бир куни Муҳаммад Алайҳиссалом,
Суҳайб ва Билол-ла суҳбат қурарди.
Ўрганмоқлик учун энг буюк Калом,
Аммор ва Ҳаббоб ҳам тайёр турарди.
Набийнинг қошида бўлганди ҳозир,
Иймонга келганлар заиф ва фақир.
Уларга минг ҳавас қилсангда арзир,
Саҳоба бўлганди бу зотлар ахир...
Шу кун ўтиб қолди Набий ёнидан,
Бир гуруҳ Қурайшнинг зодагонлари.
Ва лекин дунёга келган онидан,
Башарнинг шарафсиз, нотавонлари.
Набийнинг ёнида Билол ва Суҳайб,
Аммор ва Хаббоблар кўриб борлигин.
Улар сўз бошлашди топгандек зўр айб,
Билмасдан ўзларин мутлоқ хорлигин.
"Эй Муҳаммад! Сен ўз қавминг ичидан,
(Наҳот айт) Шуларга бўлдингми рози?
Орамиздан Аллоҳ неъмат берганлар,
Биз қолиб шу фақир зотларми ўзи?
Энди биз шуларга эргашмоғимиз-
Керакми ўзинг айт бу бизга малол!
Уларни ёнингдан хайда балки биз,
Сенга эргашармиз шунда эҳтимол.
Бизлар булар билан бир жойда бўлсак,
Кўнглимиз айнийди дақиқа сайин.
Сен бундайлар билан тўпланмоқликаа,
Алоҳида бир вақт айлагил тайин!"
Ўшал он мўъжиза бўлдику содир,
Бу мўъжиза мени йиғлатур ғоят.
"Анъом"ни ўқисин ким бўлса қодир,
Нозил бўлди эллик иккинчи оят!
Эй Суҳайб! Эй Билол! Аммор ва Хаббоб,
Қандоқ тан олмайлик шарафингизни?
Ота-онангизмас, Аллоҳ ўшал тоб,
Олиб турган бўлса тарафингизни.
Сизга дунё аҳли хавас қилмоғин,
О билсангиз эди, билсангиз эди.
Аллоҳ Набийсига ўз Каломида,
Хитоб қила туриб шундайин деди:
"Эртаю кеч Роббиларига,
Унинг юзини ирода қилиб,
Дуо этаётганларни хайдама"(Анъом 52)
Гарчи ўшал Қурайш зодагонлари,
Фақирлар-ла бирга таом емасди.
Қул ва фақирларни кўрган онлари,
Уларни сира ҳам одам демасди.
Бир боқинг Набийсин севган фақирлар,
Хаққа бўйсундию жаннатга етди.
Нотавон Қурайшнинг зодагонлари,
Охир жаҳаннамнинг тубига кетди.
Абу Жаҳл, Утба, Шайба ва яна,
Бошқа Қурайшликлар гарчи эди бой.
Ололмади улар хасаддан ёна,
Буюк саҳобалар қаторидан жой.
Кўринг бўлсаларда камбағал ё қул,
Бўлган бўлсаларда ўз вақтида хор.
Саҳоба бўлдилар Билол ва Аммор,
Суҳайб ва Хаббоб ҳам шу қаторда бор!
Диққат қил мусулмон азиз биродар,
Тушкунликка тушма, бўлсангда фақир.
Бой кофирлар сенга бўлмас баробар,
Дахрий подшохлар ҳам тенгингмас ахир!
Улар бу дунёда қисқа бир муддат,
Кайфу сафо айлар ўзинг биласан.
Сен эса жаннатда абадул-абад,
Гўзал хурлар билан ишрат қиласан!
Хавасинг келмасин қирқ йил бенамоз,
Олтмиш йил рўзасиз "каттаконлар"га.
Ўзингни қадрла, қийматингмас оз,
Хавас қилма пасткаш зодагонларга.
Борар ери аниқ хар бир жоҳилнинг,
Борар ери аниқ кофир арбобнинг.
Улар давомчиси Абу Жаҳлнинг,
Сен Суҳайб-у Билол, Аммор, Хаббобнинг!
@A_meshayan
02:43-02.07.2021
Абдурроҳман Мешаян
#Саҳобалар #ҳаётидан #шеър
#АНАС #ИБН #МОЛИК #ЙИҒИСИ
Анас ибн Молик йиғларкан ёмон,
Доим Тустар фатҳин олганда ёдга.
Саҳоба бўлсада кўз ёш бегумон,
Бегона бўлмаган у улуғ зотга.
Гарчи жанг қилмишлар Тустар фатҳида,
Аллоҳ бўлсин дея улардан рози.
Йиғининг боиси экан аслида,
У кун қазо бўлган бомдод намози.
Мушрикларга қарши жанг қила туриб,
Намозлари қазо бўлгани учун.
Бир саҳоба йиғлар.. Сенчи ох уриб,
Йиғлашни билмайсан эй гумроҳ нечун?
Устдан кўтаролмай битта кўрпани,
Ухладинг уйқуни сен ширин билиб.
Шу боис Хақ сенга берганча жазо,
Яратмаган балки саҳоба қилиб...
@A_meshayan
14:46-26.08.2021
Абдурроҳман Мешаян
АБУ ЗАРР ВА БИЛОЛ РОЗИЯЛЛОҲУ АНҲУМО ИБРАТИ...
Иккиси ҳам фақат Хақ учун,
Гарчи яшаб ўтдилар халол.
Низолашиб қолишди бир кун,
Абу Зарр ва муаззин Билол.
Абу Зарр Билолга сўз қотди:
"Эй қора хотиннинг боласи".
Бу Билолга кўп оғир ботди,
Ва Набийга етди ноласи.
Деди Набий Алайҳиссалом:
" Онасини айбладингми сан?
Эй Абу Зарр сенда жоҳил(и)ят,
Одатлари ҳануз бор экан"
Бу жавобдан Абу Зарр йиғлаб,
Қалби ёниб, кўп азоб тортди.
Билол ибн Рабоҳни топиб,
Тупроққа юз қўйганча ётди.
Сўнгра йиғлаб деди Абу Зарр:
"Билол маним сўзларим тингла.
Кўтармайман тупроқдан бошим,
Юзим қаро оёқларинг-ла,
Токи босиб ўтмагунингча"
Энди Билол кўзин ёшлади.
Абу Заррнинг юзидан ўпиб,
Аста-аста сўзин бошлади:
"Эй Абу Зарр Аллоҳга қасам,
Аллоҳ учун бир бор бўлса ҳам,
Сажда қилган юзни ҳеч қачон,
Оёғим-ла босмайман бир дам".
Бу гал энди икковлари ҳам,
Йиғисида давом этишди.
Сўнг бир-бирин қучганча илдам,
Биродардек юриб кетишди.
Бизчи? Бугун одаммиз майда,
Дўстга деймиз: "Кечирмам сани"
Узр сўрар Абу Зарр қайда,
Кечиримли пок Билол қани?
Қўрқмай қўйдик биз Қуръондаги,
Ўшал азоб оятларидан.
Муслиммизу кечмадик хали,
Жоҳилият одатларидан.
Эй дўст асри саодатдан ман,
Бир ибратли қисса кўчирдим.
Абу Заррдек узр айтдинг сан,
Билол каби мен ҳам кечирдим.
@A_meshayan
23:54-30.06.2021
Абдурроҳман Мешаян
#БИЛОЛ #ИБН #РАБОҲ #РОЗИЯЛЛОҲУ #АНҲУ
Кўксингга ҳарсангтош бостириб қўйиб,
Мушриклар қийналсанг, туйдилар роҳат.
Сен эса чидадинг синовга йўйиб,
Тилингдан тушмади Аҳад ё Аҳад.
Гоҳида оғриқдан ухлолмай чиқдинг,
Ярангдан қон оққан кечаларида.
Ахир ожизгина вужудинг сенинг,
Судратишди Макка кўчаларида.
Ул Умаййя ибн Халафдек золим,
Жонингни қийнади, қийнади узоқ.
Сен эса ёмондир демадинг ҳолим,
Фақат Яратганга арз қилдинг у чоғ.
Сенинг мақомингдан биздакалар лол,
Сенинг улуғ номинг бўлмагай қаро.
Борлигинг не бахтдир эй буюк Билол,
Илк иймон келтирган беш мўмин аро.
Эй буюк саҳобий энг оғир дамда,
Пайғамбар ёнида бўлгансан демак.
Мусулмон эдилар ёруғ оламда,
У вақтда бешта қул ва бир ҳур эркак.
Пайғамбар ёнида яна бор эди,
Икки мўминалар сиздан ташқари.
Хурмат билан тилга олинар энди,
Хавас-ла эслашга арзийдир бари.
Илк бор азон айтиб, тарихда қолдинг,
Ҳа, Аллоҳу Акбар, Аллоҳу Акбар.
Жаннатийлик хақда расулдан олдинг,
Нақадар бахт ахир, гўзал хушхабар.
Ислом буюклиги шундадир албат,
Рангу ирқ ажратмас не учун алдаш?
Йўқса қандоқ қилиб азон айтарди,
Каъбанинг томида қоп-қора ҳабаш?
Қоп-қора хотиннинг ўғли дедию,
Сўнг пушаймон бўлди юрагин эзар.
Бир дам пайғамбардан дакки едию,
Сўнг сендан кечирим сўрди Абу Зарр.
Қора оёғинг-ла юзимдан босгил,
Деган Абу Зарнинг сўзин қилиб рад.
Мен Аллоҳга иймон келтирган зотнинг,
Юзин босмам дединг, ўпганча фақат.
Ана ўлиб кетди Роббин танимай,
Умайя мисоли қадри арзонлар.
Сени эса бизга эслатар тинмай,
Минордан таралган гўзал азонлар.
Меҳринг сохта бўлса, куйдириб бағир,
Йиғламасдинг асло ўкириб хўнг-хўнг,
Азон айтолмасдан қолмасдинг ахир,
Муҳаммад пайғамбар вафотидан сўнг.
Сасинг саҳобалар тинглади ҳазин,
Пешин, аср, шому, ҳуфтон сабоҳда.
Сенга тақлиддадир ҳар бир муаззин,
Илк муаззин Билол ибн Рабоҳ-да!
@A_meshayan
14:55-03.01.2022
АбдураҳмонМешаян
Аммор ибн Ёсир розияллоҳу анҳу...
Эй жигаррангкўзли, елкалари кенг-
Қорачадан келган Хақнинг ошиғи.
Маним ҳайратларим осмонларга тенг,
Ўлгунча ҳавасим келар очиғи.
Онангиз Сумайя илк шаҳид бўлди,
Ёш тошди кўзингиз қирғоқларидан.
Отангиз Ёсир ҳам мардларча ўлди,
Қутилиб мушриклар қийноқларидан.
Кофирлар босдилар диндан қайтгин деб,
Қизиган темирни баданларига.
Жазирама иссиқ чоғларда эс еб,
Кўмиб қўйдилар қум барханларига.
Азобга чидолмай тилга олдингиз,
Тил учида куфр калималарни.
Виждон азобида ёмон қолдингиз,
Набийга айтдингиз сўнгра аларни.
Кўздан ёшингизни қўймоқ-чун артиб,
Буюк Набий айтди гўзал хушхабар:
"Аммор мўмин эрур сочидан тортиб,
Билиб қўйинглар то оёғи қадар".
Ухудда, Хандақда, айладингиз жанг,
Шижоат тошиб қалб булоғингиздан.
Айрилгач ҳам ҳолим демадингиз танг,
Ямома жангида қулоғингиздан.
Куфага амирлик қилган чоғингиз,
Бири "Эй қулоғи кесик" зот деди.
Сиз эса айтдингиз афзал қулоғим-
Шу бўлар у Хақ-чун кесилган эди.
Набий айлаганди бир кун башорат:
"Сени ўлдиражак боғий тоифа".
Сиз шаҳид бўлдингиз абадул-абад-
Жаннатда ҳеч қачон бўлмайсиз хафа.
Афсус Аммор ибн Ёсир сиз каби,,
Ёвни қириб савоб ишламаганман.
Тўқсон уч ёшда ҳам қилич тутгансиз,
Менчи хатто ханжар ушламаганман!
Эй жигаррангкўзли, елкалари кенг-
Қорачадан келган баландбўй киши.
Сиз қилган амаллар олтингадир тенг,
Ҳавас қилмоқ биздек темирнинг иши.
@A_meshayan
04-05-август 2023
Абдураҳмон Мешаян
Абу Зарр Ғифорий розияллоҳу анҳу ҳақларида шеър.
Тўлиқ ўқиш учун матн устига босинг!
ИФТОР ЯҚИН ҚОЛДИ СЕВГИЛИМ
Ҳаёт эди сенсиз заҳарли(к)
Мен қишлоқи, сенчи шаҳарлик.
Боя қилган эдик саҳарлик,
Ифтор яқин қолди севгилим...
Ўтиб шунча ёзу баҳор куз,
Асл бахтдир билсанг эй гулюз.
Сен-ла тотмоқ бир жойда нон-туз,
Ифтор яқин қолди севгилим...
Шунча йиллар бир ўзим ёлғиз,
Ифтор қилдим сен сўзи болсиз.
Энди бирга очармиз оғиз,
Ифтор яқин қолди севгилим...
Узат менга шарбат тўла жом,
Бизга шараф рўзадордек ном.
Уфқ қизарди кириб қолди шом,
Ифтор яқин қолди севгилим...
Тараляпти масжиддан овоз,
Чиқиб келай мени кут бироз.
Сен ҳам уйда ўқиб ол намоз,
Ифтор яқин қолди севгилим...
Мен масжиддан қайтган чоғимда,
Асар қолмас юрак доғимдан.
Сендек гул бор ахир боғимда,
Ифтор яқин қолди севгилим...
Таомимиз рўзадор есин,
Бир кун келиб ишқдан еб эсин-
Севганига ўғлимиз десин,
Ифтор яқин қолди севгилим...
Шеърни ташлаб бағринга қочай
Ўттиз йиллик дардларим сочай
Умар каби рўзамни очай
Ифтор яқин қолди севгилим...
P.S: Шеърни кўчириб оладиганлар диққатига: Муаллиф ўлиб қолмаган ҳозирча!
@A_meshayan
18:40-25.04.2022
Абдураҳмон Мешаян
