533
حسين سالوفة عشك مرها الذبح للتواصل @Eng_alhabeeb
هاي حچايه ،، طف وحدهه
يا شدتهه ،، يا حيرتهه
خرجت زينب
-----------------------------------------
عمت عينچ يدنيا الما نصفتيهه
ذبحتي اخوانهه ومحتاره عفتيهه
زينب بت علي بالعاشر بيا حال
هل وحدهه ومغربين اهاليهه
من حرگ خيام ،، ودموع ايتام
كلشي بهالگاع ،، آه والآم
فوگ التله ،، يا بلوتهه
ياهو العدهه ،، يا حيرتهه
خرجت زينب
---------------------------------------
هدو علخيم وام عون محتاره
بعد موت الكفيل الدنيا دواره
ركضت بالبراري وعلتراب اخوان
طلعت للحسين البيهه الف شاره
اخت العباس ،، طلعت يا ناس
مذبوح حسين ،، مرفوع الراس
تالي وتالي ،، موتى اخوتهه
ياهو ايردهه ،، يا حيرتهه
خرجت زينب
--------------------------------------
طلعت والمصيبه السوط لاحگهه
تحامي ايتامهه وهالنار تحرگهه
تحاول ما يلوح السوط بنت حسين
تشگف عن رقيه وشامت يطگهه
هل وليه شلون ،، مخنوگه ام عون
كلهم علگاع ،، صعبه يگعدون
وين الكافل ،، دمعه بخدهه
لا متهدهه ،، يا حيرتهه
خرجت زينب
---------------------------------------
طلعت والنهار اتغطى بترابه
لا تنشاف زينب اخ يا يابه
گوم امن الترب عباس شيل لواك
هاي اعله الهواشم اكبر طلابه
مو ياهي الچان ،،، رادت خوان
كلهم ميتين ،،، فوگ التربان
سوط الشامت ،، حيل يعتهه
ظل يبعدهه ،، يا حيرتهه
خرجت زينب
-------------------------------------
غم ذاك الزمان الدارت ايامه
يصعدن علهزل وتراب علهامه
حسين اعله الترب ويزيد صاير شيخ
وزينب بت علي بالشام گدامه
يا دنيا الموت ،،، ماريدن صوت
دوريلي بساع ،،، بالطف تابوت
عيني احتارت ،، شيسكتهه
شيهودهه ،،، يا حيرتهه
خرجت زينب
كلمات الخادم / رعد الفريجي
18 / محرم الحرام / 1447
ثوابها الى روح والدتي
دعم مؤسسة منبريون الحسينية
#افضل قناة للنعي
/channel/+P0VV4bLqtzuKdcQS
#للاشتراك بالدعم @ahmed_alziwar0
للسبي
.
.
.
اميره ابضعنكم بضعنهم اســيره
چبـــيره عـــليه يبــدر العشــيره
ياخويه اعله بختك
تقـبل زينــب اختك
اســـيره
-------
مـــا اعاتــب لا وحـقـــك يالكـــفـــيل
بس حچي خوه وحچي الخوه ثگيل
زينــب التحلم تشــاهدهـــا الــنســاء
ابلايه محـمــل راكـــبه فــوگ الهزيل
بنواظـــرهــم .. يجـــرحـوني
الزلم صــعـبه .. يشـــوفــوني
وحچي الوادم .. على الحرمه
يبـــو فــاضـل .. تـــره زحـمه
يگــيدون شرفكم وسبيناچ يصيحون
ويردون يشتمون وبالحـجار يــرامون
نهــر غيـره عرفتك
تقـبل زينـب اختك
اسيره
__
كلشي طاح بطيحة اچفـوفك يحيد
وسيق اهــلك يــابو فاضـل كالعـبيد
ايدي عگب السبحه وايـدك والحنان
صفدوها وداعتــك خـــويه بـحديد
ســـلاســـلهم .. كلت ايدي
امن اون گالو .. بعـد زيدي
ولـمن اسكـت .. يعــذبوني
واذا ابـچــــي .. يظـربوني
تروع الحچيهم دليلــي وتشلع
تگطع يگولــون كفيلچ ميرجع
سكت كلشي ابسكتك
تــقبل زينــــب اختك
اسيره
-------
غافي صح راسك لچن مامستراح
عالرماح وتسمـع الســب والصياح
انظر الوجهك واحس ابمستــحاك
اتفز اذا سوط الشمر بمتوني طاح
الكسر گــلبي .. وجرح ناســك
الشمر هــوس .. برمــح راسك
وتـرس اذنـي .. حچه الشامت
سبيـنه اختك .. واشــو ساكت
عليه ثـگـــيله .. يگولون سبيه
الرزيه يخلون .. هالحبال بديه
نبع للغــيره گصتك
تقبــل زينب اختك
اسيره
-------
الدرب خويه الخالي بيه يستعجلون
ومن نطــب ابديــره عـــمداً يوگفون
مــو قصــدهم يســتراحون الطــغات
حـتى طول اخـتك يشـوفنـه العيون
ابـــــأزقتـــهــم .. يفـــروني
امن امر يمهـم .. يظــربوني
صرخ واحـد .. وحقد شايل
شعجب عافچ .. ابـو فاضل
جوابي بدموعي يترجم مصابي
عذابــي التبـــده تجاوز حـسابي
أقسمت ابنخوتك
تقبل زينب اختك
اسيره
------
البيه هنه اهواي خـويه ياحــماي
الغربه اول تالــي گدامـــي اوراي
والله لو ادري يخــويه باليـــصير
چان ماخليتــك انته تجـيب ماي
صبح فرجه ..الخدر وسفه
وعليك ادري .. يـخي كلفه
ولا اعتـــب .. وفيــت انته
ابــو غــيره .. الخدر صنته
بدلالي منو ايعيل لون ضال يغالي
سؤالي شـــسوي ومـــنو الي بقالي
بالـخـــوه سئــلك
تقبل زينب اختك
اسيره
------
حيدر تركي الكربلائي
للسبي
.
.
.
اكــبر جــرح بعيـون ابوصالح
ظـعن الفـواطم للســبي رايح
العــمـاته .. لچماته
وماتنشف .. دمعاته
***
صــباحــا ومــســاء .. بــكاء الـكـــربلاء
حياة المهدي ابوصالح عــباره عن عزاء
معانات وجـــراح .. بــدت فـوگ الرماح
ويه الروس الي نشالت ظعن عماته راح
جلالة ســـتر ال البـــيــت مگــيودات اديـهن
المصيبه الذبح عبــاس هــوه الــيحدي بيهن
لو هده ونــهن من يطـــب ديره
بالسوط يضرب راس ابو الغيره
مأساته .. وجمراته
وماتنشف .. دمعاته
***
الحنت ظهر الامـــام .. وتخـــلـــي مــايـنام
العلــويات اخـــذوهـــن بـدون أي احـــترام
بعرض حامي الدخيل .. الغـرب گامت تعيل
شــماته ولان شـــافوهن نـــساء ابـــلا كفيل
ظعن مو للسبي لا كون ينحـط بين الاحداق
يطاف بظعن ال البيــت وسفه بين الأسواق
ال الله العفــاف مفـــصله الظلهن
المايســوى واليــسوى يـصد الهن
ولوعاته .. وحسراته
ماتنشف .. دمــعــاته
***
على الهــزل يـــسيــر .. جـــرح گلبه الچبير
ويسمع صوت عمـــته ام عون لمن تستجير
تصد يسـره ويـمـــين .. تــــدور عـــالحسين
نخت والـشمر گال الها اگطعت بيدي الوتين
ايسي مايرد حسين زينـب لاتحشمين
هذاك العالرمح راسه چنج ماتشوفين
شافت اخوها عاري ومسلب
من حقها لـمن تنــعمي زينب
احچاياته .. اوناته
ماتنشف .. دمعاته
***
الامام المهدي شاف .. امــيرات العفاف
بحالة مزريه عالنوگ من كلــشي تخاف
الناس اخذت قرار .. تشــامرهن احجار
المثلهن زحمه يتــشامر وحــدتـهن مزار
وادم مـــن اســــطوح الدور نار تــذب عـليهن
وقسم من عدهم يضحكون چي ذبحو وليهن
الچانت حمايه تطلع اوياهن
صاحوا سبايه هسه جبناهن
حچاياته .. اوناته
ماتنشف .. دمعاته
***
الف موته يموت .. ابوصــالح سكوت
كلما شاهد بعيــنه ظـعن زينب يفوت
ظعن للســبي سار .. ظــعن كـله مرار
اذا لكبــار سابـيهن شــنو ذنـب الزغار
شنو ذنب الأطفال تروح بله بظـعن الاحزان
اديهم كلــش ازغيـرات وحبال السبي امتان
بالشام مــن دخــلو خـرايبهم
فوگ الســبي زادت مصايبهم
وغـصاته .. ولهفاته
ماتنشـف .. دمعـاته
***
حيدر تركي الكربلائي
لدفن الاجساد الطاهرة #اساسية
مو بالاتراب بالاعيون دفنت الغـالي
عمّه تعبان اجيتچ انظري الحالي
ورده إجيت إبلا نده وهوه اليفـارگ والده
بالدنيه يبقه الوحّده
يَعمّه
ــــــــــــــــــــــــــــــــــــــ
اهناكه عايف روحي يم گبر مذبوحي يم الحنين
ومايفسّر حالي الـما امفارگ غالي وشابع ونين
وآنه فاگد والـد ومو مثل اي واحد هذا الحسين
راس ما عنده ولا عنده صبع
ابماي ماغسلته غسلته ابدمع
مات ابوي اشلون ياناس اقتنع
آنه فاگدلي انسان أعـز من عمري
شلته ياعمه بيدي وحضنته ابصدري
فگد الابو كلش صعب خلاني مكسور الگلب
عثرات گضّيت الدرب
يَعمّه
ــــــــــــــــــــــــــــــــــــــ
ابو الباقر آني والدفن آذاني كاسر كفاي
ابصدر ابوي الطاهر شفت طبع الحـافر ساحگ ضواي
شيّعيته الوحدي وبس دمعتي بخدي محّد وراي
بالحصيره لـملمت جسمه الولي
جسمي ناحل وآنه حيلي مو الي
علي آنه وگمت انــادي ياعلي
واكتبت فوگ الاتراب هُنا مذبوحي
اهنانه دافن يدنياي مهجتي وروحي
وابصدره خليت الطفل ومن نحره جــرّيت النبل
دمعي عله الراحو يهل
يَعمّه
ــــــــــــــــــــــــــــــــــــــ
البس نحر ظل عنده اشلون اوسد خده حاير بقيت
اشلون الم اضلوعه مو سهل موضوعه واشگد بچيت
عالرمح ظـل راسه اشويه من انفاسه بالطف لكيت
گتله يابويه عـمت عين الوكت
مـامتت ويــاك وسفه مامتت
جسمـك اموذر وراسك الطشت
ليش الاحباب والاهواي نحب طرواهم
ياخذ الموت عمرهم واظـل انعاهم
يجروحي ما الچن دوه ياليلي ظل بلا ضوه
بانفاسي مخنوگ الهوه
يَعمّه
ــــــــــــــــــــــــــــــــــــــ
راح أأذّي احساسچ واحچي عن عبـاسچ يازينبي
گـتله يامولانه زينبك تعبانه من السبي
هيه صح مشتاگه بس مشت عالناگه ابصورة نبي
وآنه وياهه تقاسمنه الالم
آنه ادفن هيّه تحرس بالحرم
وراسك العالرمح صار النه علم
وانطولتلي المسافات بأذن باريهه
وعله اچفوفك دموعي اجيت ابچيهه
انته علي ابهيـئة گمر وانه الوحيد ابهالبشر
ادفــن نهر يم النهر
يَعمّه
ــــــــــــــــــــــــــــــــــــــ
عله الاكبر هايم وابن عمي القاسم وابكلبي نار
ازغار من ذبحوهم عالرمل خلوهم والرمل حار
الفتوه من سمعوهه بالنحر لبّوهه بعزه ووقار
فتوة احسين ابظهر عاشوره
عالنحر رسموهه باجمل صوره
وخلّو الخيمه ابشرف مستوره
ذوله شبان الاحسين ذكرهم واجب
امن الـمگابر يتانون ظهور الغايب
شبّـان وبعمر الحلم والمهدي ذاخرهم زلم
حياهم الله والنعم
يَعمّه
ــــــــــــــــــــــــــــــــــــــ
الوادم ايسألـوني والدمع بعيوني ابلغ جواب
ياعليـل الساده القتل الكم عاده انسه المصاب
وآنه مـاانساهم دائماً انعـاهم وابچــي بعذاب
الماي اترسه ادموع اذا جابوه الي
كـربلاء والشام اخذت كل هلي
ولـو نسيت احسين آنه مو علي
الدنيه اخذت رقيه وسبتلي اسكينه
ومن خرابه الخـرابه تنوخ بينه
ما بيهه امان ولا رغد متخلي والـد لا ولد
ذبحت اليـرضع بالمهد
يَعمّه
محمد الجماسي
على درب السبايا اتانيهم يمرون
على درب السبايا دم تسيل العيون
متاني اسأل حسين..رايح بالضغن وين
ياجدي ياجدي
.............................................................
اضل أحسب بالايام..ورسم بالسما خيام
وناطر جيته
احضر ماي بالجود.. وكعد بالدرب عود
ابلل شفته
ومد عمامتي فراش..وكولن ليش ماياش
طالت مدته
خلي ايتامك اهناك..الوادم موش وياك
اخيك سمته
يطلبونك تره دين..رايح بالضغن وين
يجدي يجدي
.............................................................
يكتل من يجي الليل..افزن لو شفت خيل
اخافنك تمر
براسي تصيح الايتام..يجدي صاحي مانام
اجزع عالخدر
اغمض تبدي الصياط..وسمع بالجو عياط
بضلوعك كسر
ادعي ماتجي اهناه.. ولا زينب تجي وياه
ويلاكيها شمر
ويصير الواحد ثنين.. رايح بالضغن وين
يجدي يجدي
.............................................................
اكتبلك مكاتيب.. جرحي ماضن يطيب
اشوفك تنذبح
راسك بيد الانذال .. يهوس بيه جتال
متعلي برمح
مسلم ناسه غدروه.. وحيد بغربه عافوه
يجرحني الشرح
رسايلهم كتب زور..خطوا بيها النحور
ماكضهم ملح
الكوفه الصابه البين.. رايح بالضغن وين
.............................................................
اموتن انه كل عاشر.. وياك يسدوسني الحافر
دمي يسيل
نار الخيم تجويني.. وسهم عباس يعميني
وجدمي يميل
واركض للنهر وارجع..اخافن عالحرم تطلع
جيش يعيل
وطفي النار بهدومي..هاي بكربلا علومي
اجروحي اجيل
شمر حد السجاجين.. رايح بالضغن وين
.............................................................
الشاعر كريم الجياشي
شمس الحسين بكربلة غابت معانيها
واول شمس بالطف شفت الكاع تجويها
سولفو عنك عزيز الله شكثر
تجبر الخاطر رغم ما منكسر
ياحسين يا حسين
،،،،،،،،،،،،،
ياشمسنه الغابت وحل الضلام
والكمر مذبوح يم باب الخيام
انته صاحي و الخلگ كلها نيام
شكد حنين ونايمة بصدرة السهام
نام وخلي جروحك تكبر
اكبالك كل الوادم تزغر
تسكت كلها ويحجي المنحر
عاش الحسين
شيريد يحجي يا زمن الحاير بروحه
وحسين بعدة لهل وكت ما نشفت جروحه
يسكت العالم لجرحج نينوى
بعدة عطشان الحسين وماروى
ياحسين يا حسين
،،،،،،،،.
يا شمسنة الغابت بذاك الزمان
راح الحسين وبعد راح الامان
كان ياما كان اكو بالطف حنان
ورتفع راسه على عالي السنان
انته الاول وانته التالي
الكل تنصى وانته العالي
يحسين ويرخص كل غالي
لجل الخيام
طايح وعينك عالحرم تزحف على جفوفك
وتشوف علوية علي اتحشم بمعروفك
بين حرك خيامها وستر الهدم
هنانة شيرد الزلم يابو الزلم
ياحسين يا حسين
،،،،،،،،،،،
حسين مات وبعد بالطف كلشي مات
وضلت الزينب جروح الذكريات
جيت اشكي العطش يا ماي الحياة
المثل زينب بالخرايب ما تبات
ما تغفه عيون العايفتك
ضلت ما ماتت سالفتك
لا تسأل عن خيمة اختك
محترگه بنار
يحسين تسأل عالخيم واهل الخيم موته
من عگب عباس الشمر هسه طلع صوته
يوم جان الكمر واكف عالفرس
صنطة جانت ينسمع حتى النفس
يا حسين يا حسين
،،،،،،،،،،،،
نايم ونومك كسر كلب الرباب
ويلسع بجرحك شفت ذاري التراب
حسين باب الله وفتح للخدمة باب
حسين اصل الماي و الباقي سراب
العافك لا ماضن يتهنه
الما شافك ما شاف الجنة
جروحك جا يمته يلچمنه
تاليته وين
بالعاشر الما يلچم لا يبچي ما لازم
الما يخدم بنية الجرح ما ينحسب خادم
حسين رايد خادمة ابيض گلب
وكون بالخدمة ابد ما ينغُلب
يا حسين يا حسين
،،،،،،،،،،،،،،،
حسين كل الدنيا جانت بين اديه
خيّر و ما يرد كلمن يعتنيه
الخيل ما عدها عقل داست عليه
والحوافر گلي جا شمسويه بيه
كلها تموت ويبقى العاشر
عايش عدنا ليوم. وباجر
شيجبرك ياكسر الحافر
بضلع الحسين
الخيل عشرة الداسته تروح وترد عشرة
نص الحوافر باگته ونص لمته الحرة
ضاع بالطف من كثر ماداسته
يعينها الله الگامت اعليه لمته
يا حسين يا حسين
،،،،،،،،،،،،،،
كريم الدراجي
من لونج اخذ حتى الحزن لون . زينب
قد قامت صلاة ادموع العيون . زينب
ايسي من الحبايب مايردون . زينب
شذكر يا مصيبة شذكر يا مصيبة
.............................................
ممنوع السكوت من البجي ماكو استراحه
من گاروكج لحد السبي ما شفتي راحه
من الخيمة للتل ركضتج هاي الصراحه
هيه البجّت ابن العسكري ليله وصباحه
عينج على الستر لمن تركضين. زينب
گدام الشمر بس لا تعثرين . زينب
واشمال السياط انطك بالمتون .زينب
زينب يا غريبة. شذكر يا مصيبة
.............................................
عصابه الزهره براسج وبيرغ لزمتي
وامريه جبيره ابيوم عاشوراء صرتي
وي نحر الحسين اسبعطش ذبحه انذبحتي
يالجابولج الماي وگلبتيه ما شربتي
بالطف وحدج من صار الغروب . زينب
شميتي القميص وصرتي يعگوب . زينب
ذبحوا يوسفج ناس اليخونون . زينب .
والجثة السلبية . شذكر يا مصيبة
..................................
يالمخلوقة من عطر الورد يالهاشمية
يالكلج ترافه وخشنه كاع الغاضرية
سجادج رسول القافلة وانتي نبيه
واثمانين دمعه ابعينج ورحتي سبيه
علوية علي ومجتوفه عالنوك . زينب
ودمعج ما نشف من طبت السوك . زينب
يالكل الائمة عليج يبجون . زينب
وعباس شيجيبه . شذكر يا مصيبة
................................
يالجان اليدك بابج نبي واسمج اميره
شو هسه القضية اتبدلت صرتي اسيره
خليتي الحسين بعازه الفي والحصيره
ازغار المجالس وانتي احزانج جبيره
المفروض وعلي تركعلج الشام . زينب
كل عمرج لطم مو عشره ايام . زينب
وحزنج مو مثل كل اليحزنون . زينب
يا جرحي وطبيبه . شذكر يا مصيبه
.....................................
ضعنج شعب وعي وانتي يا زينب رئيسه
نص حيدر ونص من فاطمة صبرج نقيسه
مريم بالقداسة وبالمعاجز صرتي عيسى
والجامع نصبلج ماتم ابنص الكنيسه
لو عابس معلم للعشك صار . زينب
احنه بصف الاول كلش ازغار . زينب
وفقينه نكون بمنزلة جون . زينب
ودرسج ما نغيبه . شذكر يا مصيبة
........
وفقينه وانظرينه ابلطف نظره عناية
لو ماكو مجالس نختنك مثل السبايا
كونيه اياتج وانتي ام هاالولاية
بس رفعي عباتج تنزل ارزاق وعطاية
الما يطلم عليج الذمه مشكول . زينب
المهدي لو ظهر للمهدي شيكول . زينب
منعوف اللطم رغم اليلومون . زينب
تمت بعونه تعالى .
الشاعر محمد الجماسي
يا الم نشرح .. صدرك مجرح
حسيناه … حسيناه
——————
يادوه لكل علة علتك مايشافيها الدوه
ياهوى البعدك ولا يستاهل نشمه الهوى
الگاع وسمانه وي صدرك خوية داسوهن سوه
من طحت من عالي خيلك گلب اخيتك هم هوة
يا دوه جروحي … وياك اخذ روحي
حسيناه .. حسيناه
——————-
يا ابو الضحكة الحنين بثغرك مثلث نبت
گلبك الماكو بجمالة خيلهم گطعتله بت
والشداد السبعة ناحت وونت عليك ونعت
روح زينب ياخو زينب وي مشيك هالمشت
حايرة بامري … وانكسر ظهري
حسيناه … حسيناه
———————-
عشرة داسوهن ضلوعك عمت عيني تكسرن
اشفافك من العطش خوية بعيني شفت اتفطرن
اشلاء من جسمك يغالي خيلهم جابن واجن
مدلالتك يا ابوهن شافن الخيل وبچن
شاغت الطفلة … شدة مو سهلة
حسيناه … حسيناه
———————-
ليش يموزع المحنة محد بحالك رحم
ياهو من صوبك يجينه ايدة منك كلها دم
حسين صالوا بينا صولة اعلينا حرگوها الخيم
غيره ماعدهم هذولة لا حمية ولا شييم
اعدانه ما ترحم … حرگوا مخيم
حسيناه … حسيناه
———————-
بوجهي ذباحك تبسم گال ذابحلچ اخو
گبالي هز سيفة وتشمت وين عباس الكفو
شصاير بجسمك تفرهد خربوا طولة الحلو
خوية بارد كلشي صار نريد من عندك دفو
يا ابو اخيامي … ضاعت ايتامي
حسيناه … حسيناه
———————-
هاي هية وي المحنه والله بوداعك گضت
الحلوة بايامي بوجودك وياك خوية حملت
عيني التحبها وتعزها حسين من بعدك بچت
والله وسفة گبال غربة دمعة اعيوني جرت
خوية بالغربة … حالتي صعبة
حسيناه … حسيناه
——————-
صرنا من خيمة لخيمة نركض نريد الستر
بايدة نار وبايدة سوط ومارحم بينا الشمر
نارهم شبوها بينا مايطفيها النهر
اعلينه هدت كلها خوية لمن گطعوه النحر
حرگوا الخيمة … وضعنا بالهيمة
حسيناه … حسيناه
—————
محمد عبد الساعدي
دعم مؤسسة منبريون الحسينية
#افضل قناة للنعي
/channel/+P0VV4bLqtzuKdcQS
#للاشتراك بالدعم @ahmed_alziwar0
دعم مؤسسة منبريون الحسينية
#افضل قناة للنعي
/channel/+P0VV4bLqtzuKdcQS
#للاشتراك بالدعم @ahmed_alziwar0
((عجاج الخيل))
عجاج الخيل حيرني
ألحگني يخـــال أبني
اركض والعده تـردني .. الخيامي
هيه محـــــرگه أخيامي
اركض والگلب ضــــامي
وأشوف أمصرعه أزلامي .. وعمامي
وين انته .. ماشفــتك والشوگ أنهيبه
وين انته .. ماضـــــلت بخيامي النيبه
وين انته .. والطفل اليركض شيجيبه
ادورك وين والنار أعلـــه من نار
وسوالف سوطهم تحچيها الاثار
اجيتك وأعثر بچفين وحجـــــار
عمت عيني يضامي ...
""""""""""""""""""""""""""""""""""""""""""""""""'''""""
اجيــــــت وشفتك أمترب
ومن ضرب العده مخضب
وتگـــــلي أميـــــه يازينب .. سمعتك
ضامي ودمعته بعينه
منين الماي حاچــينه
النهر ماتت مضامينه .. بصفنتك
حاچيني .. وآنه بطرگ اللهفه بحالي
حاچيني .. جيت اعثر بجروح عيالي
حاچيني .. ولا طارش يوصل كفـالي
بعيد الماي وأهل المـــاي ميتين
اجيب الماي گلي شلـون ومنين
وصوبين العده يحسين صوبين
عمت عيني يضامي ...
""""""""""""""""""""""""""""""""""""""""""""""""'''""""
گوم اگعدلي يبن أمي
بعــــروگي نشف دمي
الخيل السحگتك يمي .. واجتني
منين اركض يبو ضعوني
أنـــــــه مطَشره لمــــوني
تهت ياخــــــــويه دلوني .. عفتني
دليني .. اركـــض ما انـدل دلوني
دليني .. ضلمه وماشوفن بعيوني
دليني .. دخــــان الضيعني بلوني
دخان الخيم تَيَـــهّ بناتي
وتراب الثره صابغ عباتي
مصيبه وياكثرهن نايباتي
عمت عيني يضامي ...
""""""""""""""""""""""""""""""""""""""""""""""""'''""""
جمر وجــروح رجليه
وخوله وسكنه ورقيه
ورباب أمچــــلبه بيه .. يويلي
ورمله الشوگ جاسمها
مـــــني تريده جاسمها
العرس بالخيل راسمها .. ودليلي
جاسمها .. بالگـــوه انجره من الخيمه
جاسمها .. نار الخيمه وگلبي وضــيمه
جاسمها .. يوليدي انهض يابو الشيمه
امك ضمتك للشيب جسـام
ليش تعوفها مابــــين ضلام
نار وخيل محترگات الخيام
عمت عيني يضامي ...
""""""""""""""""""""""""""""""""""""""""""""""""'''""""
العصر خلص يوالينه
المغرب ينعـصر بينه
وگمنه بدمعه صـلينه .. يوالي
الخيمه البيها محروگه
وگلبي بحرگته وشوگه
يخويه الماي ماضـوگه .. يغالي
يوالدنا .. هذا السوط وهاي الهزله
يوالدنا .. واليضربنه شنــهو انـگله
يوالدنا .. والّــملّتف شلـــون انفـله
جابوها الهزل والصعده عـثرات
الماتصعد ركض بالسوط طگات
حراير والعده يضحكون شمات
عمت عيني يضامي ...
عبد زينب
محمد الابراهيمي
قصيدة گعده ليلة الوحشه
ليلـة الحادي عشـر ليلـه رهيبــه
بيها زينب حايره وامست غريبـه
لاخيمه عدها ولا زلم عدها هالليله بنت الزهره وحدها
بيها زينب حايره وامست غريبـه
*
امــس چــانت بيـن أهلهــا زينب ومثــل الاميــره
وچان يحرسها ابو فاضل ذاك اخوها الكله غيـره
اليــوم لاخيمــه التلمهــــا ولا أهلهــا ولا عشيــــره
چاويـن راحت هـالزلـم ياصـاح لـو عندك علـم
زينب بيــا حالـه تهــم والله حيرتهــا چبيــره
چانت بخيمتهـا واليحرسهـا عبــاس
وهسه ياحيف ال اميه عليهـا حراس
تفطر دليلك لو تشاهدها هالليله بنت الزهره وحدها
بيها زينب حايره وامست غريبه
*
امس تذكـر چان اخوهـا حسين ابـو السجـاد يمهــا
بي تشوف الحسن چانت وبيـه تشتـــم ريحـة امهــا
مـن تجـي لخيمتــه چــان يگــوم ولصدره يظمهـــا
ياحيف زينب بت علـي هالليله مـن دون الولــي
بوليــة الظالــم تنولــي وطگها بالسوط وشتمهـا
راحت ايام الخدر ويــه الكفلهــا
زينب بولية شمر من عگب اهلها
ليش الشمر بالسبي واعدها هالليله بنت الزهره وحدها
بيها زينب حايره وامست غريبه
*
ساعد الله گلب زينب بيوم واحد چــم مصيبــه
مـن عگب خيمـة خدرها هسـه خيمتهـا سليبــه
النــار شبــت بالمخيــم واليطفيهــا اشيجيبــــه
شيجيب ابو فاضل بعد لا اخـو ظل ولا ولـد
الليله وحيده بلا سنــد زينب وامست غريبــه
الليلـه بنت المرتضـه تنطـي الوجـه ويــن
لا ابو فاضـل عدهــا ظل لا ظل الحسيـن
بس العليل الليله ساندها هالليله بنت الزهره وحدها
بيها زينب حايره وامست غريبه
*
زينب بكسرة گلبهـا عليهــا صبّــح يـوم عاشــر
موش يـوم الله اكبـر ادمـه مــن زينب نواظــر
بيه شافت گطع أدين وشاهدت گطع المناحـر
شافت حسين عله الثره جثتـــه سليبـــه موذره
الله أكبـــــر عالجــــره بزينب المكسوره خاطر
هلــه هلــه اشهالمصيبــــه الله اكبــر
شافت برأس الرمـح راس ابـو الاكبـر
وبهالمصيبه الله يساعدهــا هالليله بنت الزهره وحدهــا
بيها زينب حايره وامست غريبه
*
الليله زينب وين أهلها باليتامه حيروها
تنده وما يسمعوها امجزرين وما يجوها
اگبالهم وسفه الاعادي بالحبال ايجرجروها
تلم باليتامه وبالحرم بالهيمه وبلايه خيم
محد من اخوتها سلم بيوم واحد فاركوها
والله حيره اتحيرت من عگب الحسين
هيمه وبهاي الحرم تنطي الوجه وين
والخيل هجمت ياهو اليردها هالليله بنت الزهره وحدها
بيها زينب حايره وامست غريبه
***
خادم الحسين عليه السلام
سيد غالب الرضوي الكربلائي
ما عودتني حسين تجفيني
اتخليني انوح او تنعمي عيني
و الوادم الذبحتك تسبيني
و اتهطرت من جيتك اهواية
گوة امشي و ايدية اعلة مگفاية
جيتك يخوية حسين شچاية
كونك تحبني حسين رد اوياي لخيامي
ما بية اروحلك و ارد متعيني اجدامي
اتعنيتك اركض و الخيم محترگة بايتامي
گوم يا خوية انهبنة
گوم و اعيونك تعبنة
گوم مو وصلت حوافرهم حرمنة
ليش ساكت وآنه احشم
و سكتتك بية تهدّم
گوم مو ركض الفلة اهواية هظمنة
حسين خوية...حسين خوية
♕♕♕♕♕♕♕♕♕♕♕♕♕♕♕♕♕♕♕
عطشان خوية او غايرة اعيونك
بس گوم، واگف خل يشوفونك
شيرجعة حيلك من يسحگونك
يبن امي گوم او آنه اتچيلك
الخاطر خواتك خوية شد حيلك
ادخيلك يحامي اضعونة ادخيلك
لحگ يخوية اعلة الحرم لا توصل الوادم
لا تبقى عالگاع او تون لتظل يخي نايم
ترضاهة تركب عالهزل؟ خوية بخت هاشم
ليش هيچ حسين رحتوا
ليش كلكم ليش طحتوا
و آنه وحدي او دورت وين اليحامي
گوم خوية او لا اتغمض
آآخ بية التعب يركض
او شيبت يا خوية من حرگوا خيامي
حسين خوية...حسين خوية
♕♕♕♕♕♕♕♕♕♕♕♕♕♕♕♕♕♕♕
يا خوية گوم الناس فرحانة
شافونة نبچي او محد اويانة
او شيصبرة ليذبحون وليانة
حاچيني يا رجواي حاچيني
تيهتة دربي حسين دليني
خوية اعلة بختك لا اتبچيني
يا خوية شو چنك متت يبن امي و اتنازع
واختك غريبة ابنص غرب والوادم اتباوع
بس گوم احلفك بالضعن خوية الضعن ضايع
گوم رد الخيل و ارجع
گوم ترضى الحرم تطلع
بالبراري حسيــــــــن و الوادم تعاين
اجدامي فوگ الجمر تسحگ
من اجيت او خايفة انطگ
گلبي شيب يامن ابگلبي انتة ساكن
حسين خوية...حسين خوية
♕♕♕♕♕♕♕♕♕♕♕♕♕♕♕♕♕♕♕
تفزعلي لو أيس يرجواية
و صبّر دليلي حسين بحچاية
بس احچي اجتني الخيل عناية
عالهزلة اروح حسين ترضاهة؟
تمشي اختك و بس غربة وياهة
ابروحي اشبقة امنين اتِّلگاهة
هاهية راح امشي ابدرب ما بي و لا واحد
من بيت ابو طالب و انة او نسوانك اناشد
او ويانة بس راسك يظل و الدم عليه جامد
گوم راح انروح لحگ
گوم خوية الشام يخنگ
و الزلم من هسة حضروهة الهلاهل
وين اروح او ماكو مگصد
و ليش وحدي اوياية محد
و ليش ميرد و آنه اصيّح يابو فاضل
حسين خوية...حسين خوية
♕♕♕♕♕♕♕♕♕♕♕♕♕♕♕♕♕♕♕
حسين الزهيري
مني خذت حبيبي➖وبفراگه ضيعتني➖يالبگت فرحتي
ﻻتطب خيمنه➖شوفتك عذابي➖ﻻتدنه عمتي
ﻻﻻ تزعلهه➖مايرضى كافلهه➖شوفتك عذابي
❌❌❌❌❌❌❌❌❌❌❌❌❌❌
گاعدات بخيمه واليسلب گريب ➖اوين اليحاميهن
خيمه تكطر نار لسه ابليه باب ➖والهضم غاطيهن
كتر بكتر يتلاوذن مثل الحمام
إيخافن اعليهن تصد عين الحرام
ياناس ذن جدهن نبي وبنات امام
اتصيح اشكثر رقيه➖ياعمه انه اخافاً➖اتاخرعليه بابا
خلينه اروح ادوره➖محتاجه اشوفه هسه➖مااحتمل عذابه
وضلت تسايلهه ➖مايرضى كافلهه➖شوفتك عذابي
❌❌❌❌❌❌❌❌❌❌❌❌❌❌
بره صوت يصيح مذبوح الحسين➖رادو ايسمعونهن
بره واحد كل للاخر هذا صوط➖ حيل طگ امتونهن
اصواتهم خشنه وﻻبيهه حنان
ذوله مين الذبهم علينه الزمان
صاح واحد ذني ما الهن امان
والواكف اعله بابي➖اشگد شتم ابخواتي➖وبينه اشتفه غليله
يخزرنه وحده وحده➖تالي رجع سالني➖من منجن العقيله
ايدور على ذلهه ➖مايرضى كافلهه➖شوفتك عذابي
❌❌❌❌❌❌❌❌❌❌❌❌❌❌
كتله اسكت يزعل اهواي الكفيل➖لو جبت طاريهه
اسم زينب لفضه بلسانك حرام➖سوره نزلت بيهه
حروف اسمهه امن الله نزلت عالرسول
هاي خدر الله الجبير انته شتگول
عربي انته شبيك ماعندك اصول
ﻻ تقترب عليهه➖وديني وانه اگلهه➖بس لا تصد علينه
انجانك ردت سبينه➖انطيني الحبل اليه➖وحنه النشد ادينه
آنه اگللهه ➖مايرضى كافلهه➖شوفتك عذابي
❌❌❌❌❌❌❌❌❌❌❌❌❌❌
اتفاجئت طكني اعله خدي بجفه حيل ➖شنهي بادر مني
اخدودي انه امعوده اعله اشفاف ابوي➖ليش هيج اتطكني
اتطگني بيدك حيل بس انه شجنيت
عيني طاحت بيدي من طگني وبجيت
بيك ضالم هالكثر لا ما دريت
رد گلي رقيه➖انه اذبحت عزيزج➖وجيت اسبي بيدي اخته
وشفايفه التبوسج➖سطرات اديه ذني➖ايعوضنج اعله شفته
ادموعج اسبلهه ➖مايرضى كافلهه➖شوفتك عذابي
❌❌❌❌❌❌❌❌❌❌❌❌❌❌
گتله هسه للخيم يرجع ابوي➖ومنك ارد اشكيله
ارد اگله الزلمه هذا اشگد لئيم➖طكني ابكل حيله
ارد اراويه خدي وشسوه اللعين
وارد اگله بسطرته روحلي عين
بحبله جاي ايربط الزينب ادين
لاجنه اذه گلبي➖احجايه گلي بيهه➖ريت اولا سمعته
جلمة بابا ماتت➖گبل اشويه بيدي➖والدج ذبحته
وراح اليدللهه ➖مايرضى كافلهه➖شوفتك عذابي
❌❌❌❌❌❌❌❌❌❌❌❌❌❌
عمه عمه هذا گلي مات ابوج ➖هالحجي سامعته
توه ودعني ومشه وگلي اجيج➖وهذا گال اذبحته
عمه گليله جذب هذا الكلام
عمه گليله اليطگ طفله حرام
انه تعبانه واريد بحضنه انام
ياعمه والهضيمه➖والصوب دليلي➖يضحك اعله حالج
يازينب يكلج➖حضري ادينج➖خل اشد حبالج
وتصعد هزايلهه ➖مايرضى كافلهه➖شوفتك عذابي
❌❌❌❌❌❌❌❌❌❌❌❌❌❌
حسين باهض الحلفي
مشتاكه الك يحسين ولفركاك ما بيه
تعرف يتعب الشوك شلون بشوك مسببه
فركاك حزن سنيني .. طاريك يجرح عيني
مشتاكه الك يحسين ولفركاك مابيه
ــــــــــــــــــــــــــــــــــــــ
البعد غيرني لا عمري ولا حال الأمس حالي
جروح الذكريات وياك ثكيله اثكل من احبالي
تعب كلبي خويه الشوك رغم نحرك مشه كبالي
بس وين انته يم اختك ووين انته برمح عالي
اختك وابقى وياك شو مني يبعدونك
كدما بعيد الراس ما اجت عيني بعيونك
منعو حتى ونيني .. وطاريك يجرح عيني
مشتاكه الك يحسين ولفركاك مابيه
ــــــــــــــــــــــــــــــــــــــ
من عفتك اسم خويه اعرفت منها العمر لحضات
مره امشي بفخر خوتك ومره امشي بحجي الشمات
لجمة فركتك يحسين عودت كلبي علـ لجمات
مشيي بلا مروتك موت كضيته الدرب عثرات
والنوك موش النوك بيهن جيت بمروتك
سلبوهن لمن طحت انته وخفت صوتك
ياخويه معذبيني .. وطاريك يجرح عيني
مشتاكه الك يحسين ولفركاك مابيه
ــــــــــــــــــــــــــــــــــــــ
ما ادري النهايه شلون حصل بيه الما حاصل
سيلة دمك اعله لكاع دمعي اعله الحبل سايل
بغصة السوك بلوادم ادخلت لا اسم لا كافل
فر فريت الولايات راسي من الخجل نازل
طبيت خويه دروب وانته وياي ما طبها
مدري النهايه شلون وهذا شفته باولها
ليوين موديني .. وطاريك يجرح عيني
مشتاكه الك يحسين ولفركاك مابيه
ــــــــــــــــــــــــــــــــــــــ
وصلنه لباب بي زادت. الكسره خويه لبضهري
وكفت كباله وبلا راي يبن امي بجرح خدري
تيهت الفكر يحسين شنهي يصير ما ادري
لحضه ولنهم يفتحوه اشوف الجان مو كدري
معيدين أهل الشام جي شافوني مجتوفه
يدرون اني ام العون بلعز خويه معروفه
معيدين جي سابيني .. وطاريك يجرح عيني
مشتاكه الك يحسين ولفركاك مابيه
ــــــــــــــــــــــــــــــــــــــ
كعدت اني بمجان اضلم ارضاها يخويه شلون
جا هوه لكطع نحرك هم يهتم بحال ام عون
كل هذا واكول اهون شنهي الي جرالي يهون
بس مال اكعد بديوان ولشمات وكحه عيون
توسطت الايتام صارو خيمه فوك الراس
ينشاف طولي شلون ويعرفوني اخت عباس
وبهاي شينسيني
وطاريك يجرح عيني
مشتاكه الك يحسين ولفركاك ما بيه
اللهم عجل لوليك الفرج
_ مصطفى سلمان
دعم مؤسسة منبريون الحسينية
#افضل قناة للنعي
/channel/+P0VV4bLqtzuKdcQS
#للاشتراك بالدعم @ahmed_alziwar0
حاچيني ياوجه الصبح .. شيسوي راسك عالرمح
مالايگ اعليك الذبح
ياخويه ياخويه
*
ينور الله ويوجـه العافــيه اليزهر
چنت البارحه مورد وهسه اصفر
اگعـد مو وكت نومك يــبو الاكبر
مروتك حاچي زينب كونك تگدر
أتبــده گــدامك حچي .. بلكت يصحيك البچي
وعينك عليه تنفحت
ياخويه ياخويه
***
ها يا من ضوه الله بجــبهتك شايل
اول تالــي وجــهـك يالاخـــو ذابل
الدم من منحرك فوگ الرمح سايل
يالـكامل اشــو مابــيك شـــي كامل
بخدك اثر حافر فرس .. والدم على الحيتك يبس
مابيك شي مامنجرح
ياخويه ياخويه
***
شفتك من عــسن ميـــته ولاشفتك
من گـــد العطـش متفـــطره شفتك
يالمتــرب يالمــدمه يبـــعد اخــتك
تره اني البارحه موهيچ من عفتك
شو مو على بعضك احس .. مغيرتك هواي الشمس
ماصدگت عني تشح
ياخويه ياخويه
***
استذكرت السوالف ونچفت عيني
احتـرگت اگــبالك ومحد يطفــيني
اذا متعوب لو بـس كلمة حاچـيني
انه زينــب انچــانك انــته ناسيني
خلي السوالف بالنظر .. لاينلجم جرح الحجر
وتدري بحچي زينب ملح
ياخويه ياخويه
***
يوجه العافيــه الچنــك ضـوه المصباح
اليصــبح بيك مــوش ايصــبح ابــذباح
جابوني لعــد رمحــك ضرب وصياح
طحت وي ماشفت راسك ياخويه طاح
شميته نحرك وشهگت .. حاچيني ياخويه صحت
من اختك اتهدم صرح
ياخويه ياخويه
***
دورت الشمس ولگيــتك اگــبالي
مدري شلون ناشو راسك العالي
السيف الحـز رگبــتك ذبح دلالي
يغــالي ومابقــالي بدنيــتي غالي
براسك رمحهم من نبت .. اختك يابو اليمه انتهت
محنيه مكسورة جنح
ياخويه ياخويه
*
حيدر تركي الكربلائي
فوك الهزل والغربه تحدينه
ونوك السبي تبجي البواجينه
ضعن الله شال ابلا كمر
طلعن ضهر يسند ضهر
ــــــــــــــــــــــــــــــــــــــ
امصيبه وابد ما تنحجي فية ضعن سيد المله
الما كسرن اخيال بشمس ذبحت خدرهن كربله
معقوله زينب تنسبي وتكص بديهه السنسله
معقوله يحديهه الشمر ويسب أبوها حرمله
عكب الكمر دار الوكت بيهه
زجر وخوله ينهر اعليهه
من صوته خاطرها أنكسر
طلعن ضهر يسند ضهر
ــــــــــــــــــــــــــــــــــــــ
عالناكه ودموعي اتهمل والحيل مات اويه الخيم
سلطانه أجيت الكربله ويرفرف ابكتري العلم
معقوله زينب تنسبي مدري بحلم مدري بوهم
ما بين شمات وغرب ويلوذن بسدهه الحرم
واحد يكل للثاني نسبيهن
ونحرك كلب حيدر علي بيهن
عمدا يراموهن حجر
طلعن ضهر يسند ضهر
ــــــــــــــــــــــــــــــــــــــ
وطلعنه بمكاسر بجي كلشي انتهه وحان السبي
لا هودج ايرد الشمس ما عدنه ضل غير العبي
أخت الكمر وبشاربه تاليهه يحديني أجنبي
عالهزل وهو أعله الرمح الكلالي كومي بشاربي
اعلي الشماته تومي بيديهه
هاي اللي عباس أكتفل بيهه
وحطها وحفضها بالنضر
طلعن ضهر يسند ضهر
ــــــــــــــــــــــــــــــــــــــ
بخيالي ينشاف الهضم حرمه وتفر بيه الهزل
واكثر جرح زاد التعب الرقه مجتوفه بحبل
كل ديره متحضر جمع يشتمنه والمدمع يهل
مهضومه زينب ياهلي من الحجي الما ينحمل
طول الدرب لخواني مشتاكه
ياكافلي الذابحني بفراكه
المشتاكه يحنيهه السهر
طلعن ضهر يسند ضهر
ــــــــــــــــــــــــــــــــــــــ
أتحسر وجان الرمح متربع بأقدس نحر
محنيه والناكه أتعرج تعبانه مو مالة سفر
وسياطهم طول الدرب تصعد وتنزل عالضهر
يتوزع أدوار الضرب مدري شجرح مدري شكسر
والليل لو جل بيه ما بيه
أفكد أضل علويه علويه
أدريهن أبناتي أبخطر
طلعن ضهر يسند ضهر
ــــــــــــــــــــــــــــــــــــــ
اتخيل الطف مو ذبح ولا جسم منكم بالثره
اتخيل وصوط العده والكاني حرمه اميسره
والشام بعتابه الشتم ويشتم ضعنكم بالسره
جلمه التحز نيط الكلب وينه الكفل ذيج المره
بحيره واصد الرمحك العالي
ومن الرمح يبرالي كفالي
ياخويه الخيال انكسر
طلعن ضهر يسند ضهر
حسين جابر السكيني
لدفن الاجساد الطاهرة #اساسية
الدفن
شأقره بصلاة الدفن/والراس ما مدفون
مدفون قسم وقسم/للمثله شيصلون
محتاره ادعيلك
مييت واصليلك؟
والراس ما مدفون
++++++++
فاتن ثلاث ايام الك بالشمس باقي حسيني
ومرن ثلاث ايام الي وآنه بحبل چفيني
هسه آنه معروفه بسبي بس وضعك امأذيني
جسمك تركته بكربله والراس اشوفه بعيني
بتراب ثوبه رجع/وأنه اسأل السجاد
دافن منو وارجعت/اعرف اهلنه ابعاد
امن ابعيد اناديلك
مييت واصليلك
والراس مامدفون
++++++++
گتله ابدفنته اتأخرت گلي صعب جمعته
كلما ارفعه حاولت ماينرفع من شلته
باقي بعد منه ورحت دورت خنصر جبته
زغران ابـوي الوحدي للگبر مـن نزلته
وهنا بدت قصّتي/وجرحي اويه جسم حسين
لا خد اوسده بترب/لا مددت رجلين
كتله اشأسويلك
مييت واصليلك
والراس مامدفون
**
للقبله اوجّه ياطرف من الحصيره واجري
حكم الدفن للبالسحگ صدر وگفاه متذري
اندليته نحره من نطق وسد رضيعي الصدري
ضليت ادور عالصدر گال الصدر ضل حدري
ناشدني راسي شعجب/ماجبته يبني وياك
گتله اويه زينب بقى/يحرس بناته اهناك
وارقيه تشكيلك
ميبت واصليلك
والراس مامدفون
+++++++++
اختك يبعد اختك صبح كلشي غريب ابدونك
گالولي عنك مندفن وگبالي اشوف اعيونك
تدمع اذا ضربو طفل وبرمحك ايهزونك
هسه انت ميت منأسر يحسين شيسمونك
راسك اشوفه عدل/بس جسمك ابلا روح
بثنينهن ماكو امل/مدفون لو مجروح
چم فاتحه اهديلك
مييت واصليلك
والراس مامدفون
++++++++++
حته بدفنتك تختلف يالمختلف عن كلها
سكنه ورباب يسولفن ياعمل نهدي اتگلها
نقره الحمد دفعة بله عن راس ابوچ اتگلها
وننوي الصلاة الخنصره ونشا الله يقبلها
ياخويه جرح الحبل/يلچمني وتوضيت
الكل وصله منك فرض/لميتك وصليت
دمعاتي توميلك
مييت واصليلك
والراس مامدفون
+++++++++
ياوحشه لبدرب السبي والمندفن هنياله
ياريته طولي مندفن وما شاهدوله خياله
بالكوفه وبمجلس زلم وگفوني خويه گباله
رسك ابطشته ويلتفت من سوطه بيده الشاله
تحميني وانت بطشت/وآنه استعذ بالراس
من شر سياط المتن/ومن نظرة الحراس
تسمعني واحچيلك
مييت واصليلك
والراس مامدفون
ثائر الربيعي
بعالم جمالك..طاف الأحساس**
ولحظة وصالك..جنت الناس**
عيوني اتفرفح ابعشگك*
توئم روحي وتشبگك..*
سومرني الهوى من جدمي للراس*
..............
شملاك..وصف والخال البخدك...وشم لاك
شملاك..حلم يلتم شمل عبدك...وشملاك
شملاك..أذا عالگاع مر جدمك... وأشم لاك
(عطر صدگ تفطر روح بيه)
تسبيحة أمل عشتك..
ليل العاشگ اسهرتك..
مرني تسيورة ضوه ابليل الخيال*
والله أطش نجم السعد لجلك تعال*
هيچي لو عندي بخت واحضى ابوصال*
ضامي وابطاريك أحس ماي الزﻻل*
أعرف أنه أخرتك..
بسهام الذنب صبتك..
سومرني الهوى من جدمي للراس*
..............
لا طاب..جرح فرگاك مو خزن..وﻻ طاب
ﻻ طاب..ذبل غصن العمر بعدك..وﻻ طاب
ﻻ طاب..سكنت ابگلبي يالمهدي..وﻻ طاب
(شخص غيرك عليه يأبن الزچيه)
أحلم أگعد ابختك..
يا اجمل حلم شفتك..
أدفن ابجرف الرمش دمع الحنين*
خايف ايمر العمر تگضي السنين*
الينتظر غايب يعيش اشگد حزين*
أرجع انمشي بخت أم البنين*
عيوني ابشوگ ناطرتك..
هاي الجمعه بس ردتك..
سومرني الهوى من جدمي للراس*
....................................
وعيناك...سوالف مشتهه وملگه...وعيناك
وعيناك...رماد الطف ترس گلبك...وعيناك
وعيناك...لكون احمل قذا ابعيني..وعيناك
(وانوح اعله المشو بالغاضريه)
هواي اجروح لچمتك..
اولهن جرح عمتك..
انه احس طعم العطش كون ارتويك*
اشكبره بخته اليرتوي اميه امن أيديك*
ولو ادري اسهام ذنبي كلهه بيك*
رغم عيبي وبيّه قابل من اجيك*
واضح وانه ما شفتك..
يمي وانه دوّرتك..
سومرني الهوى من جدمي للراس*
.................................
وهج بيك..اعمه الما يحس گلبه...وهج بيك
وهج بيك...لكون اعشگ صدگ اشرد... واهج بيك
وهج بيك...اريد انجن واريد اصرخ..وهج بيك
(واخلي احروفك ابگلبي هويه)
بسوالف انه واهويتك..
سمعت وصحت حبيتك..
عالسمع يالمهدي حبيت وهويت*
وگلبي سلمته الك طابو ورضيت*
فجر عشاگ ابزغت بيه وضويت*
وابجمال اسوالفك انه اكتفيت*
الجوارح كلهه رايدتك..
ظماير حيل عاشگتك..
سومرني الهوى من جدمي للراس*
.........................................
وهم بيه..احسّب خاف ما اشوفك..وهم بيه
وهم بيه..خطيه الما عرف دربك...وهم بيه
وهم بيه..عمت عينه وحجر گلبه..وهم بيه
(كفر بالله النكر ابن الزچيه)
بخيال ابصحوه ماشيتك..
طريق الربك اقريتك..
اليفهمك يعرف اسباب الجمال*
بگلبي فارشلك هلا وحب ودلال*
واحة انته والبشر كلهم رمال*
كامل انته وتحتوي كل الكمال*
شحلاتك روحي راسمتك..
تعال اسنيني ناطرتك..
سومرني الهوى من جدمي للراس*
علاء المياحي
الفاتحه لروح والدي
قصيده لدفن الاجساد
.....
بيدي دافن روحي لو دافن حبيبي
بويه بعدك الحزن صاير نصيبي
ابوي/ بيدي دفنيته ابوي / وذر لميته
'''''''''''''''''''' '''''''''''''''''''''''''''''''''''''''''' ''''''''''''''''''''''
الابو لو راح خـالي يـضل مـكـانه
وآلي عاش بحضن ابوه سيد زمانه
وانه مــن دون الـخلق ياعالم انه
شفت ابوي حسين صاير
وذر شايلته الحوافر
وماآله واحد مناصر
مثلو تمثيل بحسين الاعادي
جسمه مطشر على طول البوادي
ابوي / بعيني نضريته ابوي/ وذر لميته
'''''''''''''''''''' '''''''''''''''''''''''''''''''''''''''''' ''''''''''''''''''''''
كربلا لازلتي كرباً عالهواشم
كربلا يالبيج ضيعنه الفواطم
حسين مسلوب الثياب بدمه نايم
خنصره خبريني وينه
ليش ابوي مكطعينه
وبالحوافر دايسينه
حسين بطف كربلا صدره مضيفه
يشلع ضلوعه ويروح الي يضيفه
ابوي / نحره صينيته ابوي / وذر لميته
'''''''''''''''''''' '''''''''''''''''''''''''''''''''''''''''' ''''''''''''''''''''''
معتني ادفن الاجساد الخضيبه
وكلبي عاشر حسرته ومامل نحيبه
قبل اشكم يوم عمتي هنا غريبه
مالها خيمه التلمهه
منهه راحت كل زلمهه
السوط واصل العضمهه
بهالمكان شكثر وكفت عمتي زينب
حايره وخيمها بالنيران تلهب
ابوي / بروحي ناديته ابوي / وذر لميته
'''''''''''''''''''' '''''''''''''''''''''''''''''''''''''''''' ''''''''''''''''''''''
بدمعتي اتوجهت صوب الشريعه
عمي طايح يمها وجفوفه كطيعه
يابوفاظل باليسر هسه الوديعه
ياجسد بخير هيه
راسك يحامي السبيه
جيت آدفننك بديه
ياجسد بس كلمه اكلك بدمعة العين
زينب ام الخدر طبت بالدوايين
ابوي / راسه خليته ابوي / وذر لميته
'''''''''''''''''''' '''''''''''''''''''''''''''''''''''''''''' ''''''''''''''''''''''
ياأخوي شكد صغير وذابحينك
اكبر امن الطف يعبدالله سنينك
من محالب امك انته فاطمينك
سهمك سنينه جبيره
وانته سنيك صغيره
طفل بس متروس غيره
شفت ابوك وكلت لازم انطي نحري
والسمه تكلك تعال اغفه اعله صدري
ابوي / الكوم واليته ابوي / وذر لميته
'''''''''''''''''''' '''''''''''''''''''''''''''''''''''''''''' ''''''''''''''''''''''
علي محسن الفرطوسي
گوّاك الله وحدك جـــاي دفان
زين اوياك ماجبت ام الاحزان
وسّــــد يبني عبد الله اعله صدري
وسلّمني اعله اخيتي وگلها اصبـري
ــــــــــــــــــــ
ثالث يوم هذا اعله الثره حسين
واصحابه واهل بيته المطاعين
اجساد وعليها ساحگه الخيــــل
والروس انسبت وي النســاوين
حاديها الشمر والوالي مجتوف
من تنطك سبيه اتديرله العيــن
طب للكوفه مگيود
و رد الكربـله اردود
يسمع صوت ابوه اصبـــــر يذخري
وسلمني اعله اخيتي وگلها اصبري
ــــــــــــــــــــ
شاف الناس ملتمه اعله الاجساد
وحزن العاشر اعليه والهظم عاد
گلهم ساعدوني بدفن الانصــــار
ابوه وخيمته شافاهم ارمــــــــاد
شبگ عالاكبر يصيح ويشم بيــه
عفتني والاخو الهاليـــوم ينـــراد
مشه الوالده ايلم بيه
وجن گلبه يحاجيـــه
كسر ظهرك اشد من كســـر ظهري
وسلمني اعله اخيتي وگلها اصبري
ــــــــــــــــــــ
مثل لم الخرز لم جسم الحســــين
يشم كل وصله منه ويشتكي البيه
ماظن بويه اوصل عدل للشــــــام
ابنك ماكو من هاي اثگل اعليــــه
شم نحره وسمع من النحر صوت
عبد الله اعله صدري اوليدي خليه
خفت يافاكد الحيــــل
اخوك اترضرضه الخيل
ادفنه بسهم نحـــره اتهظمك ادري
وسلمني اعله اخيتي وگلها اصبري
ـــــــــــــــــــــــــــــ
الاكبر يبني يم رجليّه جيبـــــه
وروح العمك وشوف المصيبــه
مثلي امكطع اخذ الباريه اوياك
لم اوصاله واجفوفه الخضيبــه
ولو ينلجم بس اشكيله بلــواك
وگبل المغرب ارجع للغريبـــــه
گلبها اعليه مفتــوت
ومن اتفكدك اتموت
اظل امتاني جيّتكم الگبـــــــــــري
وسلمني اعله اخيتي وگلها اصبري
ـــــــــــــــــــــــــــ
تفاصيل الدفن للفاجده الراي
لاتحجيهن ومن تبجي بهداي
العلويات لمهن كلهن وكــــــول
ابوي حسين مشتاگلجن اهواي
وگل العمتك لو جابت الروس
اذا تكدر ترش اعله الگبر ماي
گللهم يدفـــــــــــــــان
دفنت حسين عطشان
ورقيه الجيّتي گللها انطـــــــــــري
وسلمني اعله اخيتي وگلها اصبري
ـــــــــــــــــــــــــــــ
علي محسن الزيادي
گعده للدفن
.
.
.
يالتهلـــين دمــع العــــيون
لاتنــطـــريـن مــايــــردون
مالهم ياعـمه جيه
انه دافنهـم بديــه
لاتنطرين
***
وجهت للخدر وجهي وسلـــمت لدمــوعچ امري
وراح اسولـفلـــچ الشـفته لچــن ياعمـه اصـبري
شفت بالطف العـجايب اي بحيث انكسر ظهري
شفت لحسين اعله الثره بس شفته جثه امطشره
شــيـرده يـــــالمتـــنطره مايـــرد يابــــعــد عمـري
يرجـــع حـسيــن لاتظــنـين
وبيدي لميت جسم الحسين
عمــه والبالغاضريه
انا دافـنهـــم بديــه
لاتنطرين
***
يم خدر ماشافه احد ويم ستر ماكو نظيره
حقچ اتنطرين اخوتچ سالفت متنچ چبـيره
رايــده تگـولــين الهــم تره زينبـــكم اسيره
لكـن حـقيقـة هالامر عــباس منــچ يعتـذر
وحسين مايگدر يمر هسه لميته بحصـيره
من دفنهـــم تونــي رديـت
بس يعمه هنــاكه شلگـيت
منظر اهلي اشسوه بيه
انــه دافنــهــم بـــديــه
لاتنطرين
***
اوصلت للطف والتقيت بناسي بس كلشي تغير
عمـه ماچنهم اهلـــنه ذبلو امـن الــشمس والحر
لا القــاسم لا ابـــوفاضل لا الأكـــبر وأبــو الأكبر
ذيج البدور الساطعه فــوگ التــراب مــوزعه
لــكن يعــمه الفاجعه شفت جثـة علي الازغر
الغافـــي عطـــشان بالدللـــــول
راسه مگــطوع ومرمي بالچول
على صـدر احسين ابيه
انه دافــنـــهــــم بديـــه
لاتنطرين
***
ادري شتريدين منــهم والـتريديـنه حچـيته
حبل اديچ وسـوط متنـچ هذا كله مانـسيته
وبالنــيابه عن عيونچ مــدمع عيوني جريته
وما ســولفت كــل الامر احچيت بس عشر العشر
ولا ماجبت طاري الشمر خـاف الچــمهم جزيتــه
عمــه تــدرين كلـهم اجــروح
والحچي البيچ هوايه مملوح
ما يحملون الاذيه
انا دافنهــم بديــه
لاتنطرين
***
بعد مــــيردون أيـــسي مايجــونچ يالـــعقيله
وغــير صبرچ ماكـو عدنه والله ياعمه وسيله
السالفه ادريها صعبه ســالفت ســبيچ ثكــيله
عگب العفــاف الزينبي المثلچ وسافه تنسبي
المـــشتكى لله والنبـي ياخدر اشـرف قبيله
وســفه وســفه هالـــعــبايه
تطلـــع اليوم ابـلايـه رايــه
ومختصر هاي القضيه
انا دافنـــهــم بـــديـــه
لاتنطرين
***
حيدر تركي الكربلائي
ليلة الوحشه
.
.
.
لا مخـــيم لا محـــامل ** يابوفاضل يابوفاضل
خويه يابـدر العشيره
الليله علويتك اسيره
يابوفاضل
__
بيمن ابـدي .. والسـوالف
بيهن ازغر وحده خويه بگد رقيه
ترضه بــيها .. يابو فاضل
مــن اعــيون الوادم اتـــستر بديه
ياعمود الخيمه عگبـك كلشي طاح
الوكت ذاك المحد ايـشـاهدني راح
ذيچ زينب والشــمر بالجيش صاح
والــعــيـون تـــفتــــحت بيـــــبانهه
وبعباتـي النــار تلهب ** وكلها صاحت شفنه زينب
والله يابوالغيره حيره
الليله علويتك اسـيره
يابوفاضل
__
روحي حنت .. وعتنيتك
الجابني شــوگي يخـويه للشريعه
احمي اختك .. مـا اگلـك
شلون تحميني يالچفوفك گطيعه
اطفوف قبل شويه مو ذيچ الطفوف
بطيحة چـفوفك تره شاخت اچفوف
وعالخــدود انطبــعت وريتك تشوف
مـــــن درو زينــــب بـــلا كـــــفـــالها
فوگ الرماد گعدوني ** وبعطركم ذكروني
والمـن النــاظر تديره
الليله علويتك اسيره
يابوفاضل
____
يابوفاضل .. وغيرة الله
الليله وحشه وانه حرمه ابلايه والي
وللشماته .. عيون صلفه
ويــن اروح ومحـد امــن اهلي بقالي
ياضــرانـه البــيك چنـــه محــتــمين
الـخيل من هبــت صفــينه مطشرين
من اعتله شــمر الخنه صدر الحسين
فــزعت اعلـيـــنه ركــض جـــيــمانها
متني بالسوط من يضربون ** يابوفاضل شو يضحكون
الناس ذوله ابـلايه غيره
الليلـه علــويـتك اسيـره
يابوفاضل
_
مااعـــاتــب .. لا وحـــــقك
ضاج صـدري وجيت اسولفلك يرجواي
امتوني ورمت .. من ضربهم
الصادفني الــيوم خـويه كـــلش هـــواي
الجيش ليش بموتتك چن عنده عيد
وصــفـدو ايــدينه خويـــه بالــحديد
باچـــر ايـــسوقـــونه مـــثل الـعــبيد
ويلــي والغـــربه تــشـوف اوجوهــنه
يابوفاضل على بختك ** بلا كفاله تمشي اختك
كسرتي كســره چبيره
الليله علـويتك اسيره
يابوفاضل
____
هــــذي اول .. مــره خــويه
اتبات زيــنب اخــتك ابلايــه حمايه
البارحه وين .. اوين هاليوم
اليوم خــويه عيــونهم تـفــتر ورايه
ولو ليله ارجعلي يالگلــبك حــنين
حتى مايضربــني بالســوط اللعين
خويه بالطف صــار مـمنوع الونين
التبـچي گــول تـــزورگن متـنيــنها
كلشي ممنوع حتى الدموع ** تبچي بسكوت العدها مصروع
منو عندي واستشيره
الليله علويـتك اسيره
يابوفاضل
____
حيدر تركي الكربلائي
اعظم الله لك الاجر سيدي يابقية الله ياصاحب الزمان روحي واروح العالمين لك الفداء
اعظم الله لكم الاجر باعظم مصيبة جرت في الارض والسماء وحلت على قلوب ال محمد ذكرى استشهاد الامام الحسين عليه السلام ذلك اليوم الذي بكى على الحسين ما يُرى وما لا يُرى
نسال من الله ان يتقبل عزاؤكم ويرزقنا واياكم زيارته في الدنيا وشفاعته في الاخرة💔
ناگه عرجه ومن تميل الناگه أخاف
أمربطه بحبل السبي الحد الجتاف
إيطيح گلبي من تميل الناگه بيه
ياهوان الدنيه زينبكم سبيه
وآزينباه ➖وآزينباه➖وآزينباه➖وآزينباه
⏺⏹⏺⏹⏺⏹⏺⏹⏺⏹⏺⏹⏺⏹⏺
ياما ياما النوگ مالت بيهه چم موته متت
ياهلي يهل المحنه أميسره عنكم رحت
ياأهل زينب وسافه أويه الاعادي أتغربت
شعدل أبروحي أبعباتي شلون لوبله طحت
أحسب بخطوات دربي ياهلي بعيده الدروب
ما تفاركني حسرتي من الصبح حد الغروب
والله گص الحبل حته جفوف إديه
يـاهـوان الـدنـيـه زيـنـبـكـم سـبـيـه
وآزينباه ➖وآزينباه➖وآزينباه➖وآزينباه
⏺⏹⏺⏹⏺⏹⏺⏹⏺⏹⏺⏹⏺⏹⏺
وين جانتلي أسيره أعله الهزيله أويه العده
أبيا عبايه ما دريتو أمشگگه ومشدده
ياگلب زينب تفلش الله الله إيساعده
خشنه الحبال البديهه وبيهه حيل محدده
روحي يم الراس صارت يبجي جن أعليه جاي
ومره أشوفه إيسد عيونه من يجي السوط بگفاي
إيميل عن رمحه ويجي يكرب إليه
يـاهـوان الـدنـيـه زيـنـبـكـم سـبـيـه
وآزينباه ➖وآزينباه➖وآزينباه➖وآزينباه
⏺⏹⏺⏹⏺⏹⏺⏹⏺⏹⏺⏹⏺⏹⏺
بت علي والناس تدري وسامعه أبذاك الخدر
أشگد يقسمون بخيالي عدل من جان البدر
هسه بين النوگ ألوذ أبيا وكت وطلب ستر
زجر يحدي الناگه مره ومره يحديهه الشمر
أمن الصبح تنشد إدينه ونمشي كل ذاك النهار
شمس وتراب الصحاري گشر أوجوه الزغار
وشفت طفله تلوذ بكتاري خطيه
يـاهـوان الـدنـيـه زيـنـبـكـم سـبـيـه
وآزينباه ➖وآزينباه➖وآزينباه➖وآزينباه
⏺⏹⏺⏹⏺⏹⏺⏹⏺⏹⏺⏹⏺⏹⏺
يحدي بينه الحادي ركضه أشكد تعبت وما شكيت
أبجي بس أبجي أويه روحي أبهيده كلش لو بجيت
إنته تدري الخدر غالي شلون لو طحت وهويت
هاي زينب فوگ ناگه حسين شوجنك نسيت
أدري بيك تشوف حالي لاجن شبيدك يصح
هود وضل بمجانك خاف ياذيك الرمح
الناس تتفرج يبعد أختك عليه
يـاهـوان الـدنـيـه زيـنـبـكـم سـبـيـه
وآزينباه ➖وآزينباه➖وآزينباه➖وآزينباه
⏺⏹⏺⏹⏺⏹⏺⏹⏺⏹⏺⏹⏺⏹⏺
يارقيه ياسكينه أتجمعن صار الضلام
هاي هيمه وأحنه نسوه لا ستر عدنه وخيام
خيمه نبني من عبينه حته داخلهه ننام
أمن الفجر نگعد سويه أنخاف من عين الحرام
والله وسفه أبنات حيدر تنضر عليهن غرب
عمر زينب خلص منهه وماخلص ذاك الدرب
تكسر الخاطر وحگ راسك رقيه
يـاهـوان الـدنـيـه زيـنـبـكـم سـبـيـه
وآزينباه ➖وآزينباه➖وآزينباه➖وآزينباه
⏺⏹⏺⏹⏺⏹⏺⏹⏺⏹⏺⏹⏺⏹⏺
الشام وين الشام صارت يادربها شگد طويل
صدعت گلبي رقيه أشگد تطيح أمن الهزيل
أتخاف سكنه وبالي يمهه الناگه لو ضلت تميل
تختنك بالعبره روحي لو شفت حال العليل
نسوه وعليل ويتامه كلهم برگبه مره
فوگ الحبال البديه أبها العيال محيره
أبنات فاطم فرجه لعيون آل أميه
يـاهـوان الـدنـيـه زيـنـبـكـم سـبـيـه
وآزينباه ➖وآزينباه➖وآزينباه➖وآزينباه
⏺⏹⏺⏹⏺⏹⏺⏹⏺⏹⏺⏹⏺⏹⏺
حسين باهض الحلفي
تانيتك ــ لمن كطعت ضنوني
تانيتك ــ عذراً يبعد عيوني
ابصف الهزيله وعيني عالنهر
گلولي صعدي مايجي الگمر
÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷
ينكسر خاطري ــ ﻻ كافلي ﻻ ناگتي ﻻ محملي
يابعد ناضري ــ لسه اعله بالي جلمة اتدللي
انته هذا الجاي لو هذا سراب
والامل زاد الگلب لوعه وعذاب
ردت اشوفك والله ماعندي عتاب
بعيوني ــ صورة كفيل ورايه
بعيوني ــ مرسومه المسنايه
هم وتجي ويجيبك الدهر
گلولي صعدي مايجي الگمر
÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷
عاينت ماشفت ــ ذاك الگمر ذاك الفجر ذاك الضوه
من الخجل دنگت ــ لاجن گلت يمكن نسه امن ارتوه
هذا مو طبعك اصيح اوما تجيب
جان جرحك من همس صوتي يطيب
ماكو حاجه يحشم اهواي الحبيب
انفاسي ــ جنت اشركك بيهه
انفاسي ــ بخدر اختك اتوصيهه
صوتي وسف يم شامتي ضهر
گلولي صعدي مايجي الگمر
÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷
بيدي صار الحبل ــ وگبال شامت نزلت دمعتي
ماشفت من قبل ــ وادم غرب متجمعه بخيمتي
صاح واحد بت علي شوفوها هاي
سكينه من المستحه لبدت وراي
الشتمه ترس اذاني والصوط بگفاي
تسمعهن ــ شتماتهم والصوط المأذينه
تسمعهن ــ سكنه ورقيه يگولن امتانينه
جم مره منهن گلبي اعتذر
گلولي صعدي مايجي الگمر
÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷
گلبي بسمك يدگ ــ تاركني ليش او حاضن المشرعه
عاده اليختنگ ــ يطلب هوه والماي ماينفعه
هسه صعدت الناگه والوادم تشوف
وگام بيه الحادي عالعسكر يطوف
يابوفاضل لا تگلي ابﻻ جفوف
بنضراتهم ــ حتى الهزيله عثرت برجليهه
بنضراتهم ــ شلون ابأختكم والحبل بيديهه
كلهه عليه مسلطه النضر
گلولي صعدي مايجي الگمر
÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷
ياجروح اليسر ــ مشوني گوه وماحصلي حمه
بالحجار انشمر ــ حين اللي سمعو هاي بت فاطمه
هذا يصرخ بينه وتفز البنات
او واحد يگلي الگمر علشاطي مات
وذاك زينب صاح شلج بالحياة
ابنياتي ــ اودايع اخوك احسين كون احميهن
ابنياتي ــ صوت الشمر يابو الوفه يبجيهن
تمشي رقيه وحانيه الضهر
گلولي صعدي مايجي الگمر
÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷
ما خطر علفكر ــ ولعدهه كافل مثلي ما تنسبي
وﻻ يضيع الخدر ــ وجفوف زينب تطفي نار العبي
شفت بوجوه الحرم طبعت ادين
هاي طاحت ذيج راحت منهه عين
ذني لله اخدور مو بس للحسين
ياعمه ــ ثمانين طفله بصوت واحد صاحن
ياعمه ــ وحدتهن امنطيح كلهن طاحن
وحده عله وحده شدهن الشمر
گلولي صعدي مايجي الگمر
÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷÷
حسين باهض الحلفي
شفته بمنامي ويگلي ضامي
توني فارگتك ياضوه عيوني
وزينب اتگلي خويه ذبحوني
**
بالطيف اجاني وايده عله صدره
شلونج سألني وبگلبه حسره
انته شلونك يحسين ياخويه اضلوعك وين
بصدرك هالحفره منين اشوف
تحجي وصوتك مخنوك جا خويه شگد مسحوك
بظهرك صدرك مطبوك اشوف
تنزف جروحك وخلصانه روحك
والشمس گتلي غيرت لوني
وزينب اتگلي خويه ذبحوني
**
يحسين اشوفن اجروح بوريدك
وياخويه انشدك وين اصبع ايدك
بنحرك شفتك مطبور خويه وصدرك محفور
واصبع ايدك مبتور حسين
بالعاشر شفت الويل وشمسويه بيك الخيل
داساك الحافر حيل حسين
اشلونه ضلعك خليني اسمعك
هدمت حيلي وخابت اضنوني
وزينب اتگلي خويه ذبحوني
**
اشلوني يختي گطعولي نحري
وبعده يزينب يوجعني صدري
سحگتني الخيل اهواي عشره الصعدن فوگاي
والحافر رايح جاي جريح
من عنده اشگد مجروح يسحگني وروحي اتروح
المن ظلتها الروح جريح
عطشان اگلهم وسبوني كلهم
كسرو ظهري وخويه سحگوني
وزينب اتگلي خويه ذبحوني
**
اهنا يزينب خلوني وحدي
بسهم المنيه گطعو جبدي
الخيل التمت والناس وآنه بآخر انفاس
انده وينك عباس تعال
گامو بيه ايطعنون وحيل بصدري ايسحگون
وظلو بيه ايسلبون تعال
عباس اريده يحضر عضيده
عازته عازه من يطعنوني
وزينب اتگلي خويه ذبحوني
**
هذا يزينب برمحه طعني
وذاكه اجاني بصدري رفسني
بالطف شفت الما صار ناس بخيل وبحجار
وناس اتسب حامي الجار عجيب
يومي ما مثله يوم شمسوي الهاي الگوم
ماخلت عندي اهدوم عجيب
طعنه عله طعنه وما بيه ونه
تنزف اجروحي وخويه لجموني
وزينب اتگلي خويه ذبحوني
**
الشمر اعتناني وجاثي عله صدري
لازم لحيتي ويگطع بنحري
بنحري ظل يطبر حيل وبعيوني صارت ليل
بكل طبره شفت الويل عذاب
عانيت من الطبرات واكثر خويه الطعنات
شگد اتحمل شوغات عذاب
راسي يگطعه برمحه يرفعه
عالترب زينب مرمي خلوني
وزينب اتگلي خويه ذبحوني
**
تمت
ميثم العمري