-
هذهِ القناة لنشر قصائد اهل البيت عليهم السلام اتمنى ان تنال كلماتي اعجابكم ورضاكم ان شاءالله ❤️✨
يا دار وين الدللونه
و چلمت زعل ما سمعونه
انريدهم يمتى يجونه
و عن حالنه هم ينشدونه
مدري بطوا مدري نسونه
ابعيده الدروب و تيهونه
اويلاه و خاف اتعذرونه
((يا نارهم تحرگ ابگلبي😭💔))
✍🏻الشاعر جعفر الساعدي
وضروري تحملون برنامج vpn لاسامح الله ينقطع الانترنت وهم اشحنوا التليفونات واذا عدكم بورات للاحتياط
Читать полностью…
السلام عليكم ورحمة الله وبركاته
خادمة اهل البيت الحجيه ام ضياء اليوم عدها عملية قلب كبرى الله لايراويكم شر وماتشوفون غير العافيه ان شاء الله
وحملتني سلام اوصيه تريدكم تندعولها بالشفاء وانتم خدام الحسين واحباب زينب دعائكم مجرب بالاستجابه
فضلآ وليس امرآ لاتقصرون عنها بالدعاء
اللهم شافي كل مريض وشافيها بحق محمد وال محمد🤲
تابعوا قناة العلويه ام علي صاحبة مكتبة العليله ع عدهه توصيل لكل المحافضات
https://whatsapp.com/channel/0029Vb8UyXjKgsO28TjjdV1Q
كلامي للساكتين عن دماء الاسرى الفلسطينين 💔~~~
مشرك للخطيب بصوتهم نادوه
لان بال النبي متوســــــــل لربه~~~
گالوله شرك وانتفضــــوا وعادوه
وابن حاخامــهم هم هوس بدربه~~~
بس سكتوا جميعاً عن دماء اسلام
لا صرح رئيس، و لا ابن شعبه~~~
تسع تالاف واحد والحكم اعدام
ولد اسلام ذوله مو ولد غربه~~~
سكته يالخليج و ماكو تصريحات
لان ضد النتن تصريحهم صعبه~~~
انكشفوا عالحقيقه والغطاء الدين
وصار ابن اليهودي اليحچي بالخطبه~~~
فتواهم امرها من النتن واترامب
وتقبيل العجيزه مطلب اتطلبه~~~
لحفظ دم الشعب گالوها ويصير
بعد چم يوم واجب يفتي مو رغبه ~~~
غم كل الخليج الخاضع ومنهان
وابن الانگليزي مرتفع غَضْبه~~~
تظاهر طالع وماراضي بالافساد
بشماله والجنوب وشرقه وي غربه ~~~
رفضوا للظلم واترامب ميريدوه
احسن من ابن سلمان وي حزبه~~~
طبگ وي اللعين وصفگاله اهواي
بل هو اليحرض تستمر حربه ~~~
الشاعره ام زينب الحسيني البصراويه
الناقل الشاعر جعفر الساعدي
/channel/Jafar225
لطميه للشهداء (اسباع ومانطيتوا الحد)
أسباع وما نطيتو الحد يشجعان
او ما تكدر تكابلكم العدوان
تحزّمتو او على الظالم هجمتوا
علي ادركنه ثلث مرات صحتوا
بكلوب الدواعش رعب صرتوا
بس الكم حلت ساحت الميدان
أسباع وما نطيتو الحد يشجعان
الساحه حلت والشاجور هلهل
نشامه واليكابلكم اتبهذل
الكم تاريخ معروف أمن الأول
صرتوا انصار للمذبوح عطشان
أسباع وما نطيتو الحد يشجعان
شجعان او عدوكم خاف منكم
لوما بالغدر جا ما كربكم
يالعمر الورد بعده عمركم
عفتو اطفال رملتو النسوان
أسباع وما نطيتو الحد يشجعان
تسوون المناحه يا نشامه
عفتوهه النسه أو عفتوا يتامه
أنه امك يالولد ليلي منامه
اون من فركتك والكَلب خلصان
أسباع وما نطيتو الحد يشجعان
تون أمك عليك او تجر حسره
اتكول اعلى الولد كلبي اشيصيره
يناس الفارك ابنه ايتيه فكره
او ما يندل طريقه ايصير دوهان
أسباع وما نطيتو الحد يشجعان
✍🏻خادمة أهل البيت عليهم السلام
الشاعره ام شيماء الناقل الشاعر جعفر الساعدي
غير مبري الذمه من يحذف اسم الشاعر او ينسب الرثاء لشخص اخر
/channel/Jafar225
يالغايب ولا غايب مِته صبرك تودعه
ما صدكَ بقيع الهم ينادي ولا تسمعه
عايش باتنظارك … ما تشهـر فقارك
نِزف جرح البقيع وبانت اعلومـه
اذا مجروح يعتب مـحد يـلومـه
يبو الثارات ثارك ما إجـه يومـه
إلك أربع قبور اهناك مهدومه
أغصان الامل يبست بقت تنظر ربيعك
حتى الما يحب يسئل تعال ابني بقيعك
ملهوف اعله ثارك … ما تشهـر فقارك
السلامُ على ائمة البقيع ائمة الهدى واعلام التقى 💔💔
لطميه للخميسات (ومانسينه احبابنه)
الليله جمعه ومانسينه احبابنه
واكفين امن الصبح يم بابنه
ركعه يردون وثواب
وبيهم شسوه التراب
ضلو ايصيحون حار اترابنه
واكفين امن الصبح يم بابنه
صابحونه وياهله بمصباحهم
صاحو ومحد ايسمعه اصياحهم
دكت الباب وتون ارواحهم
كالوا اعزاز الكلب
انريد نرجع مانطب
وكالوا الشوك النزلكم جابنه
واكفين امن الصبح يم بابنه
كالوا الشوك اليجرنه كل خميس
وحشه ذيج اكبورنه وماكو ونيس
والرمل يتلف الناعم من يجيس
والجفن راكد علينه
ليش ماواحد يجينه
نعتب وماوصل خط اعتابنه
واكفين امن الصبح يم بابنه
نعتب اعله المايمر بكبورنه
واحنه نعلم باليجي ويزورنه
وينكم يامن سكنتو بدورنه
عاد اذكرونه بصلاه
لو ازياره لو زكاه
امصوبين امن الافراك اصوابنه
واكفين امن الصبح يم بابنه
روحنه بسهم الافراك امصوبه
والمعاني امن السموم امخربه
اشلون ينسانه الكعد يمنه وربه
العدل حزنه كصير
مادره اعلينه شيصير
ومانشد عن حالنه ودولابنه
واكفين امن الصبح يم بابنه
مانشد عن حالنه ليش العدل
بعد مانعتب ومن نعتب يمل
وين لمتنه العصر وين الشمل
الشمل ماضن يعود
شلنه عنكم للحود
بعد مايكضي طويل اغيابنه
واكفين امن الصبح يم بابنه
الاغياب اسنين مايكضي يطول
بالكم تنسون حيدر والبتول
همه بس همه اليعدلون الحمول
والمناحه والونين
مو لهلنه للحسين
عله امصابه اللطم مو لمصابنه
واكفين الصبح يم بابنه
✍🏻خادمة أهل البيت عليهم السلام
الشاعره ام هجران الناقل الشاعر جعفر الساعدي
غير مبري الذمه من يحذف اسم الشاعر او ينسب الرثاء لشخص اخر
/channel/Jafar225
هوسات للشهداء رضوان الله عليهم
الشهادة ما هو كل واحد ايحصّلها
الا اليّ اله ربه امسجّلها
بخيت النالها او كون اللّٰه قابلها
او باب الجنه اله فتحوه او طب الها
وايشوف الرسل والانبياء كلها
((اهلا بجاي ايكَلوله))
الموت واحد والأسباب اتعدّدت
او بين هاي او ذيج وادمنه كَضت
يا سعد حظك شهيد انته متت
فخر بالدنيه او جنّه حصّلت
ارفعت راس امك وابوك استشهدت
فاطمة تبجي اوياها لو بجت
((الزهره اعليك اتعازيها))
فاطمة الزهرة تعازي أم الشهد
اتكلها حقَّج هذا وآنه حق اريد
ساعديني اعلى انبي محزوز الوريد
((مظلوم احسين او بجّاني))
وكف عالساتر النشمي او صاح صوت
يالله طلعوا ياللّبدتوا بالبيوت
لو اسحكَ راس الدواعش لو اموت
((والكَابلني ايشوف افعالي))
يالله طلعوا كابلونه لا تغدرونه غدر
لو امكابل كل حربنه ايصير مضمون النصر
جا خسر داعش آلاف او ما خسرنه احنه نفر
احنه حيدر علمانه اشلون نهجم عالكفر
يا هو النشوفه يخوّف يكدر أو ما ينكَدر
لو يلزم رشاشة بيده او صاح لا وين المفر
الموت ينساه عزمه يشتد من تهلهله السمر
((يطرب والماو ايغنّيله))
يبن الهور يالواكف على الساتر
يحامي العرض وامك بيك تتفاخر
تحمّلت العطش الجوع او تعبك والبرد والحر
الف حياك حيّ زودك يسبع البر
((المثلك وسفه ايخسرونه))
عراقيين واسباع او غياره احنه
داعش مشتبه ما ينوخذ حقنه
امن اسمعنه بنات السلف ينخنّه
احنه اخواتكم وانتم أخوان إلنه
نعيّركم ترى لو طاحت أشيلنه
((الزود الكم يهل الغيره))
تره ابليه الملح موحلو الطعام
المجلس الما بيه ذكر لحسين ناقص مو تمام
عطّروا الافواه بسم احسين مصباح الظلام
ابجوا لطموا حيل صيحوا خل يسمعون اللام
((احسين انحبه او ما ننساه))
سفينه للنجاة احسين ينجه الي صعد بيها
سلام اللّٰه اعلى أبو السجاد أحبه روحي اله أفديها
لو ما دمه جا هسه الفريضه ما نصلّيها
((الدين ابدمه اتشيّد واعرفناه))
✍🏻خادمة أهل البيت عليهم السلام
الشاعره ام شيماء الناقل الشاعر جعفر الساعدي
غير مبري الذمه من يحذف اسم الشاعر او ينسب الرثاء لشخص اخر
/channel/Jafar225
لطميه للزهراء عليها السلام ( ايصير مثل امي )
محد بالمحنه ايصير مثل امي
تشيل الضيم عني وتشرك بهمي
حنينه وما نمل من لذت ارباها
ودولاب ويهد الحيل فرگاها
اليوم الروح محتامه اعله ملگاها
صار النوح يمه والبچي همي
محد بالمحنه ايصير مثل امي
اجيت الدارهه والدار مسدوده
ناشدت النزل والروح ممروده
وين ام المحنه وليش مفگوده
عليها انعاب گلبي وانهدم عزمي
محد بالمحنه ايصير مثل امي
عليها انعاب گلبي وجايه اگعدهه
شفتهه حملت وايست من عدهه
واصيح امي يشيال النعش ردهه
اون لفراگهه وظل الدمع يهمي
محد بالمحنه ايصير مثل امي
اون لفراگهه والعين لعميهه
نزلتي المگبره والدار عفتيهه
عدنه اهموم عگبچ وين نشكيهه
صار النوح يمه والبچي سهمي
محد بالمحنه ايصير مثل امي
بعدنه ابعازتچ مانحمل الفرگه
مالوم الگلب لو راد الچ حگه
امحمله وشايله وهيهات للملگه
صار الحيل ناحل وانخطف دمي
محد بالمحنه ايصير مثل امي
باد الحيل عالعدله محاچيهه
واذا صار العصر راد الگلب ليهه
اجيت الدارهه وانشد مبانيهه
شفت انزولهه وحشه ونحل جسمي
محد بالمحنه ايصير مثل امي
ظلمه انزولهه والدار حزنانه
ونيت وصحت والروح خلصانه
وين العاشرتنه وگعدت اويانه
لحگت اضعونهه لمن تعب جدمي
محد بالمحنه ايصير مثل امي
✍🏻خادمة أهل البيت عليهم السلام
الشاعره ام هجران
غير مبري الذمه من يحذف اسم الشاعر او ينسب الرثاء لشخص اخر
/channel/Jafar225
الدعم الحسيني الزينبي دعم القنوات الحسينيه الملتزمة وعدد مشتركيها لا يقل عن 500 مشترك من أفضل القنوات على التليكرام تنشر السته يوميا ثلاث مرات ساعتين كل مره ويتم الحذف من القناة يكون الحذف من خلال البوت بعد انتهاء الوقت للاشتراك راسلنا على الرابط 👇👇
/channel/Abas747
لطميه لشهداء الحشد الشعبي (الله واكبر)
اللـــــــــه واكبر كل حشدنه ناده
لا مـــــا يهاب الموت الهم عاده
لا ما يهاب الموت وسط الهيمه
ابنص البوادي لا ذره ولا خيمه
أصحاب غيره ذوله اهل الشيمه
بالصحره ناموو للعــــدو صياده
اللـــــــــه واكبر كل حشدنه ناده
صــــــياده الهم صولت المعروفه
واحدهم اصحاب الحسين تشوفه
راية محمـــد عل جثث ملفـــــوفه
للوطــن ارگاب الحــــــشد سداده
اللـــــــــه واكبر كل حشدنه ناده
للوطـــــن نادوا هالرگب ننطيها
رايـــــة علي فوگ السما انعليها
صــــــولة حسين اعالكفر سميها
من عزم ابو السجاد سيد الساده
اللـــــــــه واكبر كل حشدنه ناده
من عزم ابـــــو السجاد ميگربونه
كـــــل والده وشيــبه نگر اعيونه
الما جابته امه انشوفه احنه اشلونه
نسحگ جثث ونصيح بعد ازياده
اللـــــــــه واكبر كل حشدنه ناده
نسحگ جثث لا ما تفض لِطلابه
احنه الليــــوث الكاسرين الغابه
حجر وبرير وجون همه اصحابه
نادي ابإسم ابطال ذولــي القاده
اللـــــــــه واكبر كل حشدنه ناده
نادي بإسمهم خل تضيگ ادروبه
بالمحشر ايطلعون كل اعــــيوبه
نار المسعره للكــــــــفر منصوبه
تحرگ جثثهم تحصد الحصاده
اللـــــــــه واكبر كل حشدنه ناده
✍🏻خادمة أهل البيت عليهم السلام
العلويه ام وليد
غير مبري الذمه من يحذف اسم الشاعر او ينسب الرثاء لشخص اخر
/channel/Jafar225
نعي لليالي العيد
ياعيد لاتجهب نزلنه
محزنين عالشالو بعدنه
وبدارهم ماهمه اهلنه
شلون عيده الشالو اهله
بس المناحه عليه تحله
وعيدك مبارك لا تكله
الفاكد عزيز شلون عيده
محتام ملكه اهله يريده
مشو وايام ملاكهم بعيده
شيعودهم صارو بعيدين
واحنه عالفراكهم محزنين
حسره الشوفهم والدمع بالعين
ليمت يرد الوكت بيهم
عزاز ونريد انروح ليهم
ندك بابهم وانطب عليهم
ياناس جان العيد محلاه
ويه الحنين وذاك ملكاه
فاركنه الفرح من فاركيناه
الفاكد احباب يلوكله النوح
شيطيب دليله بجرح مجروح
والبيه جرح للمكبره يروح
يروح ويكلهم حيل مشتاك
عنيتو علينه والكلب طاك
ردونه وكافي من الفراك
الفاكد يون وينوح خليه
تره العيد من يجبل يبجيه
يذكره بهله يوم اليمر بيه
✍أم زينب كربلاء غير مبري الذمه من ياخذ الكلام وينسبه له اويحذف الإسم
/channel/Jafar225
الامن والامان ياصحاب الزمان
اكثروا قول هذه العباره واسألوا الله تعالى ان يعجل بظهوره الشريف😔❤️
نداء
و دعوة عامة
للمؤمنين حول العالم
لإقامة صلاة الاستغاثة بالإمام الحجة
(عجّل اللّٰه تعالى فرجه الشريف)
وقراءة دعاء التوسل
بنية تعجيل الفرج
ونصرة الإسلام والمسلمين
الثلاثاء | 7:00 مساءً | بتوقيت كربلاء
لطميه مربعه لوحشة حضرة السيده زينب عليها السلام (وحشه ثنيتهه)
اليوم ام الحزن … وحشه ثنيتهه
يردون العده ايهدمون حضرتهه
وحشه وفارغه ضلت مبانيهه
يگولون العده محد يطب ليهه
عد زينب رساله ومن يوديهه
بيهه اهموم واعتاب اعله خوتهه
اليوم ام الحزن … وحشه ثنيتهه
عد زينب رساله ومن يوصلهه
بيهه اعتاب للعباس كافلهه
ايگله اشلون نايم ماتروحلهه
رد ليهه العدو يجدد مصيبتهه
اليوم ام الحزن … وحشه ثنيتهه
رد ليهه العدو وشلون يارده
هدم حيلهه وباب الصحن سده
يا عباس زينب طاحت بشده
اگعد يالكفيل وشوف محنتهه
اليوم ام الحزن … وحشه ثنيتهه
اگعد ياكفيلي ابداعت الخوه
تعال وشوف وياي العدو شسوه
هضمني ويمنع الزوار بالگوه
وروحي اهواي محتامه اعله شيعتهه
اليوم ام الحزن … وحشه ثنيتهه
روحي اهواي محتامه اعله زواري
سد بابي الوهابي ومنع خطاري
ياعباس تسعر ماطفت ناري
وعيني لهالمصيبه اتسيل دمعتهه
اليوم ام الحزن … وحشه ثنيتهه
ماجف الدمع والنوح ما اگطعه
ياعباس وينك گوملي بسرعه
عليك ابداعت امي فاطمه البضعه
احلفك بالضلوع و ذيچ سطرتهه
اليوم ام الحزن … وحشه ثنيتهه
احلفك بالضلوع وداعت الزهره
اگعد ياكفيلي وحامي الحضره
يكلهه اشلون لايمنه ولا يسره
وتلچم ونتچ هامتي وطبرتهه
اليوم ام الحزن … وحشه ثنيتهه
✍🏻خادمة أهل البيت عليهم السلام
الشاعره ام ريام الناقل الشاعر جعفر الساعدي
غير مبري الذمه من يحذف اسم الشاعر او ينسب الرثاء لشخص اخر
/channel/Jafar225
تابعوا القناة على الواتساب خوفًا من إغلاق التلگرام 👇🏻🤎
https://whatsapp.com/channel/0029Vb7T1auKLaHj3XZE5B12
اليوم النبي دمعه يهله
يعتب عله عمه و يگله
اتطول الغيبه و موش سهله
و افراگ وجهك مو محله
(( و كلهه اعليك ايونن // دين الباري و قرآنه ))
عظم الله اجورنا واجوركم💔
الشاعر جعفر الساعدي
"اللهم كما أنعمت فتمم، وكما أعطيت فبارك، وكما أكرمت فزد."
الشاعر جعفر الساعدي😌🤍
#حصريا_من_ديوان_الحروف_الجعفرية_ج۱
لطميه بهوسات للأخت (خالة ابني)
خالة ابني و حيل يوجع يومهه
بالترابه اتنام وسفه ارسومهه
حيل يوجع يومهه و ما نحمله
بالترابه اتنام وسفه ام الهله
تسوه هوسات و عراضه و زهلله
(( لو ونينه // تستاهل ون ))
هيه تستاهل دموع من الدمه
ربت اطفالي و عليهه امعلمه
حسبيت اسنينهه اتظل دايمه
(( و اتعود // يا يوم اعلينه ))
هم ترد ويانه هم نگعد سوه
خالة ابني و هيه اعز من الهوه
والله فرگاهه جمر بيه دوه
(( السردابه // نامت بتراب ))
نامت ابتربان يكلف نومته
هيچ عاجبهه الحنينه و رادته
ظل ابنهه اينوح بس ما سمعته
(( و امعجل // بيهه الدفانه ))
بيهه حاديهه طلع وسفه ابعجل
و واگفه تنظرهه و اتنوح الاهل
امشي و اوگع گتله خليهه تظل
(( المهيوبه // بس ما رداهه ))
يمنه ما ردهه و مشه للمگبره
ليش مستعجل يا حاديهه و سره
چن اخذ روحي و عليهه حايره
(( و انگطعت // يا طاري الخيه ))
✍🏻خادم أهل البيت عليهم السلام
الشاعر جعفر الساعدي
غير مبري الذمه من يحذف اسم الشاعر او ينسب الرثاء لشخص اخر
/channel/Jafar225
((وَإِذَا الْمَوْؤُودَةُ سُئِلَتْ*بِأَيِّ ذَنْبٍ قُتِلَتْ))
Читать полностью…
لطميه للحشد الشعبي( يالعله الساتر تونون)
اسم اللّٰه يالعله الساتر تونون
أهلنه ما اجوا لينه تكولون
اسم اللّٰه اعليكم اسم اللّٰه امن الونين
يحضركم علي أو يحضركم احسين
فرحانين جي للجنه ماشين
نظل احنه ابحزن وانتم تفرحون
اسم اللّٰه يالعله الساتر تونون
اسم اللّٰه يالعله الساتر وكفتوا
ما ندريكم اشردتوا اشطلبتوا
المن من هوى الدنيه انحرمتوا
لا تبطون واعلينه تعنّون
اسم اللّٰه يالعله الساتر تونون
ونيتوا ولا يدرون اهلكم
ابساع انكطع من الدنيا املكم
واحنه من بطيتوا ايّسنه منكم
يهل الزود ما نقبل تموتون
اسم اللّٰه يالعله الساتر تونون
عمت عيني عليكم يالحياده
اشبدينه انتم تمنيتوا الشهاده
أنتم طاهرين امن الولاده
او عاهدتوا بدمكم كون توفون
اسم اللّٰه يالعله الساتر تونون
✍🏻خادمة أهل البيت عليهم السلام
الشاعره ام شيماء الناقل الشاعر جعفر الساعدي
غير مبري الذمه من يحذف اسم الشاعر او ينسب الرثاء لشخص اخر
/channel/Jafar225
لطميه للحشد الشعبي (اسباع الناخيتكم شيميتوها)
أسباع الناخيتكم شيّميتوها
من عباس غيرتكم خذيتوها
أسباع او ما نطيتوا الحد يدهريه
شردتوا الدواعش والارهابيّه
ويه احسين وقعتوا اتفاقيّه
او بعتوا أرواح والجنه اشتريتوها
أسباع الناخيتكم شيّميتوها
حدكم ما تتيهونه اسباع انتم
رفعن روسهن بيكم الجابنكم
دهريه والمزامط ايلوگ الكم
الارواح ابشهاده بدليتوها
أسباع الناخيتكم شيّميتوها
أهنا ياللازمين أحدود سمعوني
الكم اندعي او افديكم اعيوني
أحموا الدين واحموا الشرف واحموني
أو كلمن شارده للبيت ردوها
أسباع الناخيتكم شيّميتوها
يا شجعان ردوا العايل اعلينه
طردوه لا تخلونه يطب لينه
الكم تندعي لو كَمنه صلينه
ابديرتنه الدواعش لا تخلوها
أسباع الناخيتكم شيّميتوها
اسباع انتم او زامطنه العده بيكم
شحدّه اليكَرب اشحده اليلاويكم
ينصركم علي او هيبه يخلّيكم
العيله من عدوكم ما حملتوها
أسباع الناخيتكم شيّميتوها
حياهن هله بيهن الجابنكم
نعمين او كفو منهن الرّبنكم
اعزاز اعليهن او للدين ضحّنكم
اختكم ما تذل يسباع ردتوها
أسباع الناخيتكم شيّميتوها
✍🏻خادمة أهل البيت عليهم السلام
الشاعره ام شيماء الناقل الشاعر جعفر الساعدي
غير مبري الذمه من يحذف اسم الشاعر او ينسب الرثاء لشخص اخر
/channel/Jafar225
بسم الله الرحمن الرحيم
بيان استنكار
ببالغ الحزن والأسى، نستنكر وبشدة الاستهداف الآثم الذي طال قوات وقادة الحشد الشعبي، تلك المؤسسة التي قدمت التضحيات الجسام دفاعًا عن الأرض والعِرض والمقدسات.
إن هذا الفعل الجبان لا يمتّ إلى القيم الإنسانية ولا إلى تعاليم ديننا الحنيف بصلة، وهو عمل مرفوض شرعًا وأخلاقًا، ولا يرضي الله تعالى ولا أهل بيت النبوة عليهم السلام، الذين دعونا دائمًا إلى نصرة الحق ورفض الظلم والعدوان.
إن استهداف من ضحّوا بأرواحهم في سبيل حماية الوطن هو تجاوز خطير يستدعي وقفة جادة من كل الأحرار، وتأكيدًا على أن دماء الشهداء لن تذهب سدى، وأن طريق الحق سيبقى ثابتًا رغم كل المحن.
ونسأل الله تعالى أن يحفظ العراق وأهله، وأن يتغمد الشهداء بواسع رحمته، وأن يمنّ على الجرحى بالشفاء العاجل، وأن يعجّل بظهور الإمام المهدي عجل الله فرجه الشريف، ليملأ الأرض قسطًا وعدلًا كما مُلئت ظلمًا وجورًا.
وسيظل الأمل قائمًا بنهاية الظلم وانتصار الحق، مهما تكاثرت التحديات.
والله ولي التوفيق
خادم أهل البيت عليهم السلام
الشاعر جعفر الساعدي
محد بالمحنه ايصير مثل امي
اتشيل الظيم عني وتشرك ابهمي 😭😭
✍🏻ام ريام
#جديد_من_ديوان_الثأر_الموعود_الجزء_الرابع_
لطميه فزاعيه للزهراء عليها السلام (وين ام المحنه اتريد)
وين ام المحنه اتريد
شالت من وكت عنه
وين ام المحنه اليوم
خلتني ابگلب مهظوم
عگبچ ما حلالي النوم
يا شمعة منازلنه
يا شمعتنه الضويه
شلتي وين هالنيه
موحش بيتچ اعليه
و مو بيت الاهل چنه
مو بيتچ عمه اعيوني
يا يمه و بعد لوني
من شالوچ فجعوني
ما ردوّا خطيتنه
ما ردوچ من شالوچ
و ابوسط اللحد خلوچ
يمه اشلون من نزلوچ
گطعيت انه للظنه
گطعيت الرجه وياچ
ازغار اكبار ضيعناچ
و ما ظني ييمه الگاچ
يالفرگاچ عذبنه
✍🏻خادم أهل البيت عليهم السلام
الشاعر جعفر الساعدي
غير مبري الذمه من يحذف اسم الشاعر او ينسب الرثاء لشخص اخر
/channel/Jafar225
ببركة محمد وآل محمد اصدار ديوان
ديوان الحروف الجعفريه الجزء الأول الخاص بمناسبات الفواتح: للأب وللأم وللأخ وللأخت لخادم اهل البيت عليهم السلام الشاعر جعفر الساعدي.
يحتوي : قصائد ثگيله، مربع، فزاعي، نعي، هوسات، گولات، رباطات، بجميع الأطوار وايضاً ادعيه .
يتوفر في جميع المكاتب في محافضات العراق
لطميه مربعه للشبان و الشهداء رضوان الله عليهم ((غرفتك عطرتهه))
غرفتك عطرتهه ما ترد ليهه
هاي امك تنادي اهنا يواليهه
هاي امك تنادي من گلب مجروح
غرفتك عطرتهه و العطور اتفوح
اشلون اتعوفهه ها يالولد و اتروح
اتريدك للگبر بيدك توديهه
غرفتك عطرتهه ما ترد ليهه
اتريدك للگبر جناز و اتزتهه
الموته موش الك ليهه تمنتهه
و رادت گعدتك بالدار رادتهه
و رادت يالولد انته التجازيهه
غرفتك عطرتهه ما ترد ليهه
رادتك يا ابنهه اتجازي ارباهه
ما تدري الزمان ايخون وياهه
ابد ما حَسِبت و اتگول سواهه
و ما گال الولد عالوالده اشبيهه
غرفتك عطرتهه ما ترد ليهه
ما گال الولد ليش امي محزونه
هاي الربته و گمطتهن امتونه
چانت هم تون من تطلع اسنونه
اليوم امصبحه ما حيل ظل بيهه
غرفتك عطرتهه ما ترد ليهه
اليوم امصبحه ما حيل ظل عدهه
خليهه تون و الله اليساعدهه
حنين و شوگ فوگ الظيم چايدهه
و خلي ام عون نتذكر بلاويهه
غرفتك عطرتهه ما ترد ليهه
خلي ام عون نتذكر مصايبهه
ما بينه غرب كلنه حبايبهه
يا وسفه الوكت دولاب دولبهه
بالشبان من راحوا نواسيهه
غرفتك عطرتهه ما ترد ليهه
✍🏻خادم أهل البيت عليهم السلام
الشاعر جعفر الساعدي
غير مبري الذمه من يحذف اسم الشاعر او ينسب الرثاء لشخص اخر
/channel/Jafar225