الناشر احمد الفاطمي

14 June 2026 18:11

يمسلم ياهيبه..ويشيخ المرجله
يسلطان الكوفه..وتحبك كربله
...
انته بجداره
نلت الصداره
من طولك اكصر
قصر الاماره

تملك ثقافه
وكشخه وقيافه
أنته الحقيقه
وكلهم خرافه

ياترف مثل الهوه..بالنزاكه أنته الضوه
ياخشن بالحومه
المو ثكيل اوموشهم..طبعا ابسوك الزلم
بالرخيص انسومه

يمسلم وافعالك..تضل امعدله
يسلطان الكوفه..وتحبك كربله
...
وجهك سماوي
بالكوفه ضاوي
سيفك الهي
تمحيهه ناوي

وحدك تقاتل
عندك تفائل
الله ينصرك
يابوالمراجل

يابو سيف الصاعقه.. خايف العسكر بقه
يرجف أمن اخياله
يالبعتهم بالرخص ..كامت بسيفك تغص
الخيل والخياله

يشراي الغيره..هله بزودك هله
يسلطان الكوفه..وتحبك كربله
...
حرب الشوارع
بيهه أنته بارع
افضح خمرهم
يبن الجوامع

صارت قضيتك
شيبه بلحيتك
أنته الحسيني
والحب هويتك

امرايه أنته ابنص عمي.. ياسبع يالهاشمي
هلهلتلك طوعه
ذوله أشباه الزلم.. من خزرتك تنهزم
شارده ومفزوعه

فقط بس بتارك..يحل المسأله
يسلطان الكوفه ..وتحبك كربله
...
سيفك قيامه
عالي مقامه
لمن ترفعه
اتلوح الحمامه

من حيدر أنته
صيتك أخذته
قصر الاماره
ابجدمك سحكته

خطه سوي بالحرب.. تكلب الكوفه كلب
والنصر فك بابه
البس الثام الولي..خل يحسبونك علي
وانته من طلابه

علي أنته الثاني...وكأنك زلزله
يسلطان الكوفه.. وتحبك كربله
....
بالكوفه وادم
للذل تسالم
باعو عقيده
بحفنة دراهم

يعدي مرضهم
واضح غرضهم
والحمدُ لله
سيفهك قرضهم

ذوله ما إلهم دوه..وين مامال الهوه..
يابو طاهر مالو
كالنعاج اتصفطو..ورطه والله اتورطو
اليوم بيمن عالو

التلوحه ابسطراتك.. تجمد هيكله
يسلطان الكوفه..وتحبك كربله
...
دين الخليفه
نفس السقيفه
من الثلاثه
نال الوضيفه

الدين السياسي
همه الأساسي
يقتل أئمه
لاجل الكراسي

وانته ماجاي الحكم.. رايد اتبين ضلم
كل بني سفيانهه
يالصرت كبش الفده.. طوعه هيه الشاهده
عن غدر كوفانهه

فزت يامولانه..برفيع المنزله
يسلطان الكوفه.. وتحبك كربله
....
الشاعر #محمد_الجماسي

#اللهم_عجل_لوليك_الفرج

الناشر احمد الفاطمي

14 June 2026 18:11

وي اخته زينب كون اروحن سبيه
مو اربعه اتمنيت اخلفله ميه
يستاهل انجوم وكمر ..حبيبي
كالولي مكسور الضهر..حبيبي
....
احسين تسوه الدنيه بس شمة عباته
وكلُ من فوقَ الثرى فدوه الغلاته
أمه ماتت وانكسر طوله وثباته
وآنه امه الثانيه الصرت بحياته

جنت آنه ليل انهار اشمن ترابه
عمري كُبر عمرين احس بغيابه
وبعيني ضلت بس صور..حبيبي
كالولي مكسور الضهر.. حبيبي
...
كون اخلفله عشيره امن الشوارب
وينه وينه الضيغم الزلمه المحارب
الشاب الايخزرونه كون ايصير شايب
وكلهم ايشبهون مضهر العجايب

وابضهر اخوهم كون احطهم حراسه
والشيب ابد ممنوع اشوفه اعله راسه
بس مارجع من السفر..حبيبي
كالولي مكسور الضهر..حبيبي
...
ادري بس عباس يسواله عشيره
بالعرك يتخير الروس الجبيره
انه راضعته لبن خابطته غيره
أنهُ العباس قد قلَّ نظيره

طبراته فوك الروس أثر للشهامه
غيمه ومطر وافياي اريده الامامه
اسرع سطرته امن القدر.. حبيبي
كالولي مكسور الضهر.. حبيبي
...
آنه مااخلف زلم مابيهه فزعه
امخلفه وين اليهجم الكون ويوكعه
ابكربله العباس وايناديني اسمعه
اليوم ابيض وجهج وراسج ارفعه

واحسين اخوي بخير احب آنه اطمنج
من اكعد انه اوياه اسولفله عنج

واعيونه يترسهن فخر..حبيبي
كالولي مكسور الضهر.. حبيبي
...
احسين من سافر اخذ كل شي بحياتي
والحزن عاشرني من اربع جهاتي
بالدمع اتوضه ضليت الصلاتي
اشما يطك زينب شمر توكع عباتي

واشما اغمض العين اشاهد سبايه
خفت آنه وكت النوم اضيع عبايه

واعيوني عايزهه نظر.. حبيبي
كالولي مكسور الضهر.. حبيبي
...
من رجع ضعن الحبايب للمدينه
اركضت اسالهم حبيبي احسين وينه
شفت حرمه امشيبه وكلش حزينه
جاوبتي احسين بالطف ذابحينه

كتلهه زينب ليش اشوفج غريبه
كالتلي يم عباس اسكتي مصيبه

وعالغالي شيبني القهر..حبيبي
كالولي مكسور الضهر..حبيبي
...
الشاعر #محمد_الجماسي

#اللهم_عجل_لوليك_الفرج

الناشر احمد الفاطمي

14 June 2026 18:11

أم البنين عليها السلام
...
آنه خادم يالاتأمريني امر
بالوفه توصيني يمه امن الزغر
وارضعتها اويه الحليب
نصرة حسين الغريب

هالوصيه مو اليه
وانه شارب من حليبج طاعه ياام البنين
بالمراجل..ابوفاضل
وارث الغيره وراثه من امير المؤمنين
اسمي عباس..وارفع الراس
وافتخر لمن اكولن آنه عبدا للحسين

الله خالقني اكون بخدمته
احسين امامي ومااعوفن طاعته
يمه صارتلي نصيب
نصرة احسين الغريب
....
احسين امامي.. وباحترامي
اكعد اكباله وحياءا عيني تنزل للارض
عمري يمه..دمي دمه
نبض كلبي احسين وانه اشلون اعيش بلا نبض
بالحرايب..والكتاب
لو يغثونه بحجيهم اله اشبعهم ركض

باجر اخباري تجيج اتدللي
الزلمه انه الزين وارباية علي
ابالي ابدا ماتغيب
نصرة احسين الغريب
...
يمه يمه... الخوه ذمه
وانه اخوي افديله عيني والجفوف وهامتي
حته ظله..ماازعله
طولي يم طوله ازغره ومااسبگه بخطوتي
حيل أقدره..چنه حظره
الخاطر الله اشكد احبه احسين مالك دنيتي

لو اموتن الف موته بكربله
اشعر امقصر وماوفيت اله
يامره المثلي تجيب
نصرة احسين الغريب
...
الاخوه..كلمه حلوه
هوه عين وآنه رمشه وللابد مانفترك
والمواقف..موسوالف
مومثل خوان يوسف احنه خوتنه صدك
الخطر يبعد..النار تشرد
لمن اكتب عالمخيم قل اعوذو أمن الحرك

ابن ابوه الحاول ايمس العبي
واشلع ارموشه اليفكر بالسبي
والفرج كلش قريب
نصرة احسين الغريب
....

احسين يأمر..بس يأشر
أقره شيدور بخياله كبل لاينطق حرف
موجديده..هالعقيده
وبيني مابينه العلاقه يمه كلش تختلف
بدمي يجري..يسوي عمري
اعكال راسي وشيخ اهلي وغيره ماعندي عرف

افتخر واتباهه آنه احسين اخوي
هوه ابوه حيدر وحيدر هم ابوي
وتبقه بيه للمشيب
نصرة احسين الغريب
...
وانتي باجر..عالمنابر
من يذكرونج يبمه كلهه تهتف والنعم
الابيه..والوفيه
من فحول العرب انتي وخلفيتله زلم
أشكد تعبتي..وانتظرني
يرجع احسين بسلامه ومااتحقق هالحلم

وعوضج الله ونطاج الفاتحه
وآنه هاي اجفوفي تصبح اجنحه
وبدمائي استجيب
نصرة احسين الغريب
...
الشاعر #محمد_الجماسي

#اللهم_عجل_لوليك_الفرج

الناشر احمد الفاطمي

14 June 2026 18:11

العليله فاطمه عليها السلام
....

بيتي مجلس صار
ابجي ليل انهار
بويه بويه
...
ابدي من فرض الصبح للمغربيه
ساعه ادعي وساعه اسويلك عزيه
امقسمه وقتي الخاطرك يبن الزجيه
بس اريدك ياحسين اتحن عليه
جن حمامه ابغار
ابجي ليل نهار
بويه بويه
...
افرش البيت بضوه اعيوني واتاني
وابدي اكولن ها اجاني مااجاني
الحوافر شغلت افكاره ونساني
لوذكرني وهسه مشتاك الحناني

وكتي ليش اندار
ابجي ليل نهار
بويه بويه
....
مره اكول احسين مامعقوله يكدر
ايفارك بنيه غصنهه بعده أخظر
مره اكولن حاير ابنص المعسكر
ولابوفاضل عنده ضل لا اخوي الاكبر

والشمل طشار
ابجي ليل نهار
بويه بويه
...
هسه يمكن شال عبدالله اعله ايده
والسهم هسه وصله وحز وريده
كون يمكم انه بويه اومو بعيده
روحي مشتاكه لاخوي اليوم اريده

اسنيني كون اكصار
وابجي ليل انهار
بويه بويه
...
موعليله الفركه سوتني عليله
اني شيصبرني والسفره طويله
كلشي بالدنيه يبدلونه بمثيله
والابو ماممكن انحصل بديله

يالغيابك نار
وابجي ليل نهار
بويه بويه
...
وين اياتي الارتلهه بصلاتي
وين الامحليات دنياي وحياتي
عالهزل لو بالخيم هسه خواتي
امعلكه وكل مااحن توكع عباتي

وحشه صار الدار
وابجي ليل نهار
بويه بويه
....
الشاعر محمد الجماسي

#اللهم_عجل_لوليك_الفرج

الناشر احمد الفاطمي

14 June 2026 18:11

ياكلبي ضل بحزنك الحسيني
...
ياكلبي قد قام الجزع
لمن تحب حب بَوجع
تدري بحبيبك داسن بصدره الحوافر

ياكلبي ذوب ابمجلسه
عوف الهوه واتنفسه
خادم حقيقي ايسجلك ابن مضاهر

وي دمع العين..سافر لحسين
والزلمه الزين.. يسعد فاطمه

ياكلبي وروح.. ابجيله اجروح
شهر المذبوح..ابجيله بدمه

ياكلبي ضل بحزنك الحسيني
...
ياكلبي عيش اوي الخدم
انكت بسط وارفع علم
وجدر الطبخ ينطيك توفيق وإراده

واكثيره للباري الطرق
والخدمه اعظمهن رزق
والدمعه عالعطشان تتسجل عباده

واثياب السود..وصوت الرادود
كل ذني اشهود..عالحب الصدك

الوتر الموتور.. عالم من نور
موسم عاشور..جنه أمن العشك

ياكلبي ضل بحزنك الحسيني

...
ياكلبي كثر باللطم
وكون اللطم يجوي العظم
اباب الحسينيات تلكاهه الزجيه

اخلص لمن تخدم لان
المخدوم ضل بلا جفن
راس وصبع منطيك واضلوع ورقيه

المنطيك اهواي..وزعله الماي
ولم بوش الجاي.. شانك يعتلي

واذكر عالنوك..ام چف محروك
تدخل للسوك..زينب بت علي

ياكلبي ضل بحزنك الحسيني
...
شعليك بالبيهم مرض
روح انطلق مالك غرض
هوه الحسين البيده كلشي وكلشي قادر

الراد الله يبدي بكربله
والخدمه هيه البوصله
واحسين لتشوفه فقط كبه ومناير

ذا وجه الله..افهم معناه
باجر تلكاه..شافع بالحشر

لويرضه اعليك..قمه ايسويك
وموكب ينطيك.. وادموع اشكثر

ياكلبي ضل بحزنك الحسيني
..
الزهره للمجلس اجت
وام البنين اتحظرت
ياكلبي روح افرش ونينك الهن ابساط
واسي الخذوهن للسبي
واتوضه بتراب العبي
والطم مثل ماطكو العلويه بسياط

هاي الايام..زينب بالشام
وي الخدام.. خل دمعك نهر

جر الحسرات..هل العبرات
عالمسبيات..واسي المنتظر

ياكلبي ضل بحزنك الحسيني
....
الشاعر محمد الجماسي

#اللهم_عجل_لوليك_الفرج

الناشر احمد الفاطمي

14 June 2026 18:11

بسم الله عاشورك اجانه
يامذبوح وبدمه اشترانه
لبيك لبيك قد قام العزاء
لبيك لبيك وارزقنه البكاء
..
من ذيج السنه ونحسب
يمته انهيأ الموكب
والخدامك انعزب
وانسويلك اقرايه

ونحييهه شعايرنه
وتصرخلك حناجرنه
يحسين بضمايرنه
تبقه اترفرف الرايه

مانشبع من الخدمه
غركنه بهاي النعمه

يمك كون يخلص كل عمرنه
بجاه ام عون خدام اعتبرنه
لبيك لبيك اصوات الولاء
لبيك لبيك وارزقنه البكاء
...
عاشورك يرقينه
ويزرع خدمتك بينه
الف شكرا يبواسكينه
يالساترنه بافضالك

اشتسوه الدنيه من دونك
ابوالنعمه يسمونك
هوه الشايف اعيونك
خادم يبقه لخيالك

الماباجيك مو انسان
واحنه وعاشورك صحبان

موبالعين شفنه بالبصيره
يامضلوم شالوك ابحصيره
لبيك لبيك ونفديلك دماء
لبيك لبيك وارزقنه البكاء
...
يابوحجايه مسموعه
ويمه الدعوه مرفوعه
ارزقنه بجي ولوعه
وحط اعله الكلب جمره

رقيه الطفله بالدمعه
كدرت عشكك اتطلعه
وتشبك راسك وتنعه
ومنك حصلت نظره

يعني اليبجيلك أكثر
يتقرب يابوالاكبر

ممنونين لو يمك تقربنه
ونبقه اوياك ياسيد مواكبنه
لبيك لبيك يامسلوب الرداء
لبيك لبيك وارزقنه البكاء
...
كلما تبدي لطميه
يم باب الحسينيه
نلكه امريه امحنيه
وتبجي وتلطم بخدهه

اتحب الزهره الاقرايه
اعليك وتلطم اهوايه
لمن تنظر الرايه
تكعد فاطمه بسدهه

واحنه انواسي المضلومه
عالمسلوبات اهدومه

يالمسحوك صدرك بالحوافر
كون اعليك نعميهه النواضر
لبيك لبيك.. ياشيخ الفداء
لبيك لبيك وارزقنه البكاء
...
دنيه إبلا لطم صحره
والعين البجت حظره
لو نكسب رضه الزهره
ماتخسر تجارتنه

كل احنه وعوائلنه
احسين بلطفك اشملنه
غيرك واحد ايذلنه
ومايحفظ كرامتنه


بس يم بابك نتوفق
نلتم ومانتفرق

يامولاي حط ايدك علينه
بالروجات بس أنته السفينه
لبيك لبيك ياسيد العطاء
لبيك لبيك وارزقنه البكاء
.....

الشاعر محمد الجماسي

#اللهم_عجل_لوليك_الفرج

الناشر احمد الفاطمي

14 June 2026 18:11

جايب الشط امر جدا بديهي
ذلك العباس لاريب فيهي
واليدنه للخيمه يذله..عباس بس عباس مثله
لاريب فيهي
ــــــــــــــــــــــــــــــــــــــ
أنهُ العباس.. سبع الخياله
عالكتايب داس.. محد يدناله
الخوذه فوك الراس..كلش تحلاله

خبر عاجل اجه الكافل
اجه و يضوي اشمحلاه
يسبحان السواه
منو الشايف منو امصادف
كمر يمشي اعله الكاع
سبع وامخوف اسباع

يضيع يوسف بحسنه وصفاته
بجماله وطوله يتباهن خواته
هله بشيخ المراجل وشحلاته


هوه واوصاف الكمر صارو شراكه
بس ابوفاضل يغلبه بالنزاكه
وبراسه حيدر غيره خله..عباس بس عباس مثله
لاريب فيهي
ــــــــــــــــــــــــــــــــــــــ
لاعلي مامات..علي هذا بنفسه
كاشف الشدات..واحسين امدرسه
تسجد الهامات..لو تطلع شمسه

علي حيدر قلع خيبر
لجن شوف العباس
قلع بيده الانفاس
هلا ومرحب بخو زينب
يونس بالميدان
ترأس عالشجعان

تسلطن واعتله ابعرش الحرايب
حلف يسحك عله اثخان الشوارب
أخذ ثار الضلع من النواصب


كلبه يوكف إذا واحد يخزره
ايكضه بيده وعله اجنهم يشمره
وابصورة المحشر تجله..عباس بس عباس مثله
لاريب فيهي
ــــــــــــــــــــــــــــــــــــــ
كامل الاوصاف.. رزن بشخصيته
اترف أمن الماي..ماكو بحنيته
بالزعل بركان. وايخوف صيته

ابعلو القمه..اشحلاة اسمه
الجمال بشكله احتار
الكمر من عنده ايغار
اذا يغضب..يصير اصعب
يطك الكون بكون
العده اكباله يسجدون

قيادي وكاشخ بثوب القياده
صلب محد كدر يكسر عناده
تسيد عالزعامه وعالسياده

وجهي نوراني واحلى أمن المناره
دائما اسمه الاول بالصداره
ولو تجدح اعيونه شيحمله..عباس بس عباس مثله
ــــــــــــــــــــــــــــــــــــــ
والنعم عباس..مرجع للغيره
هيبه وبعاشور..وكفاته جبيره
يعجز الابداع..يوصف تصويره

منو يوصفه منو يعرفه
فقط بس العباس
عرف معنى العباس
اذا يفزع..ركب يكطع
يسوي الطف دخان
هله بشيخ الديوان

اذا رف جفنه تنزله القيامه
صواعق عالزلم يوكع حسامه
ويضم راسه الشمر مثل النعامه

والعله اخيامه ياويله التعده
سطرة الحمزه يطبعهه اعله خده
وبيمنته الاعوج يعدله..عباس بس عباس مثله
لاريب فيهي
ــــــــــــــــــــــــــــــــــــــ
امجرب العباس..مافشل زاير
اليلزم الشباج..مايرجع حاير
للحوائج باب..مايكسر خاطر


اليكصدونه ويحلفونه
ابخدر زينب والله
يمد الهم يمناه

الكرم اصله..إله ولاهله
يحب جيت الزوار
ويعزب للخطار

يعزب للضيوف إبلا مقابل
كريم واسمه حلال المشاكل
ترد روحه اللي يندب يابوفاضل

احله لحظاتي لحظات الزياره
انسه احزاني لوشفت المناره
واوكف عله الباب وأكله..عباس بس عباس مثله
لاريب فيهي

محمد الجماسي

#اللهم_عجل_لوليك_الفرج

الناشر احمد الفاطمي

13 June 2026 23:18

عباس شال الرايه  بیمینه
لازمها ظل من دون چفینه
اخذلك هيج زلمه خالس الحومه
:::::
بعدها ترفرف وما عنده چفين
لازم هاي توصل خيمة حسين
مو وصلة اقماش بعركة واطيح
من ترفرف يظل ثابت الدين
رغم السهام وهي مرفوعه
كلمة الشيخ هناك مسموعه
العركه ومن يطيبها احسبها محسومه
::::
مثل اعگال عنده الرایه توصف
ماكــــو زلمه بس عباس بالطف
گطعو چفه بس ما هدها عباس
كون الها درس موجود بالصف
محلاها من ترفرف بأيده
ثابت الكافل في مواعيده
اليوصل لابو فاضل ينزع اهدومه
::::
هـــــاي الرايه المن گالها ايزيد
مبين هذا زلمه ومن ظهر حيد
هــــاي الرايه چانت بيد عباس
هـــــذا الزلمه اليتسمه صنديد
كـــــل الحضور اتحيرو بيها
الرايه المـــــن ياهو راعيها
هاي السالفه الما تظل مكتومه
:::::
ما طاحت رغم ما يملك اذرع
ظلت عاليه بس هـــــو عالگاع
اعز من روحه عنده الرایه بهواي
ندري السبع هــــو يخلف اسباع
سلمها حيدر گله اخذ هايه
عباس مني هاي الك رايه
وگفات الكفيل هناك معلومه
:::::
صابو راسه بس ما طاحت ترف
لازمها رغــــم مـــا چـــــان ينزف
هاي الرايه هسه اطيح افصول
عشايرنه بقت بالرايه تحلف
بكل فصل هاي الرايه موجوده
تلگاها بيــد الشيخ معگــوده
رسم هالرايه عند الناس مرسومه
:::::
علي جبار الكعبي
الفاتحه لوالدي

الناشر احمد الفاطمي

13 June 2026 22:51

بالعيون.......انظر ادموع الاحبهم
يواسون.....فاطمه والمهدي كلهم

وليجي  ابكل العزيه
تگله  مشكور الزجيه
*******
عله اجروح الطف بدينه وبتدت مأساتنه
والندب  صبح  ومسيه تنتهي  ابدمعاتنه
آنه والمهدي  نسولف بس حزن  لوعاتنه
والشعر ون  استماعه بس نواعي ابياتنه

سموات......باچيه اشگد  ابدمعهه
سموات........ينكسر باچر ظلعهه

والبيان ابهل  مسيه
تگله مشكور الزجيه
*******
انه  والمهدي  اجينه  انسجل ابسمائكم
واحد ابواحد نعرفه شخّصينه خلاصكم
هوايه نتعنه المجالس  يا حلات آلائكم
احنه يم باب  العزيه  كاتبين  اضوائكم

يالاحباب.....والله ماننساكم احنه
يالاحباب.......بالنعي التمينه كلنه

والنداء  الباقي  بيه
تگله مشكور الزجيه
*******
كلكم   ابياض  الوجه  والمدامع كافيه
بيكم انشوف الخدامه ونواعي شافيه
الله يجمع هالمحبه  بيها  ثوب العافيه
صانت الشيعه عهدها بالمجالس وافيه

جراحات.........باقيه اليوم  المنيه
جراحات......من مصاب الغاضريه

الكلمه يامحلاها هيه
تگله  مشكور الزجيه
*******
آنه  محنيه   اجيت  وما  طفت   نيراني
وبقميص  حسين  هذا  علگتهه  احزاني
اتعذبت  بالطف  بنيني  يامرار  اشجاني
شفت چن اخيول عشره تذبح بوجداني

عذابات......يامحرم جرحي يبدي
عذابات......ماطفت نيرانه  عندي

نحسب ادموع البريه
تگله مشكور الزجيه
*******
انه  ادور   بالمجالس  والظلع  حانيته
خاف يلچمني وونّّ وبدموعي اجريته
آه  يحسين   ومصابه والحزن   بانيته
نار  باب  الدار  نارك من شفتهه ابيته

بالجروح........عايشه ليلي وحياتي
بالجروح.....حسره بالطف ذكرياتي

واليواسي يدري  بيه
اتگله مشكور الزجيه
*******
گلبي  يشفه  بالنواعي يمكم تبچوني
الناعي لويقره يشيعه حسرتي بعيوني
هوايه مشكوره  خدمنه گامو يواسوني
هناك عالمحشر يشيعه كلكم اتشوفوني

بالونين......مانشف دمعي الجريته
بالونين......حسين مالحظه نسيته

واليحبني يهوى اليه
اتگله مشكور الزجيه
*******
تمت بعون الله تعالى الشاعر_يوسف_الفتلاوي

الناشر احمد الفاطمي

13 June 2026 20:34

فتحت عزاء لأم البنين



شكراً لنكران ذاتج

يالي ضحيتي بحياتج

اربعه اقمار

ــــــــــــــــــ

لازم اخلاقج تدرسها المدارس

قبس من شعلة وفائج سوه عابس

قلبج ابيض من جنح ريش النوارس

بالعشگ ضحيتي ماعندج منافس


ما وصل واحد صفاتج

يالي ضحيتي بحياتج

اربعه اقمار

ـــــــــــــــــ

يامرة التنطي لشريجتها ولدها

لجل ابن حيدر علي تضحي بعدها

نذرت سنين الربا وانطت جبدها

هذا ايام التعب لا ما تعدها


لم حسن كل تضحياتج

يالي ضحيتي بحياتج

اربعه اقمار

ــــــــــــــــــ

يالي غيرتي اسمج انتي شگد وفية

كلتي ياحيدر فشل من الابية

لا تناديني باسم فاطم علية

اني اجيت الخدمة اولاد الزجية



گلتي خدمتهم رضاتج

يالي ضحيتي بحياتج

اربعه اقمار

ـــــــــــــــــ

وجنتج سجادة بيها الدمعه تربة (تربة الصلاة)

وبالجفون ترقرقت كل دمعه تربة (تنمو، تكبر)

بالدرب عينج بقت لضعونه تربة (تنتظر)

طلع من غربة وتلگة هناكه غربة



بالدمع تخلص صلاتج

يالي ضحيتي بحياتج

اربعه اقمار

ــــــــــــــــــ

عاشت ايدج عالربه وعندج مهمة

مو مهم ولدي الحسين الله يسلمه

لمن يذكر فاطمة يناديني يمة

واني قبل الساني دمعي الي يكلمة


حبج لاخر مماتج

يالي ضحيتي بحياتج

اربعه اقمار

ــــــــــــــــــ

ام وهب بس واحد وانتي اربعتهم

گلتي قربان السمة ولله انذرتهم

هذا حجم التضحية ودونك ردتهم

لا يرجعون بسلامة خبرتهم



ما اكو أعظم من ثباتج

يالي ضحيتي بحياتج

اربعه اقمار


ــــــــــــــــــ

الشاعر زين العابدين الشمري

الناشر احمد الفاطمي

13 June 2026 19:11

قصيدة مولاتي ام البنين عليها السلام

بالدمع من اتوادعن   .... ام الخدر وام الضعن
             اربع كواكب عني ماشين
           مربيتهم انه الخدمة حسين
               بالدمع من اتوادعن
_
وياج وديت الثمر كله ويه سهر أيامي
عن لا يمر بيج التعب يايمه قمة احلامي
بس المشاهد بالدمع تعرض صفة كدامي

استوطن براسي القلق ... ظليت اردد بالفلق

         مثل السراب التلمحه العين
          شما يبعد  يبين قريبين
           بالدمع من توادعن
____
كلتلهم بشحت الهوى تمرون كلكم نسمه
هيه المواقف تنذكر من ترتبط بالكلمه
وليرضي زينب يالولد يوصل سهل للقمه

خلوني أشعر بالفخر .. مرتاحه اظل طول الدهر
             
            كلفين وادري افعالكم زين
            وين الشهم وابن الميامين
__
العاشگ الحب من صدگ ريح الهوى چتاله
ويفرهد خيوط الضوى لو گربت لخياله
هذا الوجود بلا طعم من دونه يترواله

الافق فارغ والزمن .. المعشوگ اله مثل الوطن

               يبدي الصراع بين نارين
             من تعرف الخلان مچفين


_
اربع مواسم بالسنه  كلمن وعطره ولونه
عبدالله يافصل الورد لو رادو يذكونه
عثمان الي بالذت البرد من جانو يوصفونه

بالصيف معروف الكمر  ... ياجعفر اليسوه السهر

           انتم بفيه وخيره رابين
        حل الوفه يايمه لحسين

___
انتشروا بين الخيم مثل الضوى ويشظه
واليخدم حسين وهله بالعالي يصعد حظه
تراب المعاره بهل الضهر كون بدمه يتوظه

بصدوركم ريت السحگ . ولايوصل الخيمه الحرگ

               اولو خيروكم بين أمرين
             فوگ الارماح هواي حلوين
_
ربيت للطف الكلف يفدون كل خيامه
لحسين اخوهم ما تعز ارواحهم كدامه
يرفعون رايات النبي عن لا يروح إسلامه
لحسين صارو مو ظهر صارو لظهره حزامه

الما نعني وياكم اجي .. بليل اهدعش اشبع بجي
               بلدار گلي هنانه تبقين
               ويه العليله علينا تنعين
-----
للشاعر علي عطيه البهادلي

الناشر احمد الفاطمي

13 June 2026 19:11

للشاعر علي عطيه البهادلي

احنه غير حسين ما عدنه وسيله.  والذنوب هواي جفتهه ثكيله
____
رزق دمعه بشهر عاشور    تثبت بالعشگ جدمك
بكل فطره وبلا تخطيط  تجهز روحك وجسمك
التكبر والانا والصيت      وغرور امصاحب الاسمك 
تتركهن ابدون اسباب     وترضى حسين كل همك
اهو ينظر ترى الكلبك       ويحب تمشي عدل دربك
                    بكثر ذبنك ترى يحبك   
يعلمك هالحياة اسرار      نفسرهه بضمايرنه
يحسين ابضمايرنه   صحنه بيك امنه
-----------------------------
يالماشي اعله درب الشوگ   سهل لو رايد اتخبره
شيضيعك واهوه ايدليك    بمحنه وعطف وبعطره
الضحه بكلشي حته تعيش  بطفله واخوته وعمره
الدمع كلش قليل ايصير     ميعادل كسر ضهره
زحمه يا بشر زحمه           دليله مثلم انلجمه
                   النعمه مسبح ابدمه
بيا محله الوداع ابنوح   من حمزه تعلمنه
يا محله الوداع بهل مسيه    واعلوم المنيه
___
يا باب التجي تلگاه      امانه وموعضه وحكمه
تعلمنا نعيش احرار          والذل انطلع انهدمه
مقاس الرجل بنصاف       اخلاق ومؤقف وحشمه
رسالة حب صفة معناك   الموده الشاعة ابعلمه
سفينه للنجاة انته         اليتبعك ثق ضمن حصته
                    بيدك يحس حصنته
ابجي امن الصبح لليل  لحد ما تخلص ايامي
ياليل طول ساعاتك.    ياليل احمل اهاتك
---------------------------
تزل جدمك تشوف حسين  حنين ايمدلك جفوفه
يجيبك ويدرب الانصار.      يبعدك مسلك الكوفه
من تعتازه ثق تالگاه         اول واحد اتشوفه
نضف روحك بطروها        بذكره خلها مكشوفه
شما جلبت ما تندم          وبيوم الحشر تسلم
                  بسيطه وسهله تتعلم
يحبونه بدرهم دوم  ثابت يضل يردون
يردونه يردونه      والولد يردونه
للحرب والعازاة  والظلم الشدات
__
يسجل اسمك التاريخ  من تتوكل الدربه
الدنيا الفتنه العالم     بدون الغالي فد غربه
يخبط دمعك تخلي   ويه الماي التشربه
تحير شخصك العراف ماتكدر ترى تعربه
يمن ما نعرف انفسره  حبيب الهادي والزهره
               يمن حبك صبح جمره
وكل ما اسمع انه ايام  يعرض راسك اكبالي
ايام ايام   هاي الدنيا ايام
-----------------------
للشاعر علي عطيه البهادلي

الناشر احمد الفاطمي

13 June 2026 19:11

حسين شاف انصاره
            كلمن لزم بتاره
صفوت الدين .... عنده سبعين
___
مثل لنجم يم الخيام لتمو
للدنيا من بعد العشگ ما همو
عطر الوفه باليل من اشتمو
وحزام واحد لبو اليمه تحزمو

الجمل ما نختاره
          ربعك ونهوه الغاره
كحلت العين ... عنده سبعين
___
لن شيبه طلعت بالبخت متروسه
شيمه أو وقار ومرجله ملبوسه
هوس ربعه اطربو من الهوسه
هل جيش باجر بالخيول ندوسه

بدربك نعرف اسراره
       كلش حلو بفكاره
بهل ميادين ... عنده سبعين
__
من لون وجهه تسحي كل كمره
اسمر ما ضيعها ذيج العشره
التاريخ ثبت موقفه وذكره
الورد باهت لو نقيسه بعطره

حاز المجد بكتاره
         من سيفه شبت ناره
وياه وافين  ... عنده سبعين
_
عباس اونافع اوبرير اواسلم
بطف كربله طوفان سوو منالدم
جبال اصبحو والجبل ما يتثلم
وحسين شاهد هل امر وتبسم

ما صارت لهم جاره
          الروس دم تجاره
بالحومه كلفين ... عنده سبعين
___
الحر وزهير لي اهتدو من نوره
قصه وفه كتبها مو اسطوره
خالده تصبح بالزمن هالصوره
لكل البشر في داخل المعموره

للجنه احله بشاره
          شما تزدحم اخطاره
عالعهد ماضين ... عنده سبعين
___
عن الهواسم وابو الرايه الخظره
قمة الجمال الما توصف سحره
ليفزع اسم الله يم درب كل عثره
زمز الامان بكل ذيج العتره

لو يزعل الطف داره
        حيدر علي مختاره
لنصرة حسين.. عنده سبعين
_
علي عطيه البهادلي

الناشر احمد الفاطمي

13 June 2026 19:11

نزال اول يوم محرم الحرام
للشاعر علي عطيه البهادلي
نحسب ساعه ساعه تمر حتة يحيل شهر حزنك
نخلقنا المجلسك يحسين ولا نبعد ابد عنك
كون نكسر احنه اظلوع لن الخيل داسنك
_
كلشي بينه ليك يصير حته النفس من فظلك
الكوكب والارض والضي كلهن جزء من اصلك
يااجمل عشك مخلوق مو بالهين انحصلك
عبيدك احنه نلفي عليك وهاي الروح ترخصلك
حبُك ملك حساس ماموجود ابد منه
بالفطره ونسمعك صوت وسط الروح يوصنه
غايتنه برضاك نفوز انته السيد الأوحد
لو طبينه وسط النار جفك يجي ويقدنه
___
العين الما بچت يومك ما تستاهل الرحمه
كون ولا تشوف النور لحضه ومن صدگ تعمه
الما يجزع على المظلوم مايعرف شنو اللجمه
ولا سمع بصدرك حيل هذاك الحافر مهشمه
الجنون بلطمة العشاگ من الوجع مصدرها
گلوب مفطره مولاي بس رحمتك تنضرها
لسمك يا ابو الاحرار فدوه ونذر لو صرنه
بنفاسك الكهن طيب روح المحب تسحرها
__
نفس فزعة اليطلب ثار نفزع لو تحل رايات
بحركت جمر المخيم لچوت جدم البنيات
ونفرح لو نحصل اثار والعمال بلنيات
ومن نمشي الدرب حفاي نتذكر المسبيات
الحجر لمن بچالك دم جزع ونتصور الحاله
جبل شامخ يشوف جان هسه مسلب اگباله
شمس من بدلت ارسومك بحر الرمل تتچوه
شخصك ماكو منه اثنين يالغالي انتعناله
___
من نگصد نظوگ الماي نتحسر الف حسره
تلوج امن العطش مولاي ومحد ضوگك گطره
صحت عطشان ياوادم واجتك عالنحر طبره
وتخلخل نظام الكون والدنيا اصبحت حمره
رادت تنمحي الاكوان اونت اتثبت ابرجلك
لغز جانت ضربتك هاي ومحد مكتشف حلك
الدولة قائمك دعوه الاساس بهل امرينصر
والالف لمثل عابس ويكل جيل تفزعلك
__
رويات الي وصلتنا وماتحمل المشهد
الله يعين ابو صالح بكل مصباح يتجدد
كباله الي حصل بالطف وذاك الخدر يتفرهد
النار بوسط صدره تفور طول الزمن ما تبرد
بزياره الناحيه نقره ياجرح شكبر جرحه
يصب دم الدمع لجلك من المسه لحد صبحه
واويلي عله المضلوم حجايه نزعت بصدره
ويدعي الباري يسمحله وينشر رايته ورمحه
__
للشاعر علي عطيه البهادلي

الناشر احمد الفاطمي

13 June 2026 19:11

السلام على تاسع الائمه
محمد ابن علي الجواد

سلامآ من گلب عاشگ
انفطر من الحزن والنوح
يمر ذكرك على حساسي
يهب اجمل عطر ويفوح
بخيالي من رحت لبيعد
مشاهد صارن گبالي
بجمالك تسحر اكبر عين
گمر شع وبقه يلالي
مقياس العلي ختارك
غزير العلم من كل صوب
ابمدرسة المجد خالد
اسمك عالعرش مكتوب
رغم جان الحقد طامع
يفرهد نورك بالحضه
ورسم موت اعله بيبانك
اواقع مؤلم يفرضه
جواد واسمك ومعناه
عجيب ويصعب التحليل
ياقران ونهج واضح
ابد ماحاجه للتأويل
السم الگطّع اواصالك
تون وفوك سطح الدار
اختل الكون ظل يميل
النهار بليل شفته ندار
حمام ومن اجه يزورك
عرف لازم الك حضره
امانك ماكو ابد منه
اليخدمك يرتفع قدره
ثلث تيام من مطروح
تشبهن ثلث تيام
جدك عالرمل نايم
وانت برمل هم اتنام
قصه عطش ما تنفض
وماي المستمر حربه
سهل شربه اعله هلوادم
وعلى بيت النبي صعبه
كل هذا وبجيت حسين
وكل يوم وألك عاشور
تصب دم الدمع مولاي
وتون بحرگه عالمنحور
وصوت اطفالكم نفسه
هذاك الصوت يوم الطف
من بالخيمه شبت نار
وعسكر عالحرم مصطف
من جابو رمح بي راس
زينب نادت اعله حسين
خويه حسين هم متنه
نعمت عيني يبعد العين

الشاعر علي عطيه البهادلي

الناشر احمد الفاطمي

14 June 2026 18:11

مسلم ابن عقيل عليه السلام
....

اول من فتحت موكب
طوعه وبالماي اتعزب
يوم الكالت يامسلم هاك
بثواب الاحسين
...
طوعه سوت دارهه
موكب الخطارهه
واشترت كل السعاده بطاسة الماي
امعدله وعربيه
وبالاخص شيعيه
ومؤمنه ابحيدر وامامة حيدر اهواي

ومسلم من اجاهه وسالته امنين
كاللهه يطوعه بدمعة العين
مسلم ها أنه الواكف عله الباب
وكالتله هلا بمبعوث الاحسين

منك مولاي اتعذر
خليتك واكف بالحر
خدامينك ياسيد الناس
يبن السلاطين
...
اتكله يامولانه
بيتي جن حيطانه
اهتزن وصاحن هلا ابجيتك يمحبوب

وانه ياهنيالي
طب عليه الغالي
طبتك تمحي الخطايه وتغفر إذنوب

الف الحمد لله الجعلني
خادمتك يبوطاهر حسبني
مثل ام البنين الخدمة احسين
يامسلم اريدك تعتبرني

بداعت خدر العلويه
سجل بيتي احسينيه
وبهذا الموقف طوعه اتصير
مثل ام الابنين
...
ياهلا بهالطاري
مرحبا بخطاري
اليوم احس نزلتلي رحمه أمن السماوات
اتلكته بقرايه
واصبحت ملايه
وكام تقراله اعله حزن الزينبيات

كالتله بشفاعتكم اليه
اريدن بس رضه الزهره الزجيه
انه اتمنه اشارك غربة ام عون
وايسموني طوعه السبيه

يبن الناس المعروفه
اتغدرك ياحيف الكوفه
مسلم لتأمن بيهم ذول
وادم جذاببن
...
والوفه الوفايه
حاكته امصلايه
وفرشته المسلم يصلي وسدت الباب

ومن أكل من زادهه
انطاهه الله امرادهه
ووكفت ابهيئة حراسه ولبست انكاب

وامن البيت شافت يطلع النور
واملاك السمه ايزورونه والحور
بيت اماسس اعله التقوى والله
يسواله اشكثر تيجان واقصور

ماعافت مسلم وحده
وكفتله بيوم الشده
هيج ايدور مهدينه انصار
بس للاسف وين
...
هذا موكب طوعه
مايجف ينبوعه
يروي كل خادم حسيني ابهاي الافكار

وهسه شوف الكوفه
بالكرم معروفه
وللحسين اتعزب ازغار اوي الاكبار

طوعه بجال مسلم رفعة الراس
وعليهه بكل وكت تترحم الناس
من حست اجو عدوان للبيت
صاحتله انتهض ياثاني عباس

شد الثامك عالعسكر
وضوكهم غيرة حيدر
يامسلم يومك هذا اليوم
يازلمة الزين
...
الشاعر #محمد_الجماسي

#اللهم_عجل_لوليك_الفرج

الناشر احمد الفاطمي

14 June 2026 18:11

زينب بام البنين اتخاطب
اتكلهه ابنج سوه فوك الواجب
....
بشري يام عباس يالوفايه
خوش زلمه امخلفه بي الإكفايه
يوم عالمعبار هز الرايه
طب عليهه وداس اكبر شارب
...
جني بام عباس عبر احساسهه
سمعت الصوت وهدت انفاسهه
حمدت الله وفرحت بعباسهه
واللبن صافي طلع مو رايب
...
زينب اتكلهه اسمعي اخباره
الروس سواهه الكمر طشاره
والنعم من كصته المطاره
ابعين يحرسني وعين ايحارب
....
جاوبتهه ام الوفه وخجلانه
احنه نفداكم يبت مولانه
فدوه الج دم هامته وذرعانه
احنه عين وانتي دومج حاجب
...
زينب اتكلهه قطوفج دانيه
راحت امي وانتي امي الثانيه
يللي ماغرتج دنيه الفانيه
واليناسب كون هيچي ايناسب
...
كالتلهه ام الوفه وملتاعه
حزنج بكلبي القيام الساعه
السوط الايضربج احس باوجاعه
ومثل وجهج وجهي اصبح ذايب
...
زينب اتكلهه اشوف اخيالج
اوياي يمشي واستمع لاقوالج
انه ادري احسين شاغل بالج
وعينج ابدرب الضعون اتراقب
...
اتكلهه يازينب اسمعي اجوابي
احسين ماابدله سود اثيابي
كون تلكيني اعله عتبة بابي
ميته واكبالي لطم وامواكب
....
الشاعر #محمد_الجماسي

#اللهم_عجل_لوليك_الفرج

الناشر احمد الفاطمي

14 June 2026 18:11

العليله فاطمه عليها السلام
....

الابو لوراح ماينسد مكانه
الابو ياناس شيعوض حنانه
الينومني اعله ايده
خلاني وحيده
....
يكولون الابو ياناس مثل خيمه البناته
وايعيشن بامان وخير يمه امدللاته
وانه الهسه مشتاكه اشم ريحة عباته
الهي نقص ابعمري بس طول حياته

عمري فوك عمره كون اديره
واشيله اعله الرمش مو بالحصيره

مشه بسفره بعيده
وخلاني وحيده
...
طول الليل سهرانه ولا غمضت جفني
عباتي ابحظني ياهالناس واهدومي اعله متني
يشدون ابهوادجهم اشوف وزاد وني
صعدن كل اخياتي وانه محد ندهني

محد صاحلي وكلي تعالي
وي طولي رجف حته خيالي
الجنت امشي بوريده
خلاني وحيده
..
كمت امشي وره احسيني مثل ضله اتبعه
موبس صوته اسمعنه النفس ماله اسمعه
بلكت يلتفت وايشوف بين اعيوني دمعه
كطع بيه الوكت وسفه مثل كطعة اصبعه

يحمل بالضعن وانه اصطبيله
بلكي ايكول كومي يالعليله
اخذ سكنه وحميده
وخلاني وحيده
...
رحت يم زينب وزينب احس عركت عباهه
وكالتلي اعذريني يعمه بمستحاهه
ضلي اهنا يبعد اهلي يعيني وياضواهه
يعمه كربله ابعيده وسفرنه بي متاهه

كتلهه السبي اوياجن سلوتي
حياتي اوياكم وبالفركه موتي
الكتبته بكل قصيده
خلاني وحيده
...
اكصدت عمي كمر هاشم يحن بلكت عليه
ويركبني عله الناكه مثل اختي رقيه
اعيش احساس الامسافر ضلت حسره بيه
اشويه وخل ينزلوني واكلهم هاي هيه

مامحسوبه جني من شملكم
اخذتو بالضعن حتى طفلكم
الطفل رجعوه اريده
خلاني وحيده
...
الشاعر #محمد_الجماسي

#اللهم_عجل_لوليك_الفرج

الناشر احمد الفاطمي

14 June 2026 18:11

العليله عليها السلام

احله الابيوت كبل يا بيت اهلنه
بيه الاحسين وابوفاضل املنه
أشكد حلو جان..جنه بستان
يابيت اهلنه
...
جان الخضار البالبيت..من العمايم لونه
واسكينه وردالقداح..وارقيه بي زيتونه
وبالغيره عمي العباس..نهران تجري اعيونه
وجان الحسين ابكل يوم..ايلعبنه فوك امتونه

وزينب الهيل نشمه من حجيهه
والطفل جان مثل طير اعله اديهه
شكله قران..جنه بستان
يابيت اهلنه
...
بكل الزوايه البالبيت.. صوره العلي والزهره
ويتوضن الفراشات..لمن يشمن عطره
ومن يقره ابوي القران..كل احنه وياه نقره
وبليلة الجمعه انكوم..نتصدق اعله الفقره

وام البنين كجدتنه الزجيه
اتحط عله الزاد بخت اختي رقيه
زاد الاحنان..جنه بستان
يابيت اهلنه
...
وادم تشغل الفانوس..حتى الغرف تتنور
واحنه ابدال الفانوس.. ضاوينه وجه الاكبر
يوميه ينزل للبيت..يروينه حوض الكوثر
صف العصافير اتصير.. لو يضحكلهن قنبر

حتى الاطيور اذا حطن علينه
حنطه واشعير نوكلهم بدينه
وعدنه ديوان..جنه بستان
يابيت اهلنه
...
عندي اخو ايرد الروح..والأصغر بخواني
جن وصفة مالت دكتور..وجهه الحلو النوراني
اينسيني كل الاوجاع..عبدالله لو ناغاني
ميت علك بالكاروك..شديته بس ماجاني

كالو الماي كسر خاطر ضحكته
وحرمله الصاب بالامثلث ركبته
ودمه نيشان..جنه بستان
يابيت اهلنه
...
ثاري الوكت مامضمون.. خسرني كل ضحكاتي
من الزرع عاف الماي.. واتبدلت دنياتي
راحوا هلي بذاك الليل..واتيتمت نجماتي
مو من مرض اشكي الحال..مشتاكه انه الخياتي

لمة احباب كبل والدنيه حلوه
عكب الاحسين بعد ياعيشه تسوه
حلمي الوان..جنه بستان
يابيت اهلنه

الشاعر محمد الجماسي

#اللهم_عجل_لوليك_الفرج

الناشر احمد الفاطمي

14 June 2026 18:11

كل عاشور انه البابك اتعنه
وكلبي اهناك بالشباج اشدنه
....
كل عاشور اجي الكبر يبواليمه
اطلب منك الحنيه والخدمه
وتثبتلي قدم واتزيدلي النعمه
وتنطيني كلب يستاهل الونه
...
توفقني ابمحرم احظر اقرايه
واعلكلك اعيوني اعله السطح رايه
ويوم الاربعين اتعنه مشايه
وعالناس بثوابك ماي اوزعنه
...
اخدم بالمواكب والمدد منك
وأسولف بالقصايد للخدم عنك
الحوافر بيهن أشعر من يسحكنك
والطم حيل من حيلك يهدمنه
...
احسين انته الوحيد الحقق امنيتي
وامدللني وامدلل أهل بيتي
اخذ كل الهوه وحط حزنك بريتي
يااقصر طريق ايروح للجنه
...
خليني اعله بالك موش تنساني
وبيوم الحشر دورني والكاني
طير انه ورحمتك هيه جنحاني
واعيش بمجلسك للموت اتمنه
...
راية خدمتك للموت لازمهه
امانه أمن الزجيه ولابني اسلمهه
شحلاة الزهره لوتحسيني خادمهه
واموت وانته تحظر ساعة الدفنه
...
اموت وابنك الاكبر يغسلني
وعبدالله الطفل يحظر يلقني
وللحفره يجي القاسم ينزلني
والعباس شايل رايه اشوفنه
...
الشاعر محمد الجماسي

#اللهم_عجل_لوليك_الفرج

الناشر احمد الفاطمي

14 June 2026 18:11

باهل رسول الله النبي اليوم النصاره
ومن شافو اصحاب الكسه ضلو حياره
...
انفسنه ترجمهه بعلي حامي الحميه
ثم النساء إبفاطمه الزهره الزجيه
ابنائنا الحسنين سادات البريه
واوجوهم تسطع ضوه مثل المناره
....
ماجاب شخصيات مشهوره أمن الاصحاب
جاب الائمه الطاهرين الساده الانجاب
و الزهره لو بس من وجهه اتشيل الانكاب
تكلب الكون اعله الخصم هوه ومداره
....
رايد محمد للبعض يبعث رساله
بيهه يوضح منزلة أعظم سلاله
ذوله أهل بيت النبي ونور الجلاله
هاليوم همه الاثبتو أعظم جداره
...
جمعهم الزهره وولدهه وي علينه
هم حجج صارو عالبرايه وهم سفينه
الرهبان حيل اتفاجئو من هالسكينه
وانسحبو وقائدهم أعلن عن قراره
...
كال النصر الكم وأحنه مانباهل
يالنوركم من عالم اللاهوات نازل
ياشيعة أهل البيت علوهه الهلاهل
هذا الفخر من العرش الكم بشاره
....
محمد الجماسي
#اللهم_عجل_لوليك_الفرج

الناشر احمد الفاطمي

14 June 2026 18:05

العليله
....
الچانو بعيني امس عايفيني بغربتي
غربت عني الشمس وآنه طاحت دمعتي
محد بجرحي يحس غير جرحي ووحشتي .. يمته ارتاح
...
جرح الشوگ .. خطوة نوگ
مشو عني الچنت نبضه بگلبهم
سهر الليل .. رايد حيل
تعب شوفي وردت ملگه الاحبهم

كلشي سكته وبيتي شفته يشبه التابوت
المغربيه تمر عليه چنها ساعة موت

وين سافرتو صحت فراگكم كلش صعب
گمت مرتين وطحت اشم بتراب الدرب
ما دريتو شگد نحت الفرگه تشلع بالگلب والسباح
...
وحشه البيت .. بي ظليت
اعيش بذكرياتي وابچي وحدي
حچي الناس ايشيب الراس
وكُبر دمعي ونزل شيب اعله خدي

وانحرمنه من المحنه ولمة الاحباب
ليله ليله اويه العليله انتظر عالباب

اضم بجروحي العتب والحزن بيه وطن
مادري شنو السبب ما خذوني بالضعن
والله يا عالم تعب گلبي من هذا الزمن الغالي وراح
...
چنت بخير .. وراح الخير
الحياة بلا حسين تحسها ظلمه
الغالي وراح .. اشلون ارتاح
الولد من يبتعد تتيم أمه

يمه وينك ظل حنينك يجرح المشتاگ
ودعتني وعيشتني بدنيه من افراگ

بدمعة اعيوني أنه الك مرسال كتبت
من البُعد ظهري انحنه وصدّگ هواي اتعبت
الساعه بفراگك سنه وساعه ساعه شيبت
يا مصباح
...
ما أنساك .. وين الگاك
حچي بروحي اريد اگبالك احچيه
هجرك صار .. نار بنار
الحجر لو يسمع بقصتي ابچيه

والله يبني رحت عني وما نمت ليلي
الدنيه ظلمه ليش يُمه هدمت حيلي

وين چانت هاي الي وجهك الغالي ابتعد
بعيني وحشه منزلي بعيني ما يحله بعد
الراحو الچنهم علي وما بقالي كل ولد وبيتي طاح
...
شوگي يزيد .. وانت بعيد
اريد اوصلك واحچيلك جروح
ناعي النوح .. هد الروح
اجاني يگول راس حسين مذبوح

واجت زينب صحت ونحب يا بعد اهلي
ذبل صوتج وين اخوتچ راحو تگلي

عالولد ما ناشدت وعنك اسألت اشكثُر
يمه گالولي طحت يوم عاشور الظهر
وسف يمك ماچنت حته اضمك عالصدر
فوگ الرماح
...
خادم الحسين ( عليه السلام)
كرار حسين الكربلائي
( ابو كميل)

الناشر احمد الفاطمي

13 June 2026 23:01

ما سافرت وي الاحبهم
شلعان گلبي من سفرهم
وحدي بقيت ومشو كلهم
انه العليله
::::
ذابحني السفر والفرگـــــه تكتل
اول ورده عاشت بصحــــــاري
حلاة الدار مـن يطبها الحسين
مـــــن يروح وحشه تصير داري
العمر خلص بچي ونياح واهات
يخلص هيچ كــــل ليلي ونهاري
سجادة صلاتي انترست ادموع
الدمع عن الاهل اصبح شعاري
ظليت بس انه وخيالي
عني مشو كل الغوالي
معقوله هم ينسون بتهم
انه العليله
&&&&
بيدي هدومــي واتنطر تعالي
بس حسين مــــا اشرلي بيده
يمه تقــــربت متحضره گتله
لبست ثيابي يا بويه الجديده
ما چنه سمع گد ما احاچیه
يمه الحچي ظليت انه اعيده
سعيده ویاك من تاخذني وياك
بدونك انــــه ابدن مو سعيده
كسرة الخاطر كلها بيه
عالناگه باوعت الرقيه
يمهم تره ومشتاگتلهم
انه العليله
&&&&
ابد مـــــا نايمه وسهرانه ليلي
فرحــــانه گلت باچــــر اسافر
يموتني القهر لو راح الحسين
بدون حسين انه اكسر الخاطر
عيون الما تشوف حسين عميات
بدون حسين شتفيد النواظر
اموت من الهجر بعد الاحباب
ادري حسين راح يسحگه حافر
ليل ونهار ادموعي تجري
حسين يدري بحالي يدري
مكتوبي طول ما وصلهم
انه العليله
:::::
وديت شكثر الكــــــم مكاتيب
گلت معقوله ما وصلتهم اخبار
اتاني اباب بيتي واسهر الليل
من يوم المشو ما داخله الدار
ها يمكن اجو ها بلكت اليوم
مـــــــن يمي اطلع الهم اعذار
يطر الفجر وانه بعتبت الباب
ولا واحد اجه من اهلي خطار
ما امتلك هدهد سليمان
يعرف خبركم وين ما چان
عن حالتي يوصل يگلهم
انه العليله
:::::
من صعدن خواتي وانه ضليت
گلت ما راح ینساني الاحبه
ما معقوله يترك بنته الحسين
ابوي شلون ينطي هيج گلبه
ابد ما حاسبه يتركني ويروح
عجبه وما تصير وياي عجبه
سجادة صـــــلاتك الك مديت 
سبحه وحضرت وياها تربه
ضليت اباوع انه الدروب
حال العليله هواي متعوب
بخباري چا ياهو يگلهم
انه العليله
:::::
علي جبار الكعبي
الفاتحه لوالدي

الناشر احمد الفاطمي

13 June 2026 22:42

(لحن بدوي)

  ماتجيني الخيل اذا عباس حي
ماتجيني الخيل اذا عباس حي

رايته فوگ الضعون اتصير في
            :::::::::::::::::1:::::::::::::::
كافلي اوحماي ضعني وهيبتي
مـا ينام اليـل يحـرس خيمتي
يختلف عباس عن كـل اخوتي
چفه قبل اجفوني يمسح دمعتي
من تظلم نور وجهه يصير ضي
              ::::::::::::::::2:::::::::::::::::;
من يشيل الجود عباس الشهم
مايهـاب المـوت يطلـع مبتسم
صيته عابر فوگ من روس الزلم
والنـعـم عباس مـنك والنـعـم
لو تهد صوب الفرات اتصير عي
          :::::::::::::::::::::3:::::::::::::::
من يشد ارچابهه اتميل الارض
يفرض اعليهم كمر هاشم فرض
يسحگ اعله ارگابهم طول وعرض
صارت الفرسان باللطف تنقرض
من يسئلونه يگلهم ماكو شي
             ::::::::::::::::::4:::::::::::::::
نزل يقره الزلزله وسورة ضحئ
گـامت الفـرسان تفتر چالرحئ
من أجاهم غيم الـجـو ماصحئ
ضلت أشباه الرجال امـطـرحه
گال أكَسر روسها المتروسه غي
             :::::::::::::::::5:::::::::::::::::
عفيه أخوي الحيد راعي المرجله
سجل اعظم ملحمه أبطف كربله
شـايل الجـربه ابيمينه امـحمـله
گـال ابـو السجاد ياميت هـلـه
جربتك هـايه تعـادل مـلـك ري
            :::::::::::::::::::::::::::::::::::::
       فاخر علي الشبيبي

الناشر احمد الفاطمي

13 June 2026 19:13

‏الليله الثامنه
‏القاسم(ع)
‏انه سبع الميــــــدان
‏والموت عندي عنوان
‏....................................
‏شبل الحسن نازل يراوي العسكر
‏فنون الحرب من جده حيدر حيدر
‏لو صال جنه الموت ليهم يحضر
‏بجفوفه شايل غيظ يوم المحشر
‏تعبها هاي الفرســــــان
‏الموت عندي عنــوان
‏
‏ـــــــــــــــــــــــــــــــــــــــــــــــــــ
‏خله الزلم تتشاهد امن اتقدم
‏بسيفه خله ارگابهم شلال دم
‏جنه الحسن عليهم من تحزم
‏والعادي يتندم اذا يتجدم
‏اسويها ديرة عمـيان
‏المـوت عـندي عنـوان
‏
‏ــــــــــــــــــــــــــــــــــــــــــــ
‏عريس وبدم العدى حنه الجفوف
‏ما همه جيش ابن سعد لو مو الوف
‏بالمعركه صنديد وأتحدى الظـروف
‏دوخ زلمهم بلحرب طافاهم طوف
‏ماهمني انس ولا جان
‏الموت عندي عنوان
‏
‏ــــــــــــــــــــــــــــــــــــــــــ
‏هلهلت رمله لمعرس كربلا
‏ابني هذا نزل يا مية هلا
‏سيف أبوك الحسن بيدك جردله
‏ولا تخلي حسين وحده بهالفلا
‏لعـمــي انا عـــــــوان
‏والموت عندي عنوان
‏
‏ـــــــــــــــــــــــــــــــــــــــــــــــــــ
‏مؤمل رضا العبودي
‏

الناشر احمد الفاطمي

13 June 2026 19:11

ياليلى وليدج متغير شفته هواي
ماضل شي سالم من عنده يرد وياي
خربت ضحكاته الحلوات
وصوت يگلي وليدك مات
وليدك مات .... وليدك مات
____
الورد ما يلحگ جماله چن فجر ويطر نداى
امسابگ ويه الريح اجيته بالگي اشم نسمة هواى
عمري ضايع وصار لونه اسود وبأگو ضواى
والفراغ البيه صاير كهف موحش وبصداى
من بعدك كل شي يتحول ما بي لون
الحاسب من اكبر يفزعلي هو امتون
تلهب مشتعله الچلمات
وما تبرد بيه الاهات
وليدك مات. .... وليدك مات
____
هاي اول مره اشوفن مشهد وموقف صعب
ما وگف من سمع صوتي وبيننه شكد غرب
حساسي ماگدر اوصفه يگطع بتوت الگلب
ومو دمع صب برحيله حيلي من بعدك يصب
كسر الخاطر ما ينشاف بشوف العين
كل خطوه اعله خطوه تبين فرق سنين
طلع روحي ويه الانفاس
بالحافر طولك ينداس
وليدك مات. .... وليدك مات
____
ماكو من بعده سلامه وتنشر شفت الظلام
صوت عالي وفوضويه كلشي ينذر بالحطام
ترسم الفرگه اعله يوم الريح ينگل للخيام
وذكرياتك بيه عرضن چن سرب من الحمام
اخ شگد متصور لجلك عندي احلام
بس ما حاسب فوگ الرمل الحار تنام
كل ما شلتك من تطيح
ويلجمك لو مر الريح
وليدك مات. .... وليدك مات
___
ايست يرجع ياليلى للهجر خل نستعد
چن سراب العشره كلها لحضه وحده وتبتعد
بالقلاقل چنه نقره عنه خافن ينحسد
هسه اذا نقراله ايه نقره بس نقره الحمد
من نشتاگ الوجهه الهادي نصد عليه
سبحان القدوس الاعظم ابداع بيه
الفراش من حقه يغار
رسم عيونه حيل كبار
وليدك مات. .... وليدك مات
____
روحتك يوليدي كلفه وهيه اعظم فاجعه
مو هلال وابقه انطر واحسب انه المرجعه
للسفر رحله طويله والمسافه الشاسعه
تغيريت كلش واحسن بالفصول الربعه
صوت ارعيد وهبت جعه امنالدخان
كلشي يفور بگاع الطف چن بركان
خربت ضحكاته الحلوات
وصوت يگلي وليدك مات
وليدك مات .... وليدك مات

الشاعر علي عطيه إلبهادلي

الناشر احمد الفاطمي

13 June 2026 19:11

صوتك وصلني .... أشعر هدمني
يكتبلي حزني ... رايح علي
___
الريح يرسم صوره .. مهشمه ومنثوره.. عن الوداع
شلون اقنع روحي .. حرب بين اجروحي.. يبدي الصراع
گلبي خلص حيله.. مدري ابدي انعيله... بطور الضياع
هسه انه حاير... ولابيه اكابر... هوسه المشاعر.. رايح علي
_""'__1
بصدري تلهب ناري... ومن شده وافكاري.. تكبرني جيل
والهوه امنشتمه... ليش احس بيه لجمه.. من الخليل
حار رمل الحومه .. وانه اخاف ارسومه.. تصبح سبيل
بين الحوافر ... ثمر النواضر... اتوقعه صاير ..رايح علي
-----------------------------2
ورد جان وليدي.. عطر وسط وريدي.. لمن يفوح
صعبه من مااعرفه ..خدوه حلوه وترفه . بيها الجروح
شنهو غير لونه.. گمر جنها عيونه .. وعليهه انوح
شلته وتطشر... عينوني مگدر .. لميته بالبر.. رايح علي
____3
شلون ارد لخيامي... ودعيت أحلامي.. رايد اگوم
ضحك من ياديره.. لغز وبتفسيره ... غيمت هموم
شيب ترس لحيتي... يبني وحده امنتي.. عمرك يدوم
انهض واگومن .. وارجع احومن... وجروحي يومن رايح علي
_____4
المشهد الأذاني.. شامت بترس اذاني.. سمعني صوت
كسر ضهره وحيده... سهل ذبح وريده.. خلو يموت
وانه كلش حاير... الخيل بعدك داير .. يمي ويفوت
ذابحني همي ... ياريت يمي.. وبضمي ضمي. رايح علي

الشاعر علي عطيه البهادلي

الناشر احمد الفاطمي

13 June 2026 19:11

عرس دمع وهلاهل... وكمر بالخيمه كامل
يشع وسط الخيم
_
حالي انه اشرحه... ماتكفي فرحه
الواهس جبير ودمعي يتجاره

هسه ردلي حيلي.... وبتشر دليلي
مات الظلام وطلعت انواره

قمت امنياتي... ياثمرحياتي
احسب ليالي تمرني الابشاره

هو هذا الحلمي.... بضحك حلوه يمي
يزفونه اخوته ويدخل الداره

وحق ليل السهرته... وشكو بالدنيا شفته
انتهت قصة الألم

عرس دمع وهلاهل... وكمر بالخيمه كامل
يشع وسط الخيم
__
يوسف وجماله.... لو يصد خياله
شوگ وهيام يحرك احساسه

عطره لو يمره... يركض ويدوره
من التعب تتصاعد انفاسه

يطفن النواضر.... وزحمت المشاعر
تلهي ولا يذكر أعز ناسه

باسمهِ تعالى ... أبدع بخصالى
يسجد نده فوگ الورد باسه

الترافه بشخصه ايه... كتب اجمل حكايه
بقلم عشگه انرسم

عرس دمع وهلاهل... وكمر بالخيمه كامل
يشع وسط الخيم
____
كلبي ماله حيله ... يوگع واشيله
اقره القلاقل والخطر حايم

قل اعوذُ اقره... تحفضه وتحضره
من الحسده والشر يضل دايم

كلشي بيه خايف... وتطلع السوالف
ضحكتة شماته من شخص لايم

بينت العلامه... ما تظل سلامه
فوگ الرمل وكت الضهر نايم

الشمس تسلب حلاتها... وتخرب كل صفاته
واحس طولي نهدم

عرس دمع وهلاهل... وكمر بالخيمه كامل
يشع وسط الخيم
____
بعيني كمت اشاهد ... تعرض المشاهد
شمعه بدمه لوليده مشعوله

من يسحگه حافر... بصدره چنه عاثر
حتى الضوه يتشضه ويطوله

هايه حنة ايده.... من دمه وريده
من الهواجس ابقه مذهوله

حيرتي الجبيره... وجهي من ايديره
تگضي السعاده بفرحه مكتوله

اندرت لله ودعيته.. يرد سالم ياريته
واشمن طوله شم

عرس دمع وهلاهل... وكمر بالخيمه كامل
يشع وسط الخيم
____
ساعة المنيه... لودنت اليه
وحشه النعش من يطلع وخالي

عندي جان اهم شي .. بيه انته تمشي
لحد اللحد يبني انته تبرالي

واشعر بوداعك ... واستمع دعائك
والفاتحه بالونه تقرالي

لجمه هيه لجمه ... كسره ويه هضمه
لوحدي بعدك ضايع الوالي

الفگد شفته بضياعك... الثكل كله بوداعك
برحيلك يا نجم

عرس دمع وهلاهل... وكمر بالخيمه كامل
يشع وسط الخيم
____
الشاعر علي عطيه البهادلي

الناشر احمد الفاطمي

13 June 2026 19:11

قيصده إلى مولاي مسلم ابن عقيل

ياسفير التضحيه ورمز الوفاء
اختارك حسين البدأ مشروعه
انت قائد  ... يا مجاهد   .. والنعم
صول بيها ..  وهد عليها ..المو زلم
وجوهم من الخبر  مفجوعه
-----
انته اول خطوة بدروب اليقين
وسر حقيقي يتضح للعاشقين
حصن لامر الباري ولدين المكين
زلزلت بسمك عروش الظالمين

انت يحچابة بخت تحيي الضمير
شمس جنت لوحدك كوكب منير

أنت الها …..وبمحلها ….شما تصير
انت اول …ولمخول ..والأمير
يا كتاب ومختلف موضوعه
____
تمشي وحدك بالغرب وسط الظلام
إنت جيتك تحيي دين الله بسلام
ومن سلامك كام يتوضه الحمام
بجنح واحد من تلكيت السهام
__
صورة وحده تركزت وسط العيون
يبقه وحده حسين صعبة اعله الضنون

من أعدك ..جيش وحدك ..للحسين
انته اية …وبيها غاية..  ..وسر مكين
بروحك الثورة زرع مزروعة
____
انت عطشان وگمت ترويها ماي
لان شفت الكوفة كلها بلاية رأي
واعلنت ساعة صفر للحمله هاي 
وضحكت عالجيش لمن شفته جاي

هيه حرمة… ومنها كلمة ..التسوه جيش
كلها قوه ..كلمة حلوه  ..هالموقف من تعيش
من اعدها بجيش لازم طوعه
____
فوق ذاك القصر شامخ والجفوف
تسلم على حسين وتگول الحروف
كون گبلك جسمي التكطعه السيوف
وكون حاضر انه في يوم الطفوف
جنت أتمنه انه بطف كربله
وانه والعباس نقره الزلزله
من خيالي  ... وبسوالي  ... والغياب
يسيل دمهم ... من نخلهم  ... بالتراب
ماكو رحمة تصبح الهم لوعه
____
حيدر عبد الحسين
علي عطيه البهادلي

الناشر احمد الفاطمي

13 June 2026 18:05

4محرم الحرام 
‏حوار(بين الوفه وأم البنين (ع) 

‏إسم الوفه منج خـجل
‏يــأم  الـوفـه يـأم الكفل 
‏والقصه ألج معروفه أبنج فداها أجفوفه
‏          يـأم الوفـه يـأم الكفل 
‏______
‏أســم الوفه يمج وكـف وتـكبع بـجلجابه
‏صاح الوفت أم الكمر وصدر بيـان أكتابه  
‏لامو وفي أنه هـتف وتوضح ألنه أجوابه
‏أم الكمر هيـه الوفت ونطت ولد المصابه
‏
‏إسـم الـوفه ليها يلوك 
‏وعلينه جاوب بالشوك
‏
‏نسمع جواب أحروفه أبنج فداها أجفوفه
‏       يــأم الـوفـه يــأم  الكفل 
‏___
‏وحروفه تتلامس خجل سولف علينه بعبره
‏هايه الوفت كال وحجه ونطت عهد للحره 
‏هايه الفدت  أربع ولـد هايه الوفت  للزهره
‏وع الضنه لامابجت وع الحـسين الحصره
‏
‏
‏هايه الوفـت يـهل ناس
‏وأخذت عهد من عباس
‏
‏تشهد علية اجروفه  أبنج فداها أجفوفه
‏     يــأم الـوفـه يـأم الكفـل 
‏__
‏شاطي النهر يشهد أله وأبنج فده بجفينه
‏ماكصر ويه أم الخدر مطيها هـامه وعينه
‏لمن وصل ماي النهر يذكر عطش للحسينيه
‏بيده جفه ماي العذب وقرر يروي اسـكينه
‏
‏جاب النهر ويه جوده
‏بالخيـمه دك  حـدوده
‏
‏وتفايض من اطروفه أبنج فداها أجفوفه
‏        يأم الـوفه يأم الكفل 
‏_
‏معنى الوفه أنتي إذاً اسم الوفه يلوك وياج
‏يم الكمر أنه اعتذر وطلب عذر وأترجاج
‏والله استحي لمن نجي لمن نمريم طرواج
‏أنه الوفه وشقدمت وأنتي الفديتي برباج
‏
‏أربـع ولـد للـمــنحر
‏قدمتـي وانـه تعـذر
‏
‏وشقدمت الطفوفه أبنج فداها أجفوفه
‏         يـأم الـوفــه يــأم  الكفل 
‏_
‏بس الإسـم أنه فقط وشقدمت  للعاشـر
‏شنهو العذر من فاطمة لوسألت ع الصاير
‏خجلان من بت النبي وبيه الفكر ضل حاير
‏يأم البنين أنتي الفعل ونتي الجبرتي الخاطر
‏
‏مــعروفـه يانبـع الــوفه 
‏الاذ الــوفه بـيج اكتـفه
‏
‏بيج الوفه ونشوفه أبنج فداها أجفوفه
‏        يأم الوفه يأم الكفل
‏
‏
‏كلمات الشاعر الحسيني 
‏مرتضى مكطوف الموالي
‏
‏