الناشر احمد الفاطمي

22 июля 2025 10:58

احسنت قصيدة واعية وعن دراية تامة موفق ان شاء الله

الناشر احمد الفاطمي

22 июля 2025 08:40

ما نندل ومشونه نصب الهيمه
واحنه القبل ما شفنه باب الخيمه
&&&
باجر ندخل سوك الكوفه   ونشوف لما ردنه نشوفه
واحنه بنص ارجال
نلگه اشكال السوك هوايه   وليمشي يسمعنه احچايه
ما تخطر عالبال
ما ظل حيل وگد ما امشي   ما اگدر حتى ارفع رمشي
هيج وياي الحال
اركب عالنوك انه بدونك    هضموني هواي يسبونك
راسك ظل ينشال
چا ليش ما مطرت علينه الغيمه
&&&&
شفت ضلوعك بين الحافر  من جسمك گلي شگد كاسر
باقي اعله التربان
عالگاع تبدت عافيتك     مسلوبه اهدومك خاچيتك
ماكو هيج انسان
ذبلانه شفافك ذبلانه   حسيت بروحك خلصانه
عالگاع وعطشان
بس راسك يمي ويبرالي    عينك يمي ويم اعيالي
چا وين الخوان
بالشام بالكوفه الضعن تقسيمه
&&&&
ستر الله احنه لما شافونه   واليوم بسوك يمشونه
واحنه البس نسوان
باب الله احنه ونعرف بابه   شطلعها الايه من كتابه
ايه من القران
من ينزل اهلي يحاچونه   جبرائيل يغشي عيونه
هسه احنه بديوان
زينب تمشي بنص الوادم     يتفرج ظل حتى الخادم
لما عاش بعنوان
وينه الي برد ناره لبراهيمه
&&&&
زينب هيه تكلم الله   طاحت محد گال اصملله
تركض عاليتام
حيدر ناسه تعرف شويه   محد يعلم عنده بنيه
لا خاص ولا عام
زينب هسه بنص الغربه    هالحاله شگد چانت صعبه
ادخل نص الشام
وين اگعد انه واطفالي    لو تعرف ياهو يبرالي
ما ظلتي اخيام
بعد اخوتي گلبي انه زايد ضيمه
&&&
حسين وظل نايم عالغبره   شفت بعيني گطو نحره
گدامي الذباح
حر الرمله يچوي جروحه  ريت انه وياكم مذبوحه
خاطر هم ارتاح
خنصر ما ظل بچف ايده    ما سالم ظل نحر وليده
مذبوح المصباح
راد يطفي النار الشبت    بس اطفاله بهيمه اطشرت
يسمع بس انياح
لشمر راس حسين تم تسليمه
&&&
علويه بسوط يضربوها   وبنص السوگ يمشوها
تتفرجلي الناس
ياهو يتحمل هالمنظر    زينب بت حيدر تتيسر
تحديها الارجاس
تتحمل اختك تتشتم   شتسوي بهالحاله اتكلم
مجروح الاحساس
ناديت الكافل ما جاني    زينب يعرف ياهو اني
محتاجه العباس
هذا الامر يصعب علي تفهيمه
&&&
من كثر السوط البمتوني   للگومه اطفالي ايعينوني
ما ظل بيه الحيل
تعبابه احچيلك تعبانه   ورده بلا ماي وذبلانه
طولي وظل يميل
الشوك وتارس رجليه   گدامك اختك مسبيه
باوع دمعي يسيل
يا عباس اختك سبوها   وين الكفال يحچوها
ظلت كلها تعيل
هيج الدهر اصبح علي تقسيمه
&&&&
علي جبار الكعبي
الفاتحه لوالدي

الناشر احمد الفاطمي

22 июля 2025 08:06

علي السجاد بدموعة... يودع كل هلة وناسة
شاب ولاكن بعاشور ... شاب من الحزن راسة

....
باخر لحظة من عمرة ... يسولف كلشي صار وياه
يوم الطف ولا لحظة ... نسيتة ولاني راح انساه
يعينة الله علي السجاد ... كلشي شاهد بعيناه
اه ياحالتة حالة
من دم دمعة من سالة
الذبحوا والدة كبالة
ياصبر اليفيد وياه ... وشنهو أليجري بحساسة

....

عيني شلون تغفة يكول... وصور بالذاكرة تعرض
شفت الخيل اني هناك ... بجسم حسين من ترض
وشفت عمتي العقيلة هناك... بين خيولهم تركض

وشنو صاير ببو أليمة
تفرهد كلشي البجسمة
وفاض اعلة الترب دمة

صدرة اللي يلم الخير ... وسفة جم فرس داسة

...
جنت شاب بعمر عشرين... وشفت راسي بهظم شيب
من شفت العدوا يصيحون ... طلعت بت علي زينب
من هاي المصايب اه ... ظهري بكربلة حدب

من بخيامي وجت نار
اطفيمن هظيمة احتار
ماصار بقبلنة الصار

بسبي نمشي بضعن مهيوب ... وضعنة عدوا حراسة

....

يكلهم من تدفنوني ... واه يا حالتي حالة
اذكروا حسين لمن ظل ...عاري ومحد الشالة
لا دفنوه مثل الناس ... ومحد شفتة يبرالة

بيدي شلون لميتة
بحصيرة جسمة خليتة
التراب شلون هليتة

طحن مطحون جسمة هناك ... لعبت فوكة فراسة

....
خلص كل هذا الموادع ... وصار الملتقة بحسين
الما مرتاح ابد فد يوم ... بهيدة خل يغمض العين
الضل بس جسد هذا اليوم ... الطلعت روحة من سنين

كل اهلة يودعونة
يتلوع يشوفنة
وبعد ساعة يشيعونة

شاب ولاكن بعاشور ... شاب من الحزن راسة
...
منتظر صالح الكعبي

الناشر احمد الفاطمي

22 июля 2025 08:06

لمشاية الحُسين "ع"


رجُل سأل هَل يا تُرى يومُ القيامة؟
ام هذا شعبٌ عاشقٍ يمشي لإمامة
هل هذا يومُ القارعة
ام هذا يومُ المشرعة
ام هذا شعبٌ عاشقٍ يمشي لإمامه
——————-
مشه الگلب .. على الدرب
بلا حجب .. الى دين الصدگ

الدرب حله .. انترس هله
يكربله .. عزف صوت العشگ

مشت ناس بإحساس جدم يسبق جدم
يوصلون تعاليم زهد درس علم
ضوه بماي يسيرون عزم يشد عزم

قد خظّروا من خيمةِ الحوراءِ نخلا
واحدُهم لو قطعوهُ ما تخلا
هل حلّ يومُ الواقعه .. ام هذا يوم المشرعه
ام هذا شعبٌ عاشقٍ يمشي لامامه
——————-
الهلا الصدك .. تصب عشك
لليختنك .. تهب مثل الهوه

سفر بشر ..من البحر
الى النحر.. ضوه وكايد ضوه

يمشاي نبع ماي حدر جدمك طلع
بالدروب قبس نور كمر وجهك سطع
امن البيوت تطلعون مثل ماي ونبَع

اهلاً بزائر كربلا ناداكَ قلبي
يامن معاني جرحكَ للطفِ تنبي
نتلو بأذنِ مسمعة .. هل هذا يوم المشرعة
ام هذا شعبٌ عاشقٍ بمشي لإمامة
—————-
بذل نفس .. لا تحترس
من الشمس .. مواساة الجسد

تره الهوه .. المن نينوه
افضل دوه .. لِرياتك مدد

هوه الآل ركن بيت اليشمة يعتمر
العلل راح تره تصير رماد وينشمر
زيارات مواساة حلاتك يا عمر

هل هذا دربٌ ام ترى مشفى آلهي
خطواتهُ ممحاةُ عشقٍ للدواهي
تمحي ذنوبك مُسرِعة .. هل هذا يومُ المشرعة
ام هذا شعبٌ عاشقٍ يمشي لأمامة
————-
المشي درس .. للما يحس
مثل غرس .. على الصبخة ورد

نقل علم .. نشر سلم
وحچي زلم .. عليهم نعتمد

المشي دروس للاقوام صور للتضحية
ملايين يطلعون كأن للتلبية
يوعّون يربون مثال التربية

هل هذهِ زوارُ تمشي في الشوارع؟
أم هذا شلالُ السما للارضِ نابع
للطفِ واصل منبعة .. أم هذا يوم المشرعة
ام هذا شعبٌ عاشقٍ يمشي لأمامة
———————
خطوة قدم .. تشلع سهم
و عن الخيم .. تدافع خوّتك

الدرب تره .. بدم ينشره
بالاخره .. فضاعف خطوتك

بالاخلاص تصل راح مباشر للعشگ
انريد الناس يشوفوك مخيّم محترگ
وتخضّر بالاخلاق الگاع التنسحگ

فألتزِم كأنهُ يومُ الحسابِ
إنّ الفُرص مِرارُها مَرُّ السحابِ
في ذكرِكُم كم منفعَة .. هل هذا يومُ المشرعة
ام هذا شعبٌ عاشقٍ يمشي لإمامة
—————-
علي هادي الخزعلي

الناشر احمد الفاطمي

22 июля 2025 06:58

يحسين ياديرت محنه
ياريحت الباقي من هلنه
مطشر شملنه وصار الوداع
شيريد خويه الموت منه

انه زينب يالحنين ... روحي حنت ياحُسين
بالخرابه انشد عليك انه وين وانته وين
يحسين يبن امي
،،،،،،،،،،،،،،،،،،،،،،،،،،،،،،،،،،،،،،،،،،،
ذبيت روحي اعله النعاوي
ومن المناحه الراس خاوي
دوي المخيم خويه حسين
من بعد عينك گلبي داوي

ميته كون ولا اجيت ... ابهل خرابه اتفرهديت
الشام مابيهم حنين وين اروح تحيريت
يحسين يبن امي
،،،،،،،،،،،،،،،،،،،،،،،،،،،،،،،،،،،،،،،،،،،
يحسين يابخت العشيره
ياكسرت ام عون الجبيره
يالشايل اختك بين العيون
جا ليش تنشال ابحصيره

ماكو راحه ولاكو حيل .. الشام ضل بختك يعيل
بالله شيهود الدموع وينگطع حزني الطويل
يحسين يبن امي
،،،،،،،،،،،،،،،،،،،،،،،،،،،،،،،،،،،،،،،،،،،
حين الصحت سيير عليه
شو بالطشت جابوك اليه
گمت وطحت يحسين عالگاع
ومن شبگتك ماتت رقيه

بالخرابه وبالضلام ... ماتت ابنيتك حرام
ياغصن كاسرنه بيك وتايه اخلافه الحمام
يحسين يبن امي
،،،،،،،،،،،،،،،،،،،،،،،،،،،،،،،،،،،،،،،،،،،،،،
ابجيلك ونار ابدليلي
سهرانه اضل مانام ليلي
يالماترد وتشوفك العين
جا عاد بس رجعلي حيلي

راحت العشره بجفاك ... ماتت اعيالك وراك
منكسر گلبي عليك خويه جن كسرت گفاك
يحسين يبن امي
العبد ابوفايز الرافضي

الناشر احمد الفاطمي

21 июля 2025 23:41

نزله..........   (((وستوديو)))


            بخطــوة الزايـر. هلا.       
            بصـرخه صاحت كربله

هلا. بالمشايه.   هلا بالمشايه
___
نمشي خطوات.    مسافات.      نون المصيبتك
شنهو حر صيف.     يمــولاي.    نروح الكـبـتك


شفــنه انواع المشولك شايب يكـوده لولد
مكَـٍرم وجاي الضريحك زحف جاي ولاكعد
الله سير كلش الـــجلك ياحـسين ع الوعد
أحنه شيعه وأنتـه حبنــه مانعـــوفك الأبد


طلعـت آلااف الألوف
رايه شالو بالجـفوف

عايف البـــيت وهــله     بصرخه صاحـت كربله
___
طلعت الناس.      ملايــــين       تلاكي أم الخـدر
رجعت بروس      للطـفوف.       يويلي من اليسر


رجعت بدمـعه عذرها الدمعه بيها تلاالي
وعايفه بديره غربها.رقيـــه بنــت الغالي
تكله لا تنـشد يخـويه ماتطــمن أحـوالي
نكصد بدمعه حزنه نواسـي أخت الوالي


رجعت الأرض الطفوف
تسعه يم كبره وتـطوف


رقيــه مـــو بالــــقافله.     بصرخه صــاحت كربله
___
خادم  يـصيح.    يـــــزوار.   علي وياكم علي
فدوه مشـاي      يله وياي       مبـيتك يم هلي


فـدوه يازاير تمـرنــه الجلك أفرش عينـي
والله اغـطيك برمــشها يل تـزور حسـيني
من اخدمك ها يزاير خـدمه تسوى سنيني
خاف أقــصر أنه بــيــها ماأكــمل دينـــي

الخدمه أحله من العمر
الخـادم يــنادي بـعــذر


الخادم بصـيتك عـــله.     بصرخه صاحـت كربله
___
سفرت  حسين    حتى. الطير.     شبع منها وقنع
كل سنه تزود     للمعشوك        يعشـكي الماكطع



سفرت  وحده بهل مواكب تنمد بطول الدرب
زايد الخير وننافـس خلهـا تــسمع الغــــرب
العالم يحير بفعلنه عدنه سهـله وموصــعب
فـــدوه ياالزاير تـــمرنه أفــرح أنه من تطب


الزاير بكل خطوه حــــج
المهـــدي ندعيله بـــفرج



بالفـــــرج ندعـــي إله      بصرخه صاحـت كربله
___



الشاعر الحسيني
مرتضى مكطوف الموالي

الناشر احمد الفاطمي

21 июля 2025 20:40

يا يمه يا يمه جسام يايمه
.........................
ام الولد تطلب رباهه
وتطلب سهرهه من ظناهه
وآنه الابنهه فاركاهه
من راح عنهه ماخذهه
بفراكه بفراكه ذل روحي بفراكه
مايدري بيه
مشتاكه مشتاكه لوليدي مشتاكه
شيرده اليه
يايمه يا يمه جسام يايمه
.........................
فكدك هدملي اعليك حيلي
عشرة سهر خلصان ليلي
غركان بالمدمع شليلي
احسب واكولن هم تحيلي
ياروحي ياروحي جسام ياروحي  الفركه ثجيله
من نوحي من نوحي
ملوني من نوحي وياهو اشتكيله
يايمه يا يمه جسام يايمه
...........................
جندوب اكابر يبني جندوب
والعين مربيه اعله الادروب
يبني الضوه من عيني محجوب
مدفون عني وخدري مسلوب
مسلوبه مسلوبه يايمه مسلوب ودوني للشام

واعتابي واعتابي ماتسمع اعتابي يبني يجسام
يايمه يا يمه جسام يايمه
.......................
عازت ولد واتحنله امه
وبحضانهه اشتاكت تضمه
جن دنيتي ابلياك ضمه
وطولك صبح ماي ونصمه
شمحصله شمحصله من دهري شمحصله غير البواحي
من عيني من عيني مبيوك من عيني حلو المحاجي
يايمه يا يمه جسام يايمه
.......................
ما يندخل والبيت خالي
وردتك عليه عين والي
غير الدمع شنهو الصفالي
للدفن جفك ردته تالي
اهدومك اهدومك اشتمهن اهدومك ويردن الروح
والكاهن الكاهن ياجاسم الكاهن لچمه اعله الاجروح
يايمه يا يمه جسام يايمه
.......................
ياعلتي اعله اجفاك عله
رايح يمن مامنك اغله
الميت اوليده ابعمره شله
كون ابكبر يمه ايتخله
وايشوفه وايشوفه
مدفون ويشوفه ويحجيله ضيمه
يالغالي يالغالي دنياي يالغالي جن كلهه هيمه
يا يمه يا يمه جسام يايمه
.........................
يبني الحنين ابجفه عازه
وامتونه حگ شيل الجنازه
والموت وي امك توازه
وحفر الكبر يحرم جوازه
وانحفره وانحفره نمشيله وانحفره واحجيله الاهموم

محتازه محتازه جف ابني محتازه يحضرني هاليوم

خادم اهل البيت علي الزرگاني

الناشر احمد الفاطمي

21 июля 2025 16:14

گالو عليه المرض مأخذ صحته
گلبــــو الشام الليله هــو وعمته
:::::
گالو اعليه المرض خلص حياته
الدنيا يگلبها اذا ينكـــــت عباته
هواي ما ينعدن ابدن معجزاته
وحده منهن كافل اصبح يم خواته

الدين كله انشال ندري ابخته
:::::
صارت الخطبه مثل نص القصيده
عركة الطف عادت بصوره جديده
الشام واهل الشام سواهم عبيده
چنه العباس كلمــــا يرفـــــِع ايده

الشام من طباها صارت سكته
::::::
ما مگيد بالسلاسل چــــــذبه هايه
شلون اسير ويمشي اشوفن بالبدايه
اليــوم كــــل الشام اخليه بالنهايه
هاي للعباس شوفــــــو بيدي رايه

شيخ العشيره وتنفرض سالفته
::::::
مـــــــن دخل ديوانهم شيخ وفراضه
چنه بيرغ عالــــــي وبنص العــراضه
جيت مو جيت سبي جيت انتفاضه
احنه وي الباطل شلــــــون انتراضه

اليوم امحي الشام كل طايفته
:::::
عندي ثار وياكـــــم وجيت انه ارده
خل يجي يگابلني كلمن سيفه عنده
اليوم كل واحد احط صطره اعله خده
چنه العباس هــــــد محـــــد يرده

الماي ليحط راسه يم السده
::::::
علي جبار الكعبي
الفاتحه لوالدي

الناشر احمد الفاطمي

21 июля 2025 13:54

قصيدة في شهادة الإمام زين العابدين عليه السلام  ..
ـــــــــــــــــــــــــــــــــــــــــــــــــــــــــــــــ


آنه العِليل الما رَحَمني ٱزماني
ذِبحَـوا أبوي بكــربله وخواني

ـــــــــــــــــــــــــــــــــــــــــــــــــــــــــــــــ

شِفتِ المصـــايب يا خَلَـگ بعــيوني
حِرگــوا خِـيَـمنا وبالحَــبِل چتفـوني
شِتمــوهَا عَمْــتي وَانَه هَم شِـتموني
ماعندي حَـيل ٱمنِ المَرَض شافـوني

بهاي اليِتامى والحَرَم حِرت آني
ذِبحَـــــوا أبوي بكربله وخـواني
ـــــــــــــــــــــــــــــــــــــــــــــــــــــــــــــــ

آنه العِــليل وحــــايِر بهالــــعَيلة
مفزوعة الٱطفال ودَمعها ٱتسِيلَه
وَيّ الرباب ورَمـلة ناحَـت لِيـــلة
وزيـنب تِگِلّي جابَـوا الهِــــــزيلَة

مَيّت يَرَيت ولا شِفِت عَساني
ذِبحَـوا أبوي بكربله وخواني

ـــــــــــــــــــــــــــــــــــــــــــــــــــــــــــــــ

شِفتِ المرار بسَفرتي الأليمة
رِحلَة عذاب ونايبة وهِضيمة
ضِربَوا رُقَيّة وسكِينة اليَتيمة
أحقاد أُمَــيّة مدفونة وقديمة

والجَدّة هِنـدَة والنّهَج سُفياني
ذِبحَـوا أبوي بكربله وخواني

ـــــــــــــــــــــــــــــــــــــــــــــــــــــــــــــــ

لَرضِ الغُـرُب لَمّن وُصَـل ظعَنّه
شِفنـه النواصِـب كِلها تِنتِظُرنَه
وادِمهه بِحجـارَة حِقِــد رِمَتـنَه
ماكوعَشـيرة النّغـرَت وحِمَـتنَه

كِل هذا وَانَه ٱمحزّم بإيماني
ذِبحَوا أبوي بكربله وخواني

ـــــــــــــــــــــــــــــــــــــــــــــــــــــــــــــــ

لمَجلِــس يزيد الطاغية وَدّونَه
يِنفي الرسالة والوَحِي بظنونَه
بنَظرَة شِـماتَة اليَمّـه يِنظِرونَـه
سَبّ الزچية الطـاهرة وأُبـونَـه

وَانَه الحديد برُگبتي وأدماني
ذِبحَـوا أبوي بكـربله وخواني

ـــــــــــــــــــــــــــــــــــــــــــــــــــــــــــــــ

بِتنــاهَه ذيــچ الليــلة بالخــرابـة
دَلّالـــي يِــنزف مِن كِـثُـر عـذابَـه
طفلة ويَتيمة ٱتصيح أريدَن بابـه
شــافَت أبـوها ومِــن بَـعَـد غِيابَه

موقِفها فَجّر حَسرِتي وبَچّاني
ذِبحَـوا أبوي بكـربله وخواني

ـــــــــــــــــــــــــــــــــــــــــــــــــــــــــــــــ

گضّيتَه عُمري ما نِسيت الـعاشِر
دمــعي أبـد ما فــارَگ المَحـاجِر
مِن عَملَةِ الطّف گلبي لَسّه شاجِر
بَس هُوّه عاش وماتت الضّـمايِر

زَين العِباد آنه الحِزِن عِنواني
ذِبحَـوا أبوي بكربله وخـواني

ـــــــــــــــــــــــــــــــــــــــــــــــــــــــــــــــ

خِلصَت حَياتي الهَم يِدولِب بِيّة
كِـــل لِيلة أنصُـب بالـحِزِن عَزِيّة
تالـي الســموم بكِل عِرِگ سِـرِيّة
للبــاري أمشـي والنّفِس مَرضِـيّة

يا شيعة ٱذكروا ٱمصيبتي وأحزاني
ذِبحَـــوا أبوي بكـــربله وخـــــواني

ـــــــــــــــــــــــــــــــــــــــــــــــــــــــــــــــ

بقلم الأستاذ / ستار عذاب الحچامي

الناشر احمد الفاطمي

21 июля 2025 09:41

متحزمِين     للأربعينية
مشتاگـيّن      للأربعينية
 ــــــــــــــــــ 
تحَضِرت للخِدمة والله كُل مَواكبنة
كُل سنة اعله الوعدْ هذا بكُل عَزيمتنة
حسين يستاهل تعبنة وهالتحزَمنه
وخدمة الزوار نِعمة وهذا واجِبنه

متحضرين     للأربعينية
مشتاگـيّن      للأربعينية
ــــــــــــــــــ
رَفت الراية العظيمة راية الخدمة
وطلعت الزوار تمشي صوبْ أبو اليمة
نحمِد الربْ ونشكره لوافِر النعمة
 شرف من نخدِم الزاير حتلوا چلمة

منْتظرين      للأربعينية
مشتاگـيّن      للأربعينية
ــــــــــــــــــ
باجر بهاي المسيرة نخدِم بفطرة
والخِدم اسمه تسجله فاطمة الزهرة
واليحب لازم يقدم خاطر العشرة
هذا سر من الله هذا حب أبو العترة

مخلوقيّن      للأربعينية
مشتاگـيّن     للأربعينية

ــــــــــــــــــ 
هذا درب الجنة هذا والخدم زائر
يبقى ربحان بحياتة والله مو خاسر
ما يضيع التعب هذا والأجر حاضر
خدمة حسين العظيمة تشبه العاشر

متطوعين      للأربعينية
مشتاگـيّن       للأربعينية 
ــــــــــــــــــ
 يله يا زاير يغالي اطلب إِتمنه
لو تريد الجنة يمك اعتبُر جنة
من قلب صافي بخدمتك والله مو مِنه
نفرح بيوم النضيفك نخدمك يَمنه

ممنونيّن      للأربعينية
مشتاگـيّن      للأربعينية
ــــــــــــــــــ
هاية معجزة المواكب ثامن العجبة
تسهل الخدمة بوَحَدها ماكوا كُل صعبة
واليقدم من يقدم ينطي من قلبة
واليجي زاير طريقة ماَ يحسْ غُربة

معروفِين      للأربعينية
مشتاگـيّن       للأربعينية
ــــــــــــــــــ 
الشاعر زين العابدين الشمري 

الناشر احمد الفاطمي

21 июля 2025 04:40

مــات زيـن العــابــديـن اللـيلـه مات
سِبب موته الشام مدري امن الفرات
ياهو عنه نسأله ؟؟... واهله موته ابكربلا
___________________________

الچان روحه اتروح كلما ينظر الماي
الچان يبچي اعله ابو اليمه رايح او جاي
الما تهنه ابنوم ليله او گعدت افياي
ميًت او سكنت اضنها اجروحه الهواي

وآنه اضنهن خمسه اسباب الوفاة
اجروح چنها ارماح بيه امنبتات
بلوه بيهن ابتله ... واهله موته ابكربلا
___________________________

السبب الاول مهجته صارت نحيله
گد بكائه اعله ابو اليمه گد عويله
ابثگل خيل العشره حسراته ثگيله
او مثل درب الشام لوعاته طويله

مثل عينه ما بچت بالدنيا عين
ليله وانهاره ينادي يا حسين
العيش دونك ما حله ... واهله موته ابكربلا
___________________________

_والهظيمه _ سبب ثاني الهل منيه
يوم شاف احسين طايح عل وطيه
ايصيح ضامي يا خلگ رايد أميه
ماي ما ودّوله . ودّوله أعوجيه

صار يتگلب تحتهن عل رمال
واكو حافر وصله من اشلائه شال
للمخيّم وصّله ... واهله موته ابكربلا
___________________________

ثالثا هيه - حسرته - اعله النساوين
يوم حرگوها خيمهن والصواوين
او عمّته تركض تناشد عل گمر وين
خل يشوف اشعمل بينه خصم الحسين

ايشوف سوط الشمر لوع عمته
روحه طلعت يا خلگ مو دمعته
هامت ابهاذه الفلا ... واهله موته ابكربلا
___________________________

رابعا ( بل قهر ) لمن حادي الضعون
ابسوطه چم علويه گطّع منها الامتون
او عل هزيله اركبت زينب تجري العيون
عله ابن زياد لنهم بيها يردود

وصلو الكوفه او لگوها اتدگ طبول
والشماته بالحچي اتصول او تجول
كل اتنادي لا هلا ... واهله موته ابكربلا
___________________________
(الشام ) آه الشام خامس هاي الاسباب
الشام آه الشام اعظم واكلف امصاب
علي راسه او گلبه بيها امن القهر شاب
علي چم مره تمنى ايواره الاتراب

موش من السم گضه زين العباد
مات بين ايزيدها او ابنو زياد
سمّه اهون مرحله ... اهله موته ابكربلا
___________________________

ابو فاطمة الطائي

الناشر احمد الفاطمي

20 июля 2025 18:58

عالناكه من كلبي تـوازه -- شدوني جــن شدة جنازه
بجفوفـهم خلتـني دنياي
العـزو عليك بـرودة الماي
------------------------------------------------------
1= من حضنك لحضن الخرابه -- ضلت الأسكتي ومشت بابه
غاب الدلال وحضرت النوك -- والحادي مايـــــرحم عذابه
شينوم الماعـــــدهه خيمه -- ينام الجفن ويكعــــده ضيمه
ماشايفه عــيوني هالدروب -- ولا راكضه أبنيتــك بهيمه
قـبلي الشام ما داخلـته علـــويه
بديها أحبال فـــوك الناكه مسبيه
**
حقي أشوفك راس وأبجي -- وياك محد يــقـبل أحجي
أنته داواي ومنعـو أدواي
العــزو عليك بـرودة الماي





2= تـنزل دمعــتك ما تــردهه - حبال السبي بـيدك تـشدهه
الماعدها والد أحسن تموت - ولا تمشي للغـربه وحدهه
العيونك الطيبه عـــطشنه - أطشرنه بعـــــدك من يلمنه
ماطالعــــــين بلايه وليان - من كطعـــو أوداجك طلعنه
الدمعه التجري مني تحرك بنحرك
يالمحتار بأمري أتحـــيرت بأمرك
**
كدامي راسك رمح شاله -- كلبي يـــــبويه دم بجاله
جروح بغيابك صارت هواي
العـــزو عليك برودة الماي









3= وين ألتفت كدامي حيره - والسبي سالفــــــته جبـيـره
يتـناحبن عماتي عالنوك - وين العــــــزيزه والأميره
بعدك حياتي بس بـواجي - لا ضــــــل دلال ولا تراجي
ياكل بكلبي ضل الغــياب - نار وكلت طـــرف الخواجي
نطب للشام وأيــغــير معـانـيـنه
شبدينه وعدنه ضلت بس بواجينه
**
بسوك الشماته أيكعدونه -- وحنه بنات ومات أبونه
ماخلو أهلي تعـــيش وياي
العزو عليك برودة الماي









4= تـــرفات يابـويه أديه -- والحبل مايعــرف خطيه
زلمه يشدها وأنه طفـله -- ومايــــنكسر كلبه عليه
صعـــدني كدام السبايه -- وفاطمه صعــــدها ورايه
شدها أدينه الأيد بـا لأيد -- وعلينه شد طرف العـبايه
أريد أبجي الــدمع من ينزل يشوفه
وأخاف يجرني ووكع وانه مجتوفه
***
من جلمة البويه منعــني -- يضرب متوني لو سمعني
منعوني بويه يطلع بجاي
العـزو عليك برودة الماي









5= أنطـــوني ماي وماشربته -- عطشان أدري وألك جبته
كـــام السـباني مني بـداه -- عوفيه يضل كال بعـطشته
عطشانه بس الماي عفته -- راسك تــحرك بويه شفته
هوه الخسر مثلك يالحسين -- يامـــــاي اليطفي جمرته
الدم البراسي طاحت فوكه خيمتكم
بعــدكم كون مــــا عاشت رقيتكم
*
عالطـشت موعـدها منيتي -- ونحرك يضل يسمع بجيتي
يفرضون ضلوع الحرم راي
العــزو عليك بـرودة الماي
*************
عبد الجليل المالكي

الناشر احمد الفاطمي

20 июля 2025 15:16

يم جثته گعدتي شسولفيتي
شحچه وياچ زينب وشحچيتي
گلتيله امشي خل نروح
گلچ خويه مذبوح
عيونچ طاحن بگد ما بچيتي
:::::
حيل ما بيه واجيت اركض ركض
گلبي ما ينطيني نايم عالارض
الخيل تسحگ بيك احس طول وعرض
حسين من گد السحگ ما بي نبض
نحره تكلم وحاچاني بهداي
زينب يختي رايد اشرب الماي
دمك شفته مسفوح
::::
شطلعچ باليل ياهو الوصلاج
جاي اشوفنه الشمر يركض وراچ
وين ابو فاضل قبل چان بگفاچ
وين وداچ الزمن المن خذاچ
باچر يختي ما يبقالچ اموتن
عليچ الناس كلها معارك اعيون
كفيلچ يختي مطروح
:::::
ما عرفتك بالشكل تدري انت زين
هو انت حسين ما ظنك حسين
انه شميتك تره مو شوف عين
باچر اختك وين ما تعرفني وين
اشيلن يا كتل يا كتل اخلي
ماكو اي مكان وسهم ما بي
زينب يمك تنوح
::::::
باچر ايدخلونچ بمجلس يزيد
وانتي بچفوفچ سلاسل من حديد
باچر ترگضين زينب من جديد
كلها تنظرلچ صفت حتى العبيد
تره وسط الخرابه انتي تگعدين
اخت عباس هاي واخت الحسين
گلبچ يختي مجروح
:::::
بيش اسكت بنتك وتنظر عليه
گمت امسح بالدمع بچفوف اديه
يالخرابه وجابو براسك هديه
شهگه وحده وماتت براسك رقيه
ما تحمل ضرب ارقيه تنباس
ماتت بنتك ومن حضنت الراس
ما ظل بيها ابد روح
::::::
علي جبار الكعبي
الفاتحه لوالدي

الناشر احمد الفاطمي

20 июля 2025 13:17

(يازين العابدين)

شتلگه ياموت وعليمن جاي اله
هناك روحه مادريت بكربله
يم اهاليه هونك عليه
""""""""""'''''''''''''''''''''''''''''''
بزين العباد عله هونك بس نفس باقي تره
روحه ماتلگاها عنده للطفوف امسافره
شگد هظم شاف بحياته حگها منه مهاجره
شگد حمل حجي الشماته شماتنوح مخدره

من ظهر عاشر محرم لليسر
من چتل اهله وسبيهم منكسر

وبلي مر بيه هونك عليه
........................................
والقتل عاده عليهم والشهاده الهم مصير
لچن موعاده خدرهم وي غرب تمشي وتسير
ويل تريد الروح منه أنه اگلك لاتحير
اگصد الطف ها يموته تلگه روحه اعله الحصير

تلگه لسه الروح بالظامي تلم
تطوف نحره وتشبگه وساعه تشم

وجيتك ليه هونك عليه
...........................................
المرعليه مامر عله أحد وشد من گطع النحور
شافت عيونه يوسفه سياط بمتون الخدور
ونفس هاي عيونه شافت عمته تطب القصور
وبل حبال مجتفيها عمداً گبال الفجور

الما سمع صوت الها جار ولا علم
مجتفه وتتشمت أشباه الزلم

يل توافيه هونك عليه
............................................
بهل خبر ياموت اگلك بالمسير ويل عده
عل هزل للشام وصلو ولگو شام معيده
بالضحه دخلو عليها وكلها جانت مسعده
للنسه گربو عليهن روس اخوته اوالده

حته كلها تشوف زينب والخدر
گامن وبجفوفهن سون ستر

النظره ترميه هونك عليه
............................................
شوف اثر گيد بجفوفه من السلاسل يل ممات
الشام عدها تمنى موته من الهظم والنايبات
تعنو بخدره الخرابه رادو بذلة تبات
وعله راس حسين أبيه فارگت أخته الحياة

شافها وناده اعله عمته بحسرته
عمه شيلي اختي تراهي ميته

من يعزيه هونك عليه
......................................
ها يموت انظر لحاله يلتفت يمنه ويسار
تمنى واحد من اخوته والگلب بخوانه صار
تطلب جفوف الجنازه تشيعه وتطلبه ثار
مجتله ليش العشيره كبارها وي الزغار

ياهو ليشيعه واخوته مذبحه
حگ عليه لمن تنوح النايحه

يلي تلفيه هونك عليه
"""""""""""""""""""""""""""""""""''''''
خادمكم قاسم المالكي

الناشر احمد الفاطمي

20 июля 2025 09:07

مهرك اجاني بطيف  وتهل  دمعته
شفت السرج مگلوب وعنك سئلته
احسيني وينه   مارد علينه   بس تبجي عينه
حسين                حسين
……………………………………………………………… 
وداعت شوفت عيونك   اجاني بطيفي ميمونك
گبل  ماتطلع    شلونك    نظرته
السرج مگلوب يل والي    وفوگاهه السرج خالي
نعصر  يحسين  دلالي     نشدته

 وين     خيالك   يمهره      همهم  وباوع  عليه
يل سئلتي بياهي اخبرج   عفته  فوگ الغاضريه
عل   رمح شي منه شالو  ومرمي شي فوگ الوطيه

يم البنين  جروح  بحسينج  اهواي
هم  سامعه  بمذبوح  ماشربو  ماي
دم الشفيه   هذه العليه    وانه شبديه
حسين                 حسين
…………………………………………………………………
احجي   بجمرة   غيابه   لوعن  لوعة  مصابه
لو   عن   سلبة   ثيابه     شفتهه
شسولف عن گطع نحره   موطبرة ظنعش طبره
يم  عباس   من ظهره     ذبحته

عمت   عيني  فوگ ذبحه    رضرضوه بخيول عشره
كرهت كل شي اسمه حافر   من شفتهن فوگ صدره
من   كثر    مابيه  داسن      سون بنص صدره حفره

صدره  انطبگ  بگفاه  اه  يل  حوافر
طعنه  اعلى طعنه تشوف من البواتر
ذبحو رگبته   رضوهه جثته  بياحاله شفته
حسين               حسين
………………………………………………………………..
حرت  وشلون   اجمعنه    اوصل وبتعد عنه
خاف اسحگ ظلع منه     التوذر
اسمعه يگلي يامهري     اوگف لاتجي بكتري
مايحمل بعد صدري      التكسر

انته بس  المارفسني     ويلرمل  جسمي  توزع
بهيده من تگرب عليه   من الرمل لوصوت تسمع
شيل يلميمون رجلك     حدر جدمك ظلع يطلع

لبنت امي  روح بساع   لاتبگه  يمي
زينبنه  خل تشوف  يامهري   دمي
ظنهه ارجعلهه  من غيري شلهه  يامهري گلهه
حسين                حسين
…………………………………………………………….
اعوفك  گتله ماگدر    عليك الجيش شويفتر
وخاف اتگرب واعثر    بالجروح
ما  كفتهم   العشره       بكل حبة  رمل  وذره
شافو خنصرك شذره      يمذبوح

گطعت الخنصر عمتني    شلون اجيب اختك يخوهه
رايده   تلم  بل  يتامه     شما      تلمهه يطشروهه
ذيج   التحبهه  العبايه      ويه   الخيام   احرگوهه

من سولفت  لحسين  بزينب  وخدره
ماعنده  عين  تنوح ضل  يبجي نحره
دمعاته حمره    وجروحه خظره  گلبه ويخدره
حسين              حسين
………………………………………………………….
حسين  عليج   وداني     رساله  بطيف  عنواني
ابد ماگصرت اخواني      بدماهه
يم  عباس  ومروته      سمعت الخويه من صوته
يمحلاهه لجن موته       طفاهه

 وصل  مهرك  والرساله       ونته  مامريت  بيه
حسبني طف يمه بحنانك   وسير بطيفك عليه
كربله  تخيلهه   روحي     وطشر ضلوعك بديه

لخبرني  رد يحسين   عني  يخبرك
من حلمي من فزيت ماشفته مهرك
راح وتركني   اصحه اعله وني  ماشفته لني
حسين                حسين
……… .……………………………………………………….
خادمكم.قاسم المالكي

الناشر احمد الفاطمي

22 июля 2025 10:49

اليزور حسين.    عارف بحقه
في سند ثابت     يثبت بصدقه
فوز في يوم النشور    بحقه كل عارف يزور
عارف بحقه
==========
اليزور حسين متعني لضريحه
بهل حجي عدنا روايتنه الصحيحه
كمن زار الله في عرشه ومقامه
هالحقيقه واضحه وكلش صريحه

جنه مو من القبور     بحقه كل عارف يزور
==========
الكاصد وعنده علم عنده درايه
عن زيارة سيدي هاي الروايه
عن امامي الصادق وهذا حديثه
وهالحديث بوحده هو كفايه
شمس مابين السطور     بحقه كل عارف يزور
==========
بالعمر واجب فرض عدنا الزياره
عن يقين وإلها ماخذنا استخاره
من اساس الدين واركانه وجوباً
عن روايات المشي موضح قراره

شما تمر بينه الدهور.   بحقه كل عارف يزور
==========
خذنا من حسين دستور الحقيقه
للعلي نوصل لمن نمشي بطريقه
هو ثبت دين جده من دمائه
حين دمه ابكربله بالطف اوريقه
لسه دمه ظل يفور      بحقه كل عارف يزور
==========
ياشمس ماينحجب ويشع ضواها
الدنيا لوماحسين يخنگنه هواها
انت سلطان القلوب وماكو غيرك
إزيارتك جنه فلا شفنه سواها

شمس للدنيا تنور.   بحقه كل عارف يزور
=========
الشاعر علي النائلي

الناشر احمد الفاطمي

22 июля 2025 08:06

قصيدة من نوع خاص....👇👇 الدول كلها ادور على القائم
انتو يا شيعة هدفها القــادم
الراد ينجه منآل أُمية لا يعوف المرجعية
****************************
ها يشيعة حيدرهَ شفتــو المجــازر
مو روايـة ولا خبــر لا بث مُبـاشر
كَطعوالشيعة المهدي شكَد منـــاحر
بس تأمـــن بيهــم يقتلـــوك باݘــر
دير بالك تنطـي يوم ابدينك
لا تبيعلهم يشيعــي حسينك
الينصر الباري ونبيه لا يعـوف المرجعيــة
****************************
عافــو الدنيا وأجـو يا شيعة إلكم
حَلِلو مو هســه من سنيــن دمكم
هِند امهم وأنتــم الزهــراء اُمكم
ذوله وِلد الحركَ يوم الطف خيمكم
ينتقم منهم المهدي الثـــائر
اليوم وِدهم ينقتل مو باݘــر
الرايد يوافي الزݘيـة لا يعـوف المرجعيــة
****************************
مو ثقـــة ذولـه ولا عدهـم ديـانة
النبي وصاهم وخانوهـه الأمــانة
ترسو التـــاريخ مالتـهم خيـــانة
اليحݘي عالمذهب نكص لازم لسانه
غالي جـداً مذهبـــك لَتبيعه
همهم يقتلـون كــل الشيعة
والحرم تمشـي سبيـة لا يعـوف المرجعيــة
****************************
سبايكر رادوها تشمــل كل وطنـه
ينهدم حته بواليمه حسين صحنه
الوطن روحك هذا لا تتبــرة منــه
رادو ينسفونه ݘـي شاوفوه جنه
شكَد يكرهون العراق وناسه
طلـع تاريخ السقيفة خياسه
يذبحون على الهويــة لا يعـوف المرجعيــة
****************************
عرفـو المهدي غـداً يمليها عَــدلاً
يصير قائد عالكُرة الأرضية حصراً
إذن كلشي يرتبط بـي كـون يُدفن
النحور العدنه هاي انريدهه ألمن
كلشي أهدي لبو اليمه الغالي
بيتي واهلي وركَبتي وعيالي
الضحه بعيالـــه إليه لا يعـوف المرجعيــة
****************************
أحنه اذا ما نوكَف ونحمــي بلدنه
حته من ندعي الله سبحانه يردنه
نكَدر نواجــه رغم قِلــة عددنـــه
بحرب داعــش كَفو أوَفــو ولدنه
عالسواتر لسه دم انحورهم
عطر متروسات تلكَه كَبورهم
الراد يهديهم هديــة لا يعـوف المرجعيــة
****************************
إحـــذر ولا تلتفت للقيـــل والقـــال
عرضه ما يحمي تره الميصير رجال
شكثر سامحنه وعفينه وطلعو أنذال
احلى شي عند آل أمية قتل الأطفال
إلقتل والغــدر عدهم عــادة
لعنة الله على الشمر واحفادة
الشيعي خل يسند اخية لا يعـوف المرجعيــة
****************************
أرجو أن وِضحت إلك هاي القصيدة
حتى وآحدنــه يموت علـى العقيـدة
وحتى ما يبخل على المذهب وريده
ومثل أبو فاضل لدينــه ينطي إيـده
يالله خل الوطن بيكم عايش
تـره يومية يجيكم داعــش
للوطن نوكَف سويـه لا يعـوف المرجعيــة
****************************
حيدر حسين الكَرعاوي

الناشر احمد الفاطمي

22 июля 2025 08:06

ياروحي موتي وارتاحي من الشفتة بهاي العين
أنة الما مرتاح بعمري من ذبحوا كدامي حسين

....

العليل الما بقالي حيل ..أنذبحن كلهن احلامي
أنة الذبحوا هلة بفد يوم.. يروحي هناك كدامي
شفتة اني اخوية يلوج ..صريع مخضب وضامي
وابن عمي يموت هناك ...يويلي بحنتة دامي

وشفت الكافل عمنة الهيبة طايح ماعندة الجفين
أنة الما مرتاح بعمري من ذبحوا كدامي حسين

....
شفت عبدالله ينحب جان.. من كثر العطش والهم
خذاه بس من خذاه شلون.. يشرب ماي بس يحلم
رجع للخيمة بس شلون ... من نحرة يصب الدم
عبدالله ترف نحرة ... يوسفة شلون يتألم

ست اشهر عمرة ويتلوع وياروحي بي لو تدرين
أنة الما مرتاح بعمري من ذبحوا كدامي حسين

....

شفت حسين ابوي هناك .. شلون يطيح من مهرة
صدرة اللي يلم الخير ... شمر كاعد علة صدرة
يروحي من الكفة شفتيه ... من كطعوا آلة نحرة
ومن هدت عليه الخيل ...ثكيلة ورضتة العشرة

طشر جسمة بدوس الحافر واصل وين
أنة الما مرتاح بعمري من ذبحوا كدامي حسين

....

يروحي شكد تجويتي ... من حركوا خيمنة بنار
حيرة وشنهي من حيرة...يوسفة الوحدي واحتار
اطفي خيامي مدري اركض ... مدري احمي يتامة ازغار
بوجهي النار بكفاي أعداي ... حيرة هناك وين اندار

نركض بين النار ونعثر وأطفال العندي ثمانين
أنة الما مرتاح بعمري من ذبحوا كدامي حسين
....

يروحي ارتاحي ياروحي ... وبحسين التقي بسرعة
هاي الدنية بس هموم ... عمر يخلص بجي ودمعة
شوفي حسين هسة شبي ... الراح بكربلة ضلعة
صوتة البي صباح الخير ... هسة نرجع نسمعة

بأجر يم حسين وندري ياروحي لا متحيرين
أنة الما مرتاح بعمري من ذبحوا كدامي حسين
....

منتظر صالح الكعبي

الناشر احمد الفاطمي

22 июля 2025 08:06

شفنه مشاية اجتنه و عالنخل نصعد راح
طَلَع البَدرُ علينا صوت كل موكب صاح
من ثنيات الحنين .. طلع سيل الاربعين
~~~~~~~
بسم الله رحمن البشر .. طلعت مواكبنه اهواي
اندور عله الزاير مثل .. صايم يدور ع الماي
ملگة المدينة للنبي .. نتلگّة راح المشّاي

حضنة الگاع اعله الماي.. زايرنه هيچ نحضنه
نيبس مثل صبخة طين .. و الزاير ايخضرنه

من صباح الله لمسيته نصفن اعله الزوار
هسه مشاية نگلكم؟ لو نگلكم أنصار؟
من رحم حزن السنين .. طلع سيل الاربعين
~~~~~~
المشاي اذا جانه نفز .. للملگة فزة ملچوم
اخلص لِمَن تخدم لأن .. ضحة بگربته المخدوم
گاع الله تتحول سمة .. گد ما مواكبنه انجوم

يالتخدم اخلاصك صار .. چنة اعله راسك ريشة
مية هلا بكل مشّاي .. من كربلة للبيشة

والحسن زارع مضيفة بكل مضيف وكل بيت
والمعازيب المواكب للعرش واصل صيت
الله وي الصابرين .. طلع سيل الاربعين
~~~~~~~
المشاية خير وبركة .. بعرضتهم الشر مدفوع
خيرات الحسين انچفت ..اتكفي لبعد ميةْ اسبوع
امنبعد جنوبك للوسط..كل خطوة موكب مزروع

شايب نحيل ومشاي ..وبوصلة شد الحاجب
لو ناده يالزهرة اعليچ ..يركض اركاض الشايب

اليمشي وايدگ اعله صدرة ويبچي ويصيح احاه
زينب امن الناگة تنزل بالدرب تتلگاه
ايحبه زين العابدين.. طلع سيل الاربعين
~~~~~
شيب وشباب وكل بخت ..يطلع مشي بنص الليل
كلما يصادفله ترب.. يذكر صدر فوگه الخيل
ومن يمشي واتجيسه الشمس..يدعي عله العاشر حيل

البيرغ يرفعه المشاي .. الزهرة وابنها اتشوفة
لاتذكر اچفوف وماي .. وصوه يظم اچفوفة

بعتبة الحظرة ابوفاضل واگف ايلاگي الجاي
وبثواب اگلوب اخوته بالدرب وزع ماي
واعله چيس ام البنين ..طلع سيل الاربعين
~~~~
اليمشي ويجي بظهرة علي ..وگدامة عين العباس
بالحايط ايطگ الحچي ..وكل حاقد وكل الناس
والحچية سلّاية سعف .. لايدنه دوم اعله الياس

اليحچي بحقد عالخدام.. خل يحذر امن الزهرة
والعينة حمرة ومسموم .. بعيونه نوگف ابرة

يالحچيت اعله المواكب كلمة اريد احچي وياك
دير بالك لا تعثرك ام الحسين اهناك
تطي وجهك گلي وين ..طلع سيل الاربعين
~~~~~~~
علي هادي الخزعلي

الناشر احمد الفاطمي

22 июля 2025 00:51

نحسب احساب المشينه
حسين منعوف اربعينه
يحسين يحسين يحسين يحسين
...................................
يوم يوم نعده. حزامه كلمن شده
بخوته وصحبانه هجره نحوه الباري

مشي بنية قربه الى ازكى تربه
كربلاءُ الحبُ قبلة الاحراري

ولمصابه الحرگه بينه
حسين منعوف اربعينه
يحسين يحسين يحسين يحسين
.... .......................................
عزبنه بروحه وياكثرهه جروحه
شويه درب الخدمه حسينه شنوفيله

النه فده الاكبر ومهجته والمنحر
وابوفاضل كله شنوفي من نمشيله

زيارته نذراً علينه
حسين منعوف اربعينه
يحسين يحسين يحسين يحسين
..............................................
اجر مو غايتنه ولايشد همتنه
هوه كل الغايه كون يرضا الخدمه

الاربعين انتاني كلمن ويالثاني
سوالفه المشايه يشد همته وعزمه

والحبيب الله هوينه
حسين منعوف اربعينه
يحسين يحسين يحسين يحسين
...................................................
المامشاله بخطوه الدنيا عنده شتسوه
شلون عايش عجبه وكل طعم مابيهه

المامطبع رجله يالمگرم گله
المن الله انطاهن للمشي مسويهه

چلمة من الذر نطينه
حسين منعوف اربعينه
يحسين يحسين يحسين يحسين
...............................................
خادمكم قاسم المالكي

الناشر احمد الفاطمي

21 июля 2025 22:17

▪️▪️▪️▪️▪️
انه ميّت چنت من قبل لا أنسَم
من شفت الأبو غارگ ابفيض الدم
گلبي انشلع ولله ابحالتي يعلم
ما تسكن هيهات اجروحي

مصايب كربله ماكو اليضاهيها
او كل هذا الوجود اتألّم اعليها
الها اعيوني ما گطعت بواچيها
حد ما گطعت ريتي انفاسي

كل صبح او مسه أبچي لأن مفجوع
أنظر راس عالي اعله الرمح مرفوع
واسمع ركض خيل او طحن مال اضلوع
والطم عالراس ابچفّيني

كل يوميّه لو رادت اعيوني اتنام
تتراودلي صورة حرگ مال اخيام
او ما بين الزلم تركض نسه وايتام
واتدوّر عن مشرد ليها

الطف كلما أذكره اتگوم روحي اتشوط
واشما تصد عيني اوصال ابوي اتحوط
الماي او زادي يصفه ابمدمعي مخلوط
اشگد فاجعني احسين امصابه
▪️▪️▪️▪️▪️

الناشر احمد الفاطمي

21 июля 2025 19:15

يالله  يزوار  نمشي  الكربله
والموعد هناك ضعن العايله
*******************************
رحلة عشگ هاي ما ننسه الوعد
ونعاهد احسين نبقى اعله العهد
انت الفرض حان نهج   المعتقد
ملهوفه الارواح بس حبك شهد

كل خادم يصيح ياميت هله
والموعد هناك ضعن العايله
*******************************
للجنه   ماشين   سفره   وتبتدي
اجمل   درب صار  قصة  مولدي
يم العرش  شوف اعلن مقصدي
درب العشگ صار وضح مشهدي

حضرت الدموع عيني الهامله
والموعد   هناك  ضعن العايله
*******************************
يحسين الگلوب تحمل چم جرح
ونعيش الآهات  صارت چن ذبح
من هاي  الطفوف كلشي يتضح
ما نترك اشلون كل فرض الصبح

وياك  الاحباب تبدي البسمله
والموعد هناك ضعن العايله
*******************************
من هسه ونشوف يكتبهه المحب
فرض العشگ حان يا اجمل درب
هذا  الوفه ايصير نبضات الگلب
راح اجزم وياك بس انت العذب

والرابح نشوف بالجنه اعتله
والموعد  هناك ضعن العايله
*******************************
من  دربك  ايصير  نستلهم درس
هذا  الجمع  صار  غطاها الشمس
عطاي   المراد  لو  تهمس  همس
هاي القواميس من ضبط النفس

والرايد ايفوز يدري المسأله
والموعد هناك ضعن العايله
*******************************
كل  الوفه وياك  باچر  تشكره
ندريهه  موجود انت وتحضره
من لطفك ايصير نعرف تنظره
زاد السفر صار يوم الآخرة

بالمدمع اجروح ظلت سايله
والموعد هناك ضعن العايله
*******************************
تمت بعون الله تعالى الشاعر_يوسف_الفتلاوي

الناشر احمد الفاطمي

21 июля 2025 16:14

شمسويه بيك السلسله   غيرت وضعك كربله
لو هذا من ضيم الشام
::::
غيرت وضعك كربله   ما خلت بحالك حال
ما ينشرح وضعك بعد     جفك مقيد بحبال
يم عمتك عينك بقت   لو عينك اعله الاطفال
   ما بيك حيل اعله التعب   ما جان هذا اعله البال
متغير بدرب السبي        ينظر عليك الاجنبي
يتفرج الخاص وعام
لو هذا من ضيم الشام
:::::
ما جان بحسابك قبل      تنشتم انته بديوان
ويضربك بسوط النذل    ما عنده ذرة انسان
من السلاسل لو مشي     جسمك اشوفن ذبلان
باقي انته ما تخلص ابد      والشمر هو الخلصان
مو سهله لمن تنشتم      انت الاهم وانت المهم
جرحك ابد ما يلتام
:::::
     كل همك انت العائله    ما همتك هاي الناس
ويهضمك بصوته الشمر          لمن يسب بعباس  
تنجرح من تسمع حجي   جي داخلك بس احساس
    من كثر دخان الخيم     مختنكه حتى الانفاس
    مختنك متشم الهوه     اي انت والميت سوه
غيرت بيك الايام
:::::
منطبع بجفوفك حبل     يجري الدمه من جفوفك
من كثر ما شابع ضرب      ميعرفك الي يشوفك
ما خايف انته اعله النفس     عالعائله كل خوفك
من الدمع ما ظل نظر      راح بحزن كل شوفك
   تنضرب باجر بالحجر       وسط الخرابه وكلها حر
بالقيضه لو بالاحلام
::::
جانت صلاتك بس دمع            جالس كضيت سنينك
     رغم انته ما فوك الهزل          ما لحظه تارك دينك
خلصت عمرك بس دمع             تبجي انت بس لحسينك
اتجي ساعه لعمتك                 وترد عليك تعينك 
جا وينه عباس تصيح    دكوم ظلت واطيح
بس يمها ظلت ايتام
:::::
علي جبار الكعبي
الفاتحه لوالدي

الناشر احمد الفاطمي

21 июля 2025 11:06

موسم مُحرّم.. موسم تجديد البيعة والعهد لسيد الشهداء عليه السلام
💔 موسم الدمعة والرجوع إلى أحضان الحسين عليه السلام..

📌 ادعوكم إلى قناة الشاعرة لبابة آل ياسين
🌿 حيث رحاب الحسين، تجدون كل ما تحتاجه مجالسكم:
📝 قصائد الدمعة
📚 ومضات معرفية
🎶 مع الألحان الشجية

⚫️ اشتركوا الآن قبل الحذف:
🔗 اضغط هنا للاشتراك
/channel/Lobabaallyassin313

الناشر احمد الفاطمي

21 июля 2025 04:40

منزالارشيف
سريعه للامام السجاد

هذا السجاد هذا السجاد
ماناسي الطف اويومه
ويلي الچبده المسمومه
_______________________________

عايش بالدمعه احساسه
عاشور ابنص انفاسه
ويلي الطف شيب رأسه
بين احسين اوعباسه هذا السجاد

وبگد الدنيه اهمومه
ويلي الچبده المسمومه
_______________________________

جفنه امساهر ليليّه
يبچي الجثه المرميه
ينعه اويقره ابمرثيه
ويرد ينصب لطميه هذا السجاد

واسود كل يوم اهدومه
ويلي الچبده المسمومه
_______________________________

ايلوج اوتجرح وناته
ذايب گلبه ابحسراته
غيمه اوتمطر دمعاته
ناسي النوم اولذاته. هذا السجاد

الون واصل لنجومه
ويلي الچبده المسمومه
_______________________________

يبچي واتخنگه العبره
لمصيبة ابن الزهره
واشفاه الي متفطره
ايذبحو والماي ابكتره هذا السجاد

واتلاثه ايضل بالحومه
ويلي الچبده المسمومه
_______________________________

بس الهم ضل يبراله
من يذكر ذيچ الحاله
جابه امچتف چتاله
دمعاته ابدم هماله هذا السجاد

امن الگيد اتسيل ادمومه
ويلي الچبده المسمومه
_______________________________

منّه الرايح شيعيده
ضايع كلشي من ايده
والسم الٱم ايزيده
لايج والموت ايريده هذا السجاد

كل الدنيا المذمومه
ويلي الچبده المسمومه
_______________________________

ماتبره ابيوم اجراحه
ينحب ليله ومصباحه
رايد بالموت الراحه
صبره امضيع مفتاحه هذا السجاد

تاذي اجروحه المالومه
ويلي الچبده المسمومه
_______________________________

سموه اوفاضت روحه
مات اوما بطل نوحه
ولا طابت ذيچ اجروحه
الا ايشاهد مذبوحه هذا السجاد

وذيچ اعظامه المهشومه
ويلي الچبده المسمومه
_______________________________

غمض والدمعه اتلالي
راح ابن احسين الغالي
ويلي اعليه اويا ويلي
يادمعاتي دم سيلي هذا السجاد

مات ابحسره المحتومه
ويلي الچبده المسمومه
_______________________________

ابو فاطمة الطائي

الناشر احمد الفاطمي

20 июля 2025 23:50

مقتل قرة ليهه من طافت عليهه
لام النشامه تحجي الزجيه
تبجي وتسولف عل غاظريه

من طافت عليهه

"""""""""""""""""""""""""""""""""""""""
الحره بس ماغمظت بأم الحسين احلمت
فاطمه ليهه عتنت اه اه
صاحت بجيتج هله ها يبت سيد المله
دمعتج شو هامله اه اه

شرفيتي خويدمتكم من اجيتي
ونكسر حيلي يزهره من بجيتي
جفوف من ذني لبدينج ماحجيتي

احجيلي لو جلمه الفارگ جرح حلمه
سيد الهواشم مارد عليه
تبجي وتسولف عل غاظريه
………………………………………………… .
انه ادري مقصره ريت كون مسافره
لمشه وخلني محيره ليش ليش
عنه ماعندج خبر يمكن بدمعج خطر
بطه هواي بهل سفر ليش ليش

فدوه فدوه حجيلي عن حسين وينه
ضوه عيوني بياوكت يرجع علينه
خوفتيني بونينج يل حزينه

يامهجة الهادي فدوه الكم اولادي
لو عشرة ولدي الكم هديه
تبجي وتسولف عل غاظريه
……………………………………………… .
بدت تحجي ام الحسن جدامي الج هنه الاجن
جايبه جفوف الهون ليج ليج
جفوف عباس الگمر كسر بحسينه الظهر
وفه وطاح اعلى النهر ليج ليج

جيت اكلج وفوو اولادج نشامه
جايبه جفوف وعلم منهم علامه
من عگبهم ودع حسيني السلامه

رد حسرته بصدره من انكسر ظهره
شمتت ينادي عدواني بيه
تبجي وتسولف عل غاظريه
……………………………………………………
حسين من ظل وحده فرهدو طوله العده
جسمه من التل بده طاح طاح
لحد درب المشرعه وذر منه مگطعه
گلبي ساعة مصرعه طاح طاح

عدل بعده خيلهم من رظرظته
بصوت كسر ضلوعه سمعت زينب اخته
يبن امي الموت صاحت ماهو وكته

للتل اجت زينب تصد للولي وتنحب
على ابن امهه نظرت خيل اعوجيه
تبجي وتسولف عل غاظريه
…………………………………………………… .
من گبل حز رگبته سمع زينب حاجته
بطرف من رويحته گام گام
عدل لو روحك مشت العده علينه تجمعت
من سمع زينب بجت گام گام

هيه گومه وهيه طيحه عل وطيه
ناده زينب خويه ماضل حيل بيه
شلون اجي وجروحي الف وتسعميه

عذريني مابيه اوگف يعلويه
وداعت عباتج يل فاطميه
تحجي وتسولف عل غاظريه
………………………………………………… .
ببنج جفوف الگمر حسين ضل بيه بس نحر
الرمل وي خرز الظهر صار صار
امه بيه وتيهت يمه ماشوفك صحت
والطحن عگب الكسر صار صار

مااگولن عاري جسمه عل ترايب
وينه هوه عمة عيني جسمه ذايب
عل رمح شو شفت راسه اوليدي شايب

ياشيبة الوالي عالي الرمح عالي
شايب حبيبي من هل رزيه
تحجي وتسولف عل غاظريه
………………………………………………
انه يم نحره رحت بشيلتي دمه امسحت
حسين انه امك صحت جيت جيت
گلي يمه من النحر عليك اخوك لعل نهر
جايبه دموع وخبر جيت جيت

حسين يبني شصار بيكم والله حيره
الادري بيهه مدلله بنيتي و اميره
ليش تركظ يبني بالهيمه الجبيره

من حرگو الخيمه محتاره بالهيمه
من عز خدرهه لگوم ال اميه
تحجي وتسولف عل غاظريه
……………………………………………
خادمكم قاسم المالكي

الناشر احمد الفاطمي

20 июля 2025 16:02

ميمر

كلمن گصد زار حسين باجر يزوره بگبرة
..................

هاي الرواية بالكِتُب مَذكوره
من زار أبو الأكبر يگِصده يزوره
يوم اليموت بگبره يصبح نوره

حاشاه يعوفه بلا نور ما يترك المنتظرة
..................
نال الشفاعة الزارة صافي النية
ناجح بحبه والأجر من مية
ما يرجع آلة بحاجته المقضية

بالدفتر البي زِوار اسمه تسجله الزهرة
..................
كُل خطوة تِسجل اجُر محسوبة
هذا المشي يِطيح جميع ذنوبه
كلمن گُصد عن معرِفة لمحبُوبة

حصل رُضىٰ الباري وصار ربه يعلي بقدره
..................
قال الإمام الصادق يوصُفنه
اُرحم اللهي برحمِتك شيعتنه
وتِلْكَ الوجوه الي إِجت تتعنه

ما توصل لجسمه النار كل من حياها الذِكره
..................
يالمِعتِني وبِيدك ترِف الرَاية
من جوده يرويك الگمر من ماية
هوَ الشِجاع الحارِس المشاية


كافل جميع الزوار حارِسها عِندِ الحضرة
..................
الله تِقَبل بالدرُب مَسعاكُم
يلي مشيتو الحُجة يتلگاكُم
نفسهَ الامام المهدي يمشي وياكُم

صوب الإمام المذبوح يمشي ويهلْ العبرة
..................
نصِ الرواية ومن ذكرها الباقِر
لو يعلمْ بفضل الزيارة الزاير
مات اشتياقاً من أجُرها وحاير

جنة عدنْ لليمشون كُل خطوة حِجة وعْمره
..................
الشاعر زين العابدين الشمري

الناشر احمد الفاطمي

20 июля 2025 13:29

مصايب گلبك اهواي
واشدهن قصة الماي
ياهي التحجي اوين التخليهه
وابوك الصار اولهه وتواليهه
دمع.                     دمع
..........................
شسولف هنه كثره وصعبه ينعدن
وابكلبك يبو الباقر هضم خلن
اشما تغمضهه عينك كلهن يعرضن
يجنك جية المشتاك وايلجمن
دليلك دومه ملجوم
عمر خلصته مظلوم

روح ابلا فرح بس الحزن بيهه
وابوك الصار اولهه وتواليهه
دمع                      دمع
@@@@@@@@@@@@@@@@
ابدي من خير وهوه اكلف هم
هظم مامنه حتى البالمهد يسلم
عليكم طفهه يوم العاشر اتحزم
يوم وبيه كلشي يريد منكم دم

الكل دمكم يطلبون
اتكول اعليكم اديون
من دم النحر طفهم ترويهه
وابوك الصار اولهه وتواليهه
دمع                      دمع
@@@@@@@@@@@@@@@@
عتابك سيدي ويالماي ما ينفع
كلهه امحزمه وصار الذبح مطمع
ابضهره الماي ذبو كلمن اليطلع
شتذبون اله وعباس ما يرجع

الرايح جدمه للموت
بعد مايسمع الصوت
مشه وزينب اخوهه مايرد ليهه
وابوك الصار اولهه وتواليهه
دمع                        دمع
@@@@@@@@@@@@@@@@
الگرب ينفطم يكسر گلبهه امه
اشما يتدنه ليهه الموقف يهضمه
مشه حسين برضيعه وسولف الخصمه
وقرر حرمله ابقوس ونبل فطمه

بدل ماي الي ينطيه
ابسهم بالركبه يرميه
وحرورة دمه عبدالله حس بيهه
وابوك الصار اولهه وتواليهه
دمع                      دمع
@@@@@@@@@@@@@@@@
الابو يومه ثجيل اويهظم اولاده
اذا عنهم مشه يصير الحزن عاده
وين اهل الجفافي الخضر يالساده
حسين امن التراب الركبته اوساده

يكوم شويه ويطيح
بويه حيدره ايصيح
ترس دمه الطفوف وكل اراضيهه
وابوك الصار اولهه وتواليهه
دمع                       دمع

@@@@@@@@@@@@@@@@
اول ميت ايسحكونه خياله
مكطوع النحر واميسره اعياله
وسفه عالجمر ركضتهم اطفاله
كلبك سيدي من الهم اشحاله

بخال وحوافرهن يسحكونه
كسرهن يوصل وانتم تسمعونه

وحرمكم طبت الظالم تتانيهه
وابوك الصار اولهه وتواليهه
دمع                    دمع

خادم اهل البيت علي الزرگاني

الناشر احمد الفاطمي

20 июля 2025 09:10

يا خيل كافي من الاخو عوفنه
ما ظل عظم بي سالم تسحگنه
عوفنه  عوفنه
::::::
ما عافته خيول العده      ظلت تروح وترجع
بالخيمه اختك جالسه   كسرة عظم گمت اسمع
عوفن حسين شگد صحت  بس صيحتي ما تنفع
حسين روحه من السحگ   من جسمه ظلت تطلع
شلون نسحگ بالخیل باب الجنه
::::::
مو بس تره جسمه انسحن   داسن عليه بعيونه
اثكال حذوات الفرس   كسرن حتى سنونه
ما يگدر يشيل الچتف   منسحن عظم متونه
حسين مطشر وذر      وين اهله ويلمونه
الزهره خلها تزيد حيل الونه
::::::
ما اعرف شگد الزلم       كلهم عليه من هدت
حسين من كثر الضرب       عافيته كلها تبدت
شلون اعله سبط المصطفى   هالزلم كلها تعدت
والشمس وياهم صفت   عن جسمه لا ما ردت
ما شرب ماي حسين بي يتهنه
::::::
شفت الشمر يم الاخو    من الخيمه عيني تلمحه
فوك الصدر جالس شفت  وبسيفه ظل يذبحه
الليل لا يطلع بعد         ما دام ذبحو صبحه
بيده ورفع راس الاخو   وانوب شاله برمحه
الشمر يم حسين ظل يدنه
::::::
سبعين الف كلها اركضت    مطروح ظل فوگ الگاع
حسين من كثر الدبچ        ما ظلت بجسمه اضلاع
جيت اركض انه ودورت   ما ادري من جسمه شضاع
من كل كتر ظل يلجم       الجسم متروس اوجاع
شفت السيوف اعليه صارت حنه
::::::
تسعه الاصابع شاهدت    بس خنصره ما شفته
ضليت ادور بالارض        ما شفته من دورته
جبت الحصيره وگمت الم   وذره بوذر جمعته
  ضيعني بسنين الغرب    بهالحاله هم ضيعته
لو بيدي ما ابتعد ابدن منه
::::::
علي جبار الكعبي
الفاتحه لوالدي

الناشر احمد الفاطمي

20 июля 2025 07:02

مشاية شيعة علي ع••♕
نزال عزاء



لجل حسين ••رايـة ألحك تـعـتلي
لجل حسين ••نمشي ياشعية علي

نمشي ياشعية علي
نمشي ياشعية علي
ـــــــــــــــــــــــــــــــــــــــــــــــــــ

من البحر حد النحر نمشي بوفه وماكو تعب
بكل لسنه عدنه لمشي ياناس اغله من لذهب
نمشي لجل المنذبح فوگ الرمل هدمه نسلب
حسين يستاهل نحرنه مو فقط حب الگـلب

نـور العين ••خـدمتك يـابـوعـلي
لجل حسين••نمشي ياشعية علي

نمشي ياشعية علي

ـــــــــــــــــــــــــــــــــــــــــــــــــــ

مايهم حـر الشمس هـذا الـعشگ بـينه نبض
لازم احنه اعله لوعد يم كربله ونملي الارض
هوايه خدم من كل جه وبكل مكان نحط فرض
لجل دين العشگ يبقه غصبن اعله اليعترض

نبدي مـنيـن••ونـته ديني الااولي
لجل حسين••نمشي ياشعية علي

نمشي ياشعية علي
ـــــــــــــــــــــــــــــــــــــــــــــــــــ

وتنطوي كل الارض ويه المشه الگبره بعشگ
والمشه بـكل اربـعينه بـالشمس خـل يحترگ
لئن ضـعن ام عـون يمشي بستر لازم ينشبگ
ضحت النه بكلشي عدهه ولوفه رايد صدگ

يمشي الضعن••ام اخوها ياهـلي
لجل حسين••نمشي ياشعية علي

نمشي ياشعية علي

ـــــــــــــــــــــــــــــــــــــــــــــــــــ

شماتمر اعوام نمشي ومـايـهم ذبـح وخـطر
بـوصلة ديـن الـخدم بس كـربله وبيها الگمر
غيمه سوده نصير كلنه بـالمشي وهذا السفر
احـله مـن لعـمر دربـه وشـوفت الگبه بصفر

حزن الخدم ••بالدرب واسه الولي
لجل حسين ••نمشي ياشعية علي

نمشي ياشعية علي

ـــــــــــــــــــــــــــــــــــــــــــــــــــ

كلشي بينه يروح فدوه لحضرته وراعي العلم
وتسوه كـل اسنين عمره السجلااه مـن الخدم
هـوه روح الله ونـبـيه والـحـضه بـگـلـبه سلـم
حترگن خيامـه بذبحته وصارن چفوفـه خـيم

بكل اربعين••نـوصل وهم ينجلي
لجل حسين ••نمشي ياشعية علي

نمشي ياشعية علي

ـــــــــــــــــــــــــــــــــــــــــــــــــــ
خادم الحسين ع
مهند العايدي

تمت بفضل الله وال محمد ع
نسالكم الدعاء//1447ه‍