الناشر احمد الفاطمي

17 June 2026 09:33

يا تاج الراس   حسين الانفاس
انت الخليت   تعرفني الناس
&&&&
خليت الوادم من امشي
هذا الخادم يمك كلشي
وما املك بس الخدمه
مـــــرات يرزقك لطميه
بيتك ســــوي حسينيه
شكران تريد النعمه
خليت الوادم تعرفني ومثل السلطان
انـــــه اول تاجر ما يخسر لكن ربحان
الغيرك ذله تصير الخدمه ويمك انسان
غير انت حسين   ما حب اثنين
حبك مولاي   لا ما ينقاس
:::::
بگلبي انت وما حبن غيرك
عايش يا مــــولاي بخيرك
خيرك يحسين مغطيني
خادم بس مو خادم تاجر
لطام ورادود وشاعــــر
قابل بيمن شتخليني
من گد ما اخدم شخصيتك لو سولف بيك
تنطيني شما اطلب انــــــي واني شمنطيك
خل تخلص مولاي ايامي بس ابچي اعليك
اول محبوب    ثوبك مسلوب
من اجل الدين  صدرك ينداس
:::::
اول خدمه ترزقك دمعه
بقبرك باچر تصبح شمعه
هاي الخدمه الماكو منها
مجنون وافخر مجنونك
تنطيني شأطلب ممنونك
من خدامك روحي احسبها
شما اتعنالك وانظرلك بابك مفتوح
ما شايف مذبوح بعمري ويشافي جروح
شحچيلك ما تزعل مني يمك مسموح
ممنون هواي   خيرك چن ماي
اقبلني ارجوك اعليك العباس
:::::
بابك مفتوح وما ينسد
مجنونك يحسين واشهد
من دونك انه شويه
الحر جعجع بيك وسامحته
لمـــــــــن جالك اهلا صحته
اعليك الحر اقبل بيه

مثل الميل افتر ما اندل بس اندل بيك
محبوبي ومولاي وروحي وكلشي مسميك
كلشي منطيني انت وزايد وانه شمنطيك
اول عطشان   سواني انسان
راسك مرفوع   لكن نبراس
::::
من ادخلك انـــــــه جنازه
اسمك احنه شگد نحتازه
يالاسمك شمعه بقبري
منكر من يلفيني دخيلك
مجلس انه شگد قاريلك
وانه اعرف بيهن تدري
اه يحسين انه اقره بگبري ومن يسألون
ومن اذكر انه اسمك اعرف رايح يبچون
خيرك يا ابو الاكبر زايد شكرآ ممنون
بگبري وانعاك  لا ما انساك
مولاي دخيل   وكت الاجراس
:::::
علي جبار الكعبي
الفاتحه لوالدي

الناشر احمد الفاطمي

17 June 2026 09:07

كوم لينه يا علي
كوم لينه يا علي
ـــــــــــــــــــــ
للنـجف مـحتاره دارت عينها
تصيح بويه زينب امجتفينها
تالي عـمري بكـربله سـابينها
تطب سوك الشام وينه اوينها

للشام ودوني مجتوفه بحبل
لا اخوتي ولا هلي
كوم لينه يا علي
ـــــــــــــــــــــ
تحاجي ابوها ادموعها الهماله
يامــن الخــايف يلــــوذ بجاله
حسين سحكت جثته الخياله
وانه بـويــه تكــفلـت بعـــياله
من طاح والينه يحدينه الشمر
لا كفيل ولا ولي
كوم لينه يا علي
ـــــــــــــ
ريت حــــاضر كــربله وتشوفنه
خيام محتركه وخيول اتطوفنه
كمنه نركض يا علي من خوفنه
نشكف اسياط النذل بجفوفنه

سحكته الخيالة حسين بكربله
واليتامه تنولي
كوم لينه يا علي
ـــــــــــــ
عيـون تـعمه يا عـلي مـعذوره
تدري بمصاب المره المكسوره
جيوش هـدت للسلب مسعوره
بويه شــيردها التفـر مذعوره
ما ماخذه جدامي بويه اعلى الركض
بالارامل ابتلي
كوم لينه يا علي
ـــــــــــــــ
تصـرخ الاطــفــــــال يا والـينــه
وين ابـو فــاضل يجــي يحمينه
شلون يرضه الناس تضرب بينه
مــا دريـــنه الكــافل امصـوبينه

مكطوعه جفينه الكافل عالنهر

طاح بالطف كافلي
كوم لينه يا علي
ـــــــــــــــ
نعيم ابو باقر الساعدي

الناشر احمد الفاطمي

17 June 2026 09:06

▪️▪️▪️▪️▪️
هالله هالله احسين وينه بالسيوف امگطعينه
▪️▪️▪️▪️▪️
طلعت الحوراء زينب حايره او تجري المدامع
شافت الميمون ملوي السرج والنسوه تباوع
يا مهر نادت انشدك گلي وين احسين واگع
يا مهر جاوب تنادي ابيا كتر طايح ولينه
▪️▪️▪️▪️▪️
مضطرب حال ابو اليمه والتعب بعيونه واضح
العطش ياوسفه تعده او بدل ابوجهه الملامح
سهم صابه ابوسط گلبه من وراه عالغبره طايح
عالارض من مهره هاوي والحجر صوب جبينه
▪️▪️▪️▪️▪️
طاح فوگ الگاع بارد هوه بس الگاع جمره
ابعيني شفته اشلون شفته يابسه واتريد گطره
اگبال عين اخته العقيله الشمر متعمد ينحره
هوه جالس فوگ اخوهه امن الگفه يگطع وتينه
▪️▪️▪️▪️▪️
هذا ابو السجاد مرمي عالتراب او دامي نحره
والخيول الاعوجيه طحنت ابعظمه او تكسره
وصل من جسمه ابرجلها عالارض صار تنثره
احسين هذا الخير هذا ليش عظمه امهشمينه
▪️▪️▪️▪️▪️
يبچي ابو الوجدان لجله والجماد او كلشي ينعه
عالوگع ناگع ابدمه او سيف چم ظالم يگطعه
ما كفاهم كل عملهم رجعوا او گطعوا اصبعه
ضاع خنصر والاصابع تسعه موجوده بادينه
▪️▪️▪️▪️▪️
انگطع راس احسين واعله گطعته كلشي تألم
والجسد عالگاع مرمي والصدر منه تهشم
بالافق دم ابو الاكبر والسماء اتحولت دم
جامد الدم ابلحيته ابرمح راسه رافعينه
▪️▪️▪️▪️▪️
احسين اه احسين مرمي والعده سلبوا ثيابه
يا صبر واحسين جسمه منطرح فوگ الترابه
كلشي ذاك اليوم يبچي عله ابو اليمه او مصابه
انگطع راسه او ونه باقي وابد ما يگطع ونينه
▪️▪️▪️▪️▪️
ابو الحسن الوائلي

الناشر احمد الفاطمي

17 June 2026 08:59

من اول اصياري   شاغلهن افكاري
مسويلك بداري   مجلس عزاء
:::::
چنت وانه صغیر احضر بالمجالس
والدي اتعلم یگلي مـــــن المدارس
يبني هاجر للعـــــزاء مثل النوارس
الخدمة شذرة وبشذر صيت المحابس
ما عندي ابد غيره   كل خيري من خيره
مسوي لابو الغيره   مجلس عزاء
::::::
وين اكو مثلك شخص ينطي الاريده
حسين ثبت دين ربه بــــــدم وريده
تطلـــع تخبل اذا بسمه القصيـــــده
حسين وابياتي الك كلهن جديده
ما انعرف اني   حسين سواني
سويت خلاني  مجلس عزاء
::::
انه احبك رغم ما شفتك حقيقه
وشكبر حضه التصير انت صديقه
واليسيـــــــر بدربك تنـــور طريقه
سيدي وفضلك على كل الخليقه
غير انت محبوبي   يا شافع اذنوبي
اسود يظل ثوبي   مجلس عزاء
::::::
الحواس العندي مشغوله بخدمتك
يا حسين وعايشين احنه برحمتك
الخير هذا العدنه مولاي بنعمتك
انه حبيتك رغم بس صوره شفتك
نرفع ايادينه    خدام خلينه
ندري الينجينه   مجلس عزاء
::::::
بالطفوله واحضر بكـل العزيه
طفل انه وابچي من اسمع رقيه
كون هاي احبال اديها كلها بيه
بالتشابيه ابچي من انظر سبيه
من تنضرب طفله  صوت البچي يعله
يشفيلك العله   مجلس عزاء
:::::
علي جبار الكعبي
الفاتحه لوالدي

الناشر احمد الفاطمي

17 June 2026 07:29

( شور عليلة الحسين ع)
بنتك انه ...يابوية بظعونك ردت
بنتك انه...ماعندي والي لو رحت
بنتك انه...تدريني بعيونك شفت

معلوله تعرف حالتي.
مومالت ابگه بلااهل.
بجف ايدك اغفه تعلمت
يابوية جا شنهي الحصل.
ضعنك تجهز للسفر
وعليه شو محد سئل.

بدمع العين تصدني وتباوع ليه
بوية حسين گلي شيصير عليه
رايح وين بضعنك يبو الحنيه
........................................
انه بغرب....يابوية المسافر وطن
انه بغرب....دخيل الله ودخيل الضعن
انه بغرب..يحگ النواظر لوعمن

صحت الخواتي وانتظر
بسمي ولاواحد نشد.
عبدالله اناغي من گمت
وي گومتي نشال الولد.
كلها على النوگ الأهل
منكم ولاواحد بعد.

گلي شلون تمشي تريد ضعونك
منتشيلون شلي بحياة بدونك
وي الضعون موتي وحگ عيونك
......................................
ياوالدي..من للعليله بغيبتك
ياوالدي....بس انته تدري معزتك
ياوالدي....تروح وتعوف بنيتك

ياوبوية شصبر وانتظر
ومنين اجيبلكم خبر. .
تدريه المتانه صعب
ياطارش يجد بالسفر
جاوبني خاطر دمعتي
يكتلني يابوية السهر

هذا الحال نار ومصيبه ولوعه
والمرسال مومثلي بوية دموعه
محد شال ...مثلي الجمر بضلوعه
...................................
ناده حسين هونج علي يمدلله
ناده حسين دموعي لدمعتج نازله
ناده حسين گلبي انكسر والقافله
ها ياعزيزة والدج
بوية السفر موبالسهل
من نوصل الكوفه وعد
من والدج طارش يحل
لو عمج الكافل يجي
يبنيتي لو الأكبر يصل
تاني اخبار. طارش يجيج الداري
گلبي الحار شيطفي عله حالج ناري
گولي شصار من توصلج اخباري
..........................................................
خادمكم قاسم المالكي

الناشر احمد الفاطمي

17 June 2026 04:25

سماعي  ، ما بينَ مولاي الحسين و مولاي ابي الفضل عليهما السلام




بباب الخيم طولي شراع
ما دام اشوفن رايتك

بس انحنى بساع بساع
ظهري و احس بطيحتك

ما سندت اجدامي الگاع
گوة اعلى گوة و وصلتك

يا غربتي من وصلتك .. مدري بالطيف ، مدري واقع
گوة صدگت المصيبة .. و ادري بعدك ضعني ضايع
ردت احملك للمخيم .. گتلي يا كُبر المواجع

مواعد سَكينة رايح و اردن بيدي الماي
من ارجع شگلها و انا جربتي ماهي وياي
رد لخيامك صبر خواتك رد يعضاي

———————————

رديت محني و محتار
يا كسرة الفاگد ظهر

زينب شگلها من اعذار
لو تسأل شلونه الگمر

اتلاگينه شطين بنار
تشابگنه غيمة بلا مطر


ساكت و دمعي يسولف .. لخيمة الكافل خذتها
ريحة الخوة و جمالة .. ببالي و الخيمة اوصلتها
مالي حيل احچي المصيبة .. گوة بيدي طيحتها

كسرة خواطر عطشانه فگدك شيحمله
التضكة شدة يحشم باخوته يحشم اهله
المثلي شيحشم و مخير بموت و ذلّة

———————————

وسفة و گرب صوبي الجيش
يدروني كاسرني الفگد

بعازة وگفتك چا ليش
مني خذك چف البعد

خوتك تتعوض بيش
يا صوت راح و ما يرد


كسرة الخاطر يفگدك .. يا طبيب اليشفي خاطر؟
عگبك عيالي ويَ غربة .. عگبك غطاي الخناجر
ينگطع خنصر يميني .. و فوگي تتراكض حوافر


لا بيدي يلتم طولك و المك و ارجع بيك
يا حيلي الانهد فوگك يحيلي شما اصد ليك
لچمة اعلى لچمة و اخرهن انت منين ابديك

—————————


ودعت العيال و راح
امشي لمنيتي بكل گلب

بظهري الخيم ما مرتاح
اتقدم و ينفك درب

مو طبعي اردن و انزاح
بس جيش خاف امشي و يطب


حيرة ما سبگتها حيرة .. حيرتي بعد ابو فاضل
صعبة من تفگد عضيدك .. سند اخوه و لاخته كافل
و تدخل لعركة انت مولي .. و محد بظهرك يقاتل


شما انطي ظهري و للخيمة ارد تكضني اسهام
و من انطي وجهي للجيش احس وصلوا الخيام
شأكبرها حيرة الفاگد عضيده اليسوة ازلام



محمد عقيل البوحمد

الناشر احمد الفاطمي

17 June 2026 04:25

شور ، السيدة رَملة أم السيد القاسم (عليهما السلام)


اخذ گلبي ويَ سيفه
َو عيوني خذاها

راح من ايدي گمرة
و رَد بلا ضواها

كلّه دَم و تُراب
اسم الله مِن هَالمُصاب
كونه يطلع حِلم
الصابك بگلبي صاب

ويلي اعلى طولك كلّه صاير
دَم و رَمُل يا يمه داير
و مخرب ارسموك حبيبي
شيهوده گلبي اعلى ابني فاير

...........

و عيونك حَبيبي ..
ما الي بگلبي راحة

المالي عيوني طوله ..
رَد مَملي بجِراحه

الماهو بحسابي جان
يعلى حزني أذان
و تنكتِب فَرگِتَك
الليلة و بهَالمجان

عَميانه عيني يا ضواها
حزنك يَحِزن امك گضاها
طولي اعلى طولك كَسره باين
مو سَهلة أم تفگد ضناها

............

يتراوالي طولك ..
عِرّيس شحلاته

شگد گلبي تِمَنّه ..
و ماتت أمنياته

يَبني و شگد رِدت
لعِرسَك و حَسَبِت
بيدي ازفك عَريس
بفرگة ما فكرت

ليلة شِتة بروحي شثگلها
رجفة گلب بالجَف مثلها
جَم لجمة مرتني بحياتي
هاللجمة مو مثل القبلها

...........

لا بيه و أعوفَك ..
و لا بيك و تردلي

حيرة گلبي حيرة ...
و امشي بلايه ظِلّي

رايحة للسبي
و بيه يحدي اجنبي
و انتَ و اهلك رحِت
و تاهت الكُم عِبي

يمه و اجت نوگ الهزيلة
كَلفة و حمِل ما بيه اشيله
و بس الله يدري شيجري باجر
ما اظن يغمض جفني ليلة

...........

مودّع بالله يمّه ..
و بَس الباري حَسبي

و عالجاي بدربنا ..
الله يعينه گلبي

هذا آخر كلام
مهنّة بالجنّة نام
و مِن تلاگي الحَسَن
بَلغه مِنّي السلام

كلّه احمر من الدَم ثَرانا
و راحت مَصونه الكُم الأمانة
و هذا آخر وداع ويَ طولك
و منه و نحسّب للَورانا

...........

¶ مُحَمَّد عَقيل البو حَمَد

الناشر احمد الفاطمي

17 June 2026 01:46

گولات

عباس خويه من النهر گوم
صاحت علينه الصايحه اليوم
زينب اخيتك طالعه ركاض
هداده اجتنه الخيل والگوم

( حسين اتفرهد ديوانه )
.................................
عباس صعبه ام عون ترتاح
وبوجهي عرضت خيل ورماح
طايح سمعت الگمر عالگاع
يعني عمود امخيمي الطاح

( مهضومه اركض وندهلك )
....................................
ياحيل باقي اتفرهد الحيل
وابن امي فوگه ادبج الخيل
الجفه يشيل الكون ياحيف
ريشه بعد مايگدر ايشيل

( الحگ الخيامك حروگوها )
......................................
مال الوكت عباس بيه
وضيم السبي طايح عليه
جنت الأميرة واسمي ام عون
من تالي سموني السبيه

( اطلع بعد اختك مجبوره )
.......................................
تلاحگني خويه نشاف ضلي
فوگ الهزيله وطحت كلي
گتله الشمر انتضر ساعه
خليني اودع ريحت اهلي

( اعله الناگه اوداع الخوه )
ابوفايز الرافضي

الناشر احمد الفاطمي

17 June 2026 00:34

واحد مسلم وخالس المجموعه
صوت الابره من تشمرها مسموعه
الكوفه ودخلت إنذار
:::::
طبها الموت الأحمر  الخير وگابل الشر
صاحت الله يستر  لمن طبها مسلم
احتارت وين تشرد  مثل نسوان تلبد
صدر ديوان يگعد     لمن طبها مسلم
منهم راد واحد ماكو واحد
سيطر على الكوفه وبيها گاعد
من اذكر حسين يخضر حسين
فارس انه لحسين ومجاهد
مسلم بس كلمته هناك مسموعه
:::::
مثل الراد يغبش   الفارس فنه يرمش
بقصرهم ظل يفلش  شهم من طب عليها
فنه الگال انه    غیر یگص لسانه
عالي يرف لوانه شهم من طب عليها
بلايه الشذر شتفيـــد المحابس
اكبر زلمــــه بيهـــم شيله لابس
كثره بلا نفـــــع واكثرها غمان
الحارس خاف منه يريد حارس
الفارس لو وصله يكسر ضلوعه
:::::
حيره شلون تختل   حتى عيونه تكتل
من الحرب تچفل  صگر خیم علیها
مثل الحمزه يسطر   محد يجرع المر
يموت وكلمن يمر    صگر خیم علیها
رادو عطوه حتى الجيش يرتاح
مسلم هذا لو قباض الأرواح
حتمآ ميت الــــي يبرز بساع 
مثل الجبل ثابت والله ما طاح
مسلم طرح وسط الخطبه موضوعه
:::::
طوعه دگله حیهم  تعال اگطع نسلهم
ابد لتخلي منهم   مثل عمك الكرار
خليهم بحيره   حكومتهم گصیره
یبن اشرف عشیره  مثل عمك الكرار
خلي الجيش محتار اعله امره
اريد الگاع کون تصیر حمــــره
ارید الفارس انه بحیره یحتار
بيده وكون يحفر هـــــو گبره
الضربه الما تعجبچ هاي مرجوعه
:::::
يتبختر بكيفه   شهم وبچفه سیفه
منهم اخذ حيفه  مربع جاب ثاره
يضرب ضربه وحده  فنه الوصل حده
الجيش وظل يرده  مربع جاب ثاره
توجع حيل يا سطـــــرة يمينه
مسلم جاي ويحامي اعله دينه
الموقف ينذكر ميموت هيهات
موقف صار الي بيني وبينه
بخدمتك حاضره هاك استمع طوعه
:::::
علي جبار الكعبي
الفاتحه لوالدي

الناشر احمد الفاطمي

16 June 2026 22:25

🔶يوم مولاي الامام العباس🔶


احجـيها بَمكـاني … اشلـون انّطقها اني
خبّرهـم يعامود … طـاح الشايـّل الجود
شگلّهم مات عباس … صعبه تمر لساني

احجيها بمَكاني

@1
رديّت مَكسور الضهْر … بچفوفي دمّ امن الكمر
و مدنّك الراس
بعيوني مَحبوس الدمع … و بصدري عبره التنّسمع
طايح العباس

طــوس محضرين اطفال للــماي
و سألّــوني الكفــيل اتأخـر اهواي
و سكّتوا شافوا بنص ضهري يمناي

وينه عباس

شجاوب صوتي مبحوحْ … عُضِيدي عفته مطروحْ
شگلهم چفّه مكطوع …. صعبه تمر لساني

احجيها ابمكاني


@2
اَطول اخيامّي خيمتهَ … ترسملّي طوله و وكفتهَ
و اتألم اهواي
تخيلّته واكِف مبتسمْ … لا نابِت بعينه السهمْ
و يگلّي مولاي

انه اشتاگيت من يگلّي افديـــك
روحي و كلّ حياتي خويه أنطيك
بعــد ياهــوّه اليجاوبني لبـيـك

وينه عباس

بوگعتك هدمتني … مــــا صـدگ عفتنّي
اشلون اتخيّل تروح … صعبه تمر لساني

احجيها بمكاني


@3
و الخيمتكْ منّ ادخلتْ … خذني الحنين و سلّمت
عبالي موجود
مات السلامْ بطيحتك … و ماتت [الخويه بخدمتك]
و جاوب العامود


الخِشب منْ ينكطع يتوفّه الاحساس
عامــود و عشت من عطر عباس
يبو اسكينه اشحصل شو تچوّي الانفاس

وينه عباس

بچيت و دمعي مدرار … سحبته و بيّن الصار
الطاحت خيمته يمّوت … صعبه تمر لساني

احجيها بمكاني


@4
مو خيمتّه لا خيمتي … طاحت و فَاضَت دمعتي
و بدونه مذبوح
اسكينه وي زينب اجت … لطمت على الخد و بچت
يم زينب اتنوح

حجت زينب أليّه بعبره و اهات
صدك طايح ضوانا و ضوه الخيمات
على بختك اريد اتكلّي ما مات

وينه عباس

اي رايح كمرنّه … بعده بحيره صرنا
يزينب راسه مطبور … صعبه تمر لساني

احجيها بمكاني

@5
احجيّلي خويه انتّه اشفت؟ … للمصرع امن اتگرّبت
شنهو الجره اعلّيهَ
راسه يزينب منهشم … و بعينه مكسور السهم
و متگطعه ايّديهَ

شحجيلج يزينب ما تصبّرين
اذا كل صوب أيد و سهْم بالعين
بَعد عباس مثلّه نحصل منيّن

وينه عباس

معناها انسبينه … يخويه تفارگينه
ساعه و انته مذبوح … صعبه تمر لساني

احجيها بمكاني

الشاعر مصطفى ثامر الحلفي

الناشر احمد الفاطمي

16 June 2026 22:25

ضهر المهدي علينا من ثنــيات العزاء
وَجَبَ الشُـــــكرُ يَقِيناً فَشَكرناهُ بُـكاء

****

جـاء من اقصـــى المواجع رجلٌ محني الضهر
صاحب الدمعه الجريه. و ندب مگــطوع النحر
ويانه يبچي لعمته زينب بدمعته المهدي حضر
وطاري من جبنه لرقيه. خاطره وگلـبه انكــــسر

بعزانا المهدي حاضر
يجي مكــسور خاطر
محني وگلبه مشلوع
يعيش أيامه عاشر

بچف ابو فاضل دعينا ذاك البعلو السماء
وَجَبَ الشُـــــكرُ يَقِيناً فَشَكرناهُ بُـكاء


**

هايه ايـــــام السبايا الـ روحه رجعه مجتفات
عليهن الــمأتم نجــــيمه. واللطــم سر الحياة
اتخيل المهــــدي امامك ذاك البدمعاته بااااات
وياك تجري دموع عينه لمجلسك بدموعه فاات

اذا متشوفه. شمه
لگلبك. جيب. هِمَه
تره اليتاني مولاه
كــلش خوش زلمة

يلا الطم واحني ضهرك بس للحسين البقاء
وَجَبَ الشُـــــكرُ يَقِيناً فَشَكرناهُ بُـكاء

**

هذا في الإرجاءِ يسعى زلمه ســـالفته نيـاح
غمض عيونك تشـــوفـــه ذاكه البطوله الجراح
من يجي طاري السبايا گلبه ما ضن يستراح
گوه انفاسه يـــجرها مره يمشي ومره طاااح


زلمه ويمــشي گــوه
يشــوفه البــي امروه
يگول لجدي الحسين
حيل الدمعه تسوه

يلا فك أبواب روحك سافر ودور لقاء
وَجَبَ الشُـــــكرُ يَقِيناً فَشَكرناهُ بُـكاء

**


اكسر بصدرك حسرتك. كسرت اضلوع الحسين
ديين هاي الخدمة فكر. ضايع الماعنده ديين
حاضر المهدي بعزائك. اترس گليــــبك يقيين
اسمع بگلبك عبرته .. صاحب الگلب الحنين

تخيل وجهه ذبلان
تخيل حاله تعبان
حرام تشوفه تجزيي
وهو ايعرفك افلان

محني للمذبوح ضهره ويبچي مسلوب الرداء
وَجَبَ الشُـــــكرُ يَقِيناً فَشَكرناهُ بُـكاء

***////


انت من تنــصب عزيه ومـنك دموعك تطيح
هاي تعني المهدي حاضر يبچي عطشان وذبيح
عيشها الدنيا مجالس. .. و دير بالك تستريح
شوف شيسوي امامك صاحب القلب الجريح

موكب گلبك يصير
المهدي يعيشك بخير
نوح عله الخيم نوح
اترك عيشت الغير

الهوه ال بلمجلس ايهب. يختلف عن الهواء
وَجَبَ الشُـــــكرُ يَقِيناً فَشَكرناهُ بُـكاء

الناشر احمد الفاطمي

16 June 2026 22:24

ليلة 9 محرم

ويـن الـي يـهل العيـن وين الـينحـب ويـانـه
الاكـبـر وكـع مطـروح مـايتعـوض امـجـانـه

✦ ✦

ويـن الـي يـهـل دمـوع خـل يـهيـج وجـدانـه
طايح للحـسيـن الحيـد يمه اتحـوم عـدوانـه
امـوذر وذر يـاحـيـف خـلـهـا تـفـزع اخـوانـه
وحـاطت بيـه گـلـهـا الـخـيـل
حـسـيـن الـمـنـه راح الـحـيـل
يـهـل دمـوعـه مـثـل الـسـيـل
ويـاحـيـل البـگـه ياحيـل بس النوح عـنـوانـه

✦ ✦

ياحـال البگـه لـحسـيـن بس الـنوح والحسـره
مـايرجع عـلـي ويعود وبعـده الـدنيـا شو مـره
وحـمولـي عـليـه اتزيـد مثلك مـاتصح كـسـره
اتـذكـر يبنـي ليك اربـاي
يـاغالـي وضوء عـيـنـاي
ارجـع لـلـخـيـم ويـاي
وهموهـي عليك اتزيد وگلبـي انهدمت اركـانـه

✦ ✦

امـك تـنـحـب وتـبـجـي اتريـد الـي يسـكـتـهـا
يـاأجمـل شباب الكون العين بوجهـه اكحـلـهـا
ربـت بـيـك لـيـل انـهـار يـبني لا تـخب ضـنـهـا
ارحم كـوم حـال امـك
مـوتـهـا تـره هـمـك
يـزرف بالكلب سهمـك
ومـصـابـك كـبـر يـبـنـي ودار ويـاك ازمـانـه

✦ ✦ ✦

ومـن زينب يـزيد الـون تـنحـب ياعـلـي يـبـنـي
يـلـفـگـدك فـلا بـالـهـون ارحـم يـالـولـد ونـي
گـوم الـحك لفـتنـه الـگـوم ردها يـابطـل عـنـي
گـوم وردها هـاي الـگـوم
مـو وكـتـه يـعـمـه الـنـوم
عـنـدك زينـه حيـل عـلـوم
وافـزع عـمـه شوف الـحال گوم وردها اعـدانـه

✦ ✦

يـل جـدك عـلـي الـكرار كلـهـا تعـرف عـلـومـه
غـيـر عـالـزلم يـاحـيد واحـمل گوم بـالـحـومـه
تـشـبـه للنبـي الـمـختار كـلهـن بـيك ارسـومـه
گـوم احمل عليـهـم صـول
و طـشـرها زلـم وخـيـول
واتـرس بـيـهم انتـه الجـول
واحـمـل حـمـلـه الـكرار وارجـع عيـد مـيـدانـه

خـادم الـحـسـيـن
عـلـي الـخـاقـانـي

الناشر احمد الفاطمي

16 June 2026 15:45

محد شاغل البال  بس انت اعله بالي
بدونك صعبه الاحوال  يمك زين حالي
نفسي اليصعد وينزل حسين
&&&
اموت ومجلسك يحييني  احبك وانت البچيني انت بگلبي ونص عيني وانت انفاسي
يخلص كلشي بس ما تخلص  يكثر حبك وما ينقص

شگد تسامحني رغم ما انه غلطان
دوريت وما لگيت ايشبهك انسان
انت ساترني رغم ما إنت عريان

يوم لما اذكره      احس مضيع اهواي
النهر محد يمر بي  لو ما منترس ماي
گتلهم حبيبي شگد حنين
&&&&
ملكك انه صاير كلي  احبك اكثر انه من اهلي  خل وانت وحدك خلي  وانت احلامي
احبك وانت المسليني  وحدك انت تارس عيني بدونك شنهي نفع اسنيني  وشنهي ايامي

مو حقيقيه الصور بس بيها اسمك
وين ما اسمع حسين وصحت احبك
خير تارسني العلي گالو شعندك

ابد ما شايف انسان  يكرم وانه اجرحه
ابد ما يبخل بيوم كرم حتى اليذبحه
ما بيها انت ما ريد السنين
&&&&
الغيرك ما امدن چفي  زايد انت هم ومكفي اسأله وهو يدري بظرفي  ويعلم حالي
بابك منفتح ما ينسد  مثلك شخص لا ما يوجد  انت بگلبي ماكو احد وانت الغالي

بصعب الشدات انت ويانه حاضر
بس خدمتك عندي تشهدلي المنابر
بالگبر يحسين لا تنساني باچر

ما عندي عمل زين  اذا رادو يسألون
اگلهم عندي الحسين  هو بروحي مدفون
امشي لمجلسك لو صار وين
&&&&
راحة نفسي بالطميه  اجيك وانه صافي النيه  حتى الهامه الك مدميه واطبر راسي
ترضه ما اهم لليزعل  اعمى ومجلسك انه اندل احب حسين للي يسأل تسمع ناسي

ماكو غيرك حتى اروحن واعتنيله
شلت گلبي وانت خليتك بديله
حسين بالحضره فقط هو اشتكيله

خلي يملك اموال  وما يملك خدمتك
هذا هواي خسران  لما عنده نعمتك
تبقه انت ثابت عالسنين
&&&&
احب لبس السواد اهوايه  حتى ابيتي اسوي اقرايه  انه بچفي لازم رايه  اسمك بيها
خدمتك اصبحت جنسيتي  من عندك اجت تربيتي  مجلس انه اسوي ابيتي  ذكره احيها

شگد حنين وانت تكرم باليذبحك
ما نريد ايطيب بينه ويبقه جرحك
يا حسين نحبك وكلش نحبك

مثلك ماكو مولاي  ينطي وما اگله
ينطي اضعاف حاجات  وعنده الحاجه سهله
اكبر نعمه لحسين النونين
&&&&
علي جبار الكعبي
الفاتحه لوالدي

الناشر احمد الفاطمي

16 June 2026 15:01

شجاعه

بسم العلي الباقي ..  طب للنهر ساقي
والعطوه نافيها
ضل يدوي ميدانه  .. غير اخته عطشانه
وتسمه ساقيها
حط جوده بمتونه .. يرعب يشوفونه
والشده گاضيها

الله اكبر . يگضيها لو حمل
الله اكبر . راعي العلم فحل
الله اكبر . ابن الحنه الجمل
السلام على ساقي عطاشى كربلاء
،،،،،،،،،،،،،،،،،،،،،،،،،،،،،،،،،،،،،
شال الگمر رايه .. ودگ بالحرب ثايه
المايخطي نيشانه
تجدح ضوه عيونه ..  وفنهم يگدرونه
والغيره عنوانه
حدره الزلم صارت .. طگ مهرته وغارت
والحومه فحطانه

الله اكبر . زم رايتة الگمر
الله اكبر . ميثني لو صطر
الله اكبر . قد جائهم خطر
السلام على ساقي عطاشى كربلاء
،،،،،،،،،،،،،،،،،،،،،،،،،،،،،،،،،،،،،
طب ليها طب ليها ..  عاليها واطيها
حي الله جفينه
جر النهر بيده  ..  وماعبرته الصيده
وخازرهم بعينه
صطراته معروفه .. ويشمره للكوفه
ليصطره بيمينه

الله اكبر . نفس العده نحبس
الله اكبر . حته الهوى نخلس
الله اكبر . طگ رگبت الفرس
السلام على ساقي عطاشى كربلاء
،،،،،،،،،،،،،،،،،،،،،،،،،،،،،،،،،،،،،
يرعب بالملاگه .. داس النهر راگه
وتمايل بطوله
حيل والله وي حيله .. صاعد على كحيله
وبيهم لعب جوله
مايهتم ابهايه   ..  ذل النهر مايه
وكاسرها الفحوله

الله اكبر . شيكضه من يهد
الله اكبر . فات وحصد حصد
الله اكبر . بكل فزعه مستعد
السلام على ساقي عطاشى كربلاء
العبد ابوفايز الرافضي

الناشر احمد الفاطمي

16 June 2026 13:36

( استقبال محرم)
ابمأتمك حزني سيدي وني. عليك
جروحك جروحي قدمت روحي بديك
انه كل عاشور عمري الك منذور
بديك
.......................................
فتشت عيني ولگيته طفك بلچماته صاير
مالي حظ بطفك ارجع وحيرة المكثور حاير
تدري يانار بدليلي جنهه نيران الحراير
ساعة المحد حماها. وخذت خدرها العشاير

شطفي بدموعي وكسرة بظلوعي ومصاب
اه يلوعاتي. جنهه حسراتي. الرباب
هالگلب مجمور عمري الك منذور
بديك
...................................
ماجنت وسفه بطفوفك ولالي من راية شلتهه
ومافديت بروحي روحك وليلة الطف ماشفتهه
ولالذت بالسيف عنك اوگفت انصارك عشتهه
وطعنه مابيه جسمي صاحي يالطفوفك خظبتهه

لاجن وجرحك بالگلب ذبحك يطوف
ليتني احجيهه ودمعتي ابچيهه بطفوف
جمره بيه تفور عمري الك منذور
بديك
......................................
لاني جون ولاني عابس يلي نيتي تدري بيهه
حرگت انصارك حرگتي يشهد العاشر عليهه
يادمع يطفي حسرتي وكربله تأخذني اديهه
ونظرك عالغبره طايح ولالي من حيله ارتجيهه

شفاك من انظر بيه احس ينحر ظماك
حيل يبسانه. العطش بيه انه. الخذاك
بالگلب مفطور عمري الك منذور
بديك
.................................
مالي بس دمعات عيني وكل شي عندك يالنطيته
ابچي من حرگت دليلي مو ثواب انه ارتجيته
ودمعي مابلل لحيتي بدم يمن خضبوا لحيته
بالعطش حزو وريدك ولو يبس ريجي رويته

بالعطش نروه الصبر عل بلوه تگول
ياأمل عمري بصدرك وصدري الخيول
چم ظلع مكسور عمري الك منذور
بديك
..........................................
الله لا يحرمني منك وجمرتك ماتطفه بيه
كل عزه منصوب اروحن محرمك لو هل عليه
خادم الخدامك ابگه بخدمتك يبن الزچيه
عيوني ماتندل دخيلك الزم ابيديك اديه

بعالم التكوين فدوه لك يحسين اصيح
من ذرى الاصلاب تدري گلبي شحاب ذبيح
بالعطش منحور عمري الك منذور
بديك
....................................
خادمكم قاسم المالكي

الناشر احمد الفاطمي

17 June 2026 09:07

ها يبو الغيره يسبع الكنطره  
ــــــــــــــــــــــــــــــ
حشمك دمع اليتيم  بعينه . ها يبو الغيره يسبع الكنطره
صاحت بصوت الفجيعه اسكينه . ها يبو الغيره يسبع الكنطره
ما نريد المــاي بـس رد لينه..... ها يبو الغيره يسبع الكنطره
هاي خيل اعداك اجت تسبينه..... ها يبو الغيره يسبع الكنطره
هذا ابوي اعلى الثره مسلبينه..... ها يبو الغيره يسبع الكنطره
  كــوم شيل العـلم ياوالينه ..... ها يبو الغيره يسبع الكنطره
بالخيم نيران ضلت موجره.
ها يبو الغيره يسبع الكنطره
ــــــــــــــــــــــــــــــ
كوم شوف اختك غريبه اشحالها    
تنــسبي بلياك يا كفالها
فرت امن الرعب خوف اطفالها     
مغيم بضيم وحزن دلالها
 بعـد عينك لا اخو اليبرالها          
اليوم مـحتاره وتلم بعيالها
كون يالعباس تعلم بالجره
ها يبو الغيره يسبع الكنطره
ــــــــــــــــــــــــــــــ
عالمصايب زينب الله ايعينها       
بعـد ذبح الاهـل وامسلبينها
ندارت الصوب الشريعه بعينها    
يبو فاضل زينب امجـتفينـها
تطب سوك الشام وينه اوينها     
عالترب مذبوح ضل احسينها
باليتامه اتروح اختك حايره.
ها يبو الغيره يسبع الكنطره
ــــــــــــــــــــــــــــــ
جم ظهر عباس فكدك كاسر      
صار وحده احسين يطلب ناصر          
ضل غريب ابكربله ومتحاصر     
العسكر اعلى خيام زينب داير   
اليوم صار بزينب الما صاير         
فوك صدر حسين يسحك حافر
صاحت ابحسره الزجيه الطاهره
ها يبو الغيره يسبع الكنطره
ــــــــــــــــــــــــــــــ
ياخو زينب كوم شيل الرايه           
ما نريد الجــود علكم مايه
هذا الاكبر جثته امـدمايه          
جفوف جاسم بالدمه امحنايه
هاي خيل اعداك اجت عنايه        
تدري نسوانك سبوه اسبايه
عالتراب احسين حزو منحره 
ها يبو الغيره يسبع الكنطره
ــــــــــــــــــــــــــــ
راحت اعيالك سبايه بحيره        
ناس ما عــدهم كرامه وغيره
تدري كل يوم وتطب ابديره       
والنضر صوب الشريعه اتديره
دمع يجري وبالحزن تفسيره        
هذا ضعنه اشلون يمشي بغيره
مادره العباس  بيهم مادره .
ها يبو الغيره يسبع الكنطره
ـــــــــــــــــــــــــــــ
تصيح زينب خويه يا كفالي       
يا عزيزي الما دريت بحالي
كبل ياهو الي يشوف اخيالي      
تدري ياخويه الشمر يبرالي       
بعـدك انه اتكفلت بعيالي
هاي ما جانت تمر ابالي
اطب ديوان الزلم متحيره
ها يبو الغيره يسبع الكنطره
ـــــــــــــــــــــــــــــــ
زينب انه امخدره ايسموني        
اليوم مسبيه الغرب شافوني
خويه من يم مصرعك جابوني    
كبال عينك خويه ويشتموني
بعد عينك انطك اعلى اعيوني   
 وانتخي بخـواني ما سمعوني
وانته جثتك عالشريعه امطبره
ها يبو الغيره يسبع الكنطره
ــــــــــــــــــــ
عفتك اعلى النهر كلبك ضامي    
وانه اروح امجتفه اوي ايتامي
شلون اخلي احسين نحره الدامي     
تحرك الدلال نار اخيامي
واطب ديوان الرجس بآلامي        
بالطشت راس الولي كدامي
يضرب الراس اللقيط بمقصره
ها يبو الغيره يسبع الكنطره
ـــــــــــــــــــــــــــــــــ
ابو باقر الساعدي

الناشر احمد الفاطمي

17 June 2026 09:07

من يهل شهر المصايب
كمت ادور با المواكب
تحضر ابمجلس لطم
بلكي اشوفنك يغايب
ــــــــــــــــــــــــــ
للمجالس رايح وبدموعي اهدي
والجفن ضل يمطر اجروح على خدي
عيني عا اللطامه من ادخل يا مهدي
بلكي اشوفك تلطم و تصرخ يجدي
با اللطم عندك علامة
من تجي اتذب العمامة
تبجي حيلك منهدم
بلكي اشوفنك يا غايب
ــــــــــــــــــــــــــ
صاحن ادموعي التصب يا المهدي وينك
ادري ما استاهل اتباوعني عينك
عايش اويه الغربه ما يخلص ونينك
عا المصايب سيدي الله يعينك
فدوه يا الروحك حنينة
سيدي عينك علينة
راضي لو حتى بحلم
بلكي اشوفنك يغايب
ـــــــــــــــــــــــــــ
لو لبست اجروحي و المجلس وصلته
كمت اراقب ياهو فوك الخد دمعته
ادري بيه المهدي تتميز لطمته
بحركة يلطم عا الظلع مسبيه عمته
لطمته وياها شهكه
وتنزل بدمعاته حركه
ابقى اعاين على الزلم
بلكي اشوفنك يغايب
ــــــــــــــــــــــــــ
حتى بجيك يختلف و الدمعه حمره
تبجي دم يا المهدي عا المرضوض صدره
و ادري موكل مجلس انفاسك تحضره
يا بوصالح بس ردت ها الليلة نظره
بداعت الراحت سبيه
سيدي اتصدق عليه
مره لو عطرك اشم
بلكي اشوفنك يغايب
ــــــــــــــــــــــــــ
يلي خلصت العمر باالغربة وحدك
الدنيه كلهه تحولت مكلوبه ضدك
ياهو حاضر مجلس بها الليله عندك
يمكن الوحدك كمت تبجي على جدك
ياهو يقرالك مصيبه
و ينعى يزينب غريبه
تطلع بليلي نجم
بلكي اشوفنك يغايب
ــــــــــــــــــــــــــ
آنه ادري الدنيا عنك باعدتني
عفتك انه وانته ما ساعه عفتني
ذوبي يالمهدي شفتها وخجلتني
بالعسر انخاك انته وخلصتني
ما سكت بعدك ونيني
بلكي تسمعني وتجيني
اجروحي متطشره وشالم
بلكي اشوفنك يغايب
ــــــــــــــــــــــــ
يلي دومك مبتلي بيه انته بلوه
من اروح الدمعتك سبعين فدوه
انه بيكم جلبت يالمهدي كوه
الدنيه لوما انته ما شوفنها تسوه
ابداعة المرضوض صدره
سائل ابابك انظره
عمر ي يمك ينختم
بلكي اشوفنك يغايب
ـــــــــــــــــــــــــــــــــ
نعيم ابو باقر الساعدي

الناشر احمد الفاطمي

17 June 2026 09:01

كبرتني بعزائك  ونسترت بردائك
وانه اطلب دعائك   يا حسين
::::
انت العريان وساترني يا قابل بالحر اقلبني
بسجل الخدام تسجلني ممنونك يا مولاي
اول عطشان وساقيني  وحدي اعرف لا متخليني
انه شما اطلب تنطيني  ممنونك يا مولاي
لا شفتك بعيوني لا عشت وياك
لكن كلما ادعي يم گلبي الگاك
روحي بأكملها انساها وما انساك
ما عيش انه بلياك
انت حبك حياني  انت مالك كياني
عالي ويظل ندائك  يا حسين
:::::
اول مذبوح وذابحني  انه اعرف مولاي يحبني
حلوه الخدمه من اتعبني  يالتعبك راحة بال
عزبت بضلعك للحافر    كل هاي وتبچي اعله الكافر
مولاي دخيلك من باچر   يالتعبك راحة بال
ماكو مثلك عــــــــزب للخيل ضلوع
صوت ضلوعك يم خيامك مسموع
اول موجوع ويشافي علة موجوع
بالخيمه احرگني شموع
شذره وبلا محابس   عايش اعله المجالس
واعله زينب بكائك  يا حسين
:::::
يا واهب فطرس جنحانه  انه بلا مجلس مو انه
باللوحه شفافك ذبلانه  من يرسمك رسام
خادم جبريل يهز مهدك  محد يا مولاي بگدك
ليش مثلث صايب جبدك  من يرسمك رسام
ليش الرسام من يرسمك مجــــروح
كون من يرسمك عايش مو مذبوح
يرسمك مصيوب سهام ولو مطروح
يمك احچي المسموح
حتى باللوحة ضامي   انت مسكي وختامي
انحني يم رثائك  يا حسين
:::::
الحب يم بابك لا مو ذله   الخير انت وصلا انت اهله
ما حب غيرك هاي العدله  دلالي يريد حسين
تنطيني زياده شما اطلب  بگلب الضیف یعرفه معزب
من تثگل بأسمك انه اندب دلالي يريد حسين
انه بابك مديت ايدي ومكروب
وبجاهك يم الباري اطيح ذنوب
يا ساتر هاي الوادم بس مسلوب
ماكو غيرك محبوب
انت حبك حقيقي  انت نور بطريقي
نجم عالي بسمائك  يا حسين
:::::
جون اسود يملك گلب ابیض  الحب عالفطره ولا مو عالحض
حسين وحبك ما يتعوض  اليخسر حبك غلطان
انت القابل بالنصراني   وانت الحبيت الهمداني
انه اخسر لمن تنساني  اليخسر حبك غلطان
كون اسمي بسجل الخدام مسجل
يوميــــــه بابك مــــــولاي اتوسل
أعمى وعالفطره بدربك انه اندل
شكرآ لمن تقبل
انه عندي الخدامه  سند يوم القيامه
عايش انه بعطائك   يا حسين
:::::
علي جبار الكعبي
الفاتحه لوالدي

الناشر احمد الفاطمي

17 June 2026 08:58

ادخلــــــوهـــــا بســــــلام آمنيــــن
ان شاء الله الخدام مـــــن الفايزين
:::::
(١)
ادخل المجلس وخل عينك جريه
حاضره بالمجلس الزهره الزجيه
خلي عينك تبچي عالراحت سبيه
گلها یا ام الحسن عینچ علیه
بدفتر ام حسين احنه مسجلين
:::::
(٢)
قسم ما عوف المجالس بيها حاضر
اعليچ زینب اسمي سجلي بالدفاتر
ساعتي بالگبر صعبه شلــــــون باچر
ساعه الطم ساعه اخدم ساعه ناشر
احنه نصرخ كلنه عشاق الحسين
:::::
(٣)
ساعه اوزع ماي ساعه احضر عزاء
ابد مــــــا ينقطــــع يحسين النداء
والله نص اگلوبنه اسمچ کــــــربلاء
انكتب مــــولاي اسمك بالسماء
انت یا مولاي امان الخائفين
:::::
(٤)
منــــي اتقبل دخيلك بالقليل
وگفتك رايدها لــــو باچر تميل
انه امقصـــر وتنطيني الجميل
ادري ما تنساني حاشه ومستحيل
بدرب الحسين احنه نمشي وسائرين
:::::
(٥)
يا إلهي الكـــــون حقق طلبتي
كون اريد العمر كلــــه بخدمتي
انت قاضيها الحوائــِج حاجتي
بالحسين اتوسلك وبدمعتــي
يا إلهي بجاه امير المؤمنين
:::::
علي جبار الكعبي
الفاتحه لوالدي

الناشر احمد الفاطمي

17 June 2026 04:25

ثگيل ، وداع العيال للإمام الحُسين (عليه السلام) قبل رحلة السبي..

...
مودعينك مو بدينة
و انفرض بُعدك علينة


..............

هاية اول مرة تجبرنا المصايب
نبچي كلمن وحده بوكت النوايب
آخر وداع و نعوفك عالترايب
و چنهة من فيّك نروح اعلى الخرايب

رايحين بمستحانة
و عالاقل راسك ويانة



.................

من الدَلال لدرب ما نعرف مصيره
من فيايك نمشي للصحرة الچبيرة
جمرة من موگد تطيح اعلى الحصيرة
هيچ ياخذنة البچي بطول المسيرة

بهالوضع ما عدنا حيلة
و البچي اضعف وسيلة


......................

منك شما نبتعد يصعب رجانة
رحنة بس گلوبنة ظَلَّت ورانة
اليگعد بفَيّ غُربة يستاحش مكانه
يرف فوگانة لِوة بَس مو لوانة

ذني ما مرن علينة
كل جرح مستغربينة

.........................

الغربة مو بس لليعوف اهله و عزوته
الغربة لليمشي بضعن چتال اخوته
ينتچي اعلى ادموعه من يفگد تچوته
يسكت الما ينسمع بالغربة صوته

ساتر الله من اليجينة
و انفرض بعدك علينة

الناشر احمد الفاطمي

17 June 2026 04:25

سماعي ، عشق لِسيد الشهداء (عليه السلام)



غافي النِده
غُبشة اعلى گبَّة سَيّده
و اتعنّى گلبي لوحده
و اتعنى گلبي لوحده

زار الحَنان
و اترجّة من شِباجة امان
و راد ويَ ضعنه شما حِده
و اتعنى گلبي لوحده


ظل يشكي همّه
ارتاح يمه ... و بجاه

مِن مَد جفوفه
لجَف رؤوفه ... خذاه

هاية زلّاتي الاخيرة ..
التوبة اذا منك جفيت

جَم وعد لعيونه منطي
و جَم أخيره و ما وفيت

جَم مرة اگلله الأخيرة
و كل مرة يتلگاني ديرة
يلمني بحضن شيخ العَشيرة
و اردود عنّه وجهي اديره

...........

عِفت الشَمس
و غير النَدم ما صرت احس
شيرجعه گلبي لحزن امِس
شيرجعه گلبي لحزن امس

نادم و اريد
ارجع و احبن من جديد
شما تأمر اعصيها النَفس
شيرجعه گلبي الحزن امس


حَلمان جَني
الموت اخذني .. بعيد

هنا نسيتك
ما تنيتك .. وحيد

و فجأة نورك ضوّة گبري
و اسمعت منك سلام

و گتلي ما اعوفك يخادم
ما استاهل هالمقام

فزيت من حلمي بدموعي
خنگة و جوانين بضلوعي
و گلت شوكت اعلن خضوعي
و يبدي بصلاة الحب خشوعي

..............

شما ضيعت
دليني و شما قصرت
كض بيدي لو عنك روحت
كض بيدي لو عنك رحت

يا سيدي
منذور الك من مولدي
بمجلس عزاك انا اكبرت
كض بيدي لو عنك رحت

عُمري كله
وياك خَلّه .. نذُر

تروح وادم
و ابقه خادم .. عمر

يا حبيبي بلا عزاءك
جَني ماي اعلى الرمل

انشف و تحييني عينك
و ارجع لحرگة گبل


يا باب رزقي و رزقي دمعة
گلبي الي ما يهواك اشلعه
تتشاوف بكل ماي لَمعة
حزنك جديد شما اسمعه

..........

خير المَله
الناس بحماك مدللة
بالما يحبك لا هلا
بالما يحبك لا هلا

ما ينترس
كلمن بِعَد عنك احس
الما بيه عطر من كربله
بالما يحبك لا هلا


مأسور وانعى
والگاك دمعة .. حسين

بدموع عيني
اكمال ديني .. أنين

وانجرحلك وانتَ ضامي
والعطش سر الدمع

سيدي ولوعة مصابك
تكبر شما تنسمع

ياعذب ومعطشين شفتك
وتستنقذ گلوب بخدمتك
واوسع من الدنيا رحمتك
صورة شمس بالماي گبتك

.............


يا كل شي الي
مولا و حَبيبي الأولي
حُبَك مُلِك يا ابو عَلي
حُبَك مُلِك يا ابو علي

آخر عَهد
منّه و بعد ما احب أَحَد
و گلبي بحبيبه يمتلي
حُبَك مُلِ يا ابو علي


انتَ خيري
يا مَصيري .. عَليك

اندار حِزني
ليك اخذني .. باديك

رايد تكمّل وجودي
انتَ يا سر الوجود

سِن بلوغي اليبدي يمك
يُعتبر سِن الخلود

إنطيني حُب و اخذ التريده
تگدر و عنك مو بعيدة
انتَ البدايات الجديدة
و انتَ النهايات السَعيدة

....

مُحَمَّد عَقيل ألبو حَمَد

الناشر احمد الفاطمي

17 June 2026 04:25

مُوشَّح ، (مِن الخيال) السيّدة زينب (ع) نادِبَةً الحُسين (ع)
.
.
الحومة دَمّك صاير الها خضابها
و ما أَميّز جِسمك من ترابها
......

الحومة ضاگت و النفس رايد له حيل
و يدوَن براسي البچي و صوت الصهيل
و انا اجيتك راكضة و الدنيا ليل
و النجوم تكشخت بنگابها
........

گمت ادور جِثتَك و ما حاصلة
و اوصلت لك ، ريتني ما واصلة
بجسمك مسوية الحوافر باطلة
و امضة من السيف چان صوابها
.......

عيني يمك وشلت شوف و دمع
شلون يتهنّة اليشوفك تنوجِع؟
من شوكت صارت الاصابع تنّزِع؟
گلوب اخذها الحقد مدري شصابها
...........

استسلمت من صار الملاگة بفگد
واحد يسولف و الآخر ما يرد
ربِّ إن كانت لمرضاكَ فَزِد
ربِّ صَبِّر زينب اعلى مصابها

.....

محمد عقيل البوحمد

الناشر احمد الفاطمي

17 June 2026 00:59

""ام البنين وصاحب الزمان 'على لحن ياصبح مابيه ضوه لمحمد الخاقاني""

انه ياأم الاربعه
المهدي هل اجيتج لگيتچ لچمه
احچي عن موادعه
وحجي الج غربته وذبحته ودمه
وداع حنانج احجيه احجيه
الصار ييمه سمعيه سمعيه
""""""""""""""""""""""""""""""""
لبقيعج جيتج بدمعي
وحزنج رايد استمعه.
من ودعتي جدي حسين
ودمعج هل گبل دمعه.
شگلج ونتي ضليتي
شضنج بالسفر رجعه

ماتدري باليسافر ماينعرف خبر
جيتج وريد اسمعج بموادع السفر
وصيتي لابد انتي على حسينج الگمر

شگلتي ياأم الوفه
لعمي ويخوته بمروته وزوده
شمحله بالطف موقفه
عينه قدماها ونطاها زنوده
حسين تفده طاريه طاريه
الصار ييمه سمعيه سمعيه
______
هله بجيتك يبعد امك
انه الطاريكم اشتاگيت
يجنك ريحة حسيني
ال محليه هذاك البيت
اسولفلك جرح هجره
جهز حين الضعن صديت

صحت انه يابوفاضل وين اخوتك صحت
لمن اجوني كلهم يبنيني حشمت
لبن الزجيه فدوه بوصيتي گلت

هاي يعباس شگلت
گتله يمه اريدك لعضيدك تچوه
حزامه بيك اسمع ردت
لوگفتك اناطر تسافر خوه
بروح لاتخبل افديه افديه
الصار ييمه سمعيه سمعيه
.....................................
عگب ماخلصت وصيتي
لنهه تباوع عيونه
بس صوبه اله تدنيت
نزل من فوگ ميمونه
نده مشكوره يايمه
ودمعته بطارف اجفونه

عالعشره ياوفيه يشهدلج الزمن
وياكم صحت ييمه خليني بالضعن
بحسراته گلي ضلي يايمه بالوطن

عدها يالمهدي ورحل
منها وانه اتاني لجواني بناره
ياهو يطرش ماوصل
ولخبر يجيبه لغريبه بداره
بنار دليلي اتانيه اتانيه
الصار ييمه سمعيه سمعيه
....................................
رد ويگلها ماشفتي
ييمه مصايب الصارت
كلما غمظت انظر
جفوف أعلى النهر طاحت
وجربه تبده منها الماي
وعين من السهم راحت

يايمه هذا عمي وحسين اله حضر
يگله يخويه وسفه طايح عله النهر
ولوحدي ارد يخويه والكسرة بالظهر

بلا اخو رد للخيم
وكسرته شكبرها وصعبها بدمعه
وينه يسمع بالحرم
وزينب شيگلها الجفلها مودعه
حيل عضيده مابيه مابيه
الصار ييمه سمعيه سمعيه
.................................
وگف عصرية العاشر
مابين العده الوحده
يجمع حيله مايگدر
وهو ياحيل ضل عده
عدها اعتاز اخو يرجع
بس عباس شيرده

سيوف ونبل اجته وگلبه العطش فطر
تجه على سيفه حيله عل حمله ماگدر
عدها اجه بجبينه بيه عسه الحجر

وطاح عدها أعلى الثره
جروحه من خذته ولته العشره
الاعوجيه محضره
ظلوعه رضرضتهه حفرتهه بصدره
خيول ييمه تلفيه تلفيه
الصار ييمه سمعيه سمعيه
......................................
بگه فوگ الرمل مرمي
بعد بيه روحه ماطلعت
يصد بعينه المخيم
ومره عله التل نظر وگفت
تنادي لو عدل يحسين
الخيل من الخيم گربت

حشمتها من سمعها وذاك الخدر طلع
لم حيله حتى يوگف ويما وگف وگع
من عدها وعلى ذبحه ذباحه من سرع

حزله نحره من الظهر
خضب بوريده الصعيده بدمه
والعده منها وگدر
بناره يوصللها وشعلها خيمه
نار خيامه تاذيه تاذيه
الصار ييمه سمعيه سمعيه
......................................
اجه الليل أعلى عماتي
ولاخيمه لبگت ليهن
عگب عباس من شافن
العده بالماي ترويهن
ياوحده تظوگ الماي
ومنه نحرم واليهن

حسين گطعو رگبته وماضايگ العذب
تتروه ياهي ترضه وتتهنه بالشرب
وفوگ الرمل وليهن من هدمه منسلب

يم البنين وبگت
عمتي والحرايم بظلايم تنعه
بالدمع ماهودت
زينب أعله اهلها وتگلها الفزعه
وين وجهنه ننطيه ننطيه
الصار ييمه سمعيه سمعيه
.....................................
خادمكم قاسم المالكي

الناشر احمد الفاطمي

16 June 2026 23:28

يالمشيت ابعيد ريض اضعونك
گلبي من هسة ويحن لعيونك
........................................
حال الابنيه الابوهه امسافر
عينهه اعله الباب تبقه اتناطر
يلي عمرك ما امخشن الخاطر
بويه من هسه واهم الباچر

اشلون راح العمر يگضي بدونك
...........................................
راح اضل وگفه اعله عتبة بابي
حيل ماكو لچن حر اصوابي
حسين گلي ما يطول اغيابي
وبعد يلتم الشمل بحبابي

تحجي سكته وتبجي اليسمعونك
.............................................
التروح اهله اشيصبح يومه
روحي چنهه ابنص جرح ملچومه
هم مرض وافراگك اومهضومه
والي يفگد ما يعاشر نومه

الي اتدير اشما هلي ايحاچونك
.............................................
هسه يمي انته واحس مشتاگه
ونار دمعي ايطيح من افراگه
ليش من اجفوفي دهري الباگه
وياحنيني اعليه ايتعب الناگه

طحت من گدما اصيحن هونك
..............................................
ممشه اوح وما اثگل اعليهه
الناگه تتعب ابد ما اخليهه
خوفي هالسفره الهضم تاليهه
والعليله المرض يوجر بيهه

وادري بالضيم العده اينطرونك
................................................
الموت من الفرگه بويه اشوالي
وضيم من الطف يصير اگبالي
ايروح منك كل عزيز وغالي
اخلافكم يبچي اليصد الحالي

ومن صداق الزهره ما يروونك

خادم اهل البيت علي الزرگاني

الناشر احمد الفاطمي

16 June 2026 22:25

يا شهر الضمه
يمبچي السمه
من يومك يمر
تشهگ فاطمه
......................
أجه شهر المحرم ناشر أحزانه
وقميص حسين راح نحسه فوگانه
تحمله الطاهره وهل تبچي ويانه
ملطخ بل دمه ومتغييره ألوانه

ينزف بل حزن
چن دمه يون
كل كطرة دمه
تشهگ فاطمه
................
بمخيلتي قميص حسين أشوفنه
الحوافر منخل من الدوس سونه
يعبرات العيون التصرخ بونه
نياشين السيوف جروح ترسنه

ثوب ومنطرح
بي دم الذبح
راسم ملحمه
تشهگ فاطمه
..................
شهر جروحي واجب أسهر بليلي
وانه براسي مشاهد تهدم بحيلي
أبن بنت النبي مسلوب يا ويلي
شفت منضر قميصه كلشي يحچيلي

طوفان الدمع
كلما أنفجع
نوايب مؤلمه
تشهگ فاطمه
..............
يا شهر العطش بأحزانك أتأسر
بهلالك أشوف بگلبي واتصور
شفته ذابله وضامي أبو الأكبر
وأحس ماي الفرات بخوفه يتبخر

يا ماي الفله
تعطش عايله
بل بر هايمه
تشهگ فاطمه
............................
مواساتي يشهر المنگطع نحره
أقدمهه هديه الفاطمه الزهره
بلكت من گلبهه أطفي لو جمره
مفجوعه عله بنهه الما لگت صدره

كل يوم الجزه
تسويله عزه
عل خد لاطمه
تشهگ فاطمه .

///////////////////////////////////////
أللهم عجل لوليك الفرج .
ذو الفقار حيدر

الناشر احمد الفاطمي

16 June 2026 22:25

ايام الله .. ومن يعظم الشعائر
بل صل الله .. على الصدورِ والمناحر
صل الله عله خيام .. زينب
**

فتحو البيوت ورفعو رايات
عاشور اجاكم شبعو حسرات
ايام زينب ذني وحسين
ايااام المناحر والسبيات

الضلن ايام .. وتطيح خيام .. وترد اردود حسرات الشام
من حسين يطيح ..لخيام تطيح .. وترد ام عون تجمع ايتام


لـ كل بيت بي مجلس عزه شكرا جزيلا وديت
و لمخلي رايه ابـــــمنزله الف أنعم الله خلـيت
البيت الي بي طاري الحزن بحفظي وأماني هالبيت



ابني الينعااااه .. شكرا اكَله باجر
ايااام الله .. ومن يعظم الشعائر


=======================
ياهو ابمــــــحرم ينـــــعه وياااي
بثواااب الحسين يوزع الماااي
ياهو التغير وجهه الشموووس
وباجر اصير عليه انه فيااي


اليبجي عله حسين .. يطلبني بدين .. باجر والله اوكفله هواي
اليجري الدمعات .. باجر لو مااات .. لقبره اتعانه من الكوثر ماي


اليلبس اسود من صدك وجهه ابيض كَبالي يصير
لو طاست اميه بذل حاااشاه من اي تقصير
اليذكر حسين ابدمعته من عندي آمانه وليحير

اوكف وياه .. ودوم بدعائي حاضر
ايااام الله .. ومن يعظم الشعائر

=======================

ايام الحســـين اوليدي جاااايات
كثرو السواد ويه العزيااااات
مكَــــسور كلبي لنحر الحسين
جم ليله نحره عله الرمح باااات


بصوتي المجروح ..انعي المذبوح..من الشمر يحز نحر العطشان

انه ام حسين .. وابجي اخت حسين.. تفتر ع النوك هواي أوطان



مسبيه صار اسم الشرف والماي اسمه العطشاااان
المنـشاف ضل الها ابد باجر تطب جم ديوان
راس برمح حرمه بسبي يعين الله كَلبي الحيرررران


شجم اه واه .. عشرة ليالي اساهر
ايااام الله .. ومن يعظم الشعائر

===========================


تسعة ليالي وعشرة ايااام
لحد ما اشوفن نار الخياااام
لحسين اوصل واحسب جروح
واحسب شكد ابصدره السهام


من تمشي الخيل .. اتعنه بليل.. عن ابني حسين وخرت حجار
واحسب طعنات .. والكي السحكات.. بصدر المذبوح مخليات آثار



طبرات البنحره اثنعش غير الطعن و السحكات
بس تسع اصابيع البقن بيهن نقص مكطوعاااات
و اني اعرف الآم الضلع شلون الضلوعة مخلصااات؟


اندب ويلاه .. من سحكت الحوافر
ايااام الله .. ومن يعظم الشعائر

=========================

و طلعوها زينب صاحو ابساااع
واني انحنيت وطحت ع الكاااع
حركو خيمها وطلعت ام عووون
وي حسين ع التل صاار الوداع


حسين من تصيح .. لخيام تطيح .. ع التل حسيت كلبي المحروك

من جيت وياااك .. مأمنه بطرواك .. رحت انت وراح ادخل جم سوك


النوگ جابوها ا ومشت وخلف النياگ اني مشيت.
ونحور صعدن ع الرمح واني بحزن من ونيت
يندار لضعونه النحر وك ساعه اني انداريت


صاحت اماه .. وصحت معاج اهاجر
ايااام الله .. ومن يعظم الشعائر

==========================

الحمد لله

الناشر احمد الفاطمي

16 June 2026 15:46

ناحت فاطمه اليله من هل الشهر يومه
ايد اعله الضلع واتصيح يازينب المظلومه
....................................
مضمون الروايه ايگول من شهر الحزن يجبل
من ارض البقيع اتصيح امه والدموع اتهل
آنه امكم واحس بيكم يافگد الولد يكتل
آه يحسين وامصابه من عنده الگلب يجفل

ماهمني الضلع مكسور لجل حسيني مهضومه
..............................................
رفت رايتك هاليوم واوياهه دليلي الرف
وكون اندور الافلاك مايحصل مصاب الطف
گوم اتواصو اعله حسين من صف ويوصي الصف
وآنه ابگبري رفة طير گلبي اعليك من رفرف
ميته وبالگبر واعليك يالمذبوح ملچومه
...........................................
ياكسر الگلب وياي حد الموت مايجبر
طاح ابني وذر بالگاع واعليه داير العسكر
الراحت منه هيج ازلام بيمن گلبه يتصبر
شلمن وين الاگرب ليه جسمه اعله الثره امطشر

وانته ابين خيل وناس تارس جسمك الحومه
..............................................
يازينب حزنهه اشكال ماشايف بشر مثله
هاي امخدرة عباس تصعد ناگه مو سهله
ماتدري الضعن لي وين والناگه المشت هزله
تمشي الجابهه العباس ويه اعداه مو سهله
چان ايحامي عنهه الحيد اخوهه الترهب اعلومه
.......................................
آنه ويالشهر من بان بانت حسرتي بيه
ويكتلي النعي اعله حسين من ايمرني طاريه
هاي الما تصح بعقول زينب تمشي مسبيه
تمشي امحمله بفراگ لحسين وبواچيه
واليبچي وينوح اوياي ياهو اعله البچي ايلومه

خادم اهل البيت علي الزرگاني

الناشر احمد الفاطمي

16 June 2026 15:44

گالو بیمن مجنون  هم حبیت بعمرك
وبمرحلة العشاگ  من صغرك من كبرك
بطن امي واسمع زين   تحچيلي شگد بحسين
گالو بیمن مجنون
:::::
ياهو الحبيته انت بصغرك  بي روحك مسروره
ما جاوبت الي سألوني   بس طلعت الصوره
اندهشو من شافو وجهك  مو انسان اسطوره
حتى الي مثل شخصيتك  هم حبيته بدوره
گتلهم من حبیت  حبیت اعله الفطره
حافظ انه اسم حسين  بس ما اعرف اقره
اقراه مره ومرتين    تحچيلي شگد بحسين
گالو بیمن مجنون
:::::
گالو ما شفناه يوصلك     شلون تفسر هايه
گتلهم موجود بيتي            شايل اسمه براية
گالو شمحصل من عشگك  مغرم لو حب غايه
ما شفته بعمري وما عوفه   منطي حسين احچايه
انه الحبيته يصير  كل الناس تحبه
محبوبي فاتح باب  فاتح ايده وگلبه
وين الگه المثلك وين    تحچيلي شگد بحسين
گالو بیمن مجنون
:::::
گتلهم اسمه بنص گلبي وذكره بدمعة عيني
ينطني وما گال انطیتك  بينه يظل وبيني
محبوبي معشوگ العالم  لا مو بس حسيني
وانه بلا مجلس وقرايه   ما تنفعني سنيني

محبوبك ما موجود  شلون دگول انطاني
گتلهم منه الخير   هــــــو الي سواني
هالحب هذا اصبح دين     تحچيلي شگد بحسين
گالو بیمن مجنون
:::::
انه الشخص الي حبيته   عريان وساترني
چنت صغير بين الوادم  محبوبي الكبرني
محد يحضركم بالبرزخ وحسين اليحضرني
عابس متغير بجنونه وانه الحب غيرني
گتلهم عالمحبوب      داست خیل بصدره
راسه اعله ارماح انشال  حسين وگطعو نحره
جروحك الف وميتين  تحچيلي شگد بحسين
گالو بیمن مجنون
:::::
گتلهم لا ما حب غيره  بهذا الحب ما اگدر
من حبیت حسين هوايه   مو يم قيس اتصدر
علمني حسين انه اتواضع  ما علمني اتكبر
بالدنيا حسين واگفلي  يوگف یوم المحشر
انتم حبيتو انسان   هذا الحب ما ينفع
نص المكتوب يموت  لو ما بي المطلع
تبچیلك هاي العين    تحچيلي شكد بحسين
گالو بیمن مجنون
:::::
علي جبار الكعبي
الفاتحه لوالدي

الناشر احمد الفاطمي

16 June 2026 14:56

#يعينچ_الله_هل_محرم_يم_حسن
هلال المحرم

ايعينج الله هـل محـرّم يـم حسن
امصايب حسيـنـچ يفاطم هلـبدن

======================

ايعينچ الله فاطـمـه هـل الشـهـر
البي اوليدچ دامــي محـزوز النحر
البي اچفوفه اطـيـح عباس الگمر
شـهـر دمعات العقيله بـي جـرن

======================

ايعينچ الله اشلون شفتي ابنچ وحيد
ابلا مـعـيـن حسينچ وناصـر يـريـد
نارها وبسيـوفها احـجـار و حـديـد
كلهن اعله حسـين بالـطـف انرمـن

======================

مجلسـچ يافاطـمـه وحــزنـچ يطول
ودمعچ اعله الرفسن ابصدره الخيول
مثل يوم حسين مــا مــر يلبـتـول
ولا مــثـل حــزنــچ يمر اعله الزمـن

======================

اخيامه شبّـن نـار واعـيـاله انسـبت
اطفاله بين السيـف والحافر گضت
اظلوع مو واحـد اهـناك اتكـسّـرت
ايعينچ الله يالبـتـول اعلــه المـحن

======================

✍️عباس مالك آل عفريت

#جديد_محرم_الحرام_١٤٤٨هـ_٢٠٢٦م
نسألكم الدعاء

الناشر احمد الفاطمي

16 June 2026 12:45

#رد_ليه_الطفل_مذبوح
عبدالله الرضيع /الام تنعى ولدها

رد ليه الطفل مذبـوح من دمّه انترس حضـني
عبد الله شرب مو ماي دم نحــره شـرب أبنـي

============================

رد ابـ أيده جابـه حســين مـذبـوح الطـفل رده
زغير وموش مال أسـهـام أبني الذبــح مو گــدّه
ادموعه ابعينه ابوالسجاد لوليده انمـرد چبده
يـ أم الولد صاح بصـوت انعي اعله الولد انعي

============================

من ايدي خذاك حسين عـبـالي يشـربك مـاي
ما ادري السهـم غـدّار ياخذ منـي تعب ارباي
شيطلبني زمـاني وبيك يفجعني يضـي عيـناي
سهم البـنّـحـر صـابك وسط افّـادي صوبـنـي

============================

عبـد الله نـظـر عـينـي مهدك دافي حـظّـرتـه
صوتك مايجافـي البال لچـن يمه ماهـو أنـتـه
سكته الخيمه من بعدك ودمعاتي جرن سكته
هجــرك يالـولـد چتـال هجرك للنـظـر يعمي

============================

مو مالت سهم يـمـه سـهـمك حار من صابك
اتفز بحرورته وتشيط اتـفـل ابأيـدك اگماطك
ست اشهـور يوليـدي اترد للخـيـمه بخضابك
عبد يمه يلب احشاي سهـمـك حـيل تعـبني

============================

يوم الاسود ومـصـباح عـاشـر ياصِـباح اكـشر
يوم البي چبد لحسين ابـفگــد اولاده يتـفـطر
عبدالله ابمصاب الطف انت من الجـروح اكبر
انت آهاتـنـه وحسرات وانت دموعنه التجري

============================

✍️عباس مالك آل عفريت

#جديد_محرم_الحرام_١٤٤٨هـ_٢٠٢٦م
نسألكم الدعاء